Kaat Samuel bisu 2:1-36
2 Hana a soohe le:
“Yéhôva a nkônha ñem wem maséé;+Yéhôva a nkônde me ngui.*
Nyo wem u nahap inyu timbhe baoo bem,inyule me yé maséé ni minson nwoñ mi tohi.
2 Mut nye ki nye a ta bé mpubi kiki Yéhôva,mut nye ki nye a ta bé kiki we,+liaa jo ki jo li ta bé kiki Nyambe+ wés.
3 Ni pot ha bañ ni ngôk;bibuk bi lipamal bi pémél ha bañ manyo manan,inyule Yéhôva a yé Nyambe nu a nyi mam momasôna,+a nkéés maboñok ma bôt ni telepsép.
4 Mimpihlôñgô mi mimpémba mi bôt mi mbugi,ndi bôt ba yé nwaak ba ga kôhna ngui.+
5 I bôt ba bé je loñge, ba nlama yéñ bôlô inyu bana bret;ndi njal y’a gwel ha bé i bôt+ ba bé yén njal.
Kom muda i ngwal bon basaambok,+ndi nu a bééna ngandak bon, a nyila kom muda.*
6 Yéhôva a nol, a nti ki niñ;*a nsôhna i Soñ,* a ntugul+ ki.
7 Yéhôva a nyilha liyep, a nti ki lingwañ;+a nsuhus isi, a mbédés+ ki.
8 A nhéya yañga mut i lipum li biték;a nyodol ki hiyeyeba ikété libu,*+inyu yis bo lôñni mintôô mi bôt,a ti bo yééne i lipém.
Yéhôva nyen a gwé dikuu di hisi,+mu nyen a nkéhi nkoñ ’isi.
9 A ntat mabal ma bôt ba ngwélél nye,+ndi bibéba bi bôt bi ga tjiba ikété jiibe,+inyule ni ngui bé nyen mut a nyémbél.+
10 Yéhôva a ga tjé i bet ba njôs nye,*+hiun hié hi ga ba kiki mbambat i i mbam i ngii.+
Yéhôva a nlona bikééhene letee ni makas ma hisi,+a ga ti kiñe+ yé ngui,a ga kônde ki nhook+ wé ngui.”*
11 I mbus, Elkana a témb i ndap yé i Rama, ndi mañge a bôdôl gwélél Yéhôva+ isi énél i prisi le Éli.
12 Bon ba Éli ba bé bibéba bi bôt;+ ba bé ti bé Yéhôva lipém.
13 I jam lini jon ba bé boñ ni i gwom litén+ li bé ti biprisi: hiki ngéda mut a nlo i ti bisesema, ngwélél biprisi wada a nlo ni nwas u gwé mimpén maa, ki nuga i ngi téé i juu,
14 a leñ wo munu bômbôô pan, i saspan, i ntjéñe tole i hibee. To imbe két nuga nwas wé u ñôm, prisi i nyoñ yo. Hala nyen ba bé boñ bon ba Israel bobasôna ba ba bé lo i Silô.
15 Handugi hala, i ngéda mut a nlo i ti sesema, bo ngi ligis+ mahoñ, ngwélél biprisi a nlo a kal nye le: “Ti prisi nuga le a bôm inyule a ga yoñ bé nuga i mbel ndik nuga i i yé yômi.”
16 Ibale mut a nkal nye le: “Nwas ndugi le ba ligis+ mahoñ; i mbus, w’a yoñ to kii i nlémél we,” ngwélél biprisi a bé timbhe le: “To, pala ti me yo; ibale hala bé, me nyoñ yo ni ngui!”
17 Yon i bé boñ le béba i bagwélél ba biprisi i bé ikeñi i bisu bi Yéhôva,+ inyule ba bé yan makébla bôt ba bé ti Yéhôva.
18 Samuel a bé gwélél+ Yéhôva, a bak a hééba* éfôd*+ i libadô li loñge bôñgô,* to hala kiki a bé a ngi yii ndék mañge.
19 Nyañ a bé yak a kôñlene nye mbôñgô mbot u u gwé bé binam, a lon-ga nye wo hiki nwii i ngéda a nlo ni nlôm inyu ti bisesema.+
20 Éli a bi sayap Elkana bo nwaa, a kal le: “Yéhôva a ti we man ni njel muda nunu, i man nu nyen a ga yiha nu ni mpôôs Yéhôva.”+ I mbus, ba témb i ndap yap.
