Tusing cara manusa lénan, satondén lekad ka guminé Yesus idup di suargan maraga rohani. (Yohanes 8:​23) Yesus pagaén Tuhan ané kapertama, ia milu nulungin ngaé isin guminé. Yesus gaéna langsung olih Yehuwa lan pantes kasebut ”Putra Tunggal” Idané. (Yohanes 1:​14) Yesus kasebut ”Sang Sabda” ulian dadi juru wicaran Tuhan.​—Baca Pitutur 8:​22, 23, 30; Kolose 1:​15, 16.

Tuhan ngutus Putrané ka guminé. Kaidupan Yesus di suargan pindahanga ka guminé, kalekadang baan anak perawan Yahudi adané Maria. Dadiné Yesus tusing ngelah bapa kandung. (Lukas 1:​30-​35) Yesus teka ka guminé buat (1) ngajahang kasujatian unduk Tuhan, (2) ngemaang conto kénkén carané nyalanang préntah Idané yadiapin kéweh, lan (3) nyerahang kaidupané ané sampurna buat ”mebasang anake liu”.​—Baca Matius 20:⁠28.

Tebusan ento nilai ané perlu kabayah anggon mébasang manusa uli kematian. (Pararudan 21:​29, 30) Uli pajumu, Tuhan tusing taén ngelah tetujon apangé manusané tua lan mati. Apa buktiné? Ida suba ngorahang tekén manusa kapertama, Adam, yéning ia ngaé ”dosa”, ia lakar mati. Yén umpama Adam tusing ngaé dosa, ia tusing lakar mati. (Purwakaning Dadi 2:​16, 17; 5:⁠5) Cakepan Suciné ngajahang, Adam ané ”ngawinang” manusané makejang mati. Dadiné, Adam ngewarisang dosa lan kematian tekén katurunané makejang. Iraga merluang tebusan apang kebébasang uli ukuman kematian ané warisanga tekén Adam.​—Baca Roma 5:​12; 6:​23.

Nyénké ané ngidaang mayah tebusan apang iraga bébas uli kematian? Yén iraga mati, iraga tuah mayah dosan iragané padidi. Manusa ané sing sampurna tusing ngidaang mayah dosan anak lénan.​—Baca Kidung 49:​7-9.

Tusing cara iraga, Yesus manusa sampurna. Yesus tusing perlu mati ulian dosané padidi​—⁠ ia sing taén madosa. Kéwala, Yesus mati buat dosan manusané. Tuhan nunjukang rasa sayang ané paling gedé tekén manusa, Ida ngutus Yesus kanti mati buat iraga. Yesus masih ngelah rasa sayang tekén iraga, ento ngenah uli ia nyak nyalanang préntah Bapané lan nyerahang idupné buat iraga.​—Baca Yohanes 3:​16; Roma 5:​18, 19.

Dugas di guminé, Yesus nyegerang anak ané gelem, ngidupang anak mati, lan nulungin anak ané ngelah pakéweh. Ené dadi conto apa ané lakar gaéna tekén Yesus buat anak ané satia di masa depan. (Matius 15:​30, 31; Yohanes 5:28) Sasubané Yesus mati, Tuhan buin ngidupang ia maraga rohani. (1 Petrus 3:​18) Jani Yesus ngantiang di samping kenawan Ida kanti Yehuwa ngemaang kuasa dadi Raja buat mréntah guminé. (Ibrani 10:​12, 13) Jani Yesus suba dadi Raja di suargan, lan murid-muridné pada ngumumang orti luungé ené ka sajebag jagat.​—Baca Nabi Daniel 7:​13, 14; Matius 24:⁠14.

Tusing makelo buin, Yesus lakar nganggon kuasané dadi Raja buat ngilangang pakéwehé makejang lan apaja ané ngranaang kéweh. Makejang anaké ané nunjukang kapracayaan tekén Yesus lakar idup bagia di gumi pirdaus.​—Baca Kidung 37:​9-​11.