Kaat Lukas 3:1-38
3 I nwii mi nyônôs 15 mi énél i Kaisa Tibériô, i ngéda Pontiô Pilatô a bé ngomin i pes mbok i Yudéa, Hérôdé*+ a bak ñane nkoñ* u Galiléa, manyañ wé Filipô a bak ñane nkoñ i loñ Ituréa ni i Trakôniti, yak Lisania a bak ñane nkoñ u Abiléné,
2 i dilo di ñéga biprisi le Ana ni di Kaifa,+ lipôdôl li Nyambe li lôl Yôhanes+ man Sakaria, i ñoñ.+
3 Ha nyen a bi ke i mbok yosôna i i yé ipañ Yordan, a añlak le bôt ba kôhna sôble kiki yimbne le ba nhiel miñem inyu kôhna nwéhél i bibéba,+
4 kiki i yé ntilga ikété kaat i mpôdôl Yésaya le: “Mut a nlond i ñoñ le: ‘Kôôbana njel i Yéhôva!* Sañlana ki minloñ nwé.+
5 Hiki nsôsôgô u nlama yon, yak hiki hikôa ni hiki homa a nyôgi a yila tegep homa; minkoda mi manjel mi nlama yila sép, yak bahoma ba ngok ba ba nsendlak;
6 yak bôt ba binam bobasôna ba ga* tehe tohi i Nyambe.’”*+
7 I mbus, a bôdôl kal mamut ma ma bé lo i nyeni inyu kôhna sôble le: “A bé bon ba péé, njee a mbéhe bé le ni kee hiun hi nlo ngwéé?+
8 Jon numa matam ma ñunda le ni ntam bibéba binan. Ni bôdôl bañ kalba ikété miñem minan le: ‘Abraham a yé isañ wés.’ Inyule me nkal bé le Nyambe a nla pémhene Abraham bon munu ngok ini.
9 Ni maliga, nkuleñ nunu a niñi i tén bie. Jon hiki e i i num bé matam malam, b’a kit yo, ba leñ yo i hié.”+
10 Ndi mamut ma bé bat nye le: “Kii di nlama ni boñ?”
11 A bé timbhe, a kalak mo le: “I mut a gwé mambot ima* a ti nu a gwé bé, yak nu a gwé yom i je a boñ nlélém.”+
12 Yak bakottas ba lo i sôblana,+ ba bat nye le: “A Lét, kii di nlama boñ?”
13 A kal bo le: “Ni tamb bañ mut tas iloo kiki ni kôli tamb.”+
14 Yak bôt ba bé boñ bôlô i sônda ba bé bat nye le: “Kii di nlama boñ?” A bé timbhe bo le: “Ni tééñga* bañ mut nye ki nye, to ôm mut nye ki nye nsohi u bitembee,+ ndi kona maséé ni nsaa nan.”*
15 Ndi bôt ba bé bem Kristô, bobasôna ba hegek pék, ba badbaga i miñem nwap inyu Yôhanes le: “Le nye bé nyen a yé Kristô?”+
16 Yôhanes a bi ti ndimbhe, a kal bôt bobasôna le: “Me, me nsôble bé ni malép, ndi nu a nloo me ngui a yé i lo, me kôli bé to hohol minkai mi bitamb gwé.+ A’ sôble bé ni mbuu mpubi, yak ni hié.+
17 Soble ba mpébél* i yé nye i woo inyu tibil yaga pubus homa wé litidil, ni inyu tééda blé ikété ndugi yé, ndi a’ ligis bikôgôô ikété hié hi hi nlém bé.”
18 A bi ti ki ngandak maéba mape, a kônde ki añle bôt ñañ nlam.
19 Ndi Yôhanes a bi kodol ñane nkoñ le Hérôdé inyu Hérôdia, nwaa maasañ, ni inyu bibéba bi mam gwobisôna Hérôdé a bi boñ.
20 Jon Hérôdé a bi kônde ki jam lini mu bibéba gwé: A ha Yôhanes i ndap mok.+
21 ndi i ngéda bôt bobasôna ba bi sôblana, yak Yésu a sôblana.+ Kiki a bé soohe, ngii i yibla,+
22 mbuu mpubi u sôs i ngii yé, u nen-ge kiki hibeñ, yak kiñ i lôl i ngii le: “U yé Man wem, man wem nu gwéha, u nlémél me.”+
23 I ngéda Yésu+ a bi bôdôl nson wé, a bééna jam kiki bo 30 ma nwii,+ a bak, kiki bôt ba bé hoñol,man Yôsep,+man Héli,
24 man Matat,man Lévi,man Melki,man Yanai,man Yôsep,
25 man Matatia,man Amôs,man Nahum,man Esli,man Nagai,
26 man Maat,man Matatia,man Siméin,man Yôsék,man Yôda,
27 man Yôhanan,man Résa,man Sôrôbabel,+man Salatiel,+man Néri,
28 man Melki,man Adi,man Kôsam,man Elmadam,man Er,
29 man Yésu,man Éliézer,man Yôrim,man Matat,man Lévi,
30 man Siméôn,man Yuda,man Yôsep,man Yônam,man Éliakim,
31 man Méléa,man Ména,man Matata,man Natan,+man David,+
32 man Yésé,+man Ôbed,+man Bôas,+man Salmôn,+man Naasôn,+
33 man Aminadab,man Arni,man Esrôm,man Péres,+man Yuda,+
34 man Yakôb,+man Isak,+man Abraham,+man Téra,+man Nahor,+
35 man Séruk,+man Ragu,+man Péleg,+man Éber,+man Séla,+
36 man Kainan,man Arpaksad,+man Sém,+man Nôa,+man Lamek,+
37 man Métuséla,+man Énok,man Yared,+man Mahalalel,+man Kainan,+
38 man Énôs,+man Set,+man Adam,+man Nyambe.
Ndoñi
^ Ni hop Grikia, “tétrark.”
^ Hala wee, Hérôdé Antipas. Béñge Ndoñi bibuk.
^ Béñge Ndoñi bibuk.
^ Ni hop Grikia, “minsôn nwominsôna mi ga.”
^ Tole “njel tohi i Nyambe.”
^ Tole “mbot ipe.”
^ Tole “kadal moni.”
^ Tole “mam ni nkôhna.”
^ Ntén sélél ba bé gwélél inyu bagal mis ma blé ni kôgôô yap.
