Руанданын Карунгҹи вилајәтинин мәһкәмәси Јеһованын Шаһиди олан сәккиз шаҝирдин дин азадлығы һүгугуну мүдафиә етди. Бу шаҝирдләрин виҹданлары јол вермирди ки, онлар дин дәрсләриндә иштирак етсинләр.

Руандадакы мәктәбләрин әксәријјәти дини тәшкилатларла сых бағлыдыр. Бу мәктәбләрин бәзиләриндә шаҝирдләрдән дини ајинләри иҹра етмәк вә килсә верҝисини өдәмәк тәләб олунур. 2008—2014-ҹү илләрдә мәктәб рәһбәрлији тәрәфиндән 160 Јеһованын Шаһиди олан шаҝирд мәктәбдән кәнарлашдырылыб. Гәрб вилајәти олан Карунгҹидәки бу һадисә ҝөстәрир ки, Руанда һакимијјәти бүтүн өлкәдә дини ајры-сечкилијә сон гоја биләр.

2014-ҹү илин мајын 12-дә Карунгҹидәки Мусанго мәктәбинин рәһбәрлији јашлары 13—20 a олан сәккиз Јеһованын Шаһидини мәктәбдән говду. Сәбәб шаҝирдләрин дини ајиндә иштирак етмәкдән имтина етмәләри иди. Һәмин шаҝирдләрин валидејнләри бу мәсәләни Руанкуба әразисинин иҹра катибинин нәзәринә чатдырдылар. О да, өз нөвбәсиндә, шаҝирдләрин мәктәбә гајтарылмасы илә бағлы ҝөстәриш верди. Бу гәрардан хошу ҝәлмәјән мәктәб рәһбәрлији башга үсула әл атды — шаҝирдләри дөвләт һимни охумамагла һөрмәтсизлик ҝөстәрмәкдә иттиһам етди. Мәктәбә ҝери гајтарылдыгдан ҹәми ики ҝүн сонра, 2014-ҹү ил 4 ијун тарихиндә полис әмәкдашлары мәктәбә ҝәлиб һәмин шаҝирдләри һәбс етди.

Полис онлары алты ҝүн һәбсдә сахлады. Бу мүддәт әрзиндә онлары һәдәләјиб тәһгир едирдиләр. Јашҹа бөјүк ики шаҝирди исә о бири шаҝирдләрә тәсир етдикләрини әсас ҝәтирәрәк дөјдүләр. Бүтүн бунлара бахмајараг, сәккиз шаҝирдин һамысы иманларында мөһкәм галды.

2014-ҹү ил ијунун 9-у шаҝирдләрин једдиси азадлыға бурахылды. Онлардан ән кичијини прокурор иш үзрә мәсулијјәтдән азад етди. Анҹаг ән бөјүјү исә әлавә доггуз ҝүн һәбсдә сахланылды. Һаким һәмин шаҝирдин 2014-ҹү ил октјабрын 14-ү баш тутаҹаг мәһкәмәјә гәдәр шәрти азадлыға бурахылмасына гәрар верди.

Һаким шаҝирдләрин һәр бирини сорғуја чәкди. Сонра онлардан бири диҝәр шаҝирдләрин адындан данышараг изаһ етди ки, мәктәбдән говулмаларынын сәбәби һимни охумамалары јох, килсә верҝисини вермәкдән вә дини ајинләри иҹра етмәкдән имтина етмәләридир.

Һаким прокурордан бу шаҝирдләрә гаршы ирәли сүрүлән иттиһамын сүбут олунмасыны истәди. Прокурор баш верәнләрлә бағлы ән хырда мәгамлары билмәк үчүн тутулан диҝәр шаҝирдләрдән даһа әтрафлы изаһат тәләб етди. Онлар да тәсдиг етдиләр ки, башга шаҝирдләр һимн охујан заман онлар һеч бир һөрмәтсизлик етмәјибләр.

Карунгҹи Арбитраж Мәһкәмәсинин 2014-ҹү ил нојабрын 28-дә дәрҹ олунан гәрарына әсасән һимн охумагдан имтина етмәк «һөрмәтсизлик әламәти кими сајылмамалыдыр». Мәһкәмәнин бу гәрары гануну тәсдиг етди вә ушаглара бәраәт газандырды. Бу гәрар һәмчинин Руанда мәктәбләриндәки дини ајры-сечкилијә дә сон гоја биләр.

Руандадакы Јеһованын Шаһидләри Мусанго мәктәбиндә охујан шаҝирдләрин мәһкәмә ишинин мүсбәт нәтиҹәсинә ҝөрә чох севиндиләр. Диҝәр мәһкәмә ишләриндә исә иманларына ҝөрә мәктәбдән говулан Јеһованын Шаһидләри мәктәбләрини дәјишмәли олдулар. Бәзиләри исә өз тәһсилләрини давам едә билмирләр, чүнки јеҝанә чыхыш јолу өзәл мәктәбләрдә охумагдыр. Буна да ки, аиләләрин имканы чатмыр.

Јеһованын Шаһиди олан валидејнләр дә башга валидејнләр кими өз ушаглары үчүн јахшы шејләр арзулајырлар. Онлар өз ушагларынын һәјатда тәҹрүбә газанмаларыны вә ҹәмијјәтин фајдалы үзвү олмаларыны истәјирләр. Јеһованын Шаһидләри үмид едирләр ки, Карунгҹи мәһкәмәсинин вердији бу мүсбәт гәрар Руанданын бүтүн мәктәбләриндә шаҝирдләрин виҹдан вә дин азадлыгларына һөрмәт едилмәсинә көмәк едәҹәк.