ТӘЛИМ МӘГАЛӘСИ 22
НӘҒМӘ 15 Јеһованын Илкинә тәзим едәк!
Јеһованын ады Иса үчүн әзиз иди
«Мән Сәнин адыны онлара ачдым вә јенә ачаҹағам» (ЈӘҺ. 17:26).
ӘСАС ФИКИР
Мәгаләдән ҝөрәҹәјик ки, Иса Мәсиһ инсанлара Јеһованын адыны ачмаг, ону мүгәддәс тутмаг вә она бәраәт газандырмаг үчүн нәләр етмишди.
1, 2. а) Өлүмүндән әввәлки ҝеҹә Иса нә етмишди? б) Бу мәгаләдә һансы суаллара ҹаваб тапаҹағыг?
ЕРАМЫЗЫН 33-ҹү или нисанын 14-ү ҹүмә ахшамыдыр. Артыг гаш гаралыб. Бир аз сонра Исаны хәјанәт, мәһкәмә, ишҝәнҹә вә едам ҝөзләјир. О вә садиг һәвариләри елә индиҹә јухары отагда хүсуси јемәји, Ағанын шам јемәјини јејиб гуртарыблар. Јемәкдән сонра Иса һәвариләрини руһландырмаг үчүн сон сөзләрини дејир. Јухары отагдан чыхана јахын исә о дајаныр, дәрин мәна дашыјан бир дуа едир. Һәвари Јәһја һәмин дуаны гәләмә алыб. Ону 17-ҹи фәслиндән охуја биләрик.
2 Мәгаләдә Исанын дуасындан нәләр өјрәнә биләҹәјимиздән данышаҹағыг. Өлүмүндән әввәл Иса әсасән нәјә ҝөрә нараһат иди? Јер үзүндә оларкән онун үчүн ән ваҹиб нә иди? Ҝәлин бу суаллара ҹаваб тапаг.
«МӘН СӘНИН АДЫНЫ ОНЛАРА АЧДЫМ»
3. Иса Јеһованын ады илә бағлы нә демишди вә о нәји нәзәрдә тутурду? (Јәһја 17:6, 26).
3 Дуасында Иса демишди: «Мән Сәнин адыны онлара ачдым». Иса бу мәгамы дүз ики дәфә вурғуламышды. (Јәһја 17:6, 26 ајәләрини охујун.) О нәји нәзәрдә тутурду? Иса шаҝирдләринә Аллаһын адынын Јеһова олдуғуну ачыгламышды? Хејр, онлар јәһуди иди вә Аллаһын адынын Јеһова олдуғуну артыг билирдиләр. Төвратда бу ада минләрлә дәфә раст ҝәлмәк оларды. Демәли, Иса шаҝирдләринә садәҹә Аллаһын адыны јох, бу адын Саһибинин неҹә бир Аллаһ олдуғуну ачыгламышды. О, шаҝирдләринә Јеһованы даһа јахшы танымаға көмәк етмишди. Мәсәлән, Онун нијјәти, ишләри вә хүсусијјәтләри барәдә данышмышды. Бүтүн бунлары Исадан јахшы билән икинҹи варлыг јох иди.
4, 5. а) Һансы һалда инсанын ады бизим үчүн хүсусилә әзиз олур? Нүмунә чәкин. б) Исанын шаҝирдләринә Јеһованы даһа јахындан танымаға нә көмәк етди?
4 Ҝәлин бир нүмунәјә бахаг. Тәсәввүр един ки, јығынҹағынызда Давуд адлы бир ағсаггал вар вә о, ҹәрраһдыр. Сиз һәмин гардашы узун илләрдир таныјырсыныз. Бир ҝүн сизин тәҹили јардыма еһтијаҹыныз олур вә дәрһал өзүнүзү бу гардашын ишләдији хәстәханаја чатдырырсыныз. Гардаш сизин һәјатынызы хилас едир. Инди бу гардашын ады сизә хүсусилә әзиз олур. Давуд артыг сизин үчүн тәкҹә ағсаггал дејил, һәм дә һәјатынызы хилас едән бир ҹәрраһдыр.