21 Yéhôva a bi kônôl Hana ngoo, kayéle a nembee,+ a gwal bon bôlôm baa ni bon bôda iba. Mañge le Samuel a bé nañ i bisu bi Yéhôva.+
22 Éli a bé ñunuk ngandak, ndi a bi nok mam momasôna bon bé ba bé boñ bôt+ ba Israel bobasôna, ni lelaa ba bé lalna bôda ba bé sal i lijubul li ndap libadô i likoda.+
23 A bé kal bo le: “Inyuki ni mboñ i mam mana? Inyule i mam me nok litén jolisôna li mpot inyu nan ma yé mabe.
24 To, a bon bem, i jam me nok ni litén li Yéhôva jolisôna li ta bé lilam.
25 Ibale mut a mboñ mut numpe béba, ba nla soohe Yéhôva inyu yé;* ndi ibale mut a mboñ Yéhôva+ béba, njee a nla soohene nye?” Ba bi tjél emble isañ wap, inyule Yéhôva a bi mal kit le ba nlama wo.+
26 Ha ngéda i, Samuel a bé kônde nañ, a lémlak Yéhôva ni bôt ba litén.+
27 Nyambe a bi ep mut yak Éli, a kal nye le: “Yéhôva a nkal le: ‘Baa me bi yeelene bé lihaa li sôgôlsôgôl woñ njee me yé, i ngéda ba bé minkol mi Faraô i Égiptô?+
28 Nye ki nyen a bi pohlana ikété matén ma Israel+ momasôna inyu gwélél me nson u prisi, inyu ti me bisesema i juu li bisesema,+ inyu sem binjinjiñ,* ni inyu haba éfôd* i bisu gwem; me bi ti ki lihaa li sôgôlsôgôl woñ bisesema bi hié gwobisôna bon ba Israel+ ba mboñ.
29 Inyuki ni nyan* bisesema ni makébla me bi bat le ba sem i ndap me nyééne?+ Inyuki u nti bon boñ lipém iloo me, i ngéda ni nje biloñge bi bikét bi binuga bi makébla bon ba Israel+ ba nti?
30 “‘Inyu hala nyen Yéhôva Nyambe nu Israel a nkal le: “Me bi pot yaga le lihaa joñ ni lihaa li sôgôlsôgôl woñ li ga gwel nson i bisu gwem+ mba ni mba.” Ndi nano, Yéhôva a nkal le: “Hala a ga bôña ha bé, inyule i bôt ba nti me lipém, bon m’a ti lipém;+ ndi i bôt ba nyan me, yak me m’a yan bo.”
31 Nun-ki! Dilo di nlo le m’a mélés ngui yoñ* ni ngui lihaa li isoñ, kayéle mañ+ mut w’a ba bé i lihaa joñ.
32 Mam m’a ke loñge inyu Israel,+ ndi we w’a bana mut a nkolba we i ndap yem, mañ mut w’a ba ha bé kekikel i lihaa joñ.
33 Mut mbôda yoñ nu me ga nwas le a gwel nson i juu jem li bisesema, a ga boñ le mis moñ ma tehe bikuu, a nôgha ki we njôghe; ndi ngandak bôt+ ba lihaa joñ ba ga nôla ni pansoñ.
34 I jam li ga pémél bon boñ ba bôlôm bo iba, Hôfni bo Finéhas, li ga ba yimbne inyu yoñ: Bo iba ba ga wo+ nlélém kel.
35 Me ga pohol prisi i i yé maliga.+ I ga boñ mam kiki ñem wem u ngwés;* m’a boñ le mbôda yé i gwel nson u prisi ntandaa ngéda, a ga gwel nson u prisi i bisu bi nhook wem i boga ni boga.
36 Mut ni mut nu a ga yégle mu lihaa joñ, a ga lo, a ôôp i bisu gwé inyu yagal ndék moni ni két bret, a ga bat ki le: “Soho, ti me nson wada mu minson mi prisi inyu boñ le yak me, me kôhna két bret le me je.”’”+
Ndoñi
^ Ni hop Lôk Héber, “Yéhôva a mbédés toñ yem.” Béñge Ndoñi bibuk (Toñ).
^ Ni hop Lôk Héber, “a num.”
^ Tole “Séôl.” Béñge Ndoñi bibuk.
^ Tole “a ntééda i niñ.”
^ I nla ki ba, “likund.”
^ I nla ki ba, “I bet ba njôs Yéhôva ba ga kon woñi.”
^ Ni hop Lôk Héber, “a ga bédés toñ i nhook wé.” Béñge Ndoñi bibuk (Toñ).
^ I bôñgô ini yon ba nsébél ni hop Pulasi le lin.
^ Béñge Ndoñi bibuk.
^ Ni hop Lôk Héber, “a ma téñba.”
^ I nla ki ba, “Nyambe a nla baglene nye nkaa.”
^ Béñge Ndoñi bibuk.
^ I nla ki ba, “inyu boñ le hiida hi bisesema hi tu.”
^ Ni hop Lôk Héber, “ni mbép pélé mu.”
^ Ni hop Lôk Héber, “woo woñ.”
^ Tole “I ga boñ mam ma yé me ñem ni i mahoñol.”
