1. Јеһованын халгына проблемләрә бахмајараг хидмәтләрини давам етдирмәјә нә көмәк едир?

 «СОН дәрәҹә чәтин бир вахт». Мүгәддәс Китабда јашадығымыз дөвр мәһз белә тәсвир олунур (2 Тим. 3:1). Бу дүнјадакы инсанларын үзләшдији проблемләрдән әлавә, Јеһованын халгы һәлә тәгибләрлә дә үзләшир. Бәс бунлара бахмајараг Јеһоваја ибадәтимизи давам етдирмәјә бизә нә көмәк едир? Ән әсас амил одур ки, биз Јеһованын «вар олан Аллаһ» олдуғуна әмин олмушуг (Әрм. 10:10; 2 Тим. 1:12).

2. Јеһова һагда билдијимиз һансы фикир бизә ҝүҹ верир?

² Јеһова ҝерчәк Варлыгдыр. О, нәләрдән кечдијимизи ҝөрүр вә дадымыза чатмаг үчүн фүрсәтләр ахтарыр (2 Салн. 16:9; Зәб. 23:4). Онун вар олан Аллаһ олдуғуну унутмасаг, үзләшдијимиз истәнилән сынаға таб ҝәтирмәјә ҝүҹүмүз олаҹаг. Буну Давуд падшаһын һәјатындан ајдын ҝөрә биләрик.

3. Давуд Јеһованын «вар олан Аллаһ» олдуғуну дејәндә нәји нәзәрдә тутурду?

³ Давуд Јеһованы таныјырды вә Она бел бағлајырды. Талут падшаһ вә диҝәр дүшмәнләри тәрәфиндән тәгиб олунанда о, Јеһоваја дуа едиб көмәк истәмишди (Зәб. 18:6). Јеһова да онун дуасына ҹаваб вериб дүшмәнләринин әлиндән гуртармышды. Бу заман Давуд демишди: «Шүкүрләр олсун... вар олан Јеһоваја» (Зәб. 18:46). О бу сөзләрлә садәҹә Аллаһын мөвҹуд олдуғуну вурғуламырды. Бир елми мәнбәјә әсасән Давуд бу сөзләрлә гејд едирди ки, «Јеһова һәмишә Өз халгынын рифаһы үчүн чалышан ҝерчәк Аллаһдыр». Бәли, о, Јеһованын вар олан Аллаһ олдуғуна шәхсән шаһид олмушду. Бу да ону Јеһоваја даим хидмәт етмәјә вә Она һәмд етмәјә тәшвиг етмишди (Зәб. 18:28, 29, 49).

4. Јеһованын вар олан Аллаһ олдуғуна әминлијимиз бизә нәдә көмәк едәҹәк?

 ⁴ Јеһованын вар олан Аллаһ олдуғуна әмин олмағымыз бизә дә Она ҹанла-башла хидмәт етмәјә көмәк едәҹәк. Онда сынаглара таб ҝәтирә биләҹәјик вә Она вар ҝүҹүмүзлә хидмәт едәҹәјик. Бундан әлавә, Јеһовадан һеч вахт ајрылмамаға гәти гәрарлы олаҹағыг.

ВАР ОЛАН АЛЛАҺ СИЗӘ ҜҮҸ ВЕРӘҸӘК

5. Үзләшдијимиз чәтинликләр вахты бизә нә әминлик верир? (Филиппилиләрә 4:13).

⁵ Јеһованын ҝерчәк олдуғуну вә һәр заман бизә дајаг олмаға һазыр олдуғуну јадда сахласаг, кичик вә ја бөјүк олмасындан асылы олмајараг, истәнилән сынаға таб ҝәтирә биләҹәјик. Ахы бизим јашадығымыз проблемләр Јеһова үчүн һеч нәдир! О, гадир Аллаһдыр вә бизә дөзмәјә ҝүҹ верә биләр. (Филиппилиләрә 4:13 ајәсини охујун.) Буна ҝөрә дә һансыса проблемлә үзләшәндә горхмуруг, үрәјимиздә әминлик олур. Јеһованын хырда чәтинликләр заманы бизә дајаг олдуғуну ҝөрдүјүмүз үчүн архајыныг ки, О даһа бөјүк чәтинликләр вахты да бизә көмәк едәҹәк.

6. Ушаг вахты Давудун башына ҝәлән һансы һадисәләр онун Јеһоваја етибарыны артырмышды?

⁶ Давудун һәјатында баш верән ики һадисә онун Јеһоваја етибарыны мөһкәмләндирмишди. О, ушаг јашларында чобан оланда бир дәфә ајы, бир дәфә дә шир онун атасынын сүрүсүндән гојун апармышды. Һәр ики вәзијјәтдә дә Давуд һејванларын далынҹа дүшүб гојунлары онларын ағзындан алмышды. Давуд һеч вахт бу гәләбәләри өз адына јазмајыб. О билирди ки, буну Јеһованын ҝүҹү илә едиб (1 Ишм. 17:34—37). Бу ики һадисә һәмишә Давудун јаддашында иди. Онлар барәдә дүшүнәндә Јеһоваја етибары артырды вә әмин олурду ки, вар олан Аллаһ она ҝәләҹәкдә дә ҝүҹ верәҹәк.

7. Вәзијјәтә дүзҝүн бахмаг Давуда Ҹалутла үзләшмәјә неҹә көмәк етди?

⁷ Сонралар, ҝөрүнүр, һәлә јенијетмә олан вахт Давуд Исраил ордусунун дүшәрҝәсинә ҝедир. Орада ҝөрүр ки, әсҝәрләр тәлаш ичиндәдирләр, чүнки Ҹалут адлы бир нәһәнҝ филиштли «Исраил алајларыны мејдана» сәсләмишди (1 Ишм. 17:10, 11). Әсҝәрләрин ағлында Ҹалутун нә гәдәр нәһәнҝ олдуғу вә онун дедији истеһзалы сөзләр фырланырды, буна ҝөрә онлар горхурдулар (1 Ишм. 17:24, 25). Давуд исә вәзијјәтә тамам башга тәрәфдән бахырды. О баша дүшүрдү ки, Ҹалут Исраил ордусуну әлә салмагла, әслиндә, «вар олан Аллаһын алајларына мејдан охујур» (1 Ишм. 17:26). Давудун ағлында јалныз Јеһова иди. О билирди ки, чобанлыг етдији вахтларда олдуғу кими инди дә Јеһова она көмәк едәҹәк. Јеһоваја архаланараг о, Ҹалутла үзләшир вә тәбии ки, галиб ҝәлир (1 Ишм. 17:45—51).

8. Чәтинликләр заманы Јеһованын бизә көмәк едәҹәјинә етибарымызы неҹә артыра биләрик? (Һәмчинин шәклә бахын.)

⁸ Биз дә вар олан Аллаһ Јеһованын бизә көмәк етмәјә һазыр олдуғуну унутмасаг, сынаглара таб ҝәтирә биләҹәјик (Зәб. 118:6). Бәс Она етибарымызы неҹә артыра биләрик? Бунун үчүн Онун кечмишдә етдији шејләр барәдә дүшүнә биләрик. Мәсәлән, Мүгәддәс Китабда Јеһованын Өз хидмәтчиләрини неҹә горудуғу илә бағлы нүмунәләри охујун (Әшј. 37:17, 33—37). Һәмчинин jw.org сајтында Јеһованын бизим дөврүмүздә баҹы-гардашлара неҹә дајаг олдуғуну ҝөстәрән һадисәләри арашдырын. Бундан әлавә, Јеһованын сизин јахшылығыныз үчүн нәләр етдијини хатырлајын. Ола билсин, һәјатынызда ајы илә вә  ја шир илә мүбаризәјә бәнзәјән гејри-ади һадисәләр јашамамысыныз; фикирләширсиниз, Јеһова сизин үчүн хүсуси бир шеј етмәјиб. Амма, әслиндә, әсас одур ки, О сизин һәјатынызда һәмишә олуб! Јеһова Онунла достлуг етмәјиниз үчүн сизи Өзүнә ҹәлб едиб (Јәһ. 6:44). Индинин өзүндә дә сиз јалныз Јеһованын сајәсиндә һәгигәтдәсиниз. Она ҝөрә дә Јеһовадан хаһиш един ки, дуаларыныза ҹаваб вердији, еһтијаҹ дујдуғунуз заман сизә дајаг олдуғу вә сизә чәтин вәзијјәтләрдән чыхмаға көмәк етдији вахтлары јадыныза салсын. Бу һадисәләр барәдә дүшүнмәк Јеһованын сизә һәмишә көмәк едәҹәјинә етибарынызы артыраҹаг.

9. Сынагларымыза неҹә јанашмалыјыг? (Мәсәлләр 27:11).

⁹ Јеһованын ҝерчәк Варлыг олдуғуну дәрк етмәк сынаглара дүзҝүн јанашмаға көмәк едәҹәк. Белә ки, биз сынаглара Јеһова илә Шејтан арасында олан мүбаһисәли мәсәләнин бир һиссәси кими бахаҹағыг. Шејтан иддиа едир ки, биз әзаб чәкәндә Јеһовадан үз дөндәрәҹәјик (Әјј. 1:10, 11; Мәсәлләр 27:11 ајәсини охујун). Амма сынаглар заманы сәдагәтимизи горујанда Јеһованы севдијимизи вә Шејтанын јаланчы олдуғуну сүбут едирик. Ола билсин, һөкумәт тәрәфиндән тәгиб олунуруг, мадди сыхынтыларымыз вар, инсанлар хош хәбәрә гулаг асмаг истәмир, ја да башга чәтинликлә үзләширик. Бу заман јадда сахламалыјыг ки, јаранан вәзијјәт Јеһованын гәлбини севиндирмәјимизә имкан јарадыр. Һәмчинин Јеһова һеч вахт ҝүҹүмүздән артыг сынанмағымыза јол вермәз (1 Кор. 10:13). О бизә дөзмәјә ҝүҹ верәҹәк.

ВАР ОЛАН АЛЛАҺ СИЗӘ МҮКАФАТ ВЕРӘҸӘК

10. Вар олан Аллаһ Она ибадәт едән инсанлар үчүн нә едәҹәк?

¹⁰ Јеһова Она ибадәт едән инсанлары мүкафатландырыр (Ибр. 11:6). О, индинин өзүндә бизә гәлб раһатлығы верир вә һәјатдан мәмнунлуг дујмағымыз үчүн чохлу  немәтләр бәхш едир, ҝәләҹәкдә исә әбәди һәјат верәҹәк. Тамамилә етибар едирик ки, Јеһова бизә мүкафат вермәк истәјир вә буну етмәјә гадирдир. Биздә бу әминлик олдуғу үчүн Јеһованын кечмишдәки хидмәтчиләри кими Онун јолунда ҹанла-башла чалышырыг. Һәмин инсанлардан бири биринҹи әсрдә јашамыш Тимути иди (Ибр. 6:10—12).

11. Нәјә ҝөрә Тимути јығынҹагда ҹанла-башла чалышырды? (1 Тимутијә 4:10).

¹¹ 1 Тимутијә 4:10 ајәсини охујун. Тимутидә Јеһованын она мүкафат верәҹәјинә ҝүҹлү әминлик вар иди. Буна ҝөрә дә о, Јеһова вә башгалары уғрунда әлиндән ҝәләни әсирҝәмирди. О нәләр едирди? Һәвари Булус она нәсиһәт етмишди ки, мүәллим вә натиг кими пүхтәләшсин. Бундан әлавә, Тимути бөјүклү-кичикли бүтүн диндашларына нүмунә олмалы иди. Үстәлик, она чәтин тапшырыглар да верилмишди. Мәсәлән, о, лазым оланда мәһәббәтлә, амма ҹидди мәсләһәт вермәли иди (1 Тим. 4:11—16; 2 Тим. 4:1—5). Бәзән башгалары Тимутинин етдикләрини ҝөрмүрдү вә ја гијмәтләндирмирди. Амма о, әмин ола биләрди ки, Јеһова ону мүкафатландыраҹаг (Ром. 2:6, 7).