5 Буна бәнзәр тәрздә Исанын шаҝирдләри дә Јеһованын адыны артыг билирдиләр. Исанын хидмәти сајәсиндә исә бу ад онлар үчүн даһа да әзиз олду. Нәјә ҝөрә белә дејә биләрик? Чүнки Иса һәр аддымында, һәр сөзүндә Атасынын хүсусијјәтләрини әкс етдирирди. Беләҹә, һәвариләр Исанын өјрәтмәк тәрзини вә инсанларла рәфтарыны ҝөрәндә Јеһованы даһа јахшы таныдылар (Јәһ. 14:9; 17:3).
«МӘНӘ ВЕРДИЈИН АДЫНЫН ХАТИРИНӘ»
6. Јеһова һансы мәнада адыны Исаја вермишди? (Јәһја 17:11, 12).
6 Иса шаҝирдләри үчүн дуа едәркән демишди: «Мәнә вердијин адынын хатиринә ҝөзүн онларын үстүндә олсун». (Јәһја 17:11, 12 ајәләрини охујун.) Бу сөзләр о демәкдирми ки, Исаја «Јеһова» ады верилмишди? Хејр. Диггәт јетирин ки, Иса дуасында «адынын» сөзүнү ишләдир. Бунунла да ҝөстәрир ки, бу ад јалныз Јеһоваја мәхсусдур. Бир сөзлә, Јеһова Өз адыны Исаја гојмамышды. Бәс Аллаһын ады Исаја һансы мәнада верилмишди? Әввәла, Иса Јеһованы тәмсил едирди, Онун елчиси иди. О, Атасынын адындан ҝәлмишди вә Атасынын ады илә мөһтәшәм ишләр ҝөрмүшдү (Јәһ. 5:43; 10:25). Бундан әлавә, Иса Мәсиһин адынын мәнасы «Јеһова хиласдыр» демәкдир. Бәли, Исанын ады Јеһованын ады илә сых бағлы иди.
7. Нәјә ҝөрә Иса Јеһованын адындан даныша биләрди? Нүмунә чәкин.
7 Буну ајдын баша дүшмәк үчүн ҝәлин бир нүмунәјә нәзәр салаг. Сәфир өз өлкәсинин дөвләт башчысыны тәмсил етдији үчүн онун адындан даныша биләр. Белә олан һалда сәфирин сөзләри дөвләт башчысынын сөзләри илә ејни гүввәјә малик олур. Ејнилә, Иса да Јеһованы тәмсил едирди вә инсанларла Атасынын адындан данышырды (Мәт. 21:9; Лука 13:35).
8. Нәјә әсасән демәк олар ки, Иса һәлә јер үзүнә ҝәлмәздән әввәл Јеһованын адыны дашыјырды? (Чыхыш 23:20, 21).
8 Мүгәддәс Китабда Иса Мәсиһ «Сөз» адланыр, чүнки Јеһова онун васитәсилә һәм мәләкләрә, һәм дә инсанлара сөзүнү чатдырыр, ҝөстәришләр верирди (Јәһ. 1:1—3). Чох ҝүман ки, исраиллиләр сәһрада оларкән Јеһованын онлара көмәк үчүн ҝөндәрдији мәләк Иса иди. Јеһова исраиллиләрә демишди ки, бу мәләјә табе олсунлар. Сәбәбини исә белә изаһ етмишди: «Чүнки о, Мәним адымы дашыјыр» a. (Чыхыш 23:20, 21 ајәләрини охујун.) Иса һансы мәнада Аллаһын адыны дашыјырды? О, Јеһованы тәмсил едирди, Онун адынын мүдафиәсиндә вә мүгәддәс тутулмасында апарыҹы рол ојнајырды.
«АТА, ӨЗ АДЫНЫ УҸАЛТ»
9. Јеһованын ады Иса үчүн нә дәрәҹәдә өнәмли иди? Изаһ един.
9 Өјрәндијимиз кими һәлә јер үзүнә ҝәлмәмишдән әввәл Иса үчүн Јеһованын ады бөјүк әһәмијјәт дашыјырды. Елә буна ҝөрә дә јер үзүндә оларкән Иса атдығы һәр аддымда Јеһованын адыны дүшүнүрдү. Хидмәтинин сонуна јахын Иса Јеһоваја јалварыб демишди: «Ата, Өз адыны уҹалт». Јеһова дәрһал ҝөјдән уҹа сәслә она ҹаваб вермишди: «Уҹалтмышам, јенә дә уҹалдаҹағам» (Јәһ. 12:28).
10, 11. а) Иса Јеһованын адыны неҹә уҹалтмышды? (Һәмчинин шәклә бахын.) б) Јеһованын адынын мүгәддәс тутулмасына вә бәраәт газанмасына нәјә ҝөрә еһтијаҹ вар иди?
10 Исанын өзү дә Аллаһын адыны уҹалтмышды. Неҹә? О, инсанлара Атасынын ҝөзәл кејфијјәтләри вә һејрәтамиз ишләриндән данышырды. Амма бу јетәрли дејилди. Јеһованын ады мүгәддәс тутулмалы вә бәраәт газанмалы иди b. Бу, Иса үчүн чох ваҹиб мәсәлә иди. Буну давамчыларына өјрәтдији дуадан ҝөрмәк олар. О демишди: «Ҝөјләрдә олан Атамыз, гој адын мүгәддәс тутулсун» (Мәт. 6:9).
11 Нәјә ҝөрә Јеһованын адынын мүгәддәс тутулмасына вә бәраәт газанмасына еһтијаҹ вар иди? Чүнки Әдән бағында Шејтан Иблис Јеһова Аллаһын адына гара јахыб Она бөһтан атмышды. О, иддиа етмишди ки, Јеһова јаланчыдыр вә јахшы бир шеји Адәмлә Һәввадан ҝизләдир (Јар. 3:1—5). Һәм дә јаландан демишди ки, Јеһованын идарәетмә тәрзи дүзҝүн дејил. Онун јалан иттиһамлары бирбаша Јеһованын адыны бәднам едирди. Сонралар Әјјуб пејғәмбәрин дөврүндә Шејтан иддиа етмишди ки, Јеһоваја гуллуг едән инсанлар буну өз хејирләрини ҝүддүкләри үчүн едирләр. Һәтта бу бөһтанчы демишди ки, ҝуја һеч бир инсан Јеһованы үрәкдән севмир вә сынагла үзләшсә, даһа Она гуллуг етмәјәҹәк (Әјј. 1:9—11; 2:4). Бәс ҝөрәсән јаланчы ким иди? Јеһова, јохса Шејтан? Буну сүбут етмәк үчүн вахт лазым иди.
Иса давамчыларына Јеһованын адыны мүгәддәс тутмағын ваҹиблијини изаһ етди (10-ҹу абзаса бахын)
«МӘН ҺӘЈАТЫМЫ ФӘДА ЕДИРӘМ»
12. Иса Атасынын адына севҝидән ирәли ҝәләрәк нәләр етмәјә һазыр иди?
12 Иса Јеһованы о гәдәр севирди ки, Онун адыны мүгәддәс тутмаг вә тәмизә чыхармаг үчүн һәр шејә ҝетмәјә һазыр иди. О демишди: «Мән һәјатымы фәда едирәм» (Јәһ. 10:17, 18). Бәли, Иса Јеһованын ады уғрунда һәтта өлмәјә разы олду c. Илк камил инсанлар — Адәмлә Һәвва Јеһоваја арха чевирдиләр вә Шејтанын тәрәфинә кечдиләр. Иса исә онлардан фәргли олараг, көнүллү шәкилдә јер үзүнә ҝәлди вә Јеһоваја мәһәббәтини сүбут етди. О буну бүтүн һәјаты боју сәдагәтини горумагла ҝөстәрди (Ибр. 4:15; 5:7—10). Иса та ишҝәнҹә дирәјиндә өләнә кими Јеһоваја садиг галды (Ибр. 12:2). Бу јолла о Јеһованы вә Онун адыны севдијини сүбут етди.
13. Нәјә ҝөрә Иса Шејтанын јаланчы олдуғуну сүбут етмәк үчүн ән ујғун шәхс иди? (Һәмчинин шәклә бахын.)
13 Иса өз һәјаты илә сүбут етди ки, јаланчы Јеһова јох, Шејтандыр! (Јәһ. 8:44). Иса гәдәр Јеһованы јахшы таныјан икинҹи варлыг јох иди. Шејтанын Јеһоваја гаршы сөјләдији иттиһамларда ҹүзи дә олса һәгигәт олсајды, Исанын бундан хәбәри оларды. Амма Иса Јеһованын адыны мүдафиә етмәјә гәти гәрарлы иди. Һәтта Јеһова мүдафиәсини Исанын үзәриндән ҝөтүрәндә белә о, өлүмә ҝетмәјә разы олду, амма севимли Атасына үз чевирмәди (Мәт. 27:46) d.
Исанын һәјаты Јеһованын јох, Шејтанын јаланчы олдуғуна зәррә гәдәр дә шүбһә јери гојмады! (13-ҹү абзаса бахын)
«МӘНӘ ТАПШЫРДЫҒЫН ИШИ БАША ЧАТДЫРДЫМ»
14. Јеһова Исаја сәдагәтинә ҝөрә һансы мүкафаты верди?
14 Өлүмүндән өнҹәки ҝеҹә Иса етдији дуада бу сөзләри дејә билмишди: «Мәнә тапшырдығын иши баша чатдырдым». Иса әмин иди ки, садиг галдығына ҝөрә Јеһова ону мүкафатландыраҹаг (Јәһ. 17:4, 5). Исанын Јеһоваја етибары боша чыхмады. Нәјә ҝөрә белә демәк олар? Јеһова ону мәзарда гојмады (Һәв. 2:23, 24). Ону дирилтди вә ҝөјдә ән јүксәк мөвгејә уҹалтды (Филип. 2:8, 9). Сонралар Иса Аллаһын Падшаһлығынын Падшаһы кими һакимијјәт сүрмәјә башлады. Бәс бу Падшаһлыг нәјә наил олаҹаг? Бу суалын ҹавабыны Исанын шаҝирдләринә өјрәтдији дуанын икинҹи һиссәсиндән тапа биләрик: «Гој Падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин» (Мәт. 6:10).
15. Иса башга нәләр едәҹәк?
15 Јахын ҝәләҹәкдә Иса Аллаһын дүшмәнләринә гаршы вурушаҹаг вә Армаҝеддонда пислијә сон гојаҹаг (Вәһј 16:14, 16; 19:11—16). Бундан гыса мүддәт сонра Шејтан «дибсиз гујуја» атылаҹаг, јәни өлү кими фәалијјәтсиз вәзијјәтдә олаҹаг (Вәһј 20:1—3). Иса миниллик һакимијјәти әрзиндә јер үзүндә сүлһү бәрпа едәҹәк вә бәшәријјәти камиллијә чатдыраҹаг. О, өлүләри дирилдәҹәк вә бүтүн дүнјаны ҹәннәтә чевирәҹәк. Нәһајәт, Јеһованын нијјәти һәјата кечәҹәк! (Вәһј 21:1—4).
16. Миниллик һакимијјәтин сонунда һәјат неҹә олаҹаг?
16 Исанын миниллик һакимијјәтинин сонунда нәләр олаҹаг? Ҝүнаһ вә гејри-камиллијин изи-тозу галмајаҹаг. Артыг инсанларын фидјә гурбанлығы әсасында ҝүнаһларына ҝөрә әфв диләмәсинә, Јеһова илә араларында киминсә васитәчи олмасына вә ја каһинлик етмәсинә еһтијаҹ галмајаҹаг. «Ахырынҹы дүшмән олан өлүм», јәни Адәмин ҝәтирдији өлүм мәһв едиләҹәк. Өлән инсанлар һәјата гајытмыш олаҹаг. Јер үзүндә јашајан һәр бир инсан камиллијә јетишәҹәк (1 Кор. 15:25, 26).
17, 18. а) Миниллик һакимијјәтин сонунда нә баш верәҹәк? б) Иса һакимијјәти сона чатанда нә едәҹәк? (1 Коринфлиләрә 15:24, 28; һәмчинин шәклә бахын.)
17 Бәс миниллијин сонунда даһа нә баш верәҹәк? Чох хүсуси бир шеј. Јеһованын адынын мүгәддәслији илә бағлы мүбаһисәјә сон гојулаҹаг. Неҹә? Әдән бағында Шејтан Јеһованын јаланчы олдуғуну вә инсанлары мәһәббәтлә идарә етмәдијини иддиа етмишди. О вахтдан бәри Јеһоваја еһтирам бәсләјән кәсләр Онун адыны дәфәләрлә мүгәддәс тутублар. Беләликлә, миниллик һакимијјәтин сонунда Јеһованын ады тамамилә бәраәт газанаҹаг. Онун мәһәббәтли сәмави Атамыз олдуғуна артыг һеч бир шүбһә јери галмајаҹаг.
18 Шејтанын иддиаларынын јалан олдуғу бирдәфәлик сүбута јетириләҹәк. Бәс Иса һакимијјәти сона чатандан сонра нә едәҹәк? О да Шејтан кими давраныб Јеһоваја аси чыхаҹаг? Хејр. (1 Коринфлиләрә 15:24, 28 ајәләрини охујун.) Иса Падшаһлығы Атасына тәһвил верәҹәк, өзү дә Онун һакимијјәтинә табе олаҹаг. Бәли, Иса Јеһованы севдији үчүн Шејтандан фәргли олараг, әлиндә олан бүтүн сәлаһијјәти Она вермәјә һазырдыр.
Иса миниллик һакимијјәтинин сонунда Падшаһлығы көнүллү шәкилдә Јеһоваја гајтарыр (18-ҹи абзаса бахын)
19. «Јеһова» ады Иса үчүн һансы мәнаны дашыјырды?
19 Инди бизә ајдындыр, нәјә ҝөрә Јеһова Өз адыны Исаја вермишди. Иса Јеһованы мүкәммәл шәкилдә тәмсил етди. Беләликлә, «Јеһова» ады Иса үчүн һансы мәнаны дашыјырды? Бу ад онун үчүн һәр шеј иди. О бу ад уғрунда өлмәјә һазыр иди вә миниллик һакимијјәтинин сонунда һәр шеји Јеһоваја гајтармаға да һазыр олаҹаг. Бәс биз Исанын нүмунәсини неҹә изләјә биләрик? Бу һагда ҝәлән мәгаләдә данышаҹағыг.
НӘҒМӘ 16 Хиласкар падшаһа ҝөрә Јеһоваја һәмд олсун
a Бәзән мәләкләр дә Јеһованын адындан хәбәр чатдыранда Ону тәмсил едирдиләр. Буна ҝөрә дә Мүгәддәс Китабда мәләјин данышдығы бәзи һадисәләрдә Јеһованын данышдығы дејилир (Јар. 18:1—33). Мүгәддәс Китабда охујуруг ки, Муса пејғәмбәрә Гануну Јеһова вериб. Амма башга ајәләрдән ајдын олур ки, Јеһова бу Гануну Мусаја мәләк васитәсилә өтүрмүшдү (Лав. 27:34; Һәв. 7:38, 53; Гал. 3:19; Ибр. 2:2—4).
b БӘЗИ ИФАДӘЛӘРИН ИЗАҺЫ. «Мүгәддәс тутмаг» дејиләндә шәрәфләндирмәк, пак һесаб етмәк вә еһтирамла јанашмаг нәзәрдә тутулур. «Бәраәт газандырмаг» сөзү киминсә адыны сахта иттиһамлардан тәмизләмәк, она һагг газандырмаг вә ја онун һагда дејилән бөһтанларын вә иттиһамларын әсассыз олдуғуну сүбут етмәк, онун ҝүнаһсыз олдуғуну ҝөстәрмәк мәнасыны верир.
c Исанын өлүмү бәшәријјәтин әбәди һәјат алмасына јол ачды.
d «Ҝөзәтчи гүлләси»нин 2021-ҹи ил апрел сајынын 30—31 сәһифәләриндә јерләшән «Охуҹуларын суаллары» рубрикасына бахын.
