Yérémia 27:1-22
27 I bibôdle bi ane i Yéhôyakim man Yôsia, kiñe Yuda, i bibañga bini gwon Yéhôva a bi kal Yérémia:
2 “Haana nyen Yéhôva a bi kal me: ‘Boñ minkôô, u boñ ki bikék bi kop nson, u kéhi gwo i joo joñ.
3 I mbus, ômle gwo kiñe Édôm,+ kiñe Môab,+ kiñe Lôk Amôn,+ kiñe Tir+ ni kiñe Sidôn;+ om gwo ni balegelnwin ba ba nlo i Yérusalem inyu tehe Sédékia, kiñe Yuda.
4 Kal bo le ba legel bikiñe gwap i nwin unu:
“‘“Haana nyen Yéhôva nu mintôñ mi gwét, Nyambe nu Israel, a mpot; kala bikiñe binan le:
5 ‘Men me bi hek hisi, bôt ba binam ni binuga bi bi yé hana ’isi lôñni ngui yem; ni woo wem u lipémba, me nti hio tonjee me ngwés+ ti.*
6 Nano, me mal ti ngwélél wem Nébukadnézar,+ kiñe Babilôn, i biloñ bini gwobisôna; me nti yak nye binuga bi bikai le bi gwélél nye.
7 Biloñ gwobisôna bi ga gwélél nye, ni man wé, ni nlal wé letee ngéda i kola le bôt bape ba ane loñ yé.+ Ha nyen ngandak biloñ ni bikiñe bikeñi bi ga yilha nye nkol wap.’+
8 “‘“‘I loñ tole i ane i ga tjél gwélél Nébukadnézar, kiñe Babilôn, i tjél ki lek joo inyu begee kop nson i kiñe Babilôn; m’a kogse i loñ i ni pansoñ,+ ni njal, ni himala,’* hala nyen Yéhôva a mpot, ‘letee me gwélél Nébukadnézar inyu sas gwo.’
9 “‘“‘Jon ni emble bañ bapôdôl banan, to bôt banan ba ba mbo ngambi, to bôt banan ba ba ñemel bieem, to bôt banan ba makañ, to bôt banan ba ba nke liemb, ba ba nkal le: “N’a gwélél bé kiñe Babilôn.”
10 Inyule bitembee gwon ba ñañle bé; ni emble bañ bo tiga le ni ke haa ni loñ nan, me sand bé, ni tjiba ki.
11 “‘“‘Ndi i loñ i ga lek joo inyu begee kop nson i kiñe Babilôn, i gwélél ki nye, me ga boñ le i yégle* mu hisi hié,’ hala nyen Yéhôva a mpot, ‘i sal hio, i yééne ki mu.’”’”
12 Me bi kal Sédékia,+ kiñe Yuda nlélém jam le: “Ibale ni nlek joo inyu begee kop nson i kiñe Babilôn, ni neebe i gwélél ki nye ni bôt bé, n’a niñ.+
13 U nwas bañ le pansoñ,+ ni njal,+ ni himala+ bi nol we ni bôt boñ. Inyule kiki Yéhôva a bi pot, i mam ma mon ma ga pémél i loñ i ga tjél gwélél kiñe Babilôn.
14 Ni emble bañ bipôdôl bi bapôdôl ba ba nkal bé le: ‘N’a gwélél bé kiñe Babilôn,’+ inyule bitembee gwon ba ñañle bé.+
15 “‘Inyule me bi om bé bo,’ hala nyen Yéhôva a mpot, ‘ndi bitembee gwon ba mpot i jôl jem. Ndi ibale ni ñemble bo, m’a sand bé, ni tjiba ki, bé ni bapôdôl banan ba ba nkal bé mam.’”+
16 Me bi kal yak biprisi ni bôt ba litén bobasôna le: “Yéhôva a nkal le: ‘Ni emble bañ bipôdôl bi bapôdôl ba ba nkal le: “Ndék ngéda bisélél bi ndap Yéhôva bi bi yé i Babilôn bi ga témb!”+ Inyule bitembee gwon ba nkal bé.+
17 Ni emble bañ bo. Gwéélana kiñe Babilôn ndi n’a niñ.+ Inyuki i tison ini i nlama tjiba?
18 Ndi ibale ba yé toi bapôdôl, ibale bañga i Yéhôva yon ba mpot, wee ba soohe ni Yéhôva nu mintôñ mi gwét le i bisélél bi bi yégle i ndap Yéhôva, i ndap* kiñe Yuda ni i Yérusalem, bi ke bañ i Babilôn.’
19 “Inyule haana nyen Yéhôva nu mintôñ mi gwét a mpot inyu mél,+ soso pan ba bé sébél le Tuye,*+ bikak,+ ni bisélél bi bi ngi yii munu tison ini,
20 bi Nébukadnézar, kiñe Babilôn, a bi kena bé i ngéda a bi lo i Yérusalem, a gwel Yékônia man Yéhôyakim, kiñe Yuda, a kena nye i minkôm i Babilôn, nye ni mintôô mi bôt nwominsôna mi Yuda ni mi Yérusalem.+
21 Ñ, haana nyen Yéhôva nu mintôñ mi gwét, Nyambe nu Israel, a mpot inyu bisélél bi bi yégle i ndap Yéhôva, i ndap* kiñe Yuda ni i Yérusalem:
22 ‘“Bi ga ke i Babilôn,+ bi yén nyoo letee ni i kel me ga yoñ ngéda ni gwo,”* hala nyen Yéhôva a mpot. “I mbus, me ga témbna gwo, me timbis gwo hana homa nunu.”’”+
Ndoñi
^ Ni hop Lôk Héber, “tonjee i téé sép i mis mem.”
^ Tole “kon.”
^ Ni hop Lôk Héber, “noi.”
^ Tole “yale.”
^ A bé soso bômbôô pan i mamuna ikété témpel.
^ Tole “yale.”
^ I nla ki ba, “ni bo.”
