1, 2. Јеһованы севмәк нә демәкдир вә Иса Јеһованы севдијини неҹә ҝөстәрирди?

 «АЛЛАҺЫН Јеһованы бүтүн гәлбинлә, бүтүн варлығынла, бүтүн ағлынла вә вар ҝүҹүнлә сев» (Марк 12:29, 30). Иса Мәсиһ бу әмрин Мусанын ганунунда ән ваҹиб әмр олдуғуну демишди. Демәли, биз Јеһованы бүтүн гәлбимизлә севмәлијик. Бура бизим арзуларымыз, һиссләримиз, әһвали-руһијјәмиз дахилдир. Биз һәм дә Јеһованы бүтүн варлығымызла вә вар ҝүҹүмүзлә, гүввәмизлә севмәлијик. Бундан әлавә, Јеһованы бүтүн ағлымызла севмәлијик. Бура исә һәр һансы мәсәлә илә бағлы нә дүшүндүјүмүз дахилдир. Әлбәттә, биз һеч вахт Јеһованын әглини ахыра гәдәр дәрк едә билмәрик. Амма Мәсиһин дүшүнҹәсини арашдырсаг, Јеһованын әглинә даһа јахшы бәләд оларыг. Чүнки Иса Мәсиһ Јеһованын дүшүнҹәләрини мүкәммәл шәкилдә әкс етдирирди (1 Кор. 2:16).

² Иса Мәсиһ Јеһованы бүтүн ағлы илә севирди. О, Јеһованын онунла бағлы ирадәсини билирди вә әзаб чәкмәк лазым ҝәләндә белә, Онун истәјинә ујғун давранмаға гәтијјәтли иди. Фикрини буна ҹәмләдији үчүн Иса нәјинсә ону бу мәгсәддән јајындырмасына имкан вермәди.

3. Һәвари Бутрус Исадан нә өјрәнмишди вә о, мәсиһиләри нәјә тәшвиг етмишди? (1 Бутрус 4:1).

³ Бутрус вә диҝәр һәвариләрин Иса Мәсиһлә вахт кечирмәк, онун мүхтәлиф мәсәләләрә неҹә јанашдығыны, неҹә  дүшүндүјүнү ҝөрмәк имканы вар иди. Бутрус Јеһованын илһамы илә јаздығы илк мәктубунда мәсиһиләри тәшвиг етмишди ки, онлар Иса Мәсиһин дүшүнҹәси илә силаһлансынлар. (1 Бутрус 4:1 ајәсини охујун.) Бутрусун истифадә етдији «силаһланын» сөзү һәрбидә истифадә едилән сөздүр. Демәли, Иса кими дүшүнмәји өјрәнән мәсиһинин өз ҝүнаһлы мејилләринә вә Шејтанын идарә етдији дүнјаја гаршы мүбаризә апармаг үчүн ҝүҹлү силаһы олур (2 Кор. 10:3—5; Ефес. 6:12).

4. Бу мәгаләдә нә һагда данышаҹағыг?

⁴ Ҝәлин ҝөрәк Иса Мәсиһин дүшүнҹә тәрзи неҹә иди вә она бәнзәмәк үчүн нә едә биләрик. Онун нүмунәси көмәк едәҹәк ки, 1) Јеһова кими дүшүнәк, 2) тәвазөкар олаг, 3) сағламдүшүнҹәли олаг.

ЈЕҺОВА КИМИ ДҮШҮНМӘЈИ ӨЈРӘНИН

5. Һансы һадисә заманы Бутрус Јеһова кими дүшүнмәдијини ҝөстәрмишди?

⁵ Бир һадисәдә Бутрус Јеһова кими дүшүнмәдијини ҝөстәрмишди. Иса һәвариләринә демишди ки, Јерусәлимә ҝедәҹәк, дин хадимләринә тәслим едиләҹәк, дирәкдә әзаб чәкәҹәк вә ахырда да өлдүрүләҹәк (Мәт. 16:21). Бутрус инана билмирди ки, Јеһова Исанын өлдүрүлмәсинә изин версин. Ахы о, Исраилин үмиди вә вәд едилмиш Мәсиһ иди! (Мәт. 16:16). Буна ҝөрә дә Бутрус Исаны гыраға чәкиб белә деди: «Өзүнә јазығын ҝәлсин, Аға! Белә шеј һеч вахт ола билмәз!» (Мәт. 16:22). Бутрус бу мәсәләдә Јеһованын дүшүнҹәсини әкс етдирмәдији үчүн Иса илә дә фикирләри үст-үстә дүшмүрдү.

