2024-cü ilin sentyabr ayında 240 ölkə və ərazidə yaşayan Yehovanın Şahidləri Müqəddəs Kitab dərsinə başlamaq üçün xüsusi kompaniyada iştirak etdilər. Bütün dünyada bacı-qardaşlar yaranan hər münasib vəziyyətdə «Əbədi xoşbəxt həyat!» nəşri vasitəsilə Müqəddəs Kitab dərsinin necə keçirildiyini göstərməyə çalışırdılar. Həmin ay ərzində əldə olunan bəzi ruhlandırıcı hadisələri sizinlə bölüşmək istəyirik.

Çilidə yaşayan 30 yaşlı bir qadın avtobusda gedərkən bizim ədəbiyyat arabamızı görür. O, avtobusun pəncərəsindən öz smartfonu ilə pulsuz Müqəddəs Kitab dərsi üçün bannerin üstündəki QR kodu skan edir. Beləcə, jw.org saytına daxil olur. «Kimə etibar etmək olar? Müqəddəs Kitabda bu barədə nə deyilir?» adlı məqaləni oxuduqdan sonra qadın Yehovanın Şahidlərinin onu ziyarət etməsi üçün müraciət blankını doldurur. Çox keçməmiş bir ər-arvad onun evinə gəlir. Qadın onlara deyir ki, düzgün şəkildə ibadət etməyin yolunu göstərməsi üçün Allaha dua edirmiş. Dindaşlarımız qadına Müqəddəs Kitab dərsi keçməyi təklif edirlər və o, dərhal başlamaq istəyir. Dərs vaxtı qadın dərslikdə yer alan videoların onun çox xoşuna gəldiyini bildirir. Artıq o, «Əbədi xoşbəxt həyat!» dərsliyinin 3-cü dərsini bitirib və Müqəddəs Kitabı öyrənməyə davam edir.

Seneqalda yaşayan bir qadın evinin pəncərəsindən iki bacımızın bir kişi ilə Müqəddəs Kitab haqda danışdığını eşidir. Eşitdikləri ona o qədər maraqlı gəlir ki, bacılar getməmiş tez həyətə düşüb onlara yaxınlaşır. Ədalətsizlik haqda danışan bacımız Əşiya 32:16, 17 ayələrini oxuduqdan sonra qadına «Əbədi xoşbəxt həyat!» kitabının 2-ci dərsindən Müqəddəs Kitabın gələcəklə bağlı vədlərini göstərir. Qadın ağlaya-ağlaya bacılarımıza həyatında baş verən çox ağır vəziyyətləri danışır. Bacılarımız 1 Butrus 5:7 ayəsini oxuyub ona təsəlli verirlər və həmçinin Müqəddəs Kitab dərsi təklif edirlər. Qadın dərhal razılaşır.

Tayvanda ev-ev təbliğ edən zaman bir qardaş gənc bir oğlanla söhbət edir. Oğlan deyir ki, öz gələcəyinə görə narahatdır. Qardaş ona Əşiya 65:21, 22 ayələrini oxuyur və belə bir sual verir: «Sən hər kəsin öz zəhmətindən həzz alacağı bir dünyada yaşamaq istəyərdin?» Sonra «Əbədi xoşbəxt həyat!» kitabının 2-ci fəslinin 4-cü bəndi vasitəsilə ona Müqəddəs Kitabın gələcəyə dair gözəl ümid bəxş etdiyini deyir. Qardaş oğlana Müqəddəs Kitab dərsi keçməyi təklif edir. Oğlan söhbətin onun üçün xoş olduğunu bildirir və Müqəddəs Kitab dərsi keçməyə razılaşır. Bir neçə həftə sonra bu gəncin atası oğlunun öyrəndiklərinin maraqlı olduğunu deyərək Müqəddəs Kitab dərslərinə qoşulmağa başlayır. İndi bu ata-oğul müntəzəm olaraq Müqəddəs Kitab dərsi keçir.

Ukraynanın balaca bir kəndində ev-ev təbliğ edən zaman qardaşlarımız bir kişiyə Dənyal 2:44 ayəsini oxuyurlar və izah edirlər ki, yalnız Allahın Padşahlığı bəşəriyyətin bütün problemlərini aradan qaldıra bilər. Kişi sevinərək bildirir ki, Müqəddəs Kitabı oxuyur və çoxlu sualları var. O bildirir ki, Yehovanın Şahidlərinin onu ziyarət edəcəyini gözləyirdi, hətta evinə yaxın ərazidə ibadət evimizi axtarırdı. Qardaşlarımız ona Müqəddəs Kitab dərsi sayəsində bütün suallarına cavab tapa biləcəyini deyib, dərslərin necə keçirildiyini göstərirlər. Kişi Müqəddəs Kitab dərsi təklifini həvəslə qəbul edir və hal-hazırda müntəzəm olaraq dərs keçir.

Bu beynəlxalq kampaniyadan bu cür gözəl hadisələri eşitmək bizi çox ruhlandırır. Bütün dünyada dindaşlarımız təmiz qəlbli insanlara Allahın Kəlamını öyrənməyə kömək edirlər. Yehovaya çox minnətdarıq ki, onların zəhmətlərini əvəzsiz qoymur (1 Salonikililərə 2:13).

Aşağıdakı şəkillərdə 2024-cü ilin sentyabr ayında keçirilən xüsusi təbliğ kampaniyasında sevinclə iştirak etmiş müxtəlif ölkələrdən olan bacı-qardaşlarımız təsvir olunub.