1, 2. а) Нәјә ҝөрә јени аилә гуранлар Јеһоваја ҝүвәнмәлидир? (Зәбур 37:3, 4). б) Бу мәгаләдә нәји арашдыраҹағыг?

ОЛА БИЛСИН, тәзәликҹә аилә гурмусунуз вә ја аилә гурмаға һазырлашырсыныз. Тәбии ки, севдијиниз инсанла хошбәхт өмүр сүрмәји арзулајырсыныз. Дүздүр, аилә һәјатынын өз чәтинликләри вар вә јени аилә гуранлар мүһүм гәрарлар вермәлидир. Бу чәтинликләрә мүнасибәтиниздән вә вердијиниз гәрарлардан гаршыдакы илләрдә бир аилә кими хошбәхт олмағыныз асылыдыр. Әҝәр Јеһоваја ҝүвәниб, һикмәтли гәрарлар версәниз, никаһыныз ҝетдикҹә мөһкәмләнәҹәк вә сиз даһа хошбәхт олаҹагсыныз. Јох әҝәр Јеһованын вердији мәсләһәтләрә мәһәл гојмасаныз, башыныз проблемләрдән ачылмајаҹаг. Бу исә мүнасибәтләриниздә ҝәрҝинлик јарадаҹаг, нәтиҹәдә, хошбәхт олмајаҹагсыныз. (Зәбур 37:3, 4 ајәләрини охујун.)

² Бу мәгалә јени аилә гуранлара үнванланса да, бурада бәһс олунан чәтинликләрлә бүтүн аиләләр үзләшә биләр. Мәгаләдә Мүгәддәс Китабдакы бир чох мөмин киши вә гадынын нүмунәси ҝәтирилир. Онлардан һәјатын мүхтәлиф саһәләри илә јанашы, аилә һәјаты илә дә бағлы чох шеј өјрәнә биләрик. Һәмчинин ҝөрәҹәјик ки, бизим дөврүмүздә јашајан әр-арвадлардан нә өјрәнә биләрик.

3, 4. Јени аилә гуранларын үзләшдији бәзи чәтинликләр һансылардыр?

³ Бәзиләри јени аилә гуранлары тәшвиг едир ки, һамы кими «нормал» һәјат јашасынлар. Мәсәлән, валидејнләр вә гоһумлар онлара тәзјиг ҝөстәрир ки, тез бир заманда өвлад саһиби олсунлар. Јахуд достлар вә аилә үзвләри тәшвиг едир ки, өзләри үчүн ев алсынлар вә ону ҝөзәл әшјаларла долдурсунлар.

⁴ Јени аилә гуранлар еһтијатлы олмасалар, елә гәрар верәрләр ки, бөјүк борҹ алтына ҝирмиш оларлар. Сонра әр дә, арвад да ҝеҹә-ҝүндүз ишләмәли олаҹаг ки, борҹлары өдәсинләр. Ишә сәрф етдикләри вахт фәрди мүталиәјә, аиләви ибадәтә вә хидмәтә ајырмалы олдуглары вахты ала биләр. Һәтта елә ола биләр ки, онлар ибадәт ҝөрүшләрини дә бурахсынлар, чүнки даһа чох пул газанмаг вә ја ишләрини итирмәмәкдән өтрү әлавә ишләмәли ола биләрләр. Нәтиҹәдә, Јеһоваја хидмәтләрини ҝенишләндирмәк имканыны әлдән вермиш оларлар.

5. Клаусла Марисадан нә өјрәндиниз?

⁵ Тәҹрүбә ҝөстәрир ки, һәјатда пул газанмаға үстүнлүк вермәк инсана хошбәхтлик ҝәтирмир. Клаус вә Мариса адлы әр-арвад буна өз һәјатларында шаһид олуб *. Тәзә аилә гурандан сонра онларын һәр икиси там иш ҝүнү ишләјирди ки, өзләри үчүн раһат һәјат гурсунлар. Амма дахилләриндә мәмнунлуг һисси јох иди. Клаус дејир: «Һәр шејимиз артыгламасы илә вар иди. Амма руһани ҹәһәтдән һеч бир мәгсәдимиз јох иди. Дүзүнү десәм, һәјатымыз гармагарышыг, ҝәрҝин иди». Јәгин сиз өзүнүз дә ҝөрмүсүнүз ки, һәјатынызда әсас јери маддијјата вермәк сизә хошбәхтлик ҝәтирмәјиб. Амма руһдан дүшмәјин. Бир чох әр-арвадын ҝөзәл нүмунәси сизә бу саһәдә көмәк едә биләр. Әввәла, ҝәлин ҝөрәк әрләр Јәһушафат падшаһдан нә өјрәнә биләр.

