1. Һансы ҹәһәт Јеһованын хидмәтчиләрини өзүнү мәсиһи адландыран кәсләрдән фәргләндирир?

 ШӨВГЛӘ a тәблиғ етмәк Јеһованын хидмәтчиләрини өзүнү мәсиһи адландыран кәсләрдән фәргләндирир (Тит. 2:14). Амма, ола билсин, тәблиғ етмәјә һәрдән һеч һәвәсиниз олмасын. Ағсаггал кими хидмәт едән зәһмәткеш бир гардашын дедији бу сөзләрә, ола билсин, сиз дә шәриксиниз: «Һәрдән тәблиғ еләмәјә һеч һәвәсим олмур».

2. Нәјә ҝөрә бәзән тәблиғдә шөвгүмүзү горумаг чәтин олур?

² Ола билсин, тәблиғ етмәкдән чох, мүгәддәс хидмәтин диҝәр нөвләриндә даһа һәвәслә иштирак едирик. Нәјә ҝөрә бу беләдир? Чүнки теократик биналары тикәндә вә ја тәмир едәндә, тәбии фәлакәтдән зәрәрчәкәнләрә көмәк едәндә, јахуд баҹы-гардашлары руһландыранда бунун нәтиҹәсини дәрһал ҝөрүрүк. Бу исә бизә мәмнунлуг ҝәтирир. Диндашларымызла бирҝә чалышанда биз сүлһ вә мәһәббәтин һөкм сүрдүјү бир шәраитдә олуруг. Һәмчинин баҹы-гардашларын чәкдијимиз зәһмәтә дәјәр вердијини ҝөрүрүк. Тәблиғә ҝәлдикдә исә, ола биләр, бир әразидә илләрлә тәблиғ едәк, амма тәк-түк адам хош хәбәрә һај версин. Јахуд да елә инсанларла растлаша биләрик ки, хош хәбәри јахшы гаршыламасын. Һәмчинин билирик ки, сон јахынлашдыгҹа инсанларын мүждәјә марағы азалаҹаг (Мәт. 10:22). Бәс хидмәтдә шөвгүмүзү итирмәмәк, һәтта аловландырмаг үчүн нә едә биләрик?

3. Лука 13:6—9 ајәләриндәки мәсәлдән Исанын шөвгү һагда нә өјрәнирик?

³ Исанын нүмунәсинә нәзәр салмагла хидмәтдә шөвглү олмағы өјрәнә биләрик. Јер үзүндәки хидмәти боју Иса шөвгүнү  һеч вахт итирмәди. Әксинә, онун хидмәтдәки шөвгү заман кечдикҹә даһа да артырды. (Лука 13:6—9 ајәләрини охујун.) Иса Мәсиһ чәкдији бир мәсәлдә ҝөрдүјү иши бағбанын ишинә бәнзәтмишди. Бағбан үч ил әрзиндә әнҹир ағаҹына гуллуг етсә дә, о, бар вермәди. Ејнилә Иса да үч ил јәһудиләрә тәблиғ етсә дә, онлардан чоху Исанын шаҝирди олмады. Мәсәлдәки бағбан әнҹир ағаҹындан әлини үзмәдији кими, Иса да инсанлардан үмидини үзмәди. Әксинә, о, һәр фүрсәтдән истифадә едиб инсанларын үрәјинә јол тапмаға чалышырды.

4. Бу мәгаләдә Исанын нүмунә гојдуғу һансы дөрд саһәни арашдыраҹағыг?

⁴ Бу мәгаләдә ҝөрәҹәјик ки, Иса хидмәтинин хүсусилә сон алты ајы әрзиндә неҹә шөвглә тәблиғ етмишди. Онун дедикләриндән вә ҝөрдүјү ишләрдән нүмунә ҝөтүрмәклә бу ҝүн биз дә хидмәтдә шөвгүмүзү горуја биләрик. Ҝәлин ҝөрәк нөвбәти дөрд саһәдә Иса бизә һансы нүмунәни гојмушду: 1) О, фикрини Јеһованын ирадәсинә ҹәмләјирди. 2) Мүгәддәс Китаб пејғәмбәрлијинә диггәт јетирирди. 3) Јеһованын көмәјинә архаланырды. 4) Она гулаг асаҹаг инсанларын олаҹағына үмидини итирмирди.

