Yésaya 41:1-29
41 “A biôn, moma nwee, ni emble me;*yak biloñ bi témbna ngui yap.
Bi tiige bebee; bi pot.+
Di kodbaga inyu bikééhene.
2 Njee a bi sébél mut a nlôl i likôl,*+a sébél nye le a loo a ba ngwélél wé,* inyu boñ mam ni telepsép,le ndi a sem biloñ i moo mé,ni le a suhus bikiñe+ isi yé?
Njee a nsand bo kiki minluñ mi biték i bisu bi pansoñ yé,a nsand bo i bisu bi mpihlôñgô wé kiki minumuk mi bikai le mbebi i ntagbana?
3 A noñ bo ngi ndutu yo ki yoi manjel le a bi bôk bé a kil.
4 Njee a bi boñ i jam li, a yônôs ki jo,ibôdôl i bibôdle, a séblak tjai i mbus tjai?
Me Yéhôva, me yé Nu Bisu;+yak ni bôt ba tjai di nsôk, me yé nlélém.”+
5 Biôn bi bi tehe hala, bi kon woñi.
Makas ma hisi ma bôdôl sehla.
Bobasôna ba ntiige bebee, ba nlo ki.
6 Hiki wada a nhôla maasañ,a nkal nye le: “Lédés.”
7 Hala nyen i mut a nsal ni likeñge a nlédés i mut a ñôô bikei;+nu a mbamb kei ni hamaa nlédés nu a yé i sal i bibil bikei.
A nkal inyu nson u sôda bikei le: “U mbôña loñge.”
I mbus, a tômôl i sat i batone le i kwo bañ.
8 “Ndi we a Israel, u yé ngwélél+ wem,a Yakôb, we nu me bi pohol,+mbôda* Abraham, liwanda+ jem,
9 we nu me bi yôñôl i makas ma ’isi,+we nu me bi sébél, u bak minkoñ mi yé haa.
Me kal we le: ‘U yé ngwélél+ wem;me bi pohol we, me bi tjél bé we.+
10 U kon bañ woñi inyule me yé ni we.+
U tôñ bañ inyule me yé Nyambe woñ.+
M’a lédés we; ñ, m’a hôla we,+M’a nit we ni woo wem walôm u telepsép.’
11 I bôt bobasôna ba ñunbene we ba ga kon hison, ba wo ki nyuu.+
I bôt ba njôs we ba ga yila to jam, ba tjiba+ ki.
12 W’a yéñ i bôt ba bé jôs we sañ, ndi w’a tehe ha bé bo;i bôt ba bé jôs we gwét ba ga yila to jam, ba ga ba ha bé.+
13 Inyule me Yéhôva Nyambe woñ, memede nyen me ngwel woo woñ walôm,men me nkal we le: ‘U kon bañ woñi. M’a hôla we.’+
14 U kon bañ woñi a Yakôb,+ we nu u yé kiki nsoñ;*we a litén li Israel, m’a hôla we,” hala nyen Yéhôva, Nkobol+ woñ, Numpubi nu Israel a mpot.
15 “Nun-ki! Me nyilha we kiki kak ba ntidil blé,+kak i mondo ba ntidil blé, i i gwé masoñ ma nhoo ngandak.
W’a nyugut dikôa, u kok ki tjo,w’a yilha ki dikôa dititigi kiki bikôgôô.
16 U ga pep tjo,mbebi i kena tjo;mbuk mbebi a ga sand tjo.
Ndi we, Yéhôva+ a ga boñ le u ba maséé,w’a kadba ki inyu Numpubi nu Israel.+
17 “Minyendek mi bôt ni diyeyeba di nyéñ malép, ndi malép ma ta bé.
Hilémb hiap hi num inyule nyus malép+ i gwé bo.
Me Yéhôva, m’a timbhe+ bo.
Me Nyambe nu Israel, m’a tjôô+ bé bo.
18 M’a boñ le balom ba kulne i dikôa di di yé nnumuk,+me pémhene ki mangen i tegep mbok.+
M’a yilha ñoñ kiki titimbamalép i i yé nyonok ni makai,me yilha yak nnumuk nkoñ mangen ma malép.+
19 M’a bel e sidar i ñoñ,e akasia, e myrte ni e môô.*+
M’a bel e junipa* i tegep ñoñ,lôñni e ashi* ni e+ sipré.
20 Inyu boñ le bôt bobasôna ba tehe, ba yi,ba béñge, ba nok ki lewoo u Yéhôva won u bi boñ i mam ma,ni le Numpubi nu Israel nyen a bi hek+ mo.”
21 “Lona minkaa,” hala nyen Yéhôva a nkal.
“Tina mahoñol manan,” hala nyen Kiñe i Yakôb i mpot.
22 “Boga mbôgi, ni yeelene ki bés i mam ma ga lo.
Kala bés mam ma ngéda kôba,*inyu boñ le di hek pék mu,* di yi ki lelaa ma ga sôk.
Tole añlana bés i mam ma ga lo.+
23 Yeelana bés i mam ma ga bôña i dilo di nlo,inyu boñ le di yi le ni yé banyambe.+
Ñ, boña jam lilam tole libe,le ndi i ngéda di ntehe+ jo, di hel.
24 Nuna-ki! Ni yé to jam,nson nan u yé yañga.+
Hiki mut a mpohol i bégés bé, a yé yom i nyega.+
25 Me bi sébél mut nu a nlôl i ñombok, a ga lo;+mut nu a nlôl i likôl,*+ a ga lôndôl jôl jem.
A ga tidbe baane* kiki ba ntjo ték lima,+kiki mma dibee a ntjo ték lima i i gwé malép.
26 Njee a bi bôk a añal i jam li ibôdôl i bibôdle, inyu boñ le di yi jo,tole ibôdôl ngéda kôba, inyu boñ le di kal le: ‘Maliga+ mon a bi pot’?
To mut a bi bôk bé a legel jo!
To mut a bi bôk bé a añal jo!
Mut to wada a bi nok bé bé ni mpot jam jo ki jo!”+
27 Men me bé mut nu bisu i kal Siôn le: “Béñge, i mam mana mon ma ga bôña!”+
Ni le me ga om ñañal miñañ minlam+ i Yérusalem.
28 Ndi me bi béñge homa nyensôna, me bi tehe bé mut to wada;mut to wada a ta bé ikété yap nu a nla ti maéba.
Me bi waa bé bat bo le ba ti ndimbhe.
29 Nuna-ki! Bobasôna ba yé ndik bieem.*
Minson nwap mi yé to jam.
Bisat gwap bi kei* bi yé yañga,* bi niñ bé.+
Ndoñi
^ Tole “moma nwee i bisu gwem.”
^ Tole “i het hiañgaa hi mpémél.”
^ Ni hop Lôk Héber, “a sébél nye i makôô mé.”
^ Ni hop Lôk Héber, “mbôô.”
^ Hala wee, nu a gwééba bé, a gwé bé to mut a nsôñ nye.
^ I e ini yon ba nsébél ni hop Pulasi le pin.
^ I e ini yon ba nsébél ni hop Pulasi le génévrier.
^ I e ini yon ba nsébél ni hop Pulasi le frêne.
^ Ni hop Lôk Héber, “mam ma bisu.”
^ Tole “di ha ñem mu.”
^ Tole “i homa hiañgaa hi mpémél.”
^ Tole “bakot nkus bakeñi.”
^ Tole “yom i i niñ bé.”
^ Tole “Bisat ba mboñ ni kei le ba nyimbi.”
^ Tole “mbebi.”
