1. Нәјә ҝөрә Јеһова там сәдагәтә лајиг Аллаһдыр?

ЈЕҺОВА там сәдагәтимизә лајиг Аллаһдыр, чүнки бизи О јарадыб, бизә һәјаты О вериб (Вәһј 4:11). Бунунла белә, бизим үчүн бир тәһлүкә вар. Бахмајараг ки, Јеһованы севир вә Она еһтирам бәсләјирик, бәзи шејләр һәјатымызда өн плана кечәрәк Јеһоваја лајиг олдуғу сәдагәти ҝөстәрмәјимизә әнҝәл ола биләр. Бунун неҹә баш вердијини анламаг ҝәрәкдир. Амма әввәлҹә ҝәлин ҝөрәк Јеһоваја там сәдагәт ҝөстәрмәк нә демәкдир.

2. Чыхыш 34:14 ајәсинә әсасән, Јеһоваја там садигиксә, нә едәҹәјик?

² Мүгәддәс Китаба әсасән, Аллаһа там сәдагәт ҝөстәрмәк Она дәрин мәһәббәт бәсләмәк демәкдир. Әҝәр Јеһоваја там садигиксә, јалныз Она ибадәт едәҹәјик. Һеч кимин вә һеч нәјин гәлбимиздә Онун јерини тутмасына изин вермәјәҹәјик. (Чыхыш 34:14 ајәсини охујун.)

3. Нә үчүн Јеһоваја сәдагәтимиз кор-коранә дејил?

³ Јеһоваја сәдагәтимиз кор-коранә дејил. Чүнки сәдагәтимиз Онун һаггында өјрәндијимиз фактлара әсасланыр. Биз Јараданымызын ҝөзәл хүсусијјәтләринә һејраныг. Севдији вә нифрәт етдији шејләри билирик вә Онунла һәмфикирик. Бәшәријјәтлә бағлы нијјәтини дәрк едирик вә һәјат тәрзимизлә буну дәстәкләјирик. Бизә Өз досту олмаг имканы вермәсиндән гүрур дујуруг (Зәб. 25:14). Јараданымыз  һаггында өјрәндијимиз һәр бир шеј бизи Она јахынлашдырыр (Јаг. 4:8).

4. а) Иблис Јеһоваја мәһәббәтимизи неҹә зәифләтмәјә чалышыр? б) Бу мәгаләдә нәји арашдыраҹағыг?

⁴ Иблис идарә етдији дүнја васитәсилә тәбии истәкләримизи вә ҝүнаһлы мејилләримизи аловландырмаға чалышыр (Ефес. 2:1—3; 1 Јәһ. 5:19). Онун мәгсәди одур ки, Јеһоваја мәһәббәтимиз һачалансын. Ҝәлин ҝөрәк о, һансы саһәләрдә мүәјјән уғур газана биләр. Биринҹиси, о бизи вар-дөвләтә ҹан атмаға тәшвиг едир. Икинҹиси, биздә пис әјләнҹә нөвләринә мејил ојатмаға чалышыр.

5. Нә үчүн өзүмүзү пулпәрәстликдән ҝөзләмәлијик?

⁵ Јетәринҹә гидамызын, мүнасиб пал-палтарымызын вә јашамаг үчүн нормал евимизин олмасыны һәр биримиз истәјирик. Амма өзүмүзү пулпәрәстликдән ҝөзләмәлијик. Бу ҝүн пулу вә пулла алына билән шејләри севәнләр чохдур (2 Тим. 3:2). Иса Мәсиһ билирди ки, давамчылары да пула мејил сала биләр. Одур ки, демишди: «Һеч ким ики ағаја гуллуг едә билмәз. Ја биринә нифрәт едиб диҝәрини севәҹәк, ја да биринә сәдагәт ҝөстәриб, диҝәрини сајмајаҹаг. Сиз һәм Аллаһын, һәм дә вар-дөвләтин гулу ола билмәзсиниз» (Мәт. 6:24). Јеһоваја хидмәт едиб, ејни заманда бу дүнјада варланмаг үчүн чохлу вахт вә ҝүҹ сәрф едән инсан, бир нөв, ики ағаја гуллуг етмәјә чалышыр. Белә инсанын Јеһоваја сәдагәти там ола билмәз.

6. Иса Мәсиһин Лаодикија јығынҹағына дедији сөзләрдән нә өјрәнирик?

⁶ Ерамызын биринҹи әсринин сонларына јахын Лаодикија шәһәриндәки јығынҹағын үзвләри ловғаланыб дејирдиләр: «Мән варлыјам,  варланмышам, һеч нәјә еһтијаҹым јохдур». Лакин Јеһованын вә Исанын ҝөзүндә онлар бәдбәхт, аҹынаҹаглы ҝүндә, јохсул, кор вә чылпаг идиләр. Иса онлары варлы олдуглары үчүн јох, вар-дөвләт һәрислији уҹбатындан Јеһова илә мүнасибәтләрини корладыглары үчүн мәзәммәт етмишди (Вәһј 3:14—17). Үрәјимиздә вар-дөвләтә севҝинин бој атдығыны һисс едириксә, ҹәлд тәрпәниб дүшүнҹәмизи дүзәлтмәлијик (1 Тим. 6:7, 8). Әкс һалда, мәһәббәтимиз һачаланаҹаг вә Јеһова ибадәтимизи гәбул етмәјәҹәк. О, «там сәдагәт тәләб едән Аллаһдыр» (Ган. 4:24). Бәс неҹә ола биләр ки, пула гаршы таразылығы итирәк?

7—9. Дејвид адлы ағсаггалын һәјатындан нә өјрәнирик?

⁷ Бирләшмиш Штатларда јашајан Дејвид адлы чалышган бир ағсаггалын нүмунәсинә нәзәр салаг. О, әввәлләр һәјатыны ишә һәср етдијини дејир. Ишләдији ширкәт онун вәзифәсини артырмышды, үстәлик, өз ихтисасына ҝөрә өлкәдә ад-сан газанмышды. Дејвид дејир: «Бәзән дүшүнүрдүм ки, газандығым уғурлар Јеһованын хејир-дуасыдыр». Бу, доғрудан да, белә иди?

⁸ Дејвид тәдриҹән ҝөрүр ки, иши Јеһова илә мүнасибәтләринә хәләл ҝәтирир. О дејир: «Фикир вердим ки, јығынҹагда, һәтта хидмәтдә ишдәки проблемләрими дүшүнүрәм. Дүздүр, чохлу пул газанырдым, амма јаман ҝәрҝин олмушдум вә јолдашымла мүнасибәтләрим корланмаға башламышды».

⁹ Дејвид баша дүшдү ки, һәјатда онун үчүн нәјин даһа ваҹиб олдуғуна гәрар вермәлидир. О дејир: «Вәзијјәти дүзәлтмәјә  гәтијјәтли идим». Дејвид иш ҹәдвәлиндә дәјишиклик етмәк гәрарына ҝәлир вә буну мүдиринә билдирир. Нәтиҹә неҹә олур? Дејвид ишини итирир. Бәс о, нә едир? Гардаш дејир: «Елә сәһәриси ҝүн давамлы олараг көмәкчи өнҹүл кими хидмәт етмәк үчүн әризә долдурдум». Өзләрини доландырмаг үчүн Дејвидлә јолдашы бөјүк биналарда тәмизлик ишләри ҝөрмәјә башлајыр. Бир мүддәтдән сонра Дејвид өнҹүл олур, даһа сонра исә һәјат јолдашы она гошулур. Бу әр-арвад ашағы сәвијјәли һесаб олунан ишдә ишләмәјә разы олурлар, чүнки онлар үчүн бу, һәјатда ән ваҹиб шеј дејил. Ҝәлирләри әввәлкинә нисбәтдә он гат азалса да, һәр ај хәрҹләрини өдәјә биләҹәкләри гәдәр пуллары олур. Онлар Јеһованы һәјатда һәр шејдән үстүн тутмаг истәјирләр вә өз тәҹрүбәләриндән ҝөрүбләр ки, Јеһова Падшаһлығын марагларыны өн плана гојанларын гајғысына галыр (Мәт. 6:31—33).

10. Үрәјимизи неҹә горуја биләрик?

¹⁰ Мадди дурумумузун неҹә олмасындан асылы олмајараг, һәр биримиз үрәјимизи горумалыјыг. Буну неҹә едә биләрик? Вар-дөвләтә севҝи бәсләмәмәклә вә ишимизин Јеһоваја хидмәтдән даһа ваҹиб олмасына јол вермәмәклә. Нөвбәти суалларын васитәсилә өзүмүзү јохлаја биләрик: «Јығынҹагда вә ја хидмәтдә оланда иш һагда тез-тез дүшүнүрәм? Ҝәләҹәк ҝүзараныма ҝөрә даима нараһатчылыг ичиндәјәм? Пула вә мадди шејләрә ҝөрә јолдашымла арамда проблемләр олур? Јеһоваја даһа чох хидмәт етмәк үчүн ашағы сәвијјәли сајылан ишдә ишләмәјә разылашарам?» (1 Тим. 6:9—12). Бу суалларын үзәриндә дүшүнәркән, ҝәлин Јеһованын бизи севдијини вә өзүнү Она һәср едәнләрә вердији вәди унутмајаг: «Сәни һеч вахт атмарам, һеч вахт тәрк етмәрәм». Елә бу сәбәбдән һәвари Булус јазмышды: «Һәјатынызда пулпәрәстлијә јер вермәјин» (Ибр. 13:5, 6).

11. Әјләнҹә инсана һансы тәсири ҝөстәрмәјә гадирдир?

¹¹ Јеһова һәјатдан зөвг дујмағымызы истәјир, әјләнҹә бизә бу саһәдә көмәк едә биләр. Белә ки, Мүгәддәс Китабда јазылыб: «Инсан үчүн јејиб-ичмәкдән, зәһмәтиндән зөвг алмагдан јахшы шеј јохдур» (Ваиз 2:24). Амма бу дүнјада әксәр әјләнҹә нөвләри бизә мәнфи тәсир  ҝөстәрә биләр. Бу ҝүн әјләнҹә инсанларын әхлаг дәјәрләрини ашағы салыр, Аллаһын Кәламында мүһакимә олунан шејләрә нормал јанашмаға, һәтта онлары севмәјә тәшвиг едир.

12. 1 Коринфлиләрә 10:21, 22 ајәләринә әсасән, нәјә ҝөрә әјләнҹә сечиминдә диггәтли олмалыјыг?

¹² Биз Јеһоваја там сәдагәт ҝөстәрмәк истәјирик, буна ҝөрә дә һәм «Јеһованын сүфрәсиндән», һәм дә «ҹинләрин сүфрәсиндән» јејә билмәрик. (1 Коринфлиләрә 10:21, 22 ајәләрини охујун.) Киминләсә бир сүфрә архасында әјләшмәк адәтән достлуг әламәти сајылыр. Зоракылығы, ҹиндарлығы, әхлагсызлығы, јахуд диҝәр ҝүнаһлы истәк вә бахыш тәрзини ашылајан әјләнҹә нөвләриндә иштирак етмәклә Аллаһын дүшмәнләринин һазырладығы сүфрәдән јемиш олуруг. Бунунла тәкҹә өзүмүзә јох, һәм дә Јеһова илә достлуғумуза хәтәр јетиририк.

13, 14. Јагуб 1:14, 15 ајәләри әјләнҹә сечиминдә диггәтли олмағын ваҹиблијини неҹә ҝөстәрир? Нүмунә чәкин.

¹³ Ҝәлин ҝөрәк һансы мәнада әјләнҹәни гидаја бәнзәтмәк олар. Јемәк јејәндә нәји ағзымыза апардығымызы өзүмүз гәрар веририк. Амма ону уданда автоматик просесләр башлајыр вә организмимиз гидадакы маддәләри мәнимсәјир. Јахшы гида организмимизә фајда ҝәтирир, пис гида исә зәрәр верир. Нәтиҹә бир ҝеҹәнин ичиндә бүрузә вермәсә дә, өзүнү мүтләг ҝөстәрәҹәк.

¹⁴ Ејнилә, әјләнҹә сечәркән ағлымыза нәји гојдуғумуза өзүмүз гәрар веририк. Бундан сонра башлајан автоматик просес нәтиҹәсиндә сечимимиз ағлымыза вә үрәјимизә тәсир едир. Јахшы әјләнҹә бизи тәравәтләндирир, пис әјләнҹә исә зәрәр јетирир. (Јагуб 1:14, 15 ајәләрини охујун.) Пис әјләнҹәнин тәсири, ола билсин, дәрһал бүрузә вермәсин, амма вахт кечдикҹә өзүнү мүтләг ҝөстәрәҹәк. Одур ки, Мүгәддәс Китабда белә бир хәбәрдарлыг јазылыб: «Алданмајын, Аллаһа истеһза едилмәз; инсан нә әкәрсә, ону да бичәҹәк. Ҝүнаһлы бәдәни үчүн әкән бәдәниндән мәһв бичәҹәк, руһ үчүн әкәнсә руһдан әбәди һәјат бичәҹәк» (Гал. 6:7, 8). Ҝөрүн Јеһованын нифрәт етдији шејләри ашылајан бүтүн әјләнҹәләрдән узаг дурмаг нә гәдәр ваҹибдир! (Зәб. 97:10).

15. Јеһова бизә һансы бәхшиши вериб?

¹⁵ Јеһованын халгы интернет телевизијамыз олан JW телевизијасыны изләмәји севир. Мерилин адлы бир баҹы дејир: «JW телевизијасы мәнә даһа никбин олмаға көмәк едиб, үстәлик, бахдығым шеји филтрдән кечирмәјә еһтијаҹ галмыр. Тәнһалыг һисси, руһ дүшкүнлүјү мәни ағушуна аланда руһландырыҹы нитгә вә ја сәһәр ибадәти програмына бахырам. Бунун сајәсиндә өзүмү Јеһоваја вә тәшкилатына даһа јахын һисс едирәм. JW телевизијасы мәним һәјатымы көкүндән дәјишиб». Бәс сиз Јеһованын бу бәхшишиндән јарарланырсыныз? JW телевизијасында ајлыг програмларла јанашы, сајсыз-һесабсыз аудио вә видео програмлар, һәмчинин әһвалы јүксәлдән нәғмәләр вар; онлары истәдијимиз вахт изләјә вә динләјә биләрик.

16, 17. Әјләнҹәјә ајырдығымыз вахта нәјә ҝөрә нәзарәт етмәлијик вә буну неҹә едә биләрик?

¹⁶ Биз тәкҹә әјләнҹәнин нөвүнә јох, она нә гәдәр вахт ајырдығымыза да фикир вермәлијик. Әкс һалда, әјләнҹәјә Јеһоваја хидмәтдән даһа чох вахт сәрф етмиш  оларыг. Чохлары үчүн әјләнҹәјә ајырдыглары вахта нәзарәт етмәк чәтиндир. Абигајил адлы 18 јашлы баҹы дејир: «Јорғун ҝүнүн сонунда телевизора баханда динҹәлирәм. Амма еһтијатлы олмасам, екранын габағында саатларла отура биләрәм». Самуел адлы ҝәнҹ гардаш дејир: «Һәрдән елә олур ки, интернетдә сајсыз-һесабсыз кичик видеолара бахырам. Биринә бахмаға башлајырам, бир дә ајылырам ки, артыг үч-дөрд саат кечиб».

¹⁷ Әјләнҹәјә ајырдығыныз вахты неҹә нәзарәтдә сахлаја биләрсиниз? Әввәлҹә, она үмумијјәтлә нә гәдәр вахт сәрф етдијинизи мүәјјән един. Бир һәфтә әрзиндә әјләнҹәјә ајырдығыныз вахты гејд едә биләрсиниз. Телевизора, интернетдә долашмаға, телефонда ојунлар ојнамаға нечә саат сәрф етдијинизи тәгвимә јазын. Ҝөрсәниз ки, әјләнҹәјә һәддиндән артыг вахт ајырырсыныз, ҹәдвәл тутун. Сонра ҹәдвәлинизә ујғун давранмаг үчүн Јеһоваја дуа един. Беләҹә, сизин Мүгәддәс Китабын фәрди мүталиәсинә, аиләви ибадәтә, ибадәт ҝөрүшләринә, тәблиғ вә тәлим ишинә вахтыныз вә ҝүҹүнүз олаҹаг. Үстәлик, Јеһоваја хидмәти биринҹи јерә гојдуғунуз үчүн әјләнҹәјә ајырдығыныз вахт сизә виҹдан әзабы јашатмајаҹаг.

18, 19. Јеһоваја там сәдагәтимизи неҹә ҝөстәрә биләрик?

¹⁸ Һәвари Бутрус Шејтан дүнјасынын сону вә јени дүнја барәдә јазандан сонра демишди: «Әзизләрим, бүтүн бунлары ҝөзләјәркән вар ҝүҹүнүзлә чалышын ки, Аллаһ сизи ахырда ләкәсиз, гүсурсуз вә сүлһ ичиндә јашајан тапсын» (2 Бут. 3:14). Бу мәсләһәтә әмәл едәндә вә Јеһованын һәјат тәрзимиздән, ибадәтимиздән разы галмасы үчүн әлимиздән ҝәләни едәндә ҝөстәририк ки, Она тамамилә садигик.

¹⁹ Шејтан вә онун дүнјасы бундан сонра да чалышаҹаг ки, һәјатымызда башга шејләри Јеһовадан үстүн тутаг (Лука 4:13). Амма нә чәтинлијимиз олурса-олсун, гәлбимиздә Јеһоваја ајырдығымыз јери киминсә вә ја нәјинсә тутмасына јол вермәјәҹәјик. Биз Јеһоваја там сәдагәт ҝөстәрмәјә гәти гәрарлыјыг. Буна јалныз О лајигдир!