1. Вәфтиздән сонра һәр бир мәсиһи нә етмәјә давам етмәлидир?

ВӘФТИЗ олунмусунуз? Әҝәр олмусунузса, һамынын гаршысында Јеһоваја иманынызы вә тәшкилаты * илә бирҝә Она ибадәт етмәк истәјинизи билдирмисиниз. Шүбһәсиз ки, Јеһоваја иманыныз ҝетдикҹә артмалыдыр. Һәмчинин Јеһованын Өз нијјәтини бу ҝүн тәшкилаты васитәсилә һәјата кечирдијинә әминлијинизи мөһкәмләндирмәлисиниз.

2, 3. Бу ҝүн Јеһова Өз тәшкилатына неҹә рәһбәрлик едир? Нүмунә ҝәтирин.

² Бу ҝүн Јеһованын тәшкилатына рәһбәрлик етмәк тәрзиндә Онун кејфијјәтләри, мәгсәдләри вә гајда-ганунлары әкс олунур. Ҝәлин Јеһоваја хас үч өзәллик һагда данышаг.

³ Биринҹиси, «Аллаһ ајры-сечкилик етмәјән Аллаһдыр» (Һәв. 10:34). Мәһәббәтдән ирәли ҝәләрәк Јеһова Оғлуну «фидјә кими һамыдан өтрү» гурбан вериб (1 Тим. 2:6; Јәһ. 3:16). Јеһова гулаг асмаг истәјән һәр кәсә халгы васитәсилә мүждәни чатдырыр вә беләҹә, даһа чох инсана фидјә сајәсиндә хилас олмаг имканы јарадыр. Икинҹиси, Јеһова низам-интизам вә сүлһ Аллаһыдыр (1 Кор. 14:33, 40). Буна ҝөрә дә Онун хидмәтчиләри бир груп кими низамлы вә сүлһ ичиндә хидмәт едир. Үчүнҹүсү, Јеһова Бөјүк Нәсиһәтчидир (Әшј. 30:20, 21). Бу сәбәбдән тәшкилаты һәм јығынҹагда, һәм дә хидмәтдә инсанлара Аллаһын Кәламыны өјрәтмәк үчүн әлиндән ҝәләни едир. Илк мәсиһи јығынҹағы Јеһоваја хас бу үч өзәллији  неҹә тәзаһүр етдирирди? Бизим дөврүмүздә бу неҹә ҝөрүнүр? Мүгәддәс руһ Јеһованын тәшкилаты илә әмәкдашлығымыза неҹә көмәк едир?

4. Һәвариләрин ишләри 1:8 ајәсиндә гејд олундуғу кими, Иса Мәсиһ давамчыларына нә бујурмушду вә онлар һансы көмәји алдылар?

⁴ Биринҹи әсрдә. Иса Мәсиһин бәјан етдији мүждә бүтүн бәшәријјәтә үмид бәхш едирди (Лука 4:43). О, давамчыларына бујурмушду ки, онун башладығы иши давам етдирсинләр вә «јерин уҹгарларынадәк» шаһидлик версинләр. (Һәвариләрин ишләри 1:8 ајәсини охујун.) Әлбәттә, онлар бу иши өз ҝүҹләринә едә билмәздиләр. Онларын Иса Мәсиһин вәд етдији «көмәкчи»јә, јәни мүгәддәс руһа еһтијаҹлары вар иди (Јәһ. 14:26; Зәк. 4:6).

5, 6. Мүгәддәс руһ Исанын давамчыларына һансы јолларла көмәк едирди?

