МҮГӘДДӘС КИТАБ МӘСЛӘҺӘТИ: «Чалышганын нијјәти уғур ҝәтирәр, тәләскән еһтијаҹа јуварланар» (Мәсәлләр 21:5).

МӘҒЗИ: Тутдуғунуз нијјәтә ҹидд-ҹәһдлә риајәт етмәк уғур газанмаг үчүн ваҹиб амилдир. Буна ҝөрә дә пулу хәрҹләмәздән әввәл «нијјәтинизи» мүәјјән един, јәни јахшы план гурун. Унутмајын ки, һәр истәдијиниз шеји ала билмәјәҹәксиниз. Буна ҝөрә дә пулунузу ағылла хәрҹләјин.

ТӘТБИГИ:

• Бүдҹәнизи ашмајын. Бүтүн хәрҹләринизи јазын вә груплашдырын. Сонра һәр бири үчүн пул ајырын. Әҝәр биринә ајырдығыныздан артыг пул хәрҹләсәниз, о бири хәрҹләриниздән кәсин. Мәсәлән, әҝәр јанаҹаға планлашдырдығыныздан артыг пулунуз чыхыбса, даһа аз әһәмијјәтли шејдә гәнаәт един.

• Јерсиз борҹа ҝирмәјин. Мүмкүн гәдәр чалышын, борҹ ҝөтүрмәјәсиниз. Бунун әвәзиндә, еһтијаҹыныз олан шеји алмаг үчүн пул јығын. Кредит карт ишләдирсинизсә, чалышын, фаиз өдәмәмәк үчүн һәр ај борҹунузу там өдәјәсиниз. Әҝәр борҹунуз варса вә ону тезликлә гајтара билмәјәҹәксинизсә, борҹу гајтармаг үчүн план тәртиб един вә бу плана риајәт един.

  Бир арашдырма ҝөстәрир ки, кредит карт ишләдән адамлар, адәтән, даһа чох пул хәрҹләјирләр. Әҝәр кредит картыныз варса, ондан диггәтлә истифадә един.

МҮГӘДДӘС КИТАБ МӘСЛӘҺӘТИ: «Тәнбәл гыш дүшдү дејә, шум шумламаз, бичин заманы да һеч нә тапмајыб диләнәр» (Мәсәлләр 20:4).

 МӘҒЗИ: Тәнбәллик јохсуллуға ҝәтириб чыхара биләр. Буна ҝөрә дә зәһмәткеш олун, һәмчинин сабаһкы ҝүн үчүн кәнара пул гојун.

ТӘТБИГИ:

• Зәһмәткеш олун. Чалышган вә етибарлы ишчи олун ки, ҝәлир јериниз әлиниздән чыхмасын. Адәтән, мүдирләр чалышган ишчини итирмәк истәмирләр.

• Дүрүст олун. Ишдән оғурламајын. Надүрүстлүк адыныза ләкә ҝәтирәр вә ҝәләҹәкдә иш тапмағыныза чәтинлик төрәдә биләр.

• Аҹҝөз олмајын. Пула һәрислик сағламлығыныза, башгалары илә мүнасибәтләринизә хәләл ҝәтирә биләр. Унутмајын, һәјатда пулдан ваҹиб шејләр вар.

ПИС ВӘРДИШЛӘРӘ ВАХТ ВӘ ПУЛ СӘРФ ЕТМӘЈИН

«Әјјаш вә гарынгулу јохсуллуға дүшәр, мүрҝү дөјән ҹыр-ҹындыр ичиндә галар» (МӘСӘЛЛӘР 23:21).

ҺӘДДӘН АРТЫГ ПУЛ ДӘРДИ ЧӘКМӘЈИН

«Буна ҝөрә сизә дејирәм, “нә јејәҹәјик?”, “нә ичәҹәјик?” дејә ҹаныныздан өтрү, “нә ҝејәҹәјик?” дејә бәдәниниздән өтрү даһа гајғы чәкмәјин» (МӘТТА 6:25).

ПАХЫЛ ОЛМАЈЫН

«Пахыл адамын вар-дөвләтдән өтрү үрәји ҝедир, даһа билмир ки, јохсуллуг ону јахалајаҹаг» (МӘСӘЛЛӘР 28:22).