Yésaya 30:1-33
30 Yéhôva a nkal le: “Ngoo ni bon ba ndok,+ba ba ñôô bipék bi bi ta bé bipék gwem,+ba ba mboñ malômbla* ma ma ta bé sômbôl yem,*le ndi ba boñok ndik béba ni béba.
2 Ba nsôs i Égiptô+ ibabé i bat me,+inyu bat Faraô le a sôñ bo,*ni i yéñ lisolbene i Égiptô.
3 Ndi lisolbene yak Faraô li ga yilna bé jam li hison,i yéñ lisolbene i Égiptô li ga wéha bé nyuu.+
4 Inyule baane bé ba yé i Zôan,+balegelnwin bé ba mbol i Hanes.
5 Bobasôna ba ga wo nyuuinyule bôt ba Égiptô ba nla bé bane bo nseñ wo ki wo,ba nla bé hôla bo, to bane bo mahee mo ki mo,ndik hison ni wonyuu.”+
6 Mbagi kogse inyu binuga bi nwelmbok:
ba nlôô i loñ i njiiha ni i mandutu,loñ i mbondo njéé, i mbondo njéé i i nkônd,loñ i péé ni nyoo i i gwé mbôñ i nhoo nola,*ba mbeglene lingwañ jap i ngii magas,yak ni nkus wap i ngii matut ma kamél.
Ndi i mam mana ma ga bane bé bôt ba litén nseñ.
7 Inyule mahôla ma Égiptô ma yé yaga yañga.+
Jon me nsébél nye le: “Rahab,+ nu a mboñ bé yom yo ki yo.”
8 “Nano, kenek, tila bibañga bini i ngii libam i bisu gwap,tila ki gwo i kaat,+le bi bok mbôgi ngéda yosôna,+i dilo di nlo.
9 Inyule ba yé litén li bôt ba ndok,+ bôt ba bitembee,+bon ba ba ngwés bé emble mbén* Yéhôva.+
10 Ba nkal batehemam le: ‘Ni tehna ha bañ,’
ba kalak batehe-biyiinda le: ‘Ni añle ha bañ bés biyiinda bi bi yé maliga.+
Kala bés mam ma ma nlémél* bés, hégdana ki biyiinda bi malôga.+
11 Nyodna i njel ilam; noña njel ipe.
Ni pôdôl ha bañ bés Numpubi nu Israel.’”+
12 Inyu hala nyen Numpubi nu Israel a nkal le:
“Kiki ni ntjél i lipôdôl lini,+ni noñ malôga ni bitembee,ni bôdlak ki gwo ñem,+
13 wee i béba ini i ga yilna bé kiki libap li li yé mbôak,kiki libap likeñi li li nsedep, li bak bebee ni kwo.
Li ga kwo kunda yada le kundum!
14 Li ga bugi kiki hibee hi biték hi mma dibee,hi hi nyugda kayéle pes to yada y’a yégle béle mut a nla yôñôl likalak i juu,tole a nla ébél malép i sesep.”*
15 Inyule Nwet Bayemlikok le Yéhôva, Numpubi nu Israel a nkal le:
“Ibale ni ntémb i meeni, ni yén ki nwee, ha nyen n’a tohlana;ngui nan y’a ba le ni yén nwee, ni bôdôl ki me ñem.”+
Ndi ni bi top bé boñ hala.+
16 Ni bi kal le: “To, di ga bet i ngii bihosi, di ke ngwéé!”
Ñ, ni ga ke yaga ngwéé.
“Di ga bet i ngii bihosi bi bi nhoo!”+
Jon yak i bôt ba ga noñ bé, ba ga hoo ngwéé.+
17 Hikôô hi bôt hi ga sehla i bisu bi mut wada;+bôt batan ba ga boñ le ni kon woñi, ni kahal ke ngwééletee i bôt ba ga yégle i weeni ba yila wengoñle jél li li téé i ngii hikôa,tole kiki kék i i gwé yimbne, i bak i téé i ngii man hikôa.+
18 Ndi Yéhôva a yé i bem* le a bôñôl bé loñge,+a ga telep inyu kon bé ngoo.+
Inyule Yéhôva a yé Nyambe nu telepsép.+
I bôt bobasôna ba nkônde bem nye* ba yé bokimasoda.+
19 I ngéda litén li ga yééne i Siôn, i Yérusalem,+ u ga ee+ ha bé. I ngéda u ga bat nye mahôla, a ga kônôl we ngoo; i ngéda a ga nok ndik kiñ yoñ, a ga timbhe.+
20 To hala kiki Yéhôva a ga boñ le njiiha i ba bret binan, yak ndééñga i ba malép manan,+ Nniiga woñ Nunkeñi a ga solop ha bé, u ga tehe Nniiga woñ Nunkeñi+ ni mis moñ.
