1. Нәјә ҝөрә фәлакәтләрә һазырлашмаг лазымдыр?

 ҺАЗЫРЛЫГЛЫ олмаг һәјаты хилас едир. Мәсәлән, тәбии фәлакәтләрә габагҹадан һазырлашанлар адәтән сағ галыр. Үстәлик, башгаларына да көмәк едә билир. Авропада олан бир һуманитар тәшкилат белә бир фикир демишди: «Јахшы һазырлашмағын бөјүк ролу вар».

2. Бөјүк мүсибәтә нәјә ҝөрә һазыр олмалыјыг? (Мәтта 24:44).

² «Бөјүк мүсибәт» гәфил башлајаҹаг (Мәт. 24:21). Амма бу бизим үчүн ҝөзләнилмәз олмајаҹаг. Чүнки диҝәр фәлакәтләрдән фәргли олараг, биз онун ҝәләҹәјини билирик. Тәхминән 2000 ил бундан әввәл Иса Мәсиһ давамчыларыны һәмин ҝүнә һазыр олмаға сәсләмишди. (Мәтта 24:44 ајәсини охујун.) Әҝәр һазырлыглы олсаг, һәмин ағыр дөнәмдән һәм биз өзүмүз даһа раһат кечәҹәјик, һәм дә башгаларына көмәк едә биләҹәјик (Лука 21:36).

3. Бөјүк мүсибәтә һазыр олмаға дөзүм, шәфгәт вә мәһәббәт неҹә көмәк едә биләр?

³ Бөјүк мүсибәтә һазырлыглы олмаг үчүн бизә үч хүсусијјәт лазымдыр. Ағыр һөкм хәбәрини чатдырмалы олсаг вә иманымыза шәрик олмајан инсанлар бизи тәгиб етсә, неҹә давранаҹағыг? (Вәһј 16:21). Дөзүм бизә көмәк едәҹәк ки, Јеһоваја итаәт едәк вә Онун бизи горујаҹағына етибар едәк. Баҹы-гардашларымыза мадди зәрәр дәјсә вә ја онлар һәр шејләрини итирсәләр, нә едәҹәјик? (Һәб. 3:17, 18). Шәфгәтдән ирәли ҝәләрәк онлара јардым әли узадаҹағыг. Милләтләр бирлијинин һүҹуму заманы бир мүддәт баҹы-гардашларла бир јердә јашамалы олсаг, буна неҹә јанашаҹағыг? (Һизг. 38:10—12). Үрәјимиздә онлара бәсләдијимиз ҝүҹлү мәһәббәт сајәсиндә бу чәтин дөврдән кечә биләҹәјик.

4. Мүгәддәс Китабда дөзүм, шәфгәт вә мәһәббәт кими хүсусијјәтләри даим јетишдирмәли олдуғумуз неҹә вурғуланыр?

⁴ Аллаһын Кәламы бизи тәшвиг едир ки, даим өзүмүздә дөзүм, шәфгәт вә мәһәббәт јетишдирәк. Лука 21:19 ајәсиндә јазылыб: «Дөзүмлә һәјатынызы хилас едәҹәксиниз». Колослулара  3:12 ајәсиндә дејилир: «Шәфгәти… ҝејинин». 1 Салоникилиләрә 4:9, 10 ајәләриндә охујуруг: «Бир-биринизи севмәји сизә Аллаһ өјрәдир… Бунунла белә, гардашлар, сизә төвсијә едирик ки, бу саһәдә даһа да инкишаф едәсиниз». Бу сөзләрин үнванландығы инсанлар артыг дөзүм, шәфгәт вә мәһәббәт ҝөстәрирдиләр. Амма онлар бу хүсусијјәтләри даим инкишаф етдирмәли идиләр. Бу бизә дә аиддир. Ҝәлин ҝөрәк биринҹи әсрдәки мәсиһиләр бу хүсусијјәтләри неҹә тәзаһүр етдирирдиләр. Ҝөрәк онлардан нүмунә ҝөтүрмәк вә беләҹә, бөјүк мүсибәтә һазыр олмаг үчүн нә едә биләрик.

5. Биринҹи әсрдәки мәсиһиләр сынаглара неҹә дөзүрдүләр?

⁵ Биринҹи әсрдәки мәсиһиләрә дөзүм лазым иди (Ибр. 10:36). Чүнки онлар мәсиһи олдуглары үчүн һамынын үзләшдији чәтинликләрдән әлавә, башга сынагларла да үзләширдиләр. Чохларыны јәһуди дин хадимләри вә Рома һөкумәти тәгиб едирди. Бу азмыш кими аилә үзвләри онлара ҝөз вериб ишыг вермирди (Мәт. 10:21). Үстәлик, мәсиһиләр јығынҹағын ичиндә дә чәтинликләр јашајырды: бәзән онлар өзләрини дