Minson mi baôma 1:1-26
1 A Téôfilô, ikété kaat yem bisu, me bi toñol mam momasôna Yésu a bi boñ ni niiga+
2 letee ni i kel Nyambe a bi yoñ nye i ngii, a ma mal ti baôma a bi pohol biniigana ni njel mbuu mpubi.+
3 I mbus le a bi nok ndutu, a pémél bo ngandak ngélé, inyu boñ le ba yi ibabé pééna le a yé toi i niñ.+ Ba tehe nye 40 ma dilo, a pôdôs ki bo inyu Ane Nyambe.+
4 I ngéda a bi kodba lôñni bo, a kal bo le: “Ni nyodi bañ i Yérusalem,+ ndi ni kônde bem i jam Tata a bi bôn,+ li ni bi nôgôl i meeni;
5 inyule ni maliga, Yôhanes a bi sôble ni malép; ndi bé n’a sôblana ni mbuu mpubi+ i mbus ndék dilo.”
6 Jon i ngéda ba bi témb ba kodba, ba bat nye le: “A Nwet, baa munu ngéda ini nyen u ntimbhene Israel ane?”+
7 A kal bo le: “Ni gwé bé le ni yi mangéda to bikék Tata a bi bii isi énél* yé nyemede.+
8 Ndi n’a kôhna ngui i ngéda mbuu mpubi w’a lo i ngii nan,+ ha nyen n’a ba mbôgi+ yem i Yérusalem, i Yudéa yosôna ni i Samaria,+ letee ni masuk* ma hisi.”
9 Kiki a mal pot i mam mana, Nyambe a yoñ nye i ngii, ba béñgege; i mbus, ond i hô nye, ba la ha bé ki tehe nye.+
10 Ba kida ba mbéñge ngii kiki a bé ke, kunda yada, bôt iba ba ba bé ba hééba bipuba bi mambot+ ba telep bo ipañ,
11 ba kal bo le: “A bôt ba Galiléa, inyuki ni nkida ni mbéñge ngii? I Yésu nunu Nyambe a nyoñ i ngii, a yék bé, kiki ni ntehe nye a nke i ngii, hala ki nyen a ntémb a loo.”
12 I mbus ha, ba témb i Yérusalem,+ ba nyodi i hikôa ba nsébél le Hikôa Ôlivé, hi hi yé bebee ni Yérusalem, jam kiki bo kilôméta yada.*
13 Kiki ba mpam, ba bet i tuñ ngii, i homa ba bé yééne. Ba bé Pétrô lôñni Yôhanes, Yakôbô, Andréa, Filipô, Tômas, Bartôlôméô, Matéô, Yakôbô man Alféô, Simôn mut makénd lôñni Yuda man Yakôbô.+
14 Bobasôna ba bé téñbe ikété masoohe ni ñem wada, lôñni bôda bahogi,+ ni Maria nyañ Yésu, ni lôknyañ.+
15 Mu dilo di nyen Pétrô a bi telep ipôla lôk kéé (nsoñgi* wonsôna u bôt u bé 120), a kal le:
16 “A lôk kéé, i bé béda le tilna i yon; tilna mbuu mpubi u bi bôk pot ni njel David inyu Yuda,+ nu a bé ñéga bôt ba bi gwel Yésu.+
17 Inyule a bé wada ikété yés,+ a yoñ ki ngaba munu nson unu.
18 (Nlélém mut won u bi somb wom ni nsaa u ngitelepsép,+ a kwo, ño u bôgôk, nyuu yé i bôô,* minla nwé nwominsôna mi kôba ’isi.+
19 Bôt ba Yérusalem bobasôna ba nyi i jam li, kayéle ba sébél i wom u ni hop wap le Akeldama, hala wee “Wom Matjél.”)
20 Inyule i yé ntilga ikété kaat Tjémbi le: ‘Liyééne jé li yila kiki ñoñ, mut a yén ha bañ mu kel to yada,’+ ni le: ‘Yak nson wé u ntééda, mut numpe a yoñ wo.’+
21 Jon i mbéda le ikété bôt ba bé kiha ni bés ngéda yosôna Nwet Yésu a bé gwel minson nwé* ipôla yés,
22 ibôdôl i ngéda Yôhanes+ a bi sôble Yésu, letee ni kel ba bi yoñ bés nye,+ a bet i ngii, i mut nu a nlama ba wada ikété bôt ba bi tehe bitugne bi Yésu kiki bés.”+
23 Ha nyen ba bi yoñ bôt iba, Yôsep nu ba nsébél le Barsabas, nu a bééna ki jôl le Yustô, lôñni Matias.
24 I mbus, ba soohe, ba kal le: “We, a Yéhôva,* wen u nyi miñem mi bôt bobasôna;+ ipôla bôt bana bo iba, unda nu u mpohol
25 le a yoñ nson unu lôñni libak li ñôma, li Yuda a bi tjél, a noñ yé njel.”+
26 Ha nyen ba leñ mbam,+ mbam i kwél Matias, a kôndba mu nsoñgi* u 11 baôma.
Ndoñi
^ Tole “kunde yé.”
^ Tole “bahoma ba yé nonok.”
^ Tole “ntel liké li kel sabat.” Hala a bé liké man Lôk Yuda a bééna kunde i ke i kel sabat.
^ Tole “limut.”
^ Tole “a bôô ñemkété.”
^ Ni hop Grikia, “a bé jôp, a pamak.”
^ Béñge Ndoñi bibuk.
^ Tole “ba soñgol nye,” hala wee, ba tehe nye nlélém kiki bana baôma bape jôm ni wada.
