Yérémia 36:1-32
36 I nwii mi nyônôs mina mi ane i Yéhôyakim+ man Yôsia, kiñe Yuda, Yéhôva a bi pôdôs Yérémia, a kal nye le:
2 “Yoñ nhôôk kaat, u tila bibañga gwobisôna me bi kal we inyu Israel, Yuda+ ni inyu biloñ+ gwobisôna; ibôdôl i kel bisu me bi pôdôs we i dilo di Yôsia, letee ni len.+
3 Bebek le i ngéda bôt ba Yuda ba ga nok bikuu gwobisôna me nsômbôl lona bo, ba ga nwas bilem gwap bibe, kayéle me nwéhél bo maboñok map mabe ni bibéba gwap.”+
4 Ha nyen Yérémia a bi sébél Baruk,+ man Néria, Yérémia a añle nye bibañga gwobisôna Yéhôva a bi pot, Baruk a tila gwo i nhôôk kaat.+
5 I mbus, Yérémia a kal Baruk le: “Me gwé bé kunde i jôp i témpel Yéhôva.
6 Jon we kenek, yoñ nhôôk kaat u bi tila, añ bibañga bi Yéhôva me bi añle we, añ gwo makeñi. Éñél gwo bôt ba litén i témpel Yéhôva, i kel sôga je; éñél gwo bôt ba litén li Yuda bobasôna ba ba nyodi i bitison gwap, ba lo hana.
7 Bebek le Yéhôva a ga nok minyemhe nwap, ni le hiki wada wap a ga nwas bilem gwé bibe; inyule bôt ba litén lini ba ñunbaha Yéhôva ngandak, ba nôgha ki nye liyot.”
8 Baruk, man Néria, a bi boñ i mam momasôna mpôdôl Yérémia a bi kal nye; a bi ke i témpel Yéhôva,+ a añ bibañga bi Yéhôva bi bi bé mu nhôôk kaat.
9 I nwii mi nyônôs mintan u ane i Yéhôyakim+ man Yôsia, kiñe Yuda, i sôñ i nyônôs bôô, i bôt bobasôna ba nyééne i Yérusalem ni bôt bobasôna ba bitison bi Yuda ba ba bi lo i Yérusalem, ba legel le ba nlama sôga je* i bisu bi Yéhôva.+
10 Ha nyen Baruk a bi añ bibañga bi Yérémia bi bi bé ntilga i nhôôk kaat. A bi añ gwo makeñi i témpel Yéhôva, i tuñ* i Gémaria+ man Safan,+ mut matila,* i kotoo i mabeda, i lijubul li nwemel u mondo u témpel Yéhôva.+ Bôt ba litén bobasôna ba bi nok i ngéda a bé añ.
11 Kiki Mikaya, man Gémaria, man Safan, a nok bibañga bi Yéhôva gwobisôna bi bi bé ntilga mu nhôôk kaat,
12 a sôs i ndap* kiñe, a jôp i tuñ i mut matila. Baane* bobasôna ba bé ba yii ha: Élisama+ mut matila, Délaya man Sémaya, Elnatan+ man Akbor,+ Gémaria man Safan, Sédékia man Hanania, ni bana baane bape bobasôna.
13 Mikaya a kal bo mam momasôna a bi nok Baruk a ñañ mu nhôôk kaat i bisu bi bôt ba litén.
14 I mbus, baane bobasôna ba om Yéhudi, man Nétania, man Sélémia, man Kusi, yak Baruk le a kal nye le: “Lona nhôôk kaat u ñañ i bisu bi litén.” Baruk man Néria a yoñ nhôôk kaat, a ke i boma bo.
15 Ba kal nye le: “Soho yén hana, éñél bés kaat ni kiñ ikeñi.” Baruk a éñél bo yo.
16 Kiki ba nok bibañga gwobisôna bi bé mu kaat, ba kon woñi, ba kahal nun-na, ba kal Baruk le: “Di nlama añle kiñe bibañga bini gwobisôna.”
