Ribka ento anak eluh ané sayang tekén Yehuwa. Kurenanné madan Ishak. Ia masih sayang tekén Yehuwa. Kéngkén Ribka adi bisa ketemu ajak Ishak? Apa buktiné Ribka edot ngaénang atin Yehuwa seneng? Mai baca kisahné.

Méméné Ishak madan Sara lan bapané madan Abraham. Ipun ngoyong di Kanaan lan anaké ditu tusing nyumbah Yehuwa. Kéwala, Abraham makita apang panakné makurenan ajak anak eluh ané nyumbah Yehuwa. Dadiné ia ngutus pembantuné ané madan Elieser, apang ngalihang kurenan buat Ishak di Haran, kota asal nyama-nyamané Abraham.

Elieser luas ajak pembantuné Abraham ané lenan. Ené perjalanan ané ejoh pesan. Ia ngaba onta adasa apang bisa ngaba bekel lan hadiah. Kéngkén carané Elieser apang bisa matemu ajak anak eluh bajang ané cocok buat Ishak? Di Haran, ia nepukin tongos marérén di samping sumuré lan ia nawang pasti liu anak lakar teka kemu buat nyemak yéh. Lantas ia ngastawa tekén Yehuwa lan ngidih: ’Yén ada anak eluh bajang ané ngemaang ngidih yéh buat tiang lan onta-ontan tiangé, artiné anaké eluh bajang ento pilihan Idané.’

Suba kéto Ribka teka ka sumuré. Cakepan Suci ngorahang ia jegeg sajaan.  Elieser nagih ngidih yéh, lan Ribka masaut: ’Oh nah pak. Lakar jemakang tiang, onta-ontan bapaké masih kal kajemakang’. Tegarang kenehang! Onta-ontané ané bedak pasti liu sajaan nginem yéh, dadiné Ribka pang liu kacag-kicig ka sumuré nyemak yéh. Apaké cening bisa ningalin yén Ribka seleg gati magaé?​— Elieser ngon tekén carané Yehuwa nyawab pangastawanné.

Elieser liu ngemaang hadiah ané melah-melah. Ribka ngajakin Elieser lan pembantuné teka ka umah bapané. Ditu Elieser nyeritaang kenapa Abraham ngutus ia kemu lan kéngkén carané Yehuwa nyawab pangastawanné. Kluargané Ribka seneng lan nyak ngemaang Ribka ngantén ajak Ishak.

Menurut cening, apaké Ribka nyak ngantén ajak Ishak?​— Ribka sadar yén Yehuwa ngutus Elieser. Lantas kluargané matakon tekén Ribka apaké ia nyak milu ka Kanaan lan ngantén ajak Ishak, Ribka masaut : ’Nah, tiang nyak milu.’ Suba kéto, ia majalan bareng-bareng ajak Elieser. Disubané neked di Kanaan, Ribka ngantén ajak Ishak.

Krana Ribka nyalanang apa ané nyenengang atin Yehuwa, ento krana ia kamertain. Makudang-kudang tiban sasubané ento, ia dadi nenek moyangné Yesus! Yén cening nyak cara Ribka lan nyalanang apa ané ngaénang atin Yehuwa seneng, cening masih lakar kamertain.