Ézékiel 2:1-10
2 I mbus, a kal me le: “A man mut,* telep, le ndi me pôdôs we.”+
2 I ngéda a bi pôdôs me, mbuu u Nyambe u jôp ikété yem, u téé+ ki me inyu boñ le me emble nu a bé pôdôs me.
3 A kal ki me le: “A man mut, me yé i ep we yak bon ba Israel,+ nyoo i biloñ* bi bi yé ndok, bi ndogbene ki me.+ Bo ni basôgôlsôgôl bap ba bi bôk mambén mem letee ni len.+
4 Me yé i ep we yak bon ba ndok ba ba gwé minledek mi miñem,+ u ga kal bo le: ‘Lana nyen Nwet Bayemlikok le Yéhôva a mpot.’
5 Ndi kiki ba yé litén li li yé ndok, to ba ñemble we, to ba ñemble bé we,+ ba ga yi yaa le mpôdôl a bé ipôla yap.+
6 “Ndi we, a man mut, u kon bañ bo woñi,+ u kon bañ to i yom ba mpot woñi, to hala kiki maum ni biloo*+ bi nkéña we ni le u yiine ipôla diéé di nyoo. Ba yé litén li li yé ndok, ndi u kon bañ i mam ba mpot woñi,+ to masu map ma boñ bañ we le u sehla.+
7 U ga kal bo i yom me mpot, to ba ñemble, to ba ñemble bé. Ni maliga, ba yé litén li bôt ba ndok.+
8 “Ndi we, a man mut, emble i yom me nkal we. U ndogop bañ kiki litén li bôt ba ndok lini. Nahal nyo, u je i yom me yé i ti we.”+
9 Kiki me bé béñge, me tehe mut a nsamblene me woo,+ nhôôk kaat+ u bak nye mu.
10 I ngéda a bi wandal yo i bisu gwem, matila ma bé mu, i bisu ni i mbus.+ I mam ma bé ntilga mu ma bé tjémbi di maéya, miñumnde ni minlénd.+
Ndoñi
^ I bibuk bini le “man mut” bi nene munu kaat Ézékiel 93 ngélé; ngélé bisu ini le ba gwélél gwo.
^ I nene le hana ba mpôdôl minkoñ mi Israel ni mi Yuda.
^ I nla ki ba, “to hala kiki bôt ba litén ba gwé minledek mi miño, ba bak kiki gwom bi bi ñôm we.”