⁵ Исанын давамчылары мүгәддәс руһу ерамызын 33-ҹү илинин Әллинҹи ҝүн бајрамында алдылар. Мүгәддәс руһун көмәјилә онлар дәрһал тәблиғ етмәјә башладылар вә гыса мүддәтдә минләрлә инсан хош хәбәрә һај верди (Һәв. 2:41; 4:4). Тәгибләр баш галдыранда шаҝирдләр горхуја гапылмады, Аллаһа үз тутуб дуа етдиләр: «Өз гулларына гүввәт вер ки,.. Сәнин сөзүнү бундан сонра да ҹәсарәтлә данышаг». Беләҹә, онлар мүгәддәс руһла долду вә «Аллаһын сөзүнү ҹәсарәтлә данышмаға» давам етдиләр (Һәв. 4:18—20, 29—31).

⁶ Исанын давамчылары башга чәтинликләрлә дә үзләширдиләр. Мәсәлән, әлләриндә Мүгәддәс Јазыларын чох аз нүсхәси вар иди. Онларда биздә олан тәлим вәсаитләри јох иди. Үстәлик, шаҝирдләр мүхтәлиф дилләрдә данышан инсанлара тәблиғ етмәли иди. Бу әнҝәлләрә бахмајараг, шөвглү шаҝирдләр мүмкүнсүз ҝөрүнән иши һәјата кечирдиләр, ҹәми-ҹүмләтаны бир нечә ониллијә мүждәни «сәма алтында јашајанларын һамысына» тәблиғ етдиләр (Кол. 1:6, 23).

7. Мәсиһиләр тәхминән 100 ил бундан габаг Аллаһын онлардан нә ҝөзләдијини һарадан билирдиләр вә буна неҹә әмәл етдиләр?

⁷ Мүасир дөврдә. Јеһова бу ҝүн дә халгына рәһбәрлик етмәјә вә гүввәт вермәјә давам едир. Әлбәттә ки, О, рәһбәрлијини башлыҹа олараг мүгәддәс руһу илә јаздырдығы Кәламы васитәсилә верир. Орада Иса Мәсиһин хидмәти вә башладығы иши давам етдирмәклә бағлы шаҝирдләринә вердији әмр јер алыр (Мәт. 28:19, 20). Һәлә 1881-ҹи илдә бу журналын ијул сајында јазылмышды: «Бизим чағырылмағымызын вә мәсһ олунмағымызын сәбәби шөһрәт, јахуд вар-дөвләт газанмаг дејил, әксинә, ҹанымызы вә малымызы хош хәбәрин тәблиғинә сәрф етмәкдир». 1919-ҹу илдә дәрҹ олунан «Бу иш кимә һәвалә олунуб?» адлы буклетдә јазылмышды: «Нә гәдәр нәһәнҝ ҝөрүнсә дә, бу, Ағамызын ишидир вә онун вердији ҝүҹ сајәсиндә бунун өһдәсиндән ҝәләҹәјик». Бәли, биринҹи әсрдәки мәсиһиләр кими, бу мәсиһиләр дә ҹәсарәтли иди вә ишә бүтүн ҹанларыны гојдулар. Чүнки әмин идиләр ки, мүгәддәс руһ онлара һәр ҹүр инсана тәблиғ етмәјә көмәк едәҹәк. Бу әминлик биздә дә вар.

8, 9. Тәблиғ ишинин ирәлиләмәси үчүн тәшкилат һансы үсуллардан истифадә едиб?

⁸ Јеһованын тәшкилаты хош хәбәрин јајылмасы үчүн һәмишә мүмкүн олан ән јахшы вәсаитләрдән истифадә едир. Бура чап олунмуш нәшрләр, «Јарадылыш фотодрамы», фонограф, сәсҝүҹләндириҹи гурашдырылан машынлар, радиојајым, һал-һазырда исә рәгәмсал технолоҝијаларын истифадәси  дахилдир. Һәмчинин тәшкилат тарихдә ҝөрүлмәмиш мигјасда тәрҹүмә ишини һәјата кечирир. Мәгсәд одур ки, бүтүн милләтләрдән олан инсанлар өз ана дилиндә хош хәбәри ешидә билсин. Јеһова ајры-сечкилик етмәјән Аллаһдыр, О пејғәмбәрлик етмишди ки, мүждә «һәр халга, тајфаја, дилә вә үммәтә» ҹар чәкиләҹәк (Вәһј 14:6, 7). О истәјир ки, Падшаһлыг һагда хәбәри һамы ешидә билсин.