6. Јәһушафат падшаһ ҹидди проблемлә үзләшәндә Мәсәлләр 3:5, 6 ајәләринә ујғун олараг, неҹә давранмышды?

⁶ Әзиз әрләр, бәзән сизә елә ҝәлирми ки, мәсулијјәтләриниз чохдур, онларын өһдәсиндән ҝәлә билмирсиниз. Онда Јәһушафат падшаһдан чох шеј өјрәнә биләрсиниз. О, бир падшаһ кими, бүтүн халгын тәһлүкәсизлијинә ҝөрә мәсулијјәт дашыјырды. Бәс о, бунун өһдәсиндән неҹә ҝәлди? Јәһушафат халгы горумаг үчүн әлиндән ҝәләни етди. Јәһуданын шәһәрләрини мөһкәмләндирди вә 1 160 000-дән чох әсҝәри олан орду топлады (2 Салн. 17:12—19). Даһа сонра Јәһушафат чох ҹидди бир проблемлә үзләшди. Әмуниләрдән, муабиләрдән ибарәт бөјүк бир орду, һәмчинин Саир дағынын адамлары она, аиләсинә  вә халгына һәдә-горху ҝәлирди (2 Салн. 20:1, 2). Јәһушафат нә етди? О, Јеһоваја үз тутуб Ондан ҝүҹ истәди. Бу, Мәсәлләр 3:5, 6 ајәләриндә јазылан мәсләһәтә ујғун иди. (Ајәләри охујун.) Јәһушафатын тәвазөкарлыгла етдији дуадан Јеһоваја нә гәдәр етибар етдијини ҝөрмәк олар. Онун бу дуасы 2 Салнамәләр 20:5—12 ајәләрдә јазылыб. Бәс Јеһова Јәһушафатын дуасына неҹә ҹаваб верди?

7. Јеһова Јәһушафатын дуасына неҹә ҹаваб верди?

⁷ Јеһова Јәһазил адлы лавили васитәсилә Јәһушафатла данышды. Она деди: «Сәф гурун, дуруб ҝөзләјин, ҝөрүн Јеһова сизи неҹә хилас едир» (2 Салн. 20:13—17). Бу, чох гәрибә дөјүш үсулу иди! Амма бу ҝөстәриши инсан јох, Јеһова вермишди. Јәһушафат бүтүн гәлби илә Јеһоваја етибар едәрәк О, неҹә демишдисә, елә дә етди. О, халгла бирҝә дүшмән ордусунун гаршысына чыханда гошунун өнүнә ән ҝүҹлү әсҝәрләрини јох, силаһ-сурсатсыз олан мәзмур охујанлары гојду. Јеһова Јәһушафаты јары јолда гојмады. Она дүшмәнләри үзәриндә гәләбә газандырды (2 Салн. 20:18—23).

8. Әрләр Јәһушафатдан нә өјрәнә биләр?

⁸ Әзиз әрләр, сиз Јәһушафатдан чох шеј өјрәнә биләрсиниз. Сизин дә аиләнизин гејдинә галмаг кими мәсулијјәтиниз вар. Бунун өһдәсиндән ҝәлмәк үчүн әлиниздән ҝәләни едирсиниз. Проблем јарананда, ола билсин, дүшүнүрсүнүз ки, өзүнүз чыхыш јолу тапа биләрсиниз. Амма белә мәгамларда өз ҝүҹүнүзә ҝүвәнмәјин. Көмәк үчүн Јеһоваја үз тутун. Она дуа един. Һәмчинин јолдашынызла бирҝә дә дуа един. Јеһованын сизә јол ҝөстәрмәси үчүн Мүгәддәс Китабы вә она әсасланан нәшрләри мүталиә един. Сонра исә тапдығыныз мәсләһәтләри һәјата кечирин. Ола биләр ки, кимләрсә сизин Мүгәддәс Китаб әсасында вердијиниз гәрарла разылашмасын, һәтта сизи «ахмаг» адландырсын. Бәлкә, кимсә дејәҹәк ки, сиз чохлу пул газанмалысыныз, аиләнизи һәр шејлә тәмин етмәлисиниз. Јәһушафаты јадыныза салын. О, Јеһоваја етибар етди вә буну һәрәкәтләри илә ҝөстәрди. Јеһова ону тәк гојмады. Јеһова сизин дә јанынызда олаҹаг (Зәб. 37:28; Ибр. 13:5). Бәс әр-арвадлар хошбәхт олмаг үчүн даһа нә едә биләр?

