1, 2. Јеһованын садиг хидмәтчиләри һансы чәтинликләрлә үзләшир?

 ФАҸИӘ бир ҝеҹәнин ичиндә инсанын һәјатыны алт-үст едә биләр. Мәсәлән, Јеһоваја сәдагәтлә хидмәт едән Луис a гардаша хәрчәнҝ диагнозу гојулур. Һәким она бир нечә ај өмрү галдығыны сөјләјир. Моника баҹы јолдашы илә бирҝә Јеһоваја фәал хидмәт едирди. Бир ҝүн Моника өјрәнир ки, ағсаггал кими хидмәт едән јолдашы илләрдир ҝизлинҹә ҝүнаһ ишләјирмиш. Оливија адлы субај бир баҹы јахынлашан ҝүҹлү фыртынаја ҝөрә евиндән тәхлијә олунур. Ҝери гајыданда ҝөрүр ки, еви дармадағын олуб. Луисин, Мониканын вә Оливијанын һәјаты бир анын ичиндә көкүндән дәјишир. Онларын јашадыглары сизә танышдыр? Һәјатынызы гәфил алт-үст едән һансыса һадисә илә үзләшмисиниз?

² Биз Јеһованын садиг хидмәтчиләри олсаг да, һамы кими һәјатда чәтинликләрлә үзләширик, хәстәләнирик. Бундан савајы, Аллаһын халгына нифрәт едән инсанлар бизи тәгиб едирләр. Дүздүр, Јеһова бу ҝүн бизи бу кими бәлалардан горумур, амма О бизә көмәк едәҹәјинә сөз верир (Әшј. 41:10). Онун көмәји илә севинҹимизи горујаҹағыг, дүзҝүн гәрарлар верәҹәјик вә һәтта һәјатымызын ән чәтин анларында белә садиг галаҹағыг. Бу мәгаләдән өјрәнәҹәјик ки, башымызын үстүнү гара булудлар аланда Јеһова һансы дөрд јолла бизә көмәк едир вә Онун көмәјиндән јарарланмаг үчүн нә етмәлијик.

 ЈЕҺОВА СИЗИ ГОРУЈАҸАГ

3. Фаҹиәви һадисә илә үзләшәндә нә етмәк бизә чәтин ола биләр?

³ Бизә нә чәтин ола биләр? Фаҹиә илә үзләшәндә ајдын дүшүнмәк, гәрар вермәк чәтин ола биләр. Чүнки елә анларда үрәјимиз ган ағлајыр, фикирдән өзүмүзә јер тапа билмирик. Санки думанын ичиндәјик, јолумузу азмышыг. Ҝөрүн бајаг адлары чәкилән ики баҹы башларына бәла ҝәлән заман һансы һиссләри кечирмишди. Оливија дејир: «Гасырға евими дармадағын едәндән сонра өзүмү чарәсиз һисс едирдим, нә едәҹәјими билмирдим». Моника исә әринин хәјанәти илә бағлы белә дејир: «Чох мәјус олмушдум. Елә бил ичимдә нәсә гырылды. Ҝүҹлү ағры һисс едирдим. Әлим-ајағым иш тутмурду. Ағлыма ҝәлмәјән шеј башыма ҝәлди». Белә чарәсиз анларымызда Јеһова бизә неҹә көмәк едәҹәјинә сөз верир?

4. Филиппилиләрә 4:6, 7 ајәләринә әсасән Јеһова бизә нә вәд верир?

⁴ Јеһова неҹә көмәк едир? О бизә Өз сүлһүнү верәҹәјини вәд едир. (Филиппилиләрә 4:6, 7 ајәләрини охујун.) Аллаһын сүлһү Онунла мөһкәм достлугдан гајнагланан сакитлик вә һүзур һиссидир. Бу сүлһ «һәр бир ағылдан үстүн»дүр, ағлымыза ҝәлмәјәҹәк гәдәр һејрәтамиздир. Һеч олуб ки, Јеһоваја дурмадан дуа етмисиниз, сонра да дахилиниздә гејри-ади бир сакитлик дујмусунуз? Бах бу, Аллаһын сүлһүдүр.

5. Аллаһын сүлһү үрәјимизи вә фикирләримизи неҹә горујур?

⁵ Филиппилиләрә 4:6, 7 ајәләриндә һәм дә дејилир ки, Аллаһын сүлһү сизин «үрәјинизи вә фикирләринизи... горујаҹаг». Орижинал мәтндә «горујаҹаг» ифадәси һәрби терминдир. Бу ифадә әсҝәрләрин шәһәри һүҹумлардан горумасына аид ишләнирди. Мүһафизәдә олан шәһәр сакинләри раһат јатырдылар, билирдиләр ки, дарвазада онларын кешијини чәкән әсҝәрләр вар. Ејнилә Аллаһын сүлһү үрәјимизи вә фикирләримизи горујанда сакит, архајын олуруг (Зәб. 4:8). Һәннә кими бизим дә вәзијјәтимиз дәрһал дәјишмәсә дә, јенә дә үрәјимиз раһат олур (1 Ишм. 1:16—18). Инсан сакит оланда исә она ајдын дүшүнмәк, дүзҝүн гәрарлар вермәк даһа асан олур.

6. Аллаһын сүлһүндән јарарланмаг үчүн нә едә биләрик? (Һәмчинин шәклә бахын.)

⁶ Бизим өһдәмизә нә дүшүр? Нараһатлыг кечирәндә сиз дә «кешикчиләри» чағырын. Буну неҹә етмәк олар? Дахилиниздә Аллаһын сүлһүнү дујана гәдәр дуа един (Лука 11:9; 1 Салон. 5:17). Бајаг ады чәкилән Луис өмрүнә бир нечә ајын галдығыны биләндә јолдашы Анна илә бу дәрдә неҹә дөздүкләри барәдә дејир: «Белә мәгамда сағламлыгла вә диҝәр мәсәләләрлә бағлы гәрар вермәк һәдсиз чәтин олур.  Амма һәмин анларымызда биз јалныз дуанын сајәсиндә сакитлик тапдыг». Луислә јолдашы дурмадан, һәрарәтлә Јеһоваја дуа едирдиләр, Аллаһа јалварырдылар ки, онлара гәлб раһатлығы, сакитлик вә дүзҝүн гәрарлар вермәк үчүн һикмәт версин. Онлар Јеһованын көмәк әлини ҝөрдүләр. Әҝәр сиз дә мүсибәтли анлар јашајырсынызса, дурмадан дуа един. Онда Јеһованын сүлһүнүн үрәјинизи вә фикирләринизи горудуғуну дујаҹагсыныз (Ром. 12:12).

ЈЕҺОВА СИЗИ САРСЫЛМАҒА ГОЈМАЈАҸАГ

7. Чәтин сынагла үзләшәндә һансы һисси кечирә биләрик?

⁷ Бизә нә чәтин ола биләр? Ҹидди сынагла үзләшәндә һиссләримиз, фикирләримиз, давранышымыз һәмишәки кими таразлы олмаја биләр. Ҝәмини атыб тутан далғалар кими биз дә һәмин ан гарышыг һиссләр кечирә биләрик, бир һиссдән о бири һиссә дүшә биләрик. Өнҹәки абзасда ады чәкилән Анна билдирир ки, Луисин өлүмүндән сонра бир-бириндән фәргли һиссләр кечирмишди. О дејир: «Елә олурду ки, дахилимдә бошлуг һисс едирдим. Өзүмү јазыгламаға башлајырдым, бәзән исә онун өлүмү илә барышмајыб гәзәбләнирдим». Башга вахтларда исә Анна өзүнү тәнһа һисс едирди. Әввәлләр әринин һәлл етдији мәсәләләри инди о, һәлл етмәли иди. Бу исә Аннаны һирсләндирирди. Бәзән Аннаја елә ҝәлирди ки, фыртыналы дәнизин ортасында чапалајыр. Бу кими һиссләр бизи боғанда Јеһова бизә неҹә көмәк едир?

8. Әшија 33:6 ајәсиндә дә дејилдији кими Јеһова бизи нәјә әмин едир?

⁸ Јеһова неҹә көмәк едир? Аллаһ бизә сәбатлы, јәни мөһкәм галмаға көмәк едәҹәјинә сөз верир. (Әшија 33:6 ајәсини охујун.) Ҝәми фыртынаја дүшәндә о јана бу јана бәрк јырғаланмаға башлајыр. Ҝәмини стабил сахламаг үчүн онун һәр ики тәрәфинә адәтән сабитләјиҹи гурғу гурашдырылыр. Онлар ҝәминин бәрк јырғаланмасынын гаршысыны хејли алыр. Бунун сајәсиндә ҝәмидәкиләр даһа тәһлүкәсизликдә олур вә сәјаһәт раһат кечир. Адәтән бу сабитләјиҹи гурғуларын ҝәми һәрәкәтдә оланда даһа чох көмәји дәјир. Ејнилә биз дә чәтин анларымызда хидмәтимизи давам етдирсәк, Јеһова бизә сабит галмаға көмәк едәҹәк.

9. Ахтарыш вәсаитләримиз бизә таразлығы горумаға неҹә көмәк едир? (Һәмчинин шәклә бахын.)

⁹ Бизим өһдәмизә нә дүшүр? Ҝүҹлү һиссләр сизи чулғајанда чалышын руһани ишләрдән галмајасыныз. Дүздүр, ола билсин, бу ишләри әввәлки кими ҝөрә билмәјәсиниз. Амма унутмајын, Јеһова анлајышлы Аллаһдыр. (Лука 21:1—4 ајәләри илә әлагәләндирин.) Һәмчинин мүталиәјә вә охудугларыныз үзәриндә дәрин  дүшүнмәјә вахт ајырын. Бу нә үчүн лазымдыр? Чүнки Јеһованын тәшкилаты васитәсилә бизә вердији ҝөзәл мәгаләләр, видеолар чәтин анларымызда һиссләримизи ҹиловламаға көмәк едир. Сизә лазым олан мәлуматы тапмаг үчүн дилиниздә мөвҹуд олан ахтарыш вәсаитләриндән истифадә едә биләрсиниз. Мәсәлән, «JW Library^®» тәтбигиндән, «Ҝөзәтчи гүлләси нәшрләринин индекси»ндән (түрк.) вә «Јеһованын Шаһидләринин нәшрләри үзрә ахтарыш» вәсаитиндән истифадә едә биләрсиниз. Бајаг ады чәкилән Моника дејир ки, мәнфи һиссләр ону бүрүјәндә мәсләһәт үчүн бу ахтарыш вәсаитләринә үз тутурду. Мәсәлән, о, «гәзәб» сөзүнү јазыб ахтарырды. Башга ҝүнләр исә «хәјанәт», «сәдагәт» сөзләрини јазыб ахтарырды. Сонра исә тапдығы мәлуматлары өзүнү јахшы һисс едәнә гәдәр охујурду. Баҹы дејир: «Ахтарыш апармаға башлајанда үрәјимдә кәдәр, нараһатлыг олурду. Амма тапдығым мәгаләләри охудугҹа Јеһованын мәни бағрына басдығыны һисс едирдим. Охуја-охуја дәрк едирдим ки, Јеһова мәним кечирдијим бүтүн бу гарышыг һиссләри баша дүшүр вә мәнә көмәк едир». Јеһова сизә дә далғалар сакитләшәнә гәдәр сабит галмаға көмәк едәҹәк (Зәб. 119:143, 144).

ЈЕҺОВА СИЗӘ АРХА ОЛАҸАГ

10. Сарсыдыҹы һадисә нәтиҹәсиндә һансы һиссләри кечирә биләрик?

¹⁰ Бизә нә чәтин ола биләр? Һәјатдан зәрбә аланда, ола билсин, бәзи ҝүнләр өзүмүзү физики вә мәнәви ҹәһәтдән зәиф һисс едәк. Зәдә алмыш идманчынын кечирдији һиссләри кечирә биләрик. О, әввәлләр сүрәтлә гачарды, амма инди ахсаја-ахсаја ҝәзир. Ола биләр, әввәлләр асанлыгла етдијимиз ишләр инди бизә чәтин ҝәлсин, ја да бир заманлар һәвәслә ҝөрдүјүмүз ишләрә инди һәвәсимиз олмасын. Јахуд Илјас кими јухудан ојанмаг чәтин ола биләр, елә һеј јатмаг истәјәрик (1 Пад. 19:5—7). Бәс Јеһова бизә өзүмүзү ҝүҹсүз һисс едәндә неҹә көмәк едир?

11. Јеһова бизә башга һансы јолла көмәк едир? (Зәбур 94:18).

¹¹ Јеһова неҹә көмәк едир? Јеһова бизә арха-дајаг олаҹағына сөз верир. (Зәбур 94:18 ајәсини охујун.) Зәдәләнән идманчынын һәрәкәт етмәси үчүн көмәјә еһтијаҹы олур. Ејнилә бизим дә Јеһоваја хидмәтдә фәал олмаг үчүн көмәјә еһтијаҹымыз ола биләр. Белә анларымызда Јеһова бизә сөз вериб дејир: «Мән, Аллаһын Јеһова сәнин сағ әлиндән тутмушам, сәнә дејирәм:  “Горхма! Сәнә көмәк едәҹәјәм”» (Әшј. 41:13). Давуд падшаһ бу көмәји өз һәјатында дујмушду. Сынагларла, дүшмәнләрин һәдәси илә үзләшәндә о, Јеһоваја демишди: «Сағ әлин мәнә дајаг олур» (Зәб. 18:35). Бәс Јеһова бизә неҹә дајаг олур?

12. Өзүмүзү ҝүҹсүз һисс едәндә Јеһова кимләрин васитәсилә бизә көмәк едә биләр?

¹² Јеһова чох вахт башгаларынын үрәјиндә бизә көмәк етмәјә һәвәс ојадыр. Бир дәфә Давуд өзүнү ҝүҹсүз һисс едәндә досту Јонатан онун јанына ҝәлиб мәнәви ҹәһәтдән она дајаг олмушду, сөзләри илә руһландырмышды (1 Ишм. 23:16, 17). Илјасын јанына исә Јеһова Әлјәсәни ҝөндәрмишди. Әлјәсә она мүәјјән ишләрдә көмәк едирди (1 Пад. 19:16, 21; 2 Пад. 2:2). Бу ҝүн Јеһова аиләмиз, достларымыз вә ја ағсаггаллар васитәсилә бизә дајаг ола биләр. Амма бәзән ҝүҹлү кәдәр һисси кечирәндә һеч кәси ҝөрмәк истәмирик, истәјирик, тәк галаг. Бу, нормал һиссләрдир. Бәс Јеһованын дәстәјини дујмаг үчүн нә етмәлијик?

13. Јеһованын көмәјиндән јарарланмаг үчүн биз нә етмәлијик? (Һәмчинин шәклә бахын.)

¹³ Бизим өһдәмизә нә дүшүр? Тәклијә чәкилмәмәк үчүн өзүнүзлә мүбаризә апарын, чүнки инсан тәклијә чәкиләндә ҝениш дүшүнә билмир. Фикри-зикри јалныз өзүндә вә проблемләриндә олур. Бу, инсанын вердији гәрарлара да тәсир едә биләр (Мәс. 18:1). Әлбәттә, һамымызын тәк галмаға еһтијаҹ дујдуғу анлар олур. Буна ән чох фаҹиәви һадисәләрлә үзләшәндә еһтијаҹ дујуруг. Амма узун мүддәт өзүмүзү тәҹрид етсәк, онда Јеһованын бизә дајаг олмаг үчүн ҝөндәрдији инсанларын әлини ҝери чевирмиш оларыг. Она ҝөрә дә нә гәдәр чәтин олса да, аиләнизин, достларынызын, ағсаггалларын көмәјини гәбул един. Онлара Јеһованын сизә ҝөндәрдији көмәк кими бахын (Мәс. 17:17; Әшј. 32:1, 2).

ЈЕҺОВА СИЗӘ ТӘСӘЛЛИ ВЕРӘҸӘК

14. Нә кими вәзијјәтләр бизи горхуја сала биләр?

