Kaat Lôk Héber 4:1-16
4 Jon, hala kiki mbônga i jôp ikété noi yé u ngi yii, wee di yoñ yihe,* tiga le wada ikété nan a nene wengoñle a nimis wo.+
2 Inyule ba bi añle yak bés ñañ nlam,+ ndik kiki ba bi añle yak bo; ndi bañga ba bi nok i bi bane bé bo nseñ, inyule ba bi bana bé nlélém hémle kiki i bôt ba bi emble.
3 Inyule i bés ba di bi unda le di nhémle, di njôp toi ikété noi ini, nlélém kiki a bi kal le: “Jon me bi kum soñ ikété hiun hiem le: ‘B’a jôp bé ikété noi yem,’”+ to hala kiki a bi mal boñ minson nwé ilole nkoñ ’isi u mbôdôl.*+
4 Inyule a bi pot homa wada inyu hilo hi nyônôs isaambok le: “Nyambe a bi noi i hilo hi nyônôs isaambok inyu minson nwé nwominsôna,”+
5 a nkônde ki kal le: “B’a jôp bé ikété noi yem.”+
6 Jon, kiki njel i ngi yii inyu bôt bahogi le ba jôp ikété noi yé, hala kiki i bôt ñañ nlam u bi bôk añlana ba bi jôp bé mu inyu ndok yap,+
7 a bi témb a téé* hilo hipe i ngéda a bi kal i mbus ntandaa ngéda ikété hiémbi hi David le: “Len”; kiki i mbôk i kéla le: “Len, ibale ni nok kiñ yé, ni lédés bañ miñem minan.”+
8 Inyule ibale Yôsua+ a jôbna bo i homa noi, ki Nyambe a bi pot bé inyu hilo hipe i mbus ngéda.
9 Jon noi i Sabat ipe i ngi yii inyu litén li Nyambe.+
10 Inyule i mut a bi jôp ikété noi i Nyambe, yak nye a noi inyu minson nwé nyemede, kiki Nyambe nyemede a bi boñ inyu minson nwé.+
11 Jon di boñ ni biliya gwés gwobisôna i jôp ikété noi ini, le ndi mut to wada a noñ bañ* nlélém njel ndok.*+
12 Inyule bañga i Nyambe i yé yômi, i gwé ki ngui,+ i nhoo iloo pansoñ yo ki yo i malo ima,+ i njôp ikétékété letee i bagal mut* ni mahoñol,* yak ni môñga lôñni poños bihés, i nla ki wan mahoñol lôñni bipék bi ñem.
13 Jam to jada li li bi héga li sôli bé i mis ma Nyambe,+ ndi mam momasôna ma yé nso, ma bémbi ki i mis ma nu di nlama ti ñañga bésbobasôna.+
14 Jon, kiki di gwé prisi keñi i i bi ke i ngii, Man Nyambe le Yésu,+ wee di téñbege i pahal hémle yés i mbamba inyu yé.+
15 Inyule di gwé bé prisi keñi i i nla bé nok bibomb gwés,+ ndi di gwé i i bi noodana ikété manjel momasôna kiki bés, ibabé nye i boñ béba.+
16 Jon di kôôge bebee ni yééne ane i konangoo i mbuma ñañ lôñni makénd,+ kayéle di kôhna konangoo, di léba ki konangoo i mbuma ñañ inyu hôla bés i loñge ngéda.
Ndoñi
^ Ni hop Grikia, “di kon woñi.”
^ Hala wee, ilole Adam bo Éva ba mbôdôl gwal bon.
^ Ni hop Grikia, “mage.”
^ Ni hop Grikia, “a kwo bañ ikété.”
^ Tole “ndémbél ndok.”
^ Hala wee, yom mut a nene i mis. Ni hop Grikia, “nom.” Béñge Ndoñi bibuk.
^ Hala wee, yom mut a yé ikété. Ni hop Grikia, “mbuu.” Béñge Ndoñi bibuk.
