Tjémbi 40:1-17
Biniigana inyu ñéga kôa. Hiémbi hi David.
40 Me bi waa bé bôdôl Yéhôva ñem,a sédne me ôô,* a emble ki nlondok+ wem.
2 A bi bédés me i bee i hundul,a héya me i ndobo.
A téé makôô mem i ngii liaa;a boñ le me* piñgla bañ.
3 A bi ha hiémbi hi mondo i nyo+ wem,hiémbi hi bibégés inyu Nyambe wés.
Ngandak bôt i ga béñge i jam li, i tinak Yéhôva lipém,i ga bôdôl ki nye ñem.
4 I mut a mbôdôl Yéhôva ñem a yé maséé,nu a noñ bé bôt ba ndok ni ba ba nhémle bitembee.*
5 A Yéhôva Nyambe wem,kinje ngandak mam u bi boñ,minson nwoñ mi hélha ni mahoñol moñ inyu yés!+
Mut to wada a nla bé ba kiki we,+ibale me noodege añal minson nwoñ ni pot nwo,ki mi nlôôha ngandak kayéle mi nla bé añlana!+
6 U bééna bé ngôñ*+ ni sesema to ni likébla,ndi u bi yibil maôô mem le me emble+ we.
U bi bat bé bisesema bi ntul i hié, to bisesema inyu béba.+
7 Ha nyen me bi kal le: “Nun-ki! Me nlo.
I yé ntilga inyu yem+ ikété nhôôk kaat.
8 A Nyambe wem, me yé maséé i boñ sômbôl yoñ,+yak mbén yoñ i yé toi ikété ñem wem.+
9 Me ñañal ñañ nlam u telepsép ikété likoda likeñi.+
Nun-ki! Me nyip bé nyo,*+a Yéhôva, wemede u nyi yaga hala.
10 Me ntééda bé telepsép yoñ inyu yem metama.*
Me ñañal libak joñ li maliga ni tohi yoñ.
Ikété likoda likeñi,+ me nsôô bé loñge yoñ ñem* ni maliga moñ.”
11 Éé a Yéhôva, u nim bañ me konangoo yoñ.
Loñge yoñ ñem* ni maliga moñ bi tééda me ngéda yosôna.+
12 I bikuu bi nkéña me bi nlôôha ba ngandak kayéle me nla bé soñgol+ gwo.
Mahôha mem ma nyamb mayoo kayéle me nla ha bé tehe njel+ yem,ma mbôl iloo tjôñ di ño wem,kayéle me nimis makénd mem.
13 Éé a Yéhôva, soho tohol me.+
Éé a Yéhôva, pala hôla me.+
14 Ba bobasôna ba nyéñ nol me*ba wo nyuu, ba kon ki hison,ba bobasôna ba nséé i ngéda bikuu bi nkwél me,ba témb ni mbus, ba kon ki hison.
15 Ba ba nkal me le: “Hiino! Hiino!”
Bomede ba hel yaga inyu wonyuu yap.
16 Ndi ba bobasôna ba nyéñ we,+ a Nyambe,ba hak, ba kônôl ki we maséé.+
Ba bobasôna ba ngwés minson nwoñ mi tohi, ba kal hiki ngéda le:
“Yéhôva a kôhna lipém.”+
17 Ndi me gwé bé nhôla, me nyep ki;éé a Yéhôva, soho yoñ ngéda ni me.
Wen u yé nhôla+ wem ni ntohol wem;a Nyambe wem, u tiñha bañ.+
Ndoñi
^ Tole “a hôdôp inyu emble.”
^ Ni hop Lôk Héber, “mabal mem ma.”
^ Tole “bôt ba bitembee.”
^ Tole “u bi kon bé maséé.”
^ Ni hop Lôk Héber, “Me ngwel bé bibép gwem.”
^ Tole “Me nsôô bé telepsép yoñ ikété yem.”
^ Ni hop Lôk Héber, “ndéñbe yoñ i gwés.”
^ Ni hop Lôk Héber, “Ndéñbe yoñ i gwés.”
^ Âme ni hop Pulasi. Béñge Ndoñi bibuk.