17 Ba bat Baruk le: “Soho kal bés, u mboñ lelaa ndi u tila bibañga bini. Baa Yérémia a podok, ndi u tilga?”
18 Baruk a timbhe bo le: “Nyen a bi añle me bibañga bini gwobisôna, a bé pot, ndi me tilga gwo i nhôôk kaat unu ni tinti.”
19 Baane ba kal Baruk le: “Kena solbana we ni Yérémia, mut to wada a yi bañ hee ni yé.”+
20 I mbus, ba yék nhôôk kaat i tuñ i mut matila le Élisama, ba ke yak kiñe, ba telep i kotoo, ba kal kiñe i mam momasôna ba bi nok.
21 Ha nyen kiñe i bi om Yéhudi+ le a lona nhôôk kaat, a ke a yoñ wo i tuñ i mut matila le Élisama. Yéhudi a bôdôl añ wo i bisu bi kiñe ni baane bobasôna ba ba bé ba téé ipañ kiñe.
22 Hala a bé i sôñ i nyônôs bôô,* kiñe i bé i yii i ndap mbéñ, juu li makalak li loñok i bisu gwé.
23 Hiki ngéda Yéhudi a bé añ bipes baa tole bina, kiñe i nkit i homa kaat nu lôñni ngwende nu mut matila, i leñ nye i hié hi bé loñ i juu li makalak; i bi kit nhôôk kaat hala ndék ni ndék letee i ligis wonsôna i juu li makalak.
24 To kiñe, to bagwélél bé ba ba bi nok bibañga bini ba bi kon bé woñi, ba bi pat bé to mambot map.
25 To hala kiki Elnatan,+ Délaya+ ni Gémaria+ ba bi soohe kiñe le i ligis bañ nhôôk kaat, i bi emble bé bo.
26 Kiñe i bi ti ki oda le Yéraméel man kiñe, Séraya man Azriel, ni Sélémia man Abdéel ba gwel mut matila le Baruk bo mpôdôl Yérémia, ndi Yéhôva a bi sôô bo.+
27 I ngéda kiñe i bi ligis nhôôk kaat u u bééna bibañga Yérémia a bé pot,+ Baruk a tilga; Yéhôva a bi témb a pôdôs Yérémia, a kal nye le:
28 “Yoñ nhôôk kaat umpe, u tila minlélém mi bibañga mi bé mu nhôôk kaat u bisu, u Yéhôyakim kiñe Yuda a bi ligis.+
29 Inyu Yéhôyakim, kiñe Yuda, u nlama pot le: ‘Haana nyen Yéhôva a nkal: “U bi ligis nhôôk kaat, u bat ki le: ‘Inyuki u ntila mu le: “Kiñe Babilôn i ga lo, i tjé i loñ ini, loñ i yégle hôlô, ngi mut binam to nuga?”’+
30 Jon, haana nyen Yéhôva a mpot inyu Yéhôyakim, kiñe Yuda: ‘A ga bana bé mut nu a ga yén i yééne ane i David,+ bôt ba ga nwas mim wé i hiañgaa njamuha ni i lihep li juu.+
31 Me ga kéés nye, mbôda* yé, ni bagwélél bé inyu bibéba gwap; me ga lona ki bo bikuu gwobisôna me bi yis bo le bi ga kwél bo,+ bo ni bôt ba nyééne i Yérusalem, yak ni bôt ba Yuda, inyule ba bi nôgôl bé me.’”’”+
32 I mbus, Yérémia a yoñ nhôôk kaat umpe, a ti wo mut matila le Baruk,+ man Néria. Yérémia a kal nye mam momasôna ma bé ntilga mu nhôôk kaat Yéhôyakim, kiñe Yuda, a bi ligis,+ Baruk a tila mo. A kônde ki ngandak bibañga ipe.
Ndoñi
^ Tole “ba nlama kôôba yén njal.”
^ Tole “kumba.”
^ Tole “nyimbén.”
^ Tole “Bôt ba ngomin ba ndap kiñe.”
^ Tole “yale.”
^ I sôñ ini i mbôdôl i ñem sôñ 11 letee ni i ñem sôñ 12. Béñge Apendis B15.
^ Ni hop Lôk Héber, “mbôô.”
