Ézékiel 28:1-26
28 Yéhôva a bi pôdôs ki me, a kal le:
2 “A man mut, kal ñane Tir le: ‘Lana nyen Nwet Bayemlikok le Yéhôva a nkal:
“Hala kiki ñem woñ u nyon ni ngôk,+ jon u nwaa bé kal le: ‘Me yé ngim nyambe.
Me yiine i yééne ane i nyambe wada i ñemkété tuye.’+
Ndi u yé ndik mut binam, u ta bé ngim nyambe,to hala kiki u nhoñol mu ñem woñ le u yé ngim nyambe.
3 U nhoñol le u nyi jam iloo Daniel,+le jam to jada li sôli bé i bisu gwoñ.
4 Pék yoñ ni yi yoñ i bagal mam bi bi yilha we ngwañ,u kot ki gôl ni silba ikété matéédana moñ ma nkus.+
5 Hala kiki u nyi nyuñga, jon u bi yila ngwañ,+yak ñem woñ u nyon ni ngôk, inyule u nkwo ngwañ.”’
6 “‘Jon lana nyen Nwet Bayemlikok le Yéhôva a nkal:
“Hala kiki u nhoñol mu ñem woñ le u yé ngim nyambe,
7 jon m’a lona bakén ba bôt le ba jôs we, bôt mukété biloñ ba ba nlôôha béba,+b’a sodol paminsoñ yap inyu tjé gwom bilam gwobisôna u bi kôhna ni pék yoñ,ba hindis ki lipém joñ likeñi.+
8 B’a suhus we i soñ,*w’a wo ki béba nyemb i ñemkété tuye.+
9 I mut a ga nol we, baa u ga ke ni bisu i kal nye le: ‘Me yé ngim nyambe?
Ngo w’a ba ndigi mut binam, ha ngim nyambe bé, i moo ma bôt ba nwéha we nyuu.”’*
10 ‘U ga wo kiki bongikweeba i moo ma bakén ba bôt,inyule me mal pot hala,’ hala nyen Nwet Bayemlikok le Yéhôva a mpot.”
11 Yéhôva a pôdôs ki me, a kal le:
12 “A man mut, tôp hiémbi hi maéya inyu kiñe Tir, u kal ki nye le: ‘Lana nyen Nwet Bayemlikok le Yéhôva a nkal:
“Wen u bé ndémbél i libak li peles,*u bak u yôni ni pék,+ u bak ki nlam kiyaga.+
13 U bé i Éden, i wom u Nyambe.
Ba bi eñg we ni mintén mi tik ngok nwominsôna:
rubi, tôpasô ni yaspi; krisôlitô, ônix ni jad; safirô, turkuas+ ni émérôd;Bipañgbene gwap ni bisômôl gwap bi bé ni gôl.
Me bi kôôba gwo i kel me bi hek we.
14 Me bi téé we le u ba nhook kérubim, le u ngwel nson u ntat.
U bé i hikôa hipubi hi Nyambe,+ u hiômôk ipôla ngok i i nloñ ni hié.
15 U bé ngi nsohi ibôdôl i kel u bi hégaletee ni i ngéda u bi kahal boñ mam ma téé bé sép.+
16 Kiki u bé boñ nyuñga ngandak,+u bi yon ni njôô,* u bôdôl boñ béba.+
Hala kiki u nyila nyega, m’a luhul we i hikôa hi Nyambe, me tjé ki we;+a kérubim, a we nu u ngwel nson u ntat, m’a luhul we le u ba haa ni ngok i i nloñ ni hié.
17 Kiki u yé nlam, jon ñem woñ u ngôgôp.+
Lipém joñ likeñi li ñôbôs pék yoñ.+
M’a bes we ’isi.+
M’a bambal we i bisu bi bikiñe.
18 Hala kiki u bé boñ mam mabe, u boñok nyuñga i malôga, u bi hindis bahoma boñ bapubhaga.
M’a kuye hié ikété yoñ, hi ga ligis we.+
M’a yilha we libu hana ’isi i bisu bi bôt bobasaôna ba mbéñge we.
19 Ba bobasôna ba bé yi we, ba ga nun we siim, ba bak nhelek,+lisuk joñ li ga lo kunda yada, li bak ki libe kiyaga,u ga ba ha bé kekikel.”’”+
20 Yéhôva a pôdôs ki me, a kal le:
21 “A man mut, hielba, u nun i pes Sidôn,+ u añal ki bikuu bi ga yik kwél nye.
22 U ga kal le: ‘Lana nyen Nwet Bayemlikok le Yéhôva a mpot:
“A Sidôn, m’a kolba we, matén m’a ti me lipém inyu jam li ga pémél we;ha nyen bôt b’a yi le men me yé Yéhôva i ngéda m’a kogse we, u ga boñ ki le jôl jem li pubhana.
23 M’a om dimala di kon i nyeni, matjél m’a kuli mu minloñ nwé.
Ngandak bôt i ga nôla i nyeni i ngéda pansoñ i ga lôl nye bipes gwobisôna;ha nyen b’a yi le men me yé Yéhôva.+
24 “‘“I ngéda i mam mana m’a tagbe, maum ma ma mbaabana ni biloo bi bi nsôghana,+ hala wee biloñ bi bi ndegle litén li Israel, bi ga kéña ha bé jo; ha nyen bôt b’a yi le men me yé Nwet Bayemlikok le Yéhôva.”’
25 “‘Lana nyen Nwet Bayemlikok le Yéhôva a nkal: “I ngéda m’a kot bôt ba litén li Israel, ba lôlak mu matén i het me bi tjam bo,+ m’a unda bo le me yé mpubi, biloñ bipe bi tehge.+ B’a yééne mu loñ+ yap, i loñ me bi ti ngwélél wem Yakôb.+
26 B’a yén mu ibabé woñi,+ b’a oñ mandap, ba bel ki nwom mi minkôô mi wai.+ Ñ, b’a yén mu ibabé woñi i ngéda m’a kogse ba bobasôna ba nkéña bo, ni ba ba ndegle bo;+ ha nyen b’a yi le men me yé Yéhôva Nyambe wap.”’”
Ndoñi
^ Ni hop Lôk Héber, “bee.”
^ Tole “i moo ma bôt ba nhindis we.”
^ Ni hop Lôk Héber, “Wen u bé band ndémbél.”
^ Tole “bisañ.”
