Iraga pasti ngutsahaang apang kluargané bagia. Sakéwala, ada unduk-unduk ané bisa ngranaang iraga kéweh buat nyaga rasa damai. (Yakobus 4:14) Krana sayang tekén iraga, Tuhan nyediaang wantuan buat ngatasin pakéwehé ento. Yén ragané nyalanang prinsip-prinsip Cakepan Suci, ragané lan kluargan ragané lakar bisa mragatang masalah, yapin ada di situasi ané paling kéweh.

APA AJAHAN CAKEPAN SUCI: ”Aturangja saluiring kasumangsayan semetone, santukan Ida pacang miara semeton.” (1 Petrus 5:⁠7) Ingetang yéning sengkalané ento tusingja uli Yehuwa. (Yakobus 1:13) Yéning ragané maekin Ida, Ida lakar ngemaang wantuan ané paling luunge. (Nabi Yesaya 41:10) ”Suksrahja ring Ida Sang Hyang Widi Wasa.”—⁠Kidung 62:⁠8.

Ragané masih lakar maan penghiburan yéning maca lan mlajahin Cakepan Suci sabilang wai. Asilné, ragané lakar ngrasaang yén Ida Yehuwa ”nglipur kaulan Idane” dikala nepukin pakéweh. (Nabi Yesaya 49:13; Roma 15:⁠4) Ida majanji lakar ngemaang ”sutrepti rahayu saking Ida Sang Hyang Widi Wasa, sane nglangkungin sakancan pepineh manusane.”—⁠Pilipi 4:6, 7, 13.

ANÉ BISA KAJALANANG:

• Ngastawaja nunas wantuan Yehuwa apang bisa tetep tenang lan makeneh ané luung

• Keneh-kenehang apa dogén solusiné, suba kéto pilih ané paling cocok buat ragané

APA AJAHAN CAKEPAN SUCI: ”Pabuat anake wicaksana, pituture ene makadadi imbuh kabisannyane muah pabuat anake widagda makadadi panuntunnyane.” (Pitutur 1:⁠5) Punduhang keterangan-keterangan ané ada. Tegarang kenehang apa ané perluanga tekén kluargané. Ajak ngomong lan padingehang omongan kluargané.—⁠Pitutur 20:⁠5.

Kéngkén yén ada anak ané kasayangin ngalain mati? Eda lek ngédéngang rasa sebet. Ingetangja yén Yesus dogén taén ”nangis.” (Yohanes 11:35) Istirahat lan masaré ané cukup ento penting sajaan. (Markus 6:31) Ento bisa ngranaang ragané élahan baan ngatasin rasa sebet.

ANÉ BISA KAJALANANG:

• Sesaija mapitungan ajak kluargané. Yén ada masalah, kluargané tusing lakar lek ngomong ajak ragané

• Takonin anak lén ané suba taén nepukin pakéweh ané patuh

APA AJAHAN CAKEPAN SUCI: ”Parasawitrane setata ia ngedengang kapitresnannyane.” (Pitutur 17:17) Timpal-timpal ragané pasti makita nulungin, kéwala ipun minab tusing nawang apa ané perluang ragané. Eda lek ngorahang apa ané kaperluang. (Pitutur 12:25) Kéto masih, alih tulungan rohani uli semeton ané ngerti tekén ajahan Cakepan Suci. Ia bisa ngemaang bimbingan uli Cakepan Suci ané lakar nulungin ragané.—⁠Yakobus 5:14.

Ragané lakar kakuatang yéning ragané sesai bergaul ajak semeton ané imané kuat lan pracaya ajak janji-janjin Tuhan. Ragané masih lakar marasa kakuatang ulian nulungin anak lénan ané merluang pitulungan. Ceritaang tekén ipun unduk kapracayaan ragané kapéning Yehuwa lan janji-janjin Idané. Terus sibukang ragané nulungin anak lénan ané perlu bantuan, eda ngejoh uli semeton-semeton ané sayang lan rungu tekén ragané.—⁠Pitutur 18:1; 1 Korintus 15:58.

ANÉ BISA KAJALANANG:

• Omongang ajak timpalé lan terimaja pitulungané

• Jujur dogén orahang apa ané sedek kaperluang