Чохушаглы ана олан Естел * һәмишә килсәјә ҝедирди. О, кешишә дејәндә ки, Мүгәддәс Китаб һагда өјрәнмәк истәјир, кешиш һеч бир тәдбир ҝөрмәди. Естел дә гәрара ҝәлди ки, даһа килсәјә ҝетмәсин. О дејир: «Ҝүнләрин бир ҝүнү килсә рәһбәрләриндән мәнә мәктуб ҝәлди. Сөзләринин ҹаны о иди ки, ҝедә билмәсәм дә, һеч олмаса пул ҝөндәрим. Бу ан фикирләшдим: “Демәли, онлары мәним ҝедиб-ҝетмәмәјим јох, пулум марагландырыр”».

Анҝелина адлы диндар бир гадын дејир: «Ҝетдијим килсәдә һәр ибадәт заманы үч дәфә сәбәт өтүрүлүрдү, һәр дәфә дә биз ора пул атмалыјдыг. Онлар һәмишә пул истәјирдиләр. Өз-өзүмә дејирдим: “Белә Аллаһ адамы олар?”».

Сизин әразиниздәки динләр пул јығмаг үчүн бу кими үсуллара әл атырлармы? Бәс Аллаһын Кәламы бунуму өјрәдир?

Аллаһын елчиси олан Иса пејғәмбәр демишди: «Тәмәннасыз алмысыныз, тәмәннасыз да верин» (Матта 10:8). Мүгәддәс Китабдакы кәламлар дәјәри бичилмәздир вә һәр кәс үчүн әлчатан олмалыдыр.

Бәс биринҹи әсрдә Аллаһын хидмәтчиләри ибадәтлә бағлы хәрҹләри неҹә өдәјирдиләр?

Ианә едән һәр бир инсан көнүлсүз вә ја мәҹбури дејил, үрәјиндә гәт етдији кими верирди, чүнки «Аллаһ севинҹлә верәни севир» (2 Коринфлиләрә 9:7). Аллаһын кечмишдә јашамыш бир хидмәтчиси јазырды: «Һәм Аллаһын хош хәбәрини тәблиғ едирдик, һәм дә араныздан һеч кими хәрҹә салмамаг үчүн ҝеҹә-ҝүндүз ишләјирдик» (1 Салониклиләрә 2:9). Бу һәвари Аллаһа хидмәт етмәк, еләҹә дә өзүнү доландырмаг үчүн чадыр тикмәклә мәшғул олурду (Һәвариләрин ишләри 18:2, 3).

Адәтән, Јеһованын Шаһидләри ибадәт ҝөрүшләрини Падшаһлыг залы адланан садә тикилиләрдә кечирирләр. Бәс хәрҹләр неҹә өдәнилир? Бәзи динләрдә олдуғу кими, ибадәт заманы нә пул јығылыр, нә дә нәзир үчүн мүраҹиәт олунур. Әксинә, Аллаһын Кәламына әсасланан руһани мөвзулары динләјән вә дәјәрләндирән һәр кәс залда јерләшән гутуја имканы јол верән гәдәр көнүллү ианә ата биләр.

Ајдындыр ки, бу журналын чап едилиб чатдырылмасы пулсуз баша ҝәлмир. Бунунла белә, сиз журналын сәһифәләриндә коммерсија характерли рекламлара вә ја пул үчүн мүраҹиәтләрә раст ҝәлмәјәҹәксиниз. Журналда Аллаһын Кәламындакы һәгигәтләр өн плана чәкилир.

Неҹә фикирләширсиниз, Јеһованын Шаһидләринин малијјәләшдирилмә мәсәләсиндә тутдуглары мөвге пејғәмбәрин сөзләринә вә кечмишдә јашамыш Аллаһын хидмәтчиләринин нүмунәсинә ујғун ҝәлир?