1, 2. Јеһованын бир чох хидмәтчиси һансы вәзијјәтләрлә үзләшир вә бу вәзијјәтләр онлара неҹә тәсир едә биләр?

ҮЧ СӘҺНӘНИ тәсәввүр едәк: Бир ҹаван гардашда ҝет-ҝедә ағырлашан хәстәлик ашкар олунур. Ортајашлы зәһмәткеш гардаш ишини итирир вә нә гәдәр чалышса да, иш тапа билмир. Бир јашлы баҹы Јеһоваја хидмәтдә әввәлки гәдәр иштирак едә билмир.

² Бу сәһнәләрдән һансыса бири сизә дә аиддирсә, ола билсин, өзүнүзү јарарсыз һисс едирсиниз. Бу кими вәзијјәтләр севинҹинизи, өзүнәһөрмәт һиссинизи итирмәјинизә вә инсанларла мүнасибәтләринизин корланмасына сәбәб ола биләр.

3. Шејтан вә онун тәсири алтында оланлар инсан һәјатына неҹә јанашыр?

³ Бу дүнјанын инсан һәјатына мүнасибәти Шејтанын бахыш тәрзини әкс етдирир. Шејтан һәмишә инсанларла дәјәрсиз бир шеј кими рәфтар едиб. О, Аллаһа итаәтсизлијин өлүмлә нәтиҹәләнәҹәјини јахшы билдији һалда, рәһмсизҹәсинә Һәвваја азад олаҹағыны демишди. Шејтан бу дүнјанын коммерсија, сијаси вә дини сферасыны һәмишә идарә едиб. Одур ки, бир чох бизнесменләрин, сијасәтчиләрин вә дин хадимләринин инсан һәјатына, инсан ләјагәтинә дәјәр вермәмәси тәәҹҹүблү дејил.

4. Бу мәгаләдә нәји арашдыраҹағыг?

⁴ Лакин Јеһова истәјир ки, гијмәтли олдуғумузу биләк. О, өзүмүзү дәјәрсиз һисс етдијимиз вәзијјәтләрлә үзләшәндә бизә дајаг олур (Зәб. 136:23; Ром. 12:3). Бу мәгаләдә Јеһованын нөвбәти вәзијјәтләрдә бизә неҹә көмәк етдијини мүзакирә едәҹәјик: 1) Хәстәликдән әзијјәт чәкәндә, 2) мадди чәтинликлә үзләшәндә, 3) гоҹалыг уҹбатындан Јеһоваја  хидмәтә јарарсыз олдуғумузу дүшүнәндә. Илк нөвбәдә, ҝәлин ҝөрәк Јеһова үчүн дәјәрли олдуғумуза нә үчүн әмин ола биләрик.

5. Инсанларын Јеһова үчүн дәјәрли олдуғуна сизи нә әмин едир?

⁵ Торпагдан јарансаг да, Јеһованын ҝөзүндә торпагдан гат-гат дәјәрлијик (Јар. 2:7). Јеһова үчүн гијмәтли олдуғумузу ҝөстәрән бир нечә амилә нәзәр салаг. Аллаһ инсаны Өз хүсусијјәтләрини тәҹәссүм етдирмәк габилијјәти илә јаратды (Јар. 1:27). Бунунла О, инсаны јер үзүндә јаратдығы һәр бир шејдән даһа үстүн етди вә она јер күрәсинин, һејванларын үзәриндә ағалыг верди (Зәб. 8:4—8).

6. Јеһованын гејри-камил инсанлара дәјәр вердијини даһа нә сүбут едир?

⁶ Һәтта Адәм ҝүнаһ ишләјәндән сонра да, инсанлар Јеһованын ҝөзүндә дәјәрини итирмәди. Јеһова үчүн о гәдәр гијмәтлијик ки, О бизим ҝүнаһларымыз уғрунда Өз севимли Оғлуну фидјә верди (1 Јәһ. 4:9, 10). Фидјә сајәсиндә Јеһова Адәмин ҝүнаһы нәтиҹәсиндә өләнләри, «һәм салеһләри, һәм дә гејри-салеһләри» дирилдәҹәк (Һәв. 24:15). Аллаһын Кәламы ҝөстәрир ки, сәһһәтимиздән, мадди дурумумуздан вә јашымыздан асылы олмајараг, һәр биримиз Онун үчүн дәјәрлијик (Һәв. 10:34, 35).

7. Јеһованын хидмәтчиләринә дәјәр вердијинә даир даһа һансы дәлилләр вар?

⁷ Јеһова үчүн дәјәрли олдуғумузу ҝөстәрән башга дәлилләр дә вар. Јеһова бизи Өзүнә ҹәлб едиб вә хош хәбәрә неҹә һај вердијимизә диггәт јетириб (Јәһ. 6:44). Биз Она јахынлашмаға башладыгҹа, О да бизә јахынлашыб (Јаг. 4:8). Јеһова һәмчинин ҝүҹүндән вә вахтындан истифадә едәрәк бизә тәлим вермәклә дә Онун үчүн дәјәрли олдуғумузу ҝөстәрир. О бизим инди неҹә бир инсан олдуғумузу вә неҹә инсан ола биләҹәјимизи билир. Еләҹә дә, бизи севдији үчүн тәрбијәләндирир (Мәс. 3:11, 12). Бунлар Јеһова үчүн дәјәрли олдуғумуза даир ҝүҹлү дәлилләрдир!

8. Зәбур 18:27—29 ајәләри чәтинликләрә мүнасибәтимизә неҹә тәсир едә биләр?

⁸ Бәзиләри Давуд падшаһын јарарсыз олдуғуну һесаб едирди, амма о, Јеһованын ону севдијини вә дәстәкләдијини билирди. Бу, Давуда үзләшдији вәзијјәтә дүзҝүн јанашмаға көмәк едирди (2 Ишм. 16:5—7). Кәдәрә гәрг оланда, јахуд проблемләрлә үзләшәндә Јеһова вәзијјәтә башга ҹүр јанашмағымыза вә истәнилән чәтинлији ашмағымыза көмәк едә биләр. (Зәбур 18:27—29 ајәләрини охујун.) Нә гәдәр ки Јеһова бизә дајагдыр, һеч нә бизи Она севинҹлә хидмәт етмәкдән сахлаја билмәз (Ром. 8:31). Бәзән Јеһованын бизи севдијини вә бизә дәјәр вердијини билмәјә хүсусилә еһтијаҹымыз олур. Ҝәлин үч белә вәзијјәтә нәзәр салаг.

9. Хәстәлик уҹбатындан өзүмүзә гаршы һансы дүшүнҹә јарана биләр?

⁹ Хәстәлик бизә мәнәви зәрбә вура биләр, белә ки, артыг һеч нәјә јарамадығымызы дүшүнә биләрик. Башгалары бизим мәһдудијјәтләримизи ҝөрәндә, јахуд киминсә көмәјиндән асылы оланда сыхыла биләрик. Һәтта башгалары бизим хәстәлијимиздән бихәбәр олса да, әввәлки гәдәр чох шеј едә билмәдијимизә ҝөрә утана биләрик. Јеһова бизә белә кәдәрли анларымызда гол-ганад верә биләр. О, буну неҹә едир?

10. Мәсәлләр 12:25 ајәсинә әсасән, хәстә оланда бизә нә көмәк едә биләр?

¹⁰ Хәстә оланда «хош сөз» әһвалымызы  галдыра биләр. (Мәсәлләр 12:25 ајәсини охујун.) Јеһова Өз Кәламында хәстәлијимизә рәғмән Она әзиз олдуғумузу ҝөстәрән хош сөзләр һәкк етдириб (Зәб. 31:19; 41:3). Аллаһдан илһам алмыш бу сөзләри охусаг, һәтта тәкрар-тәкрар охусаг, Јеһова хәстәлијимиз уҹбатындан кечирдијимиз мәнфи һиссләрин өһдәсиндән ҝәлмәјә көмәк едәҹәк.

11. Бир гардаш Јеһованын дәстәјини неҹә дујмушду?