12. Тапшырыгларыны ҹанла-башла ҝөрмәјә ағсаггаллары нә тәшвиг едир? (Һәмчинин шәклә бахын.)

¹² Бу ҝүн дә ағсаггаллар Јеһованын онларын етдији ишләри ҝөрдүјүнә вә гијмәтләндирдијинә там әмин ола биләрләр. Онлар баҹы-гардашлары зијарәт едир, тәлим верир, тәблиғ ишиндә иштирак едирләр. Бундан әлавә, бир чох ағсаггал тикинти лајиһәләринә вә зәрәрчәкәнләрә јардым ишинә көмәк едир. Бир башгалары Хәстәләрә зијарәт групларында вә ја Хәстәханаларла әлагә комитәләриндә хидмәт едир. Бу ҹүр ишләрдә иштирак етмәјә һазыр олан ағсаггаллар баша дүшүр ки, јығынҹаг Јеһоваја мәхсусдур, һансыса инсан гурулушу дејил. Буна ҝөрә дә онлар өз тәјинатларына ҹан гојурлар вә Јеһованын онларын етдији ишләри мүкафатландыраҹағына там етибар едирләр (Кол. 3:23, 24).

13. Јеһова Онун јолундан етдикләримизә неҹә јанашыр?

¹³ Һамы ағсаггал ола билмәз. Амма һамы Јеһова үчүн нәсә едә биләр. Јеһова  да Онун јолунда әлимиздән ҝәләни етмәјимизи гијмәтләндирир. Үмумдүнја тәблиғ ишинә етдијимиз ианәләр Јеһова үчүн чох дәјәрлидир, һәтта јалныз хырда мәбләғдә ианәләр едә билсәк дә. Утанҹаглығымыза үстүн ҝәлиб јығынҹагда шәрһ вермәк үчүн әлимизи галдыранда Онун үрәји шад олур. Һәмчинин хәтримизә дәјән инсаны бағышлајанда Јеһова чох севинир. Һәтта Јеһоваја истәдијиниз гәдәр хидмәт едә билмирсинизсә, әмин олун ки, О, ҝүҹүнүз дахилиндә етдикләринизи гијмәтләндирир. О сизи буна ҝөрә севир вә сизә мүкафат верәҹәк (Лука 21:1—4).

ВАР ОЛАН АЛЛАҺДАН ҺЕЧ ВАХТ АЈРЫЛМАЈЫН

14. Јеһова илә мөһкәм мүнасибәтимиз Она садиг галмаға неҹә көмәк едир? (Һәмчинин шәклә бахын.)

¹⁴ Јеһова бизим үчүн ҝерчәк олса, онда Она садиг галмаг даһа асан олаҹаг. Јусифин һадисәси буну ајдын ҝөстәрир. О, әхлагсызлыг етмәкдән гәти шәкилдә имтина етмишди, чүнки Јеһова онун үчүн ҝерчәк иди. Јусиф Ону наразы салмаг истәмирди (Јар. 39:9). Јеһованын бизим үчүн дә ҝерчәк олмасыны истәјириксә, ҝәрәк дуаја вә мүталиәјә вахт ајыраг. Онда Онунла достлуғумуз ҝетдикҹә мөһкәмләнәҹәк. Јусиф кими Јеһова илә мөһкәм достлуг мүнасибәтимиз оланда исә Ону наразы салаҹаг һәрәкәтә јол вермәк истәмәјәҹәјик (Јаг. 4:8).