О, ФИКРИНИ ЈЕҺОВАНЫН ИРАДӘСИНӘ ҸӘМЛӘЈИРДИ

5. Иса диггәтини Аллаһын ирадәсинә ҹәмләдијини неҹә ҝөстәрирди?

⁵ Иса «Аллаһын Падшаһлығы һаггында мүждәни» бөјүк шөвглә тәблиғ едирди, чүнки о билирди ки, Аллаһ онун бу иши ҝөрмәсини истәјир (Лука 4:43). Иса үчүн һәјатда ән ваҹиб иш хош хәбәри тәблиғ етмәк иди. Һәтта хидмәтинин сонларына јахын Иса шәһәрбәшәһәр, кәндбәкәнд ҝәзиб инсанлара тәлим верирди (Лука 13:22). Үстәлик, о, әлавә шаҝирдләр һазырлајырды ки, тәблиғ ишиндә онунла әмәкдашлыг етсинләр (Лука 10:1).

6. Тәблиғ иши илә диҝәр теократик тәјинатлар арасында һансы әлагә вар? (Һәмчинин шәклә бахын.)

⁶ Бу ҝүн дә Јеһова вә Иса бизим әсас етибарилә тәблиғ иши илә мәшғул олмағымызы истәјир (Мәт. 24:14; 28:19, 20). Тәблиғ иши илә диҝәр теократик тәјинатлар арасында бирбаша әлагә вар. Мәсәлән, биз теократик биналар тикмәклә вә ја Бејтелдә хидмәт етмәклә саһәдәки иши дәстәкләјирик. Тәбии фәлакәтләр заманы баҹы-гардашлары  тәкҹә зәрури еһтијаҹларла тәмин етмәклә кифајәтләнмирик. Һәмчинин онлара тәблиғ дә дахил олмагла, руһани ишләрдән галмамаға көмәк едирик. Әҝәр јадда сахласаг ки, тәблиғ иши чох ваҹибдир вә бу, ҝөрмәли олдуғумуз әсас ишдир, онда тәблиғдә мүнтәзәм иштирак едәҹәјик. Маҹарыстандан олан Јануш адлы ағсаггал дејир: «Өзүмә хатырладырам ки, һеч бир теократик иш тәблиғ ишини әвәз едә билмәз. Әсас тәјинатымыз тәблиғ етмәкдир».

7. Нәјә ҝөрә Јеһова тәблиғ ишини давам етдирмәјимизи истәјир? (1 Тимутијә 2:3, 4).

⁷ Инсанлара Јеһованын ҝөзү илә бахсаг, тәблиғ ишиндә шөвгүмүзү артыра биләрик. Јеһова истәјир ки, мүмкүн гәдәр чох инсан хош хәбәри ешидиб гәбул етсин. (1 Тимутијә 2:3, 4 ајәләрини охујун.) Буна ҝөрә дә О, хилас хәбәрини сәриштәли шәкилдә чатдырмағымыз үчүн бизә тәлим верир. Мәсәлән, «Инсанлары сев. Шаҝирд һазырла» брошүрүндәки фајдалы мәсләһәтләр бизә шаҝирд һазырламаг мәгсәдилә сөһбәтә башламаға көмәк едә биләр. Инсанлар бу ҝүн хош хәбәри гәбул етмәсәләр дә, бөјүк мүсибәтин сонуна гәдәр онларын белә бир имканы јарана биләр. Бәлкә дә, бу ҝүн дедикләримиз ҝәләҹәкдә онларын јадларына дүшәҹәк вә Јеһоваја хидмәт етмәк истәјәҹәкләр. Бу исә јалныз тәблиғ ишини давам етдирдијимиз тәгдирдә мүмкүндүр.

О, ПЕЈҒӘМБӘРЛИКЛӘРӘ ДИГГӘТ ЈЕТИРИРДИ

8. Билдији һансы пејғәмбәрликләр Исаја вахтындан дүзҝүн истифадә етмәјә көмәк етди?

⁸ Иса Мүгәддәс Китабдакы пејғәмбәрликләрин неҹә јеринә јетәҹәјини билирди. О билирди ки, ҹәми үч ил јарым тәблиғ едәҹәк (Дән. 9:26, 27). Һәмчинин пејғәмбәрликләрә әсасән, нә вахт вә неҹә өлдүрүләҹәји дә она мәлум иди (Лука 18:31—34). Билдији бу шејләр Исаја вахтындан дүзҝүн истифадә етмәјә көмәк етди. Беләҹә, она тапшырылан иши тамамламаг үчүн шөвглә тәблиғ етди.

9. Пејғәмбәрликләри баша дүшмәјимиз тәблиғ етмәк шөвгүмүзү неҹә артырыр?

⁹ Пејғәмбәрликләрин үзәриндә дүшүнмәк шөвглә тәблиғ етмәјимизә көмәк едә биләр. Биз бу дүнјанын сонуна аз вахт галдығындан хәбәрдарыг. Һәмчинин бизә мәлумдур ки, бу ҝүн баш верән һадисәләр вә инсанларын әһвали-руһијјәси ахырзаманын әламәтидир. Бундан әлавә, Мүгәддәс Китаба әсасән «ахырзаманда» шимал падшаһы илә ҹәнуб падшаһы бир-бири илә чәкишәҹәк (Дән. 11:40). Биз бу пејғәмбәрлијин Бөјүк Британија вә Америка дөвләтләри илә Русија вә онун мүттәфигләри арасындакы чәкишмәјә аид олдуғуну билирик. Һәмчинин Дәнјал 2:43—45 ајәләриндә тәсвир олунан һејкәлин ајагларынын Бөјүк Британија вә Америка дөвләтләрини тәмсил етдији дә бизә мәлумдур. Бу пејғәмбәрлијә әсасән әминик ки, тезликлә, чох тезликлә Аллаһын Падшаһлығы инсан һөкумәтләрини мәһв едәҹәк. Бүтүн бу пејғәмбәрликләр сона чох јахын бир дөврдә јашадығымызы вә јубанмадан тәблиғ етмәјин ваҹиблијини бизә хатырладыр.

10. Пејғәмбәрликләр тәблиғ етмәк шөвгүмүзү даһа неҹә артырыр?

¹⁰ Мүгәддәс Китаб пејғәмбәрликләринә һәм дә инсанларла бөлүшмәјә ҹан атдығымыз бир хәбәр дә дахилдир. Доминикан Республикасында хидмәт едән Кери адлы бир баҹы дејир: «Јеһованын ҝәләҹәк дөврлә бағлы вердији ҝөзәл вәдләр һагда дүшүнәндә истәјирәм, буну һәр кәсә мүждәләјим». Баҹы сөзүнә әлавә едир: «Инсанларын бу ҝүн һансы проблемләрлә  үзләшдијини ҝөрәндә баша дүшүрәм ки, тәкҹә мәним јох, онларын да Јеһованын бу ҝөзәл вәдләрини ешитмәјә еһтијаҹы вар». Мүгәддәс Китабдакы пејғәмбәрликләр ҝөстәрир ки, Јеһова тәблиғ ишиндә бизә дајагдыр вә бу, хидмәтимизи давам етдирмәјә бизи тәшвиг едир. Маҹарыстанда јашајан Лејла баҹы дејир: «Әшија 11:6—9 ајәләринә әсасән Јеһованын көмәји илә истәнилән инсан дәјишә биләр. Бу ајәләр мәни тәшвиг едир ки, хош хәбәри “бу, гәбул етмәз” дедијим инсанларла да бөлүшүм». Замбијада јашајан Кристофер адлы гардаш дејир: «Марк 13:10 ајәсиндә габагҹадан дејилдији кими мүждә бүтүн дүнјада тәблиғ едилир. Бу пејғәмбәрлијин јеринә јетмәсиндә мәним дә пајымын олмасыны өзүмә шәрәф билирәм». Бәс сизи һансы Мүгәддәс Китаб пејғәмбәрликләри тәблиғ ишини давам етмәјә тәшвиг едир?

О, ЈЕҺОВАНЫН КӨМӘЈИНӘ АРХАЛАНЫРДЫ

11. Нәјә ҝөрә Иса тәблиғ ишини шөвглә давам етдирмәк үчүн Јеһованын көмәјинә архаланмалы иди? (Лука 12:49, 53).

¹¹ Иса әмин иди ки, Јеһова она шөвглә тәблиғи давам етдирмәјә көмәк едәҹәк. О, инсанларла һөрмәтҹил данышса да, билирди ки, Падшаһлыг һагда хош хәбәрә ҝөрә нифрәтә туш ҝәләҹәк вә ҝүҹлү тәгибләрә мәруз галаҹаг. (Лука 12:49, 53 ајәләрини охујун.) Исанын тәблиғдә өјрәтдикләри дин хадимләринин хошуна ҝәлмәдијинә ҝөрә ону дәфәләрлә өлдүрмәјә ҹәһд етмишдиләр (Јәһ. 8:59; 10:31, 39). Лакин һеч нә Исаны дајандыра билмәди. Чүнки о, Јеһованын көмәјинә архаланырды. О демишди: «Мән тәк дејиләм, мәни ҝөндәрән Атам мәнимләдир... О, мәни тәк гојмајыб, чүнки мән һәмишә Онун бәјәндији ишләри ҝөрүрәм» (Јәһ. 8:16, 29).

12. Иса шаҝирдләрини тәгибләрә рәғмән тәблиғи давам етмәјә неҹә һазырламышды?

¹² Иса шаҝирдләринә хатырладырды ки, Јеһованын көмәјинә архалана биләрләр. О, Јеһованын онлары тәгибләр заманы белә тәк гојмајаҹағына дәфәләрлә әмин етмишди (Мәт. 10:18—20; Лука 12:11, 12). Инсанларын хош хәбәрә гаршы чыхаҹағыны билдији үчүн шаҝирдләринә еһтијатлы олмағы тапшырмышды (Мәт. 10:16; Лука 10:3). Һәмчинин онлара өјрәтмишди ки, гулаг асмаг истәмәјәнләри мәҹбур етмәсинләр (Лука 10:10, 11). Еләҹә дә тәгиб олунарларса, тәһлүкәни дујуб гачсынлар (Мәт. 10:23). Иса нә гәдәр шөвглү олса да вә Јеһоваја  архаланса да, ҝәрәксиз јерә өзүнү тәһлүкәјә атмырды (Јәһ. 11:53, 54).

13. Нәјә ҝөрә Јеһованын сизә көмәк едәҹәјинә әмин ола биләрсиниз?

¹³ Бу ҝүн биз дә тәгибләрлә үзләширик. Буна ҝөрә дә шөвглә тәблиғ етмәјә давам етмәк үчүн Јеһованын көмәјинә еһтијаҹымыз вар (Вәһј 12:17). Бәс Јеһованын бизә дајаг олаҹағына нәјә ҝөрә әмин ола биләрик? Ҝәлин Исанын Јәһја 17-ҹи фәсилдә јазылмыш дуасына нәзәр салаг. Иса Јеһовадан һәвариләри горумасыны хаһиш етмишди. Јеһова онун бу дуасына ҹаваб верди. «Һәвариләрин ишләри» китабындан ҝөрә биләрик ки, Јеһова онлара тәгибләрә рәғмән тәблиғ ишини шөвглә давам етдирмәјә неҹә көмәк едиб. Иса һәм дә Јеһовадан хаһиш етмишди ки, О, хош хәбәрә иман ҝәтирәҹәк кәсләри дә горусун. Бу инсанларын сырасына сиз дә дахилсиниз. Јеһова Исанын бу дуасына индијәдәк ҹаваб верир. Аллаһ һәвариләрә көмәк олдуғу кими сизә дә көмәк олаҹаг (Јәһ. 17:11, 15, 20).

14. Чәтин анларда белә, шөвглә тәблиғ едә биләҹәјимизә нәјә ҝөрә әминик? (Һәмчинин шәклә бахын.)

¹⁴ Сон јахынлашдыгҹа хош хәбәри шөвглә тәблиғ етмәк чәтинләшә биләр, амма бу иши ҝөрмәк үчүн лазыми көмәји алаҹағыг (Лука 21:12—15). Иса вә шаҝирдләри кими биз дә тәблиғ едәркән мүбаһисәләрдән узаг дуруруг вә сечими инсанын өз өһдәсинә бурахырыг. Һәтта фәалијјәтимизин гадаған олундуғу әразиләрдә дә баҹы-гардашлар хош хәбәри тәблиғ етмәјә давам едирләр. Чүнки онлар өз ҝүҹләринә дејил, Јеһоваја архаланырлар. Јеһова биринҹи әсрдәки хидмәтчиләринә ҝүҹ вердији кими, бу ҝүн бизә дә ҝүҹ верир ки, тәблиғ иши «там јеринә јетирилсин», та Јеһова «битди» дејәнә кими (2 Тим. 4:17). Әмин ола биләрсиниз ки, Јеһоваја архалансаныз, шөвглә тәблиғ етмәјә давам едә биләҹәксиниз.

О, ИНСАНЛАРДАН ҮМИДИНИ ҮЗМҮРДҮ

15. Нәјә әсасән дејә биләрик ки, Иса тәблиғ ишинин ҝөзәл бәһрәләр верәҹәјинә әмин иди?

¹⁵ Иса әмин иди ки, хош хәбәрә һај верән инсанлар олаҹаг. Бу она хидмәтдә шөвгүнү горумаға көмәк едирди. Мәсәлән, ерамызын 30-ҹу илинин сонларына јахын Иса чохлу сајда инсанын мүждәјә һај вермәјә һазыр олдуғуну ҝөрүрдү. О, инсанлары «бичинә һазыр мәһсул»а бәнзәтмишди  (Јәһ. 4:35). Тәхминән бир ил сонра Иса шаҝирдләринә мәһсулун бол олдуғуну демишди (Мәт. 9:37, 38). Бир мүддәт сонра о, ејни сөзләри јенә тәкрарламышды: «Мәһсул бол, бичинчи исә аздыр. Буна ҝөрә дә бичин Саһибинә јалварын ки, мәһсулу јығмаға бичинчи ҝөндәрсин» (Лука 10:2). Бәли, Иса хош хәбәрә һај верәҹәк инсанларын олаҹағына әминлијини итирмирди вә буну ҝөрәндә чох севинирди (Лука 10:21).

16. Исанын чәкдији нүмунәләр тәблиғ ишинә мүнасибәтимизә неҹә тәсир едә биләр? (Лука 13:18—21; һәмчинин шәклә бахын.)

¹⁶ Иса шаҝирдләринә хатырладырды ки, чатдырдыглары хош хәбәр ҝөзәл бәһрәләр верәҹәк. Бунун да сајәсиндә шаҝирдләр хидмәтдә шөвгләрини горујурдулар. Мисал үчүн, ҝәлин Исанын чәкдији ики нүмунәјә нәзәр салаг. (Лука 13:18—21 ајәләрини охујун.) Иса хардал тохумуну нүмунә чәкиб демишди ки, Падшаһлыг һагда хош хәбәр инанылмаз дәрәҹәдә јајылаҹаг вә һеч нә онун инкишафынын гаршысыны ала билмәјәҹәк. Мајаны нүмунә чәкәрәк исә мүждәнин ҝениш јајылаҹағыны вә дәрһал ҝөрүнмәсә дә, инсанлары дәјишмәјә тәшвиг едәҹәјини изаһ етмишди. Беләҹә, Иса шаҝирдләрини әмин етди ки, тәблиғ етдикләри мүждә инсанлара бөјүк фајда ҝәтирәҹәк.

17. Тәблиғ ишинин ҝөзәл бәһрәләр верәҹәјинә нәјә ҝөрә әмин ола биләрик?

¹⁷ Тәблиғ ишинин дүнја мигјасында нә гәдәр инсана көмәк етдијини ҝөрәндә мүждәни бәјан етмәјә даһа да һәвәсләнирик. Һәр ил һәгигәтә мараг ҝөстәрән милјонларла инсан анма мәрасиминдә иштирак едир вә Јеһованын Шаһидләри илә Мүгәддәс Китабы өјрәнир. Јүз минләрлә инсан вәфтиз олунур вә бизимлә бирҝә тәблиғ едир. Һәлә билмирик, нә гәдәр инсан хош хәбәрә һај верәҹәк. Амма билирик ки, Јеһова бөјүк бир издиһам топлајыр вә онлары јахынлашан бөјүк мүсибәтдән хилас едәҹәк (Вәһј 7:9, 14). Бичин Саһиби тарланын һәлә мәһсул верәҹәјини ҝөрүр. Буна ҝөрә дә биз тәблиғ ишинә давам етмәлијик.

18. Инсанларын биздә нәји мүшаһидә етмәсини истәјирик?

¹⁸ Исанын шаҝирдләри һәмишә тәблиғдәки шөвгләри илә сечилирдиләр. Инсанлар һәвариләрин ҹәсарәтлә данышдығыны ҝөрәндә «баша дүшдүләр ки, онлар Иса илә бир јердә олан адамлардандырлар» (Һәв. 4:13). Ејнилә биз дә истәјирик, шөвгүмүзү вә ҹәсарәтимизи мүшаһидә едән инсанлар Исадан өрнәк ҝөтүрдүјүмүзү ҝөрсүнләр.