¹¹ Ҝәлин Һорһе адлы бир ҹаван гардашын јашадыгларына нәзәр салаг. Һорһе сүрәтлә писләшән хәстәлијә тутулмушду вә өзүнү лазымсыз һисс едирди. О дејир: «Хәстәлијимин мәнә јашатдыгларына, онун башгаларынын диггәтини чәкдији үчүн кечирдијим утанҹаглыг һиссинә һазыр дејилдим. Вәзијјәтим писләшдикҹә һәјатымын неҹә дәјишәҹәји барәдә дүшүнүрдүм. Јаман пәришан олмушдум, Јеһоваја јалварырдым ки, көмәк етсин». Јеһова Һорһе гардаша неҹә дајаг олду? Гардаш дејир: «Хәстәлијимлә бағлы фикир чәкдијимдән диггәтими топламаг чәтин иди. Мәни тәшвиг етмишдиләр ки, Зәбур китабындан Јеһованын бәндәләринә неҹә гајғы ҝөстәрдији барәдә олан ајәләри аз-аз охујум. Һәмин ајәләри һәр ҝүн тәкрар-тәкрар охујараг тәсәлли, раһатлыг тапырдым. Бир мүддәтдән сонра әтрафымдакы инсанлар даһа чох ҝүлүмсәдијими дејирдиләр. Һәтта дејирдиләр ки, мәним мүсбәт әһвал-руһијјәм онлары руһландырыр. Онда баша дүшдүм ки, бу, Јеһованын дуаларыма ҹавабыдыр! Јеһова өзүмә гаршы мүнасибәтими дәјишмәјимә көмәк етди. Диггәтими Аллаһын Кәламына, хәстәлијимә рәғмән, Онун мәнә неҹә јанашдығыны ҝөстәрән фикирләрә ҹәмләмәјә башладым».

12. Хәстәликлә мүбаризә апаранда Јеһованын дајағыны неҹә дуја биләрсиниз?

 ¹² Сиз дә хәстәликлә мүбаризә апарырсынызса, әмин олун ки, Јеһова нәләр чәкдијинизи билир. Јеһоваја јалварын ки, вәзијјәтинизә дүзҝүн јанашмаға көмәк етсин. Сонра Онун Мүгәддәс Китабда сизин үчүн һәкк етдирдији хош сөзләри ахтарын. Диггәтинизи Јеһованын хидмәтчиләрини нә гәдәр дәјәрләндирдијини ҝөстәрән ајәләрә ҹәмләјин. Беләҹә, Аллаһымызын Она сәдагәтлә хидмәт едәнләрә гаршы нә гәдәр кәрамәтли олдуғуну ҝөрәҹәксиниз (Зәб. 84:11).

13. Ишини итирмәк аилә башчысына неҹә тәсир едә биләр?

¹³ Һәр бир аилә башчысы истәјир ки, аиләсини зәрури шејләрлә тәмин едә билсин. Тәсәввүр един ки, бир гардаш һеч бир сәһви олмадығы һалда ишдән азад олунур. Јени иш тапмаг үчүн чох чалышыр, амма тапа билмир. Бу ҹүр вәзијјәтлә үзләшдикдән сонра о, өзүнү дәјәрсиз һисс едә биләр. Бәс диггәтини Јеһованын вәдләринә ҹәмләмәси гардаша неҹә көмәк едә биләр?

14. Јеһова һансы сәбәбләрә ҝөрә вәдләринә садигдир?

¹⁴ Јеһова һәмишә вәдләринә садиг галыр (Јуш. 21:45; 23:14). О буну бир нечә сәбәбә ҝөрә едир. Биринҹиси, Өз ады наминә. Јеһова сөз вериб ки, сәдагәтли хидмәтчиләринин гајғысына галаҹаг вә бу вәдини јеринә јетирмәји Өзүнә борҹ билир (Зәб. 31:1—3). Үстәлик, Јеһова билир ки, әҝәр О, бизим гајғымыза галмаса, аиләсинин бир һиссәси олан бизләр чох мәјус оларыг. О бизи һәм мадди, һәм дә руһани шејләрлә тәмин едәҹәјинә сөз верир вә һеч бир шеј Онун бу вәдини ҝерчәкләшдирмәсинә мане ола билмәз! (Мәт. 6:30—33; 24:45).

15. а) Биринҹи әсрдәки мәсиһиләр һансы чәтинликлә үзләшмишди? б) Зәбур 37:18, 19 ајәләри бизи нәјә әмин едир?

 ¹⁵ Јеһованын Өз вәдләрини нә үчүн јеринә јетирдијини јадда сахласаг, мадди чәтинликләр заманы Онун бизә дајаг олаҹағына әмин олаҹағыг. Ҝәлин биринҹи әсрдәки мәсиһиләрин нүмунәсинә бахаг. Јерусәлимдәки јығынҹаға гаршы бөјүк тәгибләр башлајанда «һәвариләрдән башга шаҝирдләрин һамысы» диҝәр шәһәрләрә гачмышды (Һәв. 8:1). Бунун нә демәк олдуғуну бир тәсәввүр един. Онлар мадди чәтинликлә үзләшмишдиләр. Ҝүман ки, мәсиһиләр евләрини вә ишләрини итирмишдиләр. Бунунла белә, нә Јеһова онлары атды, нә дә онлар севинҹини итирди (Һәв. 8:4; Ибр. 13:5, 6; Јаг. 1:2, 3). Јеһова бу садиг мәсиһиләрә дајаг олмушду, О бизә дә дајаг олаҹаг. (Зәбур 37:18, 19 ајәләрини охујун.)

