Uli cenik, Samuel suba ngoyong lan ngayahin di tabernakel, tongos anaké pada teka ngaturang bakti tekén Yehuwa. Apaké cening nawang, kenapa Samuel kanti ada di tabernakel? Mai plajahin malu unduk méméné Samuel, Hana.

Suba makelo gati, Hana dot ngelah panak kéwala tusing ngidaang. Lantas ia ngastawa lan nunas tulung tekén Yehuwa. Ia majanji, yén ia bisa ngelah panak, ia lakar nyerahang panakné buat ngayahin lan ngoyong paek uli tabernakel. Yehuwa nyawab pangastawan Hana lan ia ngelah panak muani. Adanina Samuel. Buka janjiné Hana, dugas umurné Samuel telu utawi petang tiban, Hana ngajak Samuel ka tabernakel buat ngayahin Yehuwa.

Eli dadi imam besar di tabernakel ngewakilin umat ané ngaturang bakti. Panakné buka dadua masih ngayahin ditu. Tabernakel ento tongos mabakti tekéning Yehuwa, lan anaké ané ada ditu patut malaksana luung. Kéwala, panakné Eli jelek sajaan bikasné. Samuel ningalin padidi kéngkén solahné. Apaké Samuel milu-milu nuutin solah jelek panakné Eli?​— Tusing, ia terus nyalanang ané beneh, cara apa ané ajahanga tekén mémé bapané.

Yén cara cening, kéngkén patutné Eli ngurus panak-panakné?​— Ia benehné ngukum panakné. Ia harusné sing ngemaang panakné terus ngayahin di tabernakel. Kéwala, Eli sing kéto, dadiné Yehuwa duka tekén Eli lan panak-panakné. Yehuwa mutusang lakar ngukum ipun.

Di peteng dugas Samuel pules, ia ningeh ada anak ngaukin: ’Samuel!’ Ia ngénggalang nyagjagin Eli, lantas Eli masaut: ’Bapa tusing ngaukin cening.’ Kejadianné ené kanti ping pindo. Disubané ping telu, Eli ngorahin Samuel yén buin ningeh buka kéto, masautja kéné: ’Inggih Yehuwa, rarisang masabda; titiang madingehang.’ Samuel nyak nyalanang cara kéto. Lantas Yehuwa masabda  tekén Samuel: ’Orahin Eli yén Ulun lakar ngukum ia lan kluargané krana solah jelé ané suba jalananga.’ Menurut cening, apaké aluh buat Samuel ngorahin Eli sabdané ento?​— Sing, ento tusingja aluh. Yapinja Samuel marasa takut, ia tetep nyalanang tugasé ento. Sabdan Yehuwa dadi kenyataan. Panakné Eli mati buka dadua, kéto masih Eli.

Samuel dadi conto ané luung buat iraga. Ia terus nyalanang ané beneh yapin ia ningalin anak lénan nyalanang ané jelek. Yén cening kéngkén? Apaké cening nyak nuut Samuel terus nyalanang ané beneh? Yén nyak, cening lakar ngaénang Yehuwa lan mémé bapan ceningé bagia.