15. Сәһрада олан исраиллиләрлә баш верәнләрдән һансы ибрәт дәрсини ҝөтүрүрүк? (Ибраниләрә 3:12).

¹⁵ Јеһованын вар олан Аллаһ олдуғуну унутсаг, асанлыгла Ондан узаглаша биләрик. Сәһрада оланда исраиллиләрлә белә бир шеј баш вермишди. Онлар Јеһованын мөвҹуд олдуғуну билирдиләр, амма Јеһованын онларын гејдләринә галаҹағына шүбһә етмәјә башладылар. Һәтта исраиллиләр дејирдиләр: «Јеһова бизим арамыздадыр, ја јох?» (Чых. 17:2, 7). Нәтиҹәдә, онлар Јеһоваја үсјан етдиләр. Исраиллиләрин итаәтсизлији бизим үчүн ибрәт дәрсидир, биз  онларын сәһвини тәкрарламаг истәмәздик. (Ибраниләрә 3:12 ајәсини охујун.)

16. Иманымызы нә сынаја биләр?

¹⁶ Бу дүнја Јеһова илә достлуғумузу горумағы чәтинләшдирир. Чохлары Аллаһын вар олдуғуну даныр. Бәзән гырагдан елә ҝөрүнүр ки, Аллаһын тәләбләринә мәһәл гојмајан инсанларын ишләри јағ кими ҝедир. Буну ҝөрәндә, ола билсин, иманымыз сынансын. Аллаһын вар олдуғуна инансаг да, Онун бизә көмәк едәҹәјинә үрәјимиздә шүбһә јарана биләр. 73-ҹү мәзмурун јазары бу ҹүр һиссләр кечирмишди. О ҝөрүрдү ки, әтрафындакы инсанлар Аллаһын ганунларына әмәл етмәсәләр дә, хошбәхт өмүр сүрүрләр. Буна ҝөрә дә о дүшүнүрдү ки, ҝөрәсән, Аллаһа гуллуг етмәјә дәјәр? (Зәб. 73:11—13).

17. Јеһоваја садиг галмаға бизә нә көмәк едәҹәк?

¹⁷ Бәс мәзмурчуја дүшүнҹәсини дәјишмәјә нә көмәк етди? О, Јеһованы унуданларын агибәтини дүшүндү (Зәб. 73:18, 19, 27). Һәмчинин Аллаһа гуллуг етмәјин хејри барәдә дә фикирләшди (Зәб. 73:24). Ејнилә, биз дә Јеһованын вердији немәтләр барәдә дүшүнә биләрик. Тәсәввүр едирсиниз, Јеһоваја хидмәт етмәсәјдик, һәјатымыз неҹә оларды?! Бунлар барәдә дүшүнмәк көмәк едәҹәк ки, сәдагәтимизи горујаг вә мәзмурчу кими бу фикирдә олаг: «Мәнимчүнсә Аллаһа јахынлашмаг хошдур» (Зәб. 73:28).

18. Нәјә ҝөрә ҝәләҹәјә әминликлә бахырыг?

¹⁸ Јашадығымыз бу ахырзаманда үзләшдијимиз истәнилән чәтинликдән башыуҹа чыха биләрик. Чүнки «вар олан тәк бир Аллаһа гуллуг [едирик]» (1 Салон. 1:9). Бизим Аллаһымыз ҝерчәк Варлыгдыр вә Она гуллуг едән инсанларын рифаһы үчүн чалышыр. О, кечмишдә хидмәтчиләринә дајаг олуб, бу ҝүн дә дајаг олур. Тезликлә јер үзүндә олаҹаг ән бөјүк мүсибәтлә үзләшәҹәјик, амма бу заман тәк олмајаҹағыг (Әшј. 41:10). Буна ҝөрә дә биз ҹәсарәтлә дејә биләрик: «Јеһова дајағымдыр, әсла горхмарам» (Ибр. 13:5, 6).