Yehuwa ngidih apang iraga ”satia.” (Kidung 18:25) Ené khususné penting di pakurenan krana yéning tanpa rasa satia, ragané ajak dadua tusing mungkin saling pracaya. Rasa pracaya penting apang tresnan ragané ngancan dalem.

Jaman jani, liu ada pengaruh jelek ané bisa ngranaang suami istri ngancan kéweh saling satia. Dadiné apang perkawinané kalindungin, ragané perlu ngelah tekad nyalanang unduké dadua ené.

APA AJAHAN CAKEPAN SUCI: ”Mangdane semeton mrasidayang milih paindikan sane pinih becika.” (Pilipi 1:10) Perkawinan ragané ento unduk ané penting di idup ragané. Ené patut kautamaang.

Yehuwa kayun apang ragané rungu tekén kurenan lan ”muponin urip” bareng-bareng. (Guru Pangajian 9:⁠9) Ida jelas nyinahang yéning ragané sing dadi tusing rungu tekén kurenan, sakéwala ragané ajak dadua perlu ngalihin kéngkén carané apang kurenané marasa bagia. (1 Korintus 10:24) Ajininja kurenané apang ia marasa kaperluang.

ANÉ BISA KAJALANANG:

• Pastiang sesai ada waktu bareng-bareng ajak dadua dogén, baang ia perhatian

• Makenehja uli sudut pandang ”ajak dadua”, eda  ”padidi-padidi”

APA AJAHAN CAKEPAN SUCI: ”Sawatek anake ane nganengneng anak luh kanti ia makeneh teken anake luh ento, sujatinne di kenehne ia suba mamitra ngajak anake luh ento.” (Matius 5:28) Yén terus ngenehang unduk-unduk ané cabul, ento suba kaanggep ia tusing satia ajak kurenané.

Yehuwa ngajahin apang ragané ’nyaga atin’ ragané. (Pitutur 4:23; Nabi Yeremia 17:⁠9) Ento krana, jagainja paningalané. (Matius 5:29, 30) Tuutin conto uli nabi Ayub ané ngaé janji ajak paningalané apang tusing nganengneng anak eluh kanti kasemaran. (Ayub 31:⁠1) Eda pesan ningal-ningalin gambar ané porno. Eda ngaé hubungan romantis ajak anak lénan selain kurenan padidi.

ANÉ BISA KAJALANANG:

• Seken-seken édéngang tekén anak lénan yén ragané satia ajak kurenan ragané

• Kenehang kéngkén perasaan kurenané, lan énggalang pegatang hubungan apaja ané bisa nganggu keneh kurenané