6. Иса Јеһованын дүшүнҹә тәрзинә саһиб олдуғуну неҹә ҝөстәрди?

⁶ Иса Мәсиһ там шәкилдә Јеһова кими дүшүнүрдү. Елә буна ҝөрә дә Бутруса белә ҹаваб верди: «Чәкил габағымдан, Шејтан! Сән мәнә мане олурсан. Чүнки сәнин ағлындакы Аллаһын фикирләри дејил, инсан фикирләридир» (Мәт. 16:23). Иса билирди ки, Јеһованын ирадәсинә әсасән әзаб чәкиб өлмәлидир. Буна ҝөрә дә Бутрусун нијјәтинин пис олмадығыны билсә дә, онун мәсләһәтинә гулаг асмады. Бутрус бу һадисәдән Јеһова кими дүшүнмәјин ваҹиблијини өјрәнди. Буну биз дә өјрәнмәлијик.

7. Бутрус Јеһованын дүшүнҹәсини мәнимсәмәк истәдијини неҹә ҝөстәрди? (Шәклә бахын.)

⁷ Сонралар Бутрус Јеһова кими дүшүнмәк истәдијини ҝөстәрди. Сүннәт олунмамыш гејри-јәһудиләрин Јеһованын халгынын сыраларына дахил олмаг вахты ҝәлиб чатмышды. Јеһова Бутруса тапшырмышды ки, гејри-јәһуди олан Корнилијә тәблиғ етсин. Корнили мәсиһилији гәбул едән илк гејри-јәһуди олаҹагды. Нәзәрә алсаг ки, о вахтлар јәһудиләр гејри-јәһудиләрдән узаг дурурду, Бутрус бу тапшырығы иҹра етмәјә өзүнү һазырламалы иди. О, Јеһованын гејри-јәһудиләр барәдә нә дүшүндүјүнү анлајандан сонра өз дүшүнҹәсини дәјишди. Беләҹә, далынҹа ҝәлән адамлара «етираз етмәјиб» Корнилинин евинә ҝетди (Һәв. 10:28, 29). О, Корнилијә вә онун ев әһлинә тәблиғ етди вә нәтиҹәдә онлар вәфтиз олундулар (Һәв. 10:21—23, 34, 35, 44—48).

8. Јеһова кими дүшүндүјүмүзү неҹә ҝөстәрә биләрик? (1 Бутрус 3:8).

⁸ Илләр сонра Бутрус мәсиһиләри һәмфикир олмаға тәшвиг етмишди. (1 Бутрус 3:8 ајәсини охујун.) Биз баҹы-гардашларла һәмфикир олмаг үчүн Јеһованын дүшүнҹәсини әкс етдирмәлијик. Онун  неҹә дүшүндүјүнү исә Кәламдан өјрәнә биләрик. Мәсәлән, Мәтта 6:33 ајәсиндә Иса давамчыларыны Падшаһлығы һәр шејдән үстүн тутмаға тәшвиг етмишди. Јығынҹағымыздакы тәблиғчиләрдән бири онун сөзләринә әмәл едәрәк тамвахтлы хидмәтин һансыса нөвүндә иштирак етмәк гәрарына ҝәлә биләр. Она «өзүнә јазығын ҝәлсин, өзүнү чох јорма» демәкдәнсә, јахшы олар ки, бу мәгсәди барәдә мүсбәт данышаг вә баҹардығымыз көмәји ҝөстәрәк.

ТӘВАЗӨКАР ОЛУН

9, 10. Исанын бөјүк тәвазөкарлыг ҝөстәрдији бир һадисә һансыдыр?

⁹ Өлүмүндән өнҹәки ҝеҹә Иса Бутруса вә диҝәр һәвариләрә тәвазөкарлыға даир мүһүм бир дәрс өјрәтди. Бундан бир аз әввәл о, Бутрусла Јәһјаны ахшам јемәји үчүн һазырлыг ҝөрмәјә ҝөндәрмишди. Бу, Исанын өлмәздән әввәл онларла бирҝә јејәҹәји сонунҹу јемәк олаҹагды. Јәгин, шаҝирдләр һазырлыг ҝөрәркән гонагларын јемәкдән габаг ајагларыны јумасы үчүн дәсмалла ләјән дә һазырламышдылар. Бәс, ҝөрәсән, ким тәвазөкарлыг ҝөстәриб бу иши ҝөрәҹәкди?