¹⁴ Бизә нә чәтин ола биләр? Бәзән үзләшдијимиз вәзијјәтләрә ҝөрә үрәјимиздә горху ола биләр. Мүгәддәс Китабда Аллаһын садиг хидмәтчиләринин бәзән дүшмәнләрин тәгибиндән вә ја башга чәтинликләрдән долајы горхдуғу, тәлаш кечирдији дејилир (Зәб. 18:4; 55:1, 5). Биз дә мәктәбдә, ишдә, аиләдә чәтинликләрлә үзләшә биләрик, һөкумәт бизи тәгиб едә биләр, сәһһәтимиз уҹбатындан һәтта өлүмлә үз-үзә ола биләрик. Бу ҹүр анларда, ола билсин, өзүмүзү  балаҹа ушаг кими көмәксиз һисс едәк. Бәс белә анларда Јеһова бизә неҹә көмәк едир?

15. Зәбур 94:19 ајәси бизи нәјә әмин едир?

¹⁵ Јеһова неҹә көмәк едир? Јеһова бизә тәсәлли верир, овудур. (Зәбур 94:19 ајәсини охујун.) Бу мәзмуру охујанда ҝөзүмүздә санки белә бир сәһнә ҹанланыр: балаҹа гызҹығаз ҝүҹлү фыртынадан горхуб јата билмир. Сонра атасы ҝәлиб ону гуҹағына алыр вә гызҹығаз јухуја ҝедәнә гәдәр ону гуҹағында сахлајыр. Фыртына һәлә давам етсә дә, гыз атасынын гуҹағында өзүнү тәһлүкәсизликдә һисс едир. Бизи тәлаша, горхуја салан сынагларла үзләшәндә биз дә сәмави Атамызын, мәҹази диллә десәк, бизи гуҹағына алыб сакитләшдирмәсинә еһтијаҹ дујуруг. Бәс Јеһовадан бу ҹүр тәсәллини неҹә ала биләрик?

16. Јеһованын тәсәллисини дујмаг үчүн нә едә биләрик? (Һәмчинин шәклә бахын.)

¹⁶ Бизим өһдәмизә нә дүшүр? Јеһоваја дуа едәрәк вә Кәламыны охујараг Онунла мүнтәзәм вахт кечирин (Зәб. 77:1, 12—14). Әҝәр буну өзүнүздә вәрдишә чевирсәниз, онда чәтинликләрлә үзләшәндә илк нөвбәдә Јеһоваја үз тутаҹагсыныз. Горхуларынызы, нараһатлыгларынызы Јеһова илә бөлүшүн. Јеһованын сизинлә данышмасы, сизә тәсәлли вермәси үчүн исә Онун Кәламыны охујун (Зәб. 119:28). Мүгәддәс Китабда елә ајәләр вар ки, горху һисси кечирәндә сизә гәлб раһатлығы верә биләр. Мәсәлән, сиз «Әјјуб», «Зәбур» вә «Мәсәлләр» китабыны, еләҹә дә Исанын Мәтта 6-ҹы фәсилдә јазылмыш сөзләрини охујуб руһлана биләрсиниз. Јеһоваја дуа етдикҹә, Кәламыны охудугҹа Онун тәсәллисини дујаҹагсыныз.

17. Биз нәјә әминик?

¹⁷ Јеһова һәјатымызын гаранлыг ҝүнләриндә һәмишә јанымызда олаҹаг. Буна әмин ола биләрик. О бизи һеч вахт тәк гојмајаҹаг (Зәб. 23:4; 94:14). Јеһова сөз верир ки, бизи горујаҹаг, сарсылмаға гојмајаҹаг, бизә арха олаҹаг, тәсәлли верәҹәк. Әшија 26:3 ајәсиндә Јеһова илә бағлы дејилир: «Сәнә там бел бағлајанлары һифз едәрсән, онлара түкәнмәз сүлһ бәхш едәрсән, чүнки Сәнә ҝүвәнирләр». Одур ки, Јеһоваја ҝүвәнин, Онун көмәјиндән јарарланмаг үчүн әлиниздән ҝәләни един. Белә етсәниз, чәтин анларынызда да јенидән ҝүҹ әлдә едәҹәксиниз.