21 Ibale i mpam le u nimil, ndi u yoñ njel i nke i pes walôm tole i pes waé,+ maôô moñ ma ga nok kiñ i nlôl i mbus yoñ, i kalak le: “Njel ini.+ Kil mu.”
22 I silba u bi hoo munu biôñgba gwoñ, u ga yilha yo nyega, yak ni gôl u bi hoo munu bisat*+ gwoñ. U ga lep gwo* kiki libadô le muda nu a nkon sôñ a mal gwélél, u kal gwo le: “Mahindi mana!”*+
23 A ga ti nop inyu mbôô yoñ u mbel,+ yak i bijek hisi hi ga ti bi ga ba ngandak,+ bi bak bilam.* I kel i, bémba yoñ i ga jél bikai i mambok makeñi.+
24 Nyaga ni magas bi bi nsal hisi bi ga je kôn le ba mpep ni soble ni soso nwas nu mimpén maa, ba nés ki yo ni kai i i mbai.*
25 I kel ngandak manola, i ngéda minkum mi mandap mi ga kwo ’isi, diléléba ni balom+ bi ga ba i ngii dikôa dikeñi tjodisôna di di nyôgi ni i ngii bon ba dikôa bobasôna.
26 I kel Yéhôva a ga kañ litén jé bandas i homa li bi bugi a mélés ki mambabaa ma ndôm a bi bép bo,+ mapubi ma sôñ ma ga ba kiki mapubi ma hiañgaa; mapubi ma hiañgaa ma ga kônde bai ngélé isaambok,+ mapubi ma kel yada ma ga ba kiki mapubi ma dilo disaambok.
27 Nuna-ki! Yéhôva* a nlôl haa,a nloñ ni hiun, a bak ikété ond i i gwé mbibi.
Bibép gwé bi yé nyonok ni liyot,hilémb hié hi yé kiki hié hi hi nloñ ni ngui.+
28 Mbuu* wé u yé kiki lép u u nhôl ipam i joo,inyu seghe biloñ ikété segesege nu tjiba;*a ga som kei i manyo ma matén kiki hosi+ le ndi a boñ le ba nimil njel.
29 Ndi bé n’a tôp hiémbi hi hi yé kiki hiémbi mut a ntôp ni juui ngéda a nkôôba* ngand,+miñem minan mi ga ba maséé kiki mut nua nke, a hemek hikos*i njel i nke i hikôa hi Yéhôva, Liaa li Israel.+
30 Yéhôva a ga boñ le lipémba li kiñ yé li nôga,+a ga sambal ki woo wé+ inyu bép ikété hiun hikeñi,+ni lindômbôô li hié li li nloñ ni ngui,+ni soso nop,+ ni ôôm nop ni matan-ga.+
31 Inyule Asiria a ga nok kiñ Yéhôva, a kon woñi;+a ga bép nye mboñgo kék.+
32 Hiki ngéda Yéhôva a mba a bép Asiriamboñgo kék inyu kogse nye,bôt ba mba ba nkôt dingoma ni diluñ,+a ga sambal woo wé i jôs bo gwét.+
33 Inyule Tôfet*+ wé a yé nkôôbaga;a yé yak nkôôbaga inyu kiñe.+
A mal koda juu li li yé likeñi, li bak ndip,lôñni ngandak tjéé ni hié hi hi nloñ ni ngui.
Nhébék u Yéhôva u u yé kiki lép u solfa,won u ga kuye Tôfet.
Ndoñi
^ Ni hop Lôk Héber, “ma ta bé ni mbuu wem.”
^ Ni hop Lôk Héber, “ba nkôp sesema i wai,” i nene le ba bé boñ hala inyu unda le bôt ba nôgla.
^ Ni hop Lôk Héber, “i lisolbene li ngui li Faraô.”
^ Tole “nyoo i i nlighana, i puuege.”
^ Tole “biniigana.”
^ Tole “nél.”
^ I nla ki ba, “bee.”
^ Tole “hônba.”
^ Tole “bôdôl nye ñem.”
^ Tole “bisat ba mboñ ni kei le ba nyimbi.”
^ Hala wee, biôñgba ni bisat.
^ I nla ki ba, “u sébél gwo le mahindi.”
^ Ni hop Lôk Héber, “bi ga bana mahoñ, bi yook môô.”
^ I kai ini yon ba nsébél ni hop Pulasi le oseille.
^ Ni hop Lôk Héber, “Jôl li Yéhôva.”
^ Tole “inyu seghe biloñ letee yom yo ki yo i pei bé.”
^ Tole “Nhébék.”
^ Tole “a ntéé nyemede mpubhaga inyu.”
^ Tole “a nke, a nogok mut a nhem hikos.”
^ Munu nlôñ unu, “Tôfet” a yé homa ba nlighene gwom, a yé yimbne i tjiba.