¹⁰ Иса тәрәддүд етмәдән бөјүк бир тәвазөкарлыг ҝөстәрди. О, шаҝирдләрин һејрәтинә сәбәб олан бир шеји етди. Буну адәтән гуллугчулар едирди. Иса үст палтарыны чыхартды, бир дәсмал ҝөтүрүб белинә бағлады, ләјәнә су төкүб шаҝирдләрин ајағыны јумаға башлады (Јәһ. 13:4, 5). Иса, она хәјанәт едәҹәк Јәһуда да дахил олмагла, он ики һәваринин һамысынын ајағыны јуду. Јәгин ки, бу, хејли вахт чәкди. Амма о, тәвазөкарлыгла бу иши ахыра кими ҝөрдү. Сонра исә сәбирлә онлара белә бир өјүд-нәсиһәт верди: «Сизин үчүн нә етдијими баша дүшүрсүнүз? Сиз мәнә “Устад”, “Аға” дејирсиниз, дүз дә едирсиниз, бу, еләдир ки вар. Әҝәр мән, Аға вә Устад ола-ола, сизин ајагларынызы јудумса, сиз дә бир-биринизин ајагларыны јумалысыныз» (Јәһ. 13:12—14).

11. Бутрусун тәвазөкарлығы өјрәндији нәдән ҝөрүнүрдү? (1 Бутрус 5:5, һашијә; һәмчинин шәклә бахын.)

¹¹ Бутрус Исанын тәвазөкарлығындан нүмунә ҝөтүрдү. Иса ҝөјә галхандан сонра Бутрус бир мөҹүзә ҝөстәрди. О, анаданҝәлмә топал бир адамы сағалтды (Һәв. 1:8, 9; 3:2, 6—8). Сөзсүз ки, инсанлар һејрәтә ҝәлиб Бутрусун башына топлашды (Һәв. 3:11). Бутрус она шөһрәт ҝәтирән бу анын дадыны чыхартды? Ахы о, нүфуза, ад-сана өнәм верилән бир мәдәнијјәтдә бөјүмүшдү. Хејр, о, тәвазөкарҹасына диггәти өзүндән узаглашдырыб Јеһоваја вә Исаја шәрәф верәрәк деди: «Ҝөрдүјүнүз вә таныдығыныз бу адам Исанын ады вә онун адына ҝөстәрдијимиз иман сајәсиндә гүввәтләнди» (Һәв. 3:12—16). Сонралар Бутрус мәсиһиләрә јаздығы мәктубунда тәвазөкар олмағын ваҹиблијини вурғуламышды. Орижинал мәтндә о, «тәвазөкарлыға бүрүнүн» сөзүнү ишләтмишди. Јәгин, Бутрус бу сөзләри дејәндә Исанын дәсмалы белинә бағлајыб һәвариләрин ајагларыны јумасыны хатырламышды. (1 Бутрус 5:5 ајәсини вә һашијәни охујун.)

12. Бутрус кими өзүмүздә тәвазөкарлығы неҹә јетишдирә биләрик?

 ¹² Бутрусдан нүмунә ҝөтүрәрәк өзүмүздә тәвазөкарлыг јетишдирә биләрик. Унутмајаг, әсл тәвазөкарлыг садәҹә дедијимиз сөзләрлә өлчүлмүр. Бутрусун ишләтдији «тәвазөкарлыг» сөзү һәмчинин инсанын өзү вә башгалары һагда дахилән һансы фикирдә олмасыны еһтива едир. Биз јахшы ишләр ҝөрәндә буну инсанларын бизә һејран галмасы үчүн јох, Јеһоваја вә инсанлара севҝидән ирәли ҝәләрәк едирик. Кимләринсә етдикләримизи ҝөрүб-ҝөрмәмәсиндән асылы олмајараг, Јеһоваја вә диндашларымыза үрәкдән гуллуг едириксә, һәгигәтән дә тәвазөкар олдуғумузу ҝөстәририк (Мәт. 6:1—4).

САҒЛАМДҮШҮНҸӘЛИ ОЛУН

13. Сағламдүшүнҹәли олмаг нә демәкдир? Изаһ един.

¹³ Сағламдүшүнҹәли олмаг нә демәкдир? (1 Бут. 4:7). Сағламдүшүнҹәли мәсиһи гәрар верәркән Јеһованын бу мәсәлә илә бағлы нә дүшүндүјүнү нәзәрә алыр. О, баша дүшүр ки, бу дүнјада Јеһова илә мүнасибәтләриндән даһа дәјәрли һеч нә јохдур. О өзү һаггында јүксәк  фикирдә дејил. Һәр шејин ҹавабыны билдијини дүшүнмүр. Бундан әлавә, белә мәсиһи Јеһоваја ҝүвәнир. О, рәһбәрлик алмаг үчүн һәмишә дуада Јеһовадан көмәк истәјир a.