⁹ Бәс мүһафизә олунан евләрдә јашајан, јахуд башга сәбәбләрә ҝөрә әлагә јарада билмәдијимиз инсанлар һагда нә демәк олар? Буну нәзәрә алараг, Јеһованын рәһбәрлији илә тәшкилат мүхтәлиф иҹтимаи шаһидлик нөвләриндән истифадә етмәјә башлады. Мәсәлән, 2001-ҹи илдә Рәһбәрлик Шурасы Франсада, сонра исә башга әразиләрдә әдәбијјат арабаларынын вә нәшрләримизи сәрҝиләјән диҝәр васитәләрин истифадәсинә разылыг верди. Бу, чох ҝөзәл бәһрәләр ҝәтирди. 2011-ҹи илдә Нју-Јорк шәһәринин (АБШ) ән гәләбәлик әразиләринин бириндә јени лајиһә сынагдан кечирилди. Илк бир илдә 102 129 китаб вә 68 911 журнал пајланды. 4701 нәфәр исә Мүгәддәс Китабы өјрәнмәк истәјини билдирди! Ҝүн кими ајдын иди ки, Јеһова мүгәддәс руһу илә бу иши дәстәкләјирди. Буна ҝөрә дә Рәһбәрлик Шурасы иҹтимаи шаһидлијин бу үсулунун бүтүн дүнјада истифадә олунмасына разылыг верди.

10. Хидмәтимизи јахшылашдырмаг үчүн нә едә биләрик?

¹⁰ Сизин өһдәнизә нә дүшүр? Јеһованын јығынҹагда вердији тәлимдән там јарарланын. Тәблиғ групунузла мүнтәзәм әмәкдашлыг един. Онлар сизә тәблиғчи кими пүхтәләшмәјә көмәк едә биләр вә өз ҝөзәл нүмунәләри илә руһландыра биләр. Чәтинликләрлә үзләшсәниз дә, тәблиғдән галмајын. Мәгаләнин әсас ајәсиндә дә вурғуландығы кими, биз Аллаһын ирадәсини өз ҝүҹүмүзлә јох, мүгәддәс руһун көмәјилә һәјата кечиририк (Зәк. 4:6). Ахы биз Аллаһын бујурдуғу иши ҝөрүрүк.

11. Биринҹи әсрдә рәһбәрлик шурасы низам-интизамы горумаг үчүн неҹә әмәкдашлыг етмишди?

¹¹ Биринҹи әсрдә. Јерусәлимдәки рәһбәрлик  шурасы Аллаһын халгы арасында низам-интизамы вә сүлһү горумаг үчүн бирлик ичиндә әмәкдашлыг едирди (Һәв. 2:42). Мәсәлән, ерамызын 49-ҹу илиндә сүннәт мәсәләси галханда рәһбәрлик шурасы мүгәддәс руһун јөнләндирмәси илә бу иши арашдырды. Әҝәр јығынҹагда икитирәлик давам етсәјди, бу, тәблиғ ишинә мане олаҹагды. Һәвариләр вә ағсаггаллар јәһуди олсалар да, нә јәһуди адәт-әнәнәсинин, нә дә онун гәти тәрәфдарларынын тәсири алтына дүшмәдиләр. Әксинә, Аллаһын Кәламыны арашдырдылар вә мүгәддәс руһун рәһбәрлијини ахтардылар (Һәв. 15:1, 2, 5—20, 28). Бәс нәтиҹә нә олду? Јеһова онларын гәрарына бәрәкәт верди, сүлһ вә бирлик горунду вә тәблиғ иши ирәлиләди (Һәв. 15:30, 31; 16:4, 5).

12. Мүасир дөврдә Јеһованын тәшкилатында низамын вә сүлһүн олдуғу нәдән ҝөрүнүр?

¹² Мүасир дөврдә. Јеһованын халгы арасында сүлһүн вә низамын олмасы үчүн тәшкилат бир сыра ишләр һәјата кечириб. Һәлә 1895-ҹи илдә «Сион Ҝөзәтчи гүлләси вә Мәсиһин һүзурунун ҹарчысы» журналынын 15 нојабр сајында «Әдәб-әрканла вә низамла» адлы мәгалә јер алмышды. 1 Коринфлиләрә 14:40 ајәсинә әсасланан бу мәгаләдә дејилирди: «Һәвариләр илк мәсиһи јығынҹағына низам-интизамла бағлы чох шеј јазырдылар... Ваҹибдир ки, “әввәлҹәдән... бизә нәсиһәт олараг” јазыланлара ҹидди әмәл етмәјә давам едәк» (Ром. 15:4). Биринҹи әсрдәки мәсиһиләри сәҹијјәләндирән низам вә сүлһ бу ҝүн дә Јеһованын тәшкилатынын амалыдыр. Мәсәлән, истәр башга јығынҹаға ҝедин, истәрсә дә башга өлкәјә, һәмин һәфтә «Ҝөзәтчи гүлләси»нин мүзакирәсиндә һансы мәгаләнин арашдырылаҹағыны вә неҹә арашдырылаҹағыны билирсиниз. Өзүнүзү јад һисс етмирсиниз. Бу бирлик Аллаһын руһунун гүдрәтидир! (Сәф. 3:9).

13. Јагуб 3:17 ајәсинә әсасән, һансы суалларын үзәриндә дүшүнмәлијик?

¹³ Сизин өһдәнизә нә дүшүр? Јеһова истәјир ки, халгы «сүлһүн бирләшдириҹи телләри арасында руһун вердији бирлији» горусун (Ефес. 4:1—3). Өзүнүздән сорушун:  «Јығынҹагда бирлијин вә сүлһүн олмасына дәстәк олурам? Рәһбәрлик едән гардашлара табе олурам? Башгалары мәнә етибар едә билир, хүсусилә дә јығынҹагда һансыса мәсулијјәтим варса? Пунктуалам, инсанларын дадына јетирәм вә хидмәтә ҹан јандырырам?» (Јагуб 3:17 ајәсини охујун.) Һансыса саһәдә јахшылашмаг лазымдырса, дуада мүгәддәс руһ диләјин. Мүгәддәс руһун сизи формалашдырмасына вә һәрәкәтләринизә јөн вермәсинә нә гәдәр чох изин версәниз, баҹы-гардашлар сизи бир о гәдәр чох севәҹәк вә гијмәтләндирәҹәк.

14. Колослулара 1:9, 10 ајәләринә әсасән, Јеһова биринҹи әсрдә халгына неҹә тәлим верирди?

¹⁴ Биринҹи әсрдә. Јеһова халгына тәлим вермәкдән бөјүк зөвг алыр (Зәб. 32:8). Истәјир ки, халгы Ону танысын, севсин вә севимли өвладлары кими әбәди јашасын. Тәлим вермәсәјди, бүтүн бунлар мүмкүн олмазды (Јәһ. 17:3). Јеһова биринҹи әсрдәки халгына јығынҹаглар васитәсилә тәлим верирди. (Колослулара 1:9, 10 ајәләрини охујун.) Мүгәддәс руһун — Исанын вәд етдији «көмәкчи»нин бунда бөјүк ролу вар иди (Јәһ. 14:16). Бу руһ мәсиһиләрә Аллаһын Кәламыны даһа јахшы баша дүшмәјә вә Исанын дедикләрини вә етдикләрини јадларына салмаға көмәк етди, сонралар бу мәлуматлар Инҹилдә гәләмә алынды. Бу билик илк мәсиһиләрин иманыны артырды, һәмчинин Аллаһа, Онун Оғлуна вә бир-бириләринә мәһәббәтләрини мөһкәмләндирди.

15. Јеһованын Әшија 2:2, 3 ајәләриндә јазылан вәдинин һәјата кечдијинин неҹә шаһиди олмусунуз?

¹⁵ Мүасир дөврдә. Јеһова габагҹадан демишди ки, заманын сонунда бүтүн халглар Онун јолларыны өјрәнмәк үчүн мәҹази дағына ахышаҹаг. (Әшија 2:2, 3 ајәләрини охујун.) Бу пејғәмбәрлијин јеринә јетдијинин шаһидијик. Пак ибадәт бүтүн јалан ибадәтләрдән јүксәјә уҹалыр. Һәмчинин  Јеһова халгына руһани зијафәт верир! (Әшј. 25:6). О, «садиг вә ағыллы нөкәр» васитәсилә бол олмагла јанашы, ҹүрбәҹүр руһани гида верир: мәгаләләр, чыхышлар, гәләм анимасијалары вә видеолар (Мәт. 24:45). Биз Әјјубун досту Әлиһунун сөзләринә шәрикик: «Аллаһ... кими нәсиһәтчи вармы?» (Әјј. 36:22).

16. Јеһованын вердији тәлимдән неҹә јарарлана биләрсиниз?

¹⁶ Сизин өһдәнизә нә дүшүр? Аллаһын руһу Кәламындан өјрәндијиниз биликләри тәтбиг етмәјә көмәк едәҹәк. Дуанызда мәзмурчу кими дејин: «Јеһова, мәнә Өз јолунда тәлим вер, һәгигәтиндә аддымлајым. Үрәјими бүтөв ет ки, адындан горхум» (Зәб. 86:11). Јеһованын Кәламыны вә тәшкилаты васитәсилә вердији нәшрләри мүталиә етмәјә давам един. Тәбии ки, мәгсәдиниз тәкҹә билик алмаг дејил. Истәјирсиниз ки, һәгигәт үрәјиниздә көк салсын вә һәјат јолунда бәләдчиниз олсун. Бу ишдә Јеһованын руһу сизә көмәк едә биләр. Һәмчинин истәјирсиниз ки, диндашларынызы да руһландырасыныз (Ибр. 10:24, 25). Чүнки онлар сизин руһани аиләниздир. Јығынҹагда сәмими шәрһләр вермәјиниз, тапшырығынызы баҹардығыныз гәдәр јахшы јеринә јетирмәјиниз үчүн дуада Аллаһдан мүгәддәс руһ диләјин. Бунлары етмәклә Јеһоваја вә Исаја ҝөстәрәҹәксиниз ки, онларын гузуларыны севирсиниз (Јәһ. 21:15—17).

17. Јеһованын тәшкилатыны сәдагәтлә дәстәкләдијинизи һансы үсулларла ҝөстәрә биләрсиниз?

¹⁷ Тезликлә јер үзүндә јалныз Аллаһын руһу илә идарә олунан тәшкилат галаҹаг. Она ҝөрә дә Јеһованын тәшкилаты илә сых әмәкдашлыг един. Ајры-сечкилик етмәјән Аллаһын мәһәббәтини өрнәк алараг гаршылашдығыныз бүтүн инсанлара мүждәни бәјан един. Аллаһ низам-интизамы вә сүлһү севир, буна ҝөрә дә Ондан өрнәк алараг јығынҹагда бирлији горујун. Бөјүк Нәсиһәтчимизә гулаг асын, бунун үчүн Онун вердији руһани зијафәтдән там јарарланын. Беләҹә, Шејтан дүнјасынын сону ҝәләндә сизи горху бүрүмәјәҹәк. Ҹәсарәтли олаҹагсыныз вә Јеһованын садиг хидмәтчиләринин арасында дураҹагсыныз.