9. Әшија пејғәмбәрлә арвады һагда нәләри билирик?

⁹ Әшија пејғәмбәрлә арвадынын һәјатында Јеһоваја ибадәт әсас јери тутурду. Әшија пејғәмбәр иди. Ҝөрүнүр, онун арвадына да Јеһова пејғәмбәр кими мүәјјән бујруглар верирди. Чүнки онун арвады Мүгәддәс Китабда «пејғәмбәр» адланыр (Әшј. 8:1—4). Ҝөрүндүјү кими, бу әр-арвад һәјатыны Јеһоваја хидмәтә һәср етмишди. Бизим дөврүмүздә јашајан әр-арвадлар үчүн онлар неҹә дә ҝөзәл өрнәкдир!

10. Пејғәмбәрликләри арашдырмаг әр-арвадларын Јеһоваја хидмәтдә даһа чох иш ҝөрмәк истәјини неҹә артыра биләр?

¹⁰ Бу ҝүн дә әр-арвадлар чалышмалыдыр ки, Јеһоваја хидмәт һәјатларында һәр шејдән үстүн олсун. Мүгәддәс Китабдакы пејғәмбәрликләри арашдырмаг вә онларын һәмишә ҝерчәкләшдијинә диггәт јетирмәк онларын Јеһоваја етибарыны ҝүҹләндирә биләр * (Тит. 1:2). Һәмчинин  мүәјјән пејғәмбәрликләрин иҹрасында, мәсәлән, сон ҝәлмәздән әввәл бүтүн дүнјада мүждәнин тәблиғ олунмасында онларын да пајы ола биләр (Мәт. 24:14). Әр-арвадлар пејғәмбәрликләрин јеринә јетдијинә даһа чох әмин олдугҹа Јеһова үчүн даһа чох иш ҝөрмәк истәјәҹәкләр!

11. Прискилла вә Аквилас нәләр етмишдиләр вә нәјин сајәсиндә?

¹¹ Јени аилә гуранлар Прискилла илә Аквиласдан чох шеј өјрәнә биләр. Бу јәһуди әр-арвад Ромада јашајырды. Онлар орада Иса һагда һәгигәти өјрәниб, мәсиһи олмушдулар. Шүбһәсиз, онлар орадакы һәјатларындан разы идиләр. Амма һәјатлары ҝөзләнилмәдән дәјишди. Император Клавди әмр етди ки, бүтүн јәһудиләр Романы тәрк етсин. Тәсәввүр етмәк олар, бу дәјишиклик онлар үчүн нә демәк иди. Онлар доғма әразиләрини гојуб ҝетмәли иди, јени јердә мәскунлашмалы иди, чадыр тикмәк ишини јенидән гурмалы иди. Бәс һәјатларындакы бу дәјишиклијә ҝөрә Падшаһлығын иши арха плана кечди? Чох јәгин ки, ҹавабы билирсиниз. Онлар Коринф шәһәринә көчдүләр. Јени јығынҹагларына гајнајыб-гарышдылар, Булусла бирҝә баҹы-гардашлары мөһкәмләндирдиләр. Сонралар онлар тәблиғчиләрә даһа чох тәләбат олан шәһәрләрә көчдүләр (Һәв. 18:18—21; Ром. 16:3—5). Ҝөрүн онлар әл-әлә вериб неҹә ҝөзәл, мәна долу һәјат сүрүб!

12. Нәјә ҝөрә әр-арвадларын руһани мәгсәдләри олмалыдыр?

¹² Бизим дөврдә дә әр-арвадлар Прискилла вә Аквиласдан өрнәк ҝөтүрүб Падшаһлығы һәр шејдән үстүн тута биләрләр. Ҝәләҹәклә бағлы мәгсәдләри мүзакирә етмәјин ән ҝөзәл вахты евләнмәмишдән габагдыр. Ҹүтлүкләр бирҝә гәрар верәндә вә ејни руһани мәгсәдләрә наил олмаға чалышанда Јеһованын мүгәддәс руһунун көмәјини ҝөрмәк имканлары даһа чох олур (Ваиз 4:9, 12). Рассел вә Елизабетин нүмунәсинә нәзәр салаг. Рассел дејир: «Ҝөрүшдүјүмүз вахтларда  руһани мәгсәдләримизин мүзакирәсинә хүсуси јер верирдик». Елизабет дејир: «Габагҹадан буну мүзакирә едирдик ки, сонрадан һансыса гәрарлары вермәли оланда һеч бир гәрарымыз мәгсәдимизә чатмаға мане олмасын». Расселлә Елизабетин шәраити Микронезијаја, тәблиғчиләрә тәләбат олан әразијә көчмәјә јол верди.

13. Зәбур 28:7 ајәсинә әсасән, Јеһоваја етибар етмәјимиз һансы немәтләри ҝәтирир?

¹³ Расселлә Елизабет кими, бу ҝүн дә чохлу ҹүтлүк гәрар вериб ки, бөјүк јүкүн алтына ҝирмәсинләр, тәблиғ вә тәлим ишинә даһа чох вахт ајырсынлар. Әр-арвадлар хидмәтлә бағлы гаршыларына мәгсәдләр гојанда вә бу мәгсәдләрә чатмаг үчүн бирҝә чалышанда ҝөзәл нәтиҹә әлдә олунур. Онлар Јеһованын гајғысыны ҝөрүрләр вә Она етибарлары артыр. Беләҹә, сөзүн әсл мәнасында хошбәхт олурлар. (Зәбур 28:7 ајәсини охујун.)

14. Һәвари Бутрусла арвады Мәтта 6:25, 31—34 ајәләриндәки вәдә етибар етдикләрини неҹә ҝөстәрди?

¹⁴ Әр-арвадлар һәвари Бутрусла арвадындан да чох шеј өјрәнә биләр. Бутрусун Исаны илк дәфә ҝөрмәсиндән бир илә јахын вахт кечмишди. О, ваҹиб гәрар гаршысында иди. Бутрус аиләсини балыгчылыгла доландырырды. Буна ҝөрә дә Иса Бутрусу даима ардынҹа ҝетмәјә чағыранда Бутрус аилә вәзијјәтини дә нәзәрә алмалы иди (Лука 5:1—11). Бутрус тәблиғ ишиндә Иса илә әмәкдашлыг етмәјә гәрар верди. Бу, ағыллы гәрар иди! Әсаслы олараг дејә биләрик ки, бу мәсәләдә Бутрусун арвады ону дәстәкләмишди. Мүгәддәс Китабда гејд олунур ки, Иса дириләндән сонра Бутрусун арвады ән азы бир нечә дәфә Бутрусла бәрабәр тәблиғ сәфәрләриндә олмушду (1 Кор. 9:5). Шүбһәсиз, о, мәсиһи арвад кими чох нүмунәви иди. Она ҝөрә дә Бутрус мәктубларында алныачыглыгла әрләрә вә арвадлара мәсләһәт верә билмишди (1 Бут. 3:1—7). Ҝөрүнүр ки, Бутрусла арвады Јеһованын Падшаһлығы һәр шејдән үстүн тутанлара дајаг олаҹағы вәдинә етибар едирди. (Мәтта 6:25, 31—34 ајәләрини охујун.)

15. Тиагу илә Естерин һадисәсиндән нә өјрәндиниз?