16. Хидмәтимизин Јеһова үчүн дәјәрсиз олдуғуну дүшүнмәјимизә нә сәбәб ола биләр?

¹⁶ Јаша долдугҹа Јеһоваја хидмәтдә әлимиздән чох аз шеј ҝәлдијини дүшүнә биләрик. Давуд падшаһ да јаша доланда бу кими һиссләр кечирмишди (Зәб. 71:9). Бәс Јеһова бизә неҹә көмәк едә биләр?

17. Ҹери адлы баҹынын нүмунәсиндән нә өјрәнә биләрик?

¹⁷ Ҝәлин Ҹери адлы бир баҹынын нүмунәсинә нәзәр салаг. О, ибадәт евиндә кечирилән теократик биналара гуллугла бағлы семинара дәвәт олунмушду, лакин семинара гатылмаг истәмирди. Баҹы дүшүнүрдү: «Мән јашлыјам, дулам вә бу ишдә Јеһоваја јарарлы олаҹаг һеч бир баҹарығым јохдур. Мән һеч нәјә јарамырам». Семинардан өнҹәки ҝеҹә о, дуада үрәјини Јеһоваја бошалдыр. Нөвбәти ҝүн ибадәт евинә чатанда  Ҹери баҹы һәлә дә семинара гатылмаға тәрәддүд едир. Семинар вахты натигләрдән бири гејд едир ки, бизим ән дәјәрли баҹарығымыз Јеһовадан тәлим алмаг истәјимиздир. Ҹери баҹы дејир: «Дүшүндүм ки, бу баҹарыг мәндә вар! Бунун дуама ҹаваб олдуғуну баша дүшәндә ҝөз јашларымы сахлаја билмәдим. Јеһова мәни әмин етди ки, Она верә биләҹәјим дәјәрли бир шејә саһибәм вә мәнә тәлим вермәк истәјир!» Баҹы һәмин ҝүнү хатырлајараг дејир: «Семинара ҝедәндә өзүмү нараһат, мәјус вә дәјәрсиз һисс едирдим. Лакин орадан чыханда дахилимдә әминлик, руһ јүксәклији вар иди, даһа өзүмү јарарсыз һисс етмирдим!»

18. Мүгәддәс Китаб Јеһованын һәтта јашлансаг белә, хидмәтимизи дәјәрләндирдијини неҹә ҝөстәрир?

¹⁸ Јаша долсаг да, әмин ола биләрик ки, Јеһоваја хидмәтдә ҝөрәҹәјимиз чох иш вар (Зәб. 92:12—15). Иса Мәсиһ демишди ки, баҹарығымыз нә гәдәр мәһдуд олса да, етдијимиз шејләр нә гәдәр кичик ҝөрүнсә дә, Јеһова Она хидмәтдә ҝөрдүјүмүз һәр бир иши чох гијмәтләндирир (Лука 21:2—4). Одур ки, диггәтинизи баҹардығыныз шејләрә ҹәмләјин. Мисал үчүн, Јеһова һагда даныша, баҹы-гардашлар үчүн дуа едә, кимләрисә садиг галмаға тәшвиг едә биләрсиниз. Јеһова баҹардығыныз шејләрә ҝөрә јох, Она итаәт етмәк истәјинизә ҝөрә сизи Өзүнә әмәкдаш сечиб (1 Кор. 3:5—9).

19. Ромалылара 8:38, 39 ајәләри бизә һансы әминлији верир?

¹⁹ Јеһоваја — хидмәтчиләрини сөзүн әсл мәнасында дәјәрләндирән Аллаһа ибадәт етдијимизә ҝөрә чох хошбәхтик! Јеһова бизи Өз нијјәтини иҹра етмәјимиз үчүн јарадыб вә һәјатымыза әсл мәна гатан пак ибадәтдир (Вәһј 4:11). Дүнја бизә дәјәрсиз јанаша биләр, амма биз Јеһова үчүн дәјәрлијик (Ибр. 11:16, 38). Одур ки, хәстәлик, мадди чәтинлик, јахуд гоҹалыг уҹбатындан мәјуслуға гәрг оланда, унутмајын ки, һеч нә сизи Јеһованын мәһәббәтиндән ајыра билмәз. (Ромалылара 8:38, 39 ајәләрини охујун.)