14. Һансы һадисә заманы Бутрус Јеһоваја ҝүвәнмәмишди?

¹⁴ Өлүмүндән өнҹәки ҝеҹә Иса шаҝирдләрини хәбәрдар етмишди: «Бу ҝеҹә һамыныз мәндән үз дөндәрәҹәксиниз». Бутрус өзүнә әмин шәкилдә белә демишди: «Һамы сәндән үз дөндәрсә дә, мән өмрүмдә сәндән үз дөндәрмәрәм!» Һәмин ҝеҹә Иса шаҝирдләриндән бәзиләринә белә бир мәсләһәт вермишди: «Сајыг олун вә даима дуа един» (Мәт. 26:31, 33, 41). Әҝәр Бутрус бу мәсләһәтә гулаг ассајды, јәгин ки, Исанын шаҝирди олдуғуну демәјә ҹәсарәти чатарды. Амма о, Ағасыны танымадығыны деди. Сонра буна ҝөрә чох пешман олду (Мәт. 26:69—75).

15. Өлүмүндән өнҹәки ҝеҹә Иса Мәсиһә сағламдүшүнҹәли олмаға нә көмәк етди?

¹⁵ Иса Мәсиһ тамамилә Јеһоваја архаланырды. О, камил олса да, өлүмүндән өнҹәки ҝеҹә Јеһоваја дөнә-дөнә дуа етмишди. Бунун да сајәсиндә онун Јеһованын истәдији кими давранмаға ҹәсарәти олду  (Мәт. 26:39, 42, 44; Јәһ. 18:4, 5). Исанын дуаја бу гәдәр өнәм вердијини ҝөрмәк, сөзсүз ки, Бутрусун өмүрлүк јаддашында галды.

16. Нәјә әсасән демәк олар ки, Бутрус сағламдүшүнҹәли олмағы өјрәнмишди? (1 Бутрус 4:7).

¹⁶ Заманла Бутрус Јеһоваја даһа чох дуа едиб Ондан көмәк истәмәји өјрәнди. Иса Мәсиһ дириләндән сонра Бутрусу вә диҝәр һәвариләри әмин етди ки, онлар тәблиғ едә билмәләри үчүн мүгәддәс руһ алаҹаглар. Амма о вахта кими Иса онлара Јерусәлимдә ҝөзләмәји тапшырды (Лука 24:49; Һәв. 1:4, 5). Бутрус ҝөзләдији мүддәтдә нә едирди? О, диҝәр мәсиһиләрлә бирликдә «арамсыз дуа» едирди (Һәв. 1:13, 14). Сонралар Бутрус илк мәктубуну јазанда мәсиһиләри сағламдүшүнҹәли олмаға вә дуа едиб Јеһовадан көмәк истәмәјә тәшвиг етмишди. (1 Бутрус 4:7 ајәсини охујун.) Бәли, Бутрус Јеһоваја ҝүвәнмәји өјрәнмишди вә јығынҹағын сүтуну олмушду (Гал. 2:9).

17. Мүәјјән баҹарыгларымыз олса да, биз һәмишә нә етмәлијик? (Һәмчинин шәклә бахын.)

¹⁷ Сағламдүшүнҹәли олмаг үчүн биз Јеһоваја тез-тез дуа етмәлијик. Һәтта мүәјјән баҹарыгларымыз олса да, јенә дә һәмишә көмәк үчүн Јеһоваја үз тутмалыјыг. Буна ҝөрә, хүсусилә дә, мүһүм гәрарлар вермәли оланда биз дуа едиб Јеһовадан рәһбәрлик истәјирик. Чүнки инанырыг ки, О нәјин бизим үчүн даһа јахшы олдуғуну билир.

18. Нә етмәјә гәти гәрарлысыныз?

¹⁸ Јеһоваја шүкүрләр олсун ки, бизи Онун хүсусијјәтләрини әкс етдирмәк баҹарығы илә јарадыб (Јар. 1:26). Дүздүр, биз Јеһоваја мүкәммәл шәкилдә бәнзәјә билмәрик (Әшј. 55:9). Амма Бутрус кими биз дә чалыша биләрик ки, Јеһованын дүшүнҹәсини даһа чох әкс етдирәк. Одур ки, ҝәлин һәмишә Јеһова кими дүшүнәк, тәвазөкарлыг хүсусијјәтини јетишдирәк вә сағламдүшүнҹәли олаг.