¹⁵ Әҝәр сиз артыг бир нечә илдир ки аилә гурмусунузса, хидмәтинизи ҝенишләндирмәк арзунузу неҹә ҝүҹләндирә биләрсиниз? Бунун бир јолу бу саһәдә тәҹрүбәси олан әр-арвадларын нүмунәсини арашдырмагдыр. Мәсәлән, «Хидмәтә һазыр көнүллүләр» рубрикасыны охуја биләрсиниз. Бу кими мәгаләләр Бразилијадан олан Тиагу вә Естер адлы әр-арвадын тәблиғчијә тәләбат олан әразијә көчмәк истәјини ҝүҹләндирмишди. Тиагу дејир: «Јеһованын хидмәтчиләринә неҹә дајаг олдуғу һагда охујанда биз дә һәјатымызда Онун әлини ҝөрмәк вә гајғысыны һисс етмәк истәдик». Беләҹә, бу әр-арвад Парагваја көчдү вә 2014-ҹү илдән бәри португалдилли әразидә хидмәт едирләр. Естер дејир: «Икимизин дә ән чох севдији ајә Ефеслиләрә 3:20 ајәсидир. Јеһоваја хидмәтимиз бојунҹа бу сөзләрин ҝерчәк олдуғуна дәфәләрлә әмин олмушуг». Булус һәмин мәктубда әмин едир ки, Јеһова бизим диләдијимиздән гат-гат артығыны вермәјә гадирдир. Бу, доғрудан да, беләдир!

16. Јени аилә гуранлар мәгсәдләрини ҝөтүр-гој едәркән кимләрлә мәсләһәтләшә биләрләр?

¹⁶ Јени аилә гуранлар Јеһоваја етибар  етмәји өјрәнәнләрин тәҹрүбәсиндән фајдалана биләрләр. Бәзи әр-арвадлар узун илләрдир ки тамвахтлы хидмәтдәдир. Мәгсәдләринизи ҝөтүр-гој едәркән онларла мәсләһәтләшә биләрсиниз. Бу да Јеһоваја етибарынызы ҝөстәрмәјин бир јолудур (Мәс. 22:17, 19). Һәмчинин ағсаггаллар да јени аилә гуранлара мәгсәдләр гојмаға вә бу мәгсәдләрә чатмаға көмәк едә биләр.

17. Клаус вә Мариса һансы вәзијјәтлә үзләшмишди вә биз онларын һадисәсиндән нә өјрәнирик?

¹⁷ Бәзән ола биләр ки, хидмәтимизи ҝенишләндирмәк гәрарыны веририк, амма һәр шеј планлашдырдығымыз кими ҝетмир. Бу мәгаләнин әввәлиндә һаггында данышдығымыз Клаус вә Мариса илә дә белә олмушду. Евләндикдән үч ил сонра онлар Финландијаја көчүб, филиалын тикинтисиндә көнүллү кими хидмәт етдиләр. Амма сонра өјрәндиләр ки, бурадакы хидмәтләри узағы атлы ај чәкәҹәк. Әввәл-әввәл онлар чох мәјус олмушдулар. Амма вәзијјәт елә ҝәтирди ки, онлар чох кечмәмиш әрәб дили курсларына дәвәт алдылар. Һал-һазырда онлар башга бир өлкәдә әрәбдилли әразидә севинҹлә хидмәт едирләр. Архаја бојланараг Мариса дејир: «Бәзән инсан Јеһоваја там етибар етмәкдән вә хидмәтдә јени шејләр етмәкдән горхур. Амма Јеһованын бизә ҝөзләмәдијимиз тәрздә һәмишә көмәјимизә чатдығынын шаһиди олдум. Бундан сонра Јеһоваја даһа чох етибар етдим». Бу әр-арвадын нүмунәси ҝөстәрир ки, әҝәр Јеһоваја там етибар етсәниз, О, һеч вахт сизи мүкафатсыз гојмајаҹаг, бундан архајын ола биләрсиниз!

18. Әр-арвадлара Јеһоваја һәмишә етибар етмәјә нә көмәк едә биләр?

¹⁸ Никаһ Јеһованын һәдијјәсидир (Мәт. 19:5, 6). О истәјир ки, бу һәдијјә әр-арвадлара севинҹ ҝәтирсин (Мәс. 5:18). Јени аиләләр, бир дүшүнүн, ҝөрүн һәјатынызы нәјә сәрф едирсиниз? Јеһованын сизә вердији һәдијјәләри гијмәтләндирдијинизи ҝөстәрмәк үчүн әлиниздән ҝәлини едирсиниз? Дуа едиб, Јеһова илә данышын. Мүгәддәс Китабдан вәзијјәтинизә ујғун олан принсипләр тапын. Даһа сонра исә Јеһованын сизә вердији мәсләһәтләрә ујғун давранын. Бир әр-арвад кими, Јеһоваја хидмәти һәр шејдән үстүн тутсаныз, әмин ола биләрсиниз ки, хошбәхт вә мәналы өмүр сүрәҹәксиниз!