1. Вәфтиз олунмаг үчүн һансы ҝөзәл сәбәбләр вар?

 СИЗӘ һәјат бәхш едән, һәр бир ҝөзәл пајы верән Аллаһыныз Јеһованы севирсиниз? Бәс Она севҝинизи неҹә ҝөстәрә биләрсиниз? Буну етмәјин ән ҝөзәл јолу өзүнүзү Она һәср едиб суда вәфтиз олунмагдыр. Бу аддымлары атанда Јеһованын аиләсинин үзвү олурсунуз. Беләҹә, артыг Јеһоваја мәхсус олдуғунуз үчүн О, бир Ата вә Дост кими гајғыныза галаҹаг вә сизә јол ҝөстәрәҹәк (Зәб. 73:24; Әшј. 43:1, 2). Һәјатынызы Јеһоваја һәср едиб вәфтиз олунмаг сизә һәм дә әбәди јашамаг үмиди верир (1 Бут. 3:21).

2. Бу мәгаләдә нә һагда данышаҹағыг?

² Әҝәр сизи вәфтиз олунмагдан сахлајан нәсә варса, билин ки, сиз тәк дејилсиниз. Сиздән әввәл дә милјонларла инсан вәфтизә јарарлы олмаг үчүн әмәлиндә вә дүшүнҹә тәрзиндә дәјишикликләр едиб. Инди онлар Јеһоваја бөјүк севинҹлә вә шөвглә хидмәт едирләр. Ҝәлин ерамызын биринҹи әсриндә вәфтиз олунмуш бәзи инсанларын нүмунәсинә бахаг. Ҝөрәк онлар һансы чәтинликләрлә үзләшибләр вә бизә һансы нүмунәни гојублар.

СӘМӘРИЈЈӘЛИЛӘР ВӘФТИЗ ОЛУНДУ

3. Бәзи сәмәријјәлиләр вәфтиз олунмаг үчүн һансы дәјишикликләри етмәли олмушду?

³ Иса Мәсиһин дөврүндә сәмәријјәлиләр дини бир тәригәтә мәхсус идиләр. Сәмәријјәлиләрин чоху Јәһудијјәнин шималында јерләшән гәдим Сиһам вә Сәмәријјә шәһәрләринин әтрафында јашајырды. Онлар вәфтиз олунмаг үчүн Аллаһын Кәламы барәдә там билик алмалы идиләр. Сәмәријјәлиләр Мүгәддәс Китабын јалныз илк 5 китабынын, јәни «Јарадылыш»дан «Ганунун тәкрары»на кими олан һиссәнин вә ола билсин, «Јушә» китабынын Аллаһдан илһам алдығыны гәбул едирдиләр. Бунунла белә, онлар Ганунун тәкрары 18:18, 19 ајәләриндә јазылан вәдә әсасән Мәсиһин ҝәлишини ҝөзләјирдиләр  (Јәһ. 4:25). Онлар вәфтиз олунмаг үчүн Исанын вәд едилмиш Мәсиһ олдуғуну гәбул етмәли идиләр. «Хејли сәмәријјәли» белә дә етди (Јәһ. 4:39). Бундан әлавә, сәмәријјәлиләр һәгигәти өјрәнмәк үчүн јәһудиләрә гаршы олан гәрәз һиссинә үстүн ҝәлмәли идиләр (Лука 9:52—54).

4. Һәвариләрин ишләри 8:5, 6, 14 ајәләринә әсасән бәзи сәмәријјәлиләр Филипин тәблиғинә неҹә јанашды?

⁴ Сәмәријјәлиләрә вәфтиз олунмаға нә көмәк етди? Мүждәчи Филип «Мәсиһ һаггында» тәблиғ едәндә бәзи сәмәријјәлиләр «Аллаһын сөзүнү гәбул етди». (Һәвариләрин ишләри 8:5, 6, 14 ајәләрини охујун.) Филипин јәһуди олмасы сәмәријјәлиләр үчүн манеә олмады. Бәлкә дә онлар Төвратда Аллаһын ајры-сечкилик етмәдији илә бағлы ајәләри хатырламышдылар (Ган. 10:17—19). Һәр бир һалда, сәмәријјәлиләр Филипин Мәсиһ һаггында дедикләринә ҹидди јанашдылар вә Аллаһын Филипи ҝөндәрдијинә даир ајдын сүбутлары данмадылар. Бундан әлавә, Филип чохлу мөҹүзәләр ҝөстәрирди, мәсәлән, хәстәләри сағалдырды вә ҹинләри говурду (Һәв. 8:7).

5. Сәмәријјәлиләрин нүмунәсиндән нәләри өјрәнирик?

⁵ Гәрәз вә билик азлығы сәмәријјәлиләри руһани инкишафдан сахлаја биләрди. Амма онлар буна јол вермәдиләр. Филипин өјрәтдикләринин һәгигәт олдуғуна әмин оландан сонра сәмәријјәлиләр вәфтиз олунмағы јубатмадылар. Бунунла бағлы Мүгәддәс Китабда дејилир: «Филип ҝәлиб онлара Аллаһын Падшаһлығы вә Иса Мәсиһин ады барәсиндә мүждәни тәблиғ едәндә ҹамаат она инанды. Һәм кишиләр, һәм гадынлар вәфтиз олундулар» (Һәв. 8:12). Бәс сиз Аллаһын Кәламынын һәгигәт олдуғуна әминсиниз? Инанырсыныз ки, Јеһованын Шаһидләри гәрәзә үстүн ҝәләрәк бир-бирләринә әсл мәсиһиләри таныдан мәһәббәт бәсләјирләр? (Јәһ. 13:35). Онда гој вәфтиз олунмаг фикри сизи горхутмасын. Архајын олун, Јеһова сизә јар олаҹаг!

6. Рубенин нүмунәсиндән нә өјрәнирсиниз?

⁶ Алманијада јашајан Рубен Јеһованын Шаһидләринин аиләсиндә бөјүјүб. Јенијетмә олан заман онун Аллаһын варлығы илә бағлы шүбһәләри јаранмышды. Бәс о, шүбһәләринә неҹә галиб ҝәлди? Рубен ҝөрдү ки, бу мөвзу илә бағлы билији аздыр. Буна ҝөрә дә дәриндән мүталиә етмәк гәрарына ҝәлди. О дејир: «Мүталиә заманы шүбһәләрими саф-чүрүк етмәли идим. Тәкамүл мөвзусуну дәфәләрлә арашдырдым». Рубен «Гајғыкеш Јарадан мөвҹуддурму?» нәшрини охуду. Онун иманынын мөһкәмләнмәсиндә бу нәшрин бөјүк ролу олду. О өз-өзүнә һәтта белә демишди: «Јеһова һәгигәтән дә мөвҹуддур!» Рубен баш идарәмизи зијарәт едән заман үмумдүнја гардашлыға олан мәһәббәти бирә-беш артды. О, Алманијаја ҝери гајыдыб 17 јашында вәфтиз олунду. Әҝәр өјрәндикләринизлә бағлы сизин дә шүбһәләриниз варса, онда нәшрләримизи мүталиә едәрәк шүбһәләринизә галиб ҝәлә биләрсиниз. Дәгиг билик шүбһәләрә чарәдир (Ефес. 4:13, 14). Үстәлик, дүнјанын мүхтәлиф өлкәләриндә јашајан Јеһованын Шаһидләри арасындакы мәһәббәт вә бирлик барәдә ешитдикләриниз, һәмчинин буну өз јығынҹағынызда ҝөрмәјиниз үмумдүнја гардашлығымыза миннәтдарлығынызы артыраҹаг.

ТАРСЛЫ ШАУЛ ВӘФТИЗ ОЛУНДУ

7. Шаул дүшүнҹәсиндә һансы дәјишиклији етмәли иди?

⁷ Ҝәлин тарслы Шаулун нүмунәсинә нәзәр јетирәк. О, јәһуди мәзһәбиндә хејли габаға ҝетмишди вә јәһудиләр арасында сајылыб-сечилирди (Гал. 1:13, 14; Филип. 3:5). О дөврдә јәһудиләрин чоху инанырды  ки, мәсиһиләр дөнүкдүр. Шаул амансызҹасына мәсиһиләри тәгиб едирди, елә билирди ки, бунунла Аллаһын ирадәсини јеринә јетирир (Һәв. 8:3; 9:1, 2; 26:9—11). Исаны гәбул едиб мәсиһи кими вәфтиз олунмаг үчүн Шаул тәгиб һәдәфинә чеврилмәји ҝөзә алмалы иди.

8. а) Шаула вәфтиз олунмаға нә көмәк етди? б) Һәвариләрин ишләри 22:12—16 ајәләринә әсасән Һәнәнја Шаула неҹә көмәк етди? (Һәмчинин шәклә бахын.)

⁸ Шаула вәфтиз олунмаға нә көмәк етди? Иса Шаулла ҝөјдән данышанда парлаг ишыг Шаулун ҝөзләрини кор етди (Һәв. 9:3—9). О, үч ҝүн оруҹ тутду вә шүбһәсиз, башына ҝәләнләр һаггында дәриндән дүшүндү. Бәли, Шаул артыг әмин иди ки, Иса вәд олунмуш Мәсиһдир вә онун давамчылары һәгиги диндәдирләр. Һәмин вахт, јәгин, Шаул Стефанын өлүмүндә әли олдуғу үчүн виҹдан әзабы чәкирди (Һәв. 22:20). Үчүнҹү ҝүнүн сонунда Һәнәнја адлы шаҝирд меһрибанҹасына Шаула јахынлашыб онун ҝөзләринә шәфа верди вә ону јубанмадан вәфтиз олунмаға тәшвиг етди. (Һәвариләрин ишләри 22:12—16 ајәләрини охујун.) Шаул она едилән көмәји тәвазөкарлыгла гәбул етди вә вәфтиз олунараг һәјатында јени сәһифә ачды (Һәв. 9:17, 18).

9. Һансы саһәләрдә Шаулдан нүмунә ҝөтүрә биләрик?

⁹ Һансы саһәләрдә Шаулдан нүмунә ҝөтүрә биләрик? Гүрур вә инсан горхусу ону вәфтиз олунмагдан сахлаја биләрди. Амма Шаул буна јол вермәди. О, Мәсиһ һаггында һәгигәти өјрәнәндән сонра тәвазөкарлыгла һәјатында дәјишикликләр етди (Һәв. 26:14, 19). Тәгиб олунаҹағыны билә-билә көнүллү шәкилдә мәсиһилији гәбул етди (Һәв. 9:15, 16; 20:22, 23). Вәфтиз олунандан сонра о, даима мүхтәлиф сынаглар заманы Јеһованын көмәјинә архаланды (2 Кор. 4:7—10). Сиз Јеһованын Шаһиди кими вәфтиз олунанда, ола билсин, иманыныз сынансын, јахуд чәтинликләрлә үзләшәсиниз. Амма әмин ола биләрсиниз ки, Јеһова Аллаһ вә Иса Мәсиһ сизә дөзүмлү олмаға вә садиг галмаға һәмишә көмәк едәҹәк (Филип. 4:13).

10. Аннанын нүмунәсиндән нә өјрәнирсиниз?

 ¹⁰ Анна адлы бир баҹы Шәрги Авропада күрд аиләсиндә бөјүјүб. Анасы вәфтиз олунандан сонра Анна атасынын разылығы илә 9 јашында Мүгәддәс Китабы өјрәнмәјә башлады. Амма онларла бирликдә јашајан гоһумлары Аннаја гаршы чыхдылар. Онлар ата-бабаларынын дининдән дөнмәји рүсвајчылыг һесаб едирдиләр. Аннанын 12 јашы оланда о, атасындан вәфтиз олунмаг үчүн иҹазә истәди. Атасы билмәк истәјирди ки, бу, Аннанын өз истәјидир, јохса кимсә она тәзјиг ҝөстәрир. Анна белә ҹаваб верди: «Мән Јеһованы севирәм». Атасы онун вәфтиз олунмасына разылыг верди. Вәфтиз олунандан сонра гоһумлары Аннаны әлә салмаға, инҹитмәјә давам едирдиләр. Һәтта бир гоһуму демишди: «Каш әхлагсызлыг едәрдин, ја да сигарет чәкәрдин, амма Јеһованын Шаһиди олмаздын». Анна бүтүн бунлара неҹә дөздү? О дејир: «Јеһова мәнә ҝүҹлү олмаға көмәк етди. Һәмчинин валидејнләрим дә мәнә чох дәстәк олурду». Анна һәјатында Јеһованын көмәјини ҝөрдүјү хүсуси анларын сијаһысыны тутур. О, вахташыры һәмин сијаһыја ҝөз ҝәздириб Јеһованын она көмәк етдији вахтлары јадына салыр. Әҝәр тәгибләрдән горхурсунузса, онда Јеһованын сизә дә көмәк едәҹәјини унутмајын (Ибр. 13:6).

КОРНИЛИ ВӘФТИЗ ОЛУНДУ

11. Корнилијә вәфтиз олунмаға нә мане ола биләрди?

¹¹ Биз Корнилидән дә чох шеј өјрәнә биләрик. О, Рома ордусунда табелијиндә тәхминән 100 әсҝәр олан «јүзбашы» иди (Һәв. 10:1). Буна ҝөрә дә Корнили ҝүман ки, ҹәмијјәтдә вә ордуда сајылыб-сечилән адам олмушду. Мүгәддәс Китабда һәмчинин јазылыб ки, о, «мөмин бир адам иди» вә «халг үчүн саваб ишләр ҝөрүр»дү (Һәв. 10:2). Јеһова Бутрусу Корнилинин јанына ҝөндәриб она хош хәбәри данышмасыны бујурмушду. Бәс тутдуғу јүксәк мөвге она вәфтиз олунмаға мане олду?

12. Корнилијә вәфтиз олунмаға нә көмәк етди?

¹² Корнилијә вәфтиз олунмаға нә көмәк етди? Мүгәддәс Китабда дејилир ки, о вә аиләси «Аллаһдан горхан адамлар иди». Корнили даима Аллаһа дуа едирди (Һәв. 10:2). Бутрус Корнилијә хош хәбәри чатдыранда о вә аиләси Мәсиһи гәбул едиб дәрһал вәфтиз олунду (Һәв. 10:47, 48). Шүбһәсиз, Корнили аиләси илә бирҝә Јеһоваја ибадәт етмәк үчүн һәјатында истәнилән дәјишиклији етмәјә һазыр иди (Јуш. 24:15; Һәв. 10:24, 33).

13. Корнилидән нә өјрәнә биләрсиниз?

¹³ Шаул кими Корнилијә дә тутдуғу мөвге мәсиһи олмаға мане ола биләрди. Амма Корнили буна јол вермәди. Вәфтиз олунмаг үчүн сиз дә һәјатынызда бөјүк дәјишикликләр етмәлисиниз? Әҝәр еләдирсә, билин ки, Јеһова кими Јардымчымыз вар. Әҝәр сиз Мүгәддәс Китаб принсипләринә ујғун јашамаға гәтијјәтлисинизсә, О сизә көмәк олаҹаг.

14. Тсујошинин нүмунәсиндән нә өјрәнирсиниз?

¹⁴ Јапонијадан олан Тсујоши вәфтиз олунмаг үчүн ишиндә мүәјјән дәјишикликләр етмәли иди. О, ҝүлләрдән мүхтәлиф композисијалар јарадан Икенобо адлы танынмыш мәктәбин мүдир мүавини иди. Мәктәбин мүдири адәтән дәфн мәрасимләри үчүн ҝүлләр һазырлајырды вә орада кечирилән Буддист ајинләриндә иштирак едирди. Амма өзү ҝедә билмәјәндә ону Тсујоши әвәз едирди. Тсујоши өлүмлә бағлы һәгигәти өјрәнәндән сонра баша дүшдү ки, бу ҹүр ајинләрдә иштирак едә-едә вәфтиз олуна  билмәз. Буна ҝөрә дә о, гәрара ҝәлди ки, даһа буддист ајинләриндә иштирак етмәсин (2 Кор. 6:15, 16). Тсујоши бунунла бағлы мүдири илә данышды. Бәс нәтиҹә нә олду? О, ајинләри иҹра етмәдән ишинә давам едә билди. Тсујоши Мүгәддәс Китабы өјрәнмәјә башлајандан тәхминән бир ил сонра вәфтиз олунду a. Әҝәр сиз дә Аллаһын разылығыны газанмаг үчүн ишиниздә дәјишиклик етмәлисинизсә, әмин олун ки, О сизин вә аиләнизин тәләбатларынын гајғысына галаҹаг (Зәб. 127:2; Мәт. 6:33).

КОРИНФЛИЛӘР ВӘФТИЗ ОЛУНДУ

15. Коринфлиләрә вәфтиз олунмаға нә мане ола биләрди?

¹⁵ Гәдим Коринф шәһәриндә јашајан инсанлар маддијјата дүшкүнлүкләри вә әхлагсыз һәјат тәрзләри илә ад чыхармышды. Орада јашајан инсанларын чоху Аллаһын бәјәнмәдији ишләрлә мәшғул олурду. Сөзсүз, бу ҹүр мүһит хош хәбәри гәбул етмәк истәјән инсанлар үчүн әсл чәтинлик јарадырды. Бунунла белә, һәвари Булус бу шәһәрә ҝәлиб Мәсиһ һаггындакы хош хәбәри тәблиғ едәндә «хејли коринфли... инаныб вәфтиз олунду» (Һәв. 18:7—11). Сонра Аға Иса Мәсиһ рөјада Булуса ҝөрүнүб деди: «Бу шәһәрдә һәлә чох адам мәнә инанаҹаг». Беләҹә, Булус орада ил јарым галыб хош хәбәрин тәблиғинә давам етди.

16. Коринфдә јашајан бәзи инсанлара манеәләри ашыб вәфтиз олунмаға нә көмәк етди? (2 Коринфлиләрә 10:4, 5).

¹⁶ Коринфлиләрә вәфтиз олунмаға нә көмәк етди? (2 Коринфлиләрә 10:4, 5 ајәләрини охујун.) Аллаһын Кәламы вә мүгәддәс руһун ҝүҹү сајәсиндә коринфлиләр һәјатларында көклү дәјишикликләр етдиләр (Ибр. 4:12). Коринфдә јашајан инсанлар Мәсиһ һаггындакы хош хәбәри гәбул едәндән сонра ички дүшкүнлүјү, оғурлуг вә һомосексуаллыг кими әмәлләрдән вә вәрдишләрдән әл чәкә билдиләр (1 Кор. 6:9—11) b.

17. Коринфлиләрдән нә өјрәнә биләрик?

¹⁷ Диггәт јетирин ки, бәзи коринфлиләрин дәринә көк атмыш пис вәрдишләри олса да, дүшүнмәдиләр ки, мәсиһи олмаг онлар үчүн чох мүшкүл мәсәләдир. Коринфлиләр әбәди һәјата апаран дар јолда галмаг үчүн әлләриндән ҝәләни етдиләр (Мәт. 7:13, 14). Сиз дә вәфтиз олунмағыныза мане олан һансыса пис вәрдишинизлә вә ја әмәлинизлә  мүбаризә апарырсыныз? Һеч вахт тәслим олмајын! Нәфсинизә үстүн ҝәлмәк үчүн Јеһоваја јалварыб Ондан мүгәддәс руһ истәјин.

18. Мониканын нүмунәсиндән нә өјрәнирсиниз?

¹⁸ Ҝүрҹүстанда јашајан Моника баҹы вәфтиз олунмаг үчүн налајиг данышығыны тәрҝитмәјә вә пис әјләнҹәләрдән узаг дурмаға вар ҝүҹү илә чалышырды. О дејир: «Јенијетмә вахты ҝүҹ мәнбәјим дуа иди. Јеһова билирди ки, мән дүзҝүн давранмаг истәјирәм. О, һәмишә мәнә көмәк едирди, јол ҝөстәрирди». Моника 16 јашында вәфтиз олунду. Ибадәтинизин Јеһоваја мәгбул олмасы үчүн сиз дә бәзи әмәлләринизә сон гојмалысыныз? Онда даима Јеһовадан ҝүҹ диләјин. О, сәхавәтлә сизә Өз мүгәддәс руһундан верәҹәк (Јәһ. 3:34).

ИМАНЫНЫЗ ДАҒЛАРЫ ЈЕРИНДӘН ОЈНАДА БИЛӘР

19. Дағ бојда чәтинликләрин өһдәсиндән ҝәлмәјә сизә нә көмәк едә биләр? (Һәмчинин шәклә бахын.)

¹⁹ Әмин олун ки, Јеһова сизи севир вә сизи аиләсинин бир үзвү кими ҝөрмәк истәјир. Вәфтиз олунмаг үчүн һансы чәтинликлә үзләширсинизсә үзләшин, бу реаллыг дәјишмәз олараг галыр. Иса биринҹи әсрдәки бир нечә шаҝирдинә демишди: «Иманыныз хардал тохуму бојда олса, бу даға: “Бурадан о тәрәфә чәкил”,— дејәҹәксиниз, о да чәкиләҹәк. Сизин үчүн гејри-мүмкүн шеј олмајаҹаг» (Мәт. 17:20). Һәмин вахт бу сөзләри ешидән инсанлар ҹәми бир нечә ил иди ки, Иса илә бирликдә идиләр, буна ҝөрә дә онларын иманы һәлә мөһкәмләнмәли иди. Амма Иса онлара деди ки, әҝәр иманлары ҝүҹлү олса, Јеһова онларын дағ бојда чәтинликләрини јолларындан галдырмаға көмәк едәҹәк. Јеһова ејни шеји сизин үчүн дә едәҹәк!

20. Бу мәгаләдә ҝәтирилмиш биринҹи әсрдәки вә мүасир дөврдәки мәсиһиләрин нүмунәси сизи нәјә тәшвиг етди?

²⁰ Әҝәр сизи вәфтиз олунмагдан сахлајан нәләрсә варса, јубанмадан лазыми аддымлары атын. Биринҹи әсрдәки вә мүасир дөврдәки мәсиһиләрин нүмунәсиндән тәсәлли вә ҝүҹ алын. Гој онларын нүмунәси сизи руһландырсын вә һәјатынызы Јеһоваја һәср едиб вәфтиз олунмаға тәшвиг етсин. Әмин олун, бу, верә биләҹәјиниз ән ҝөзәл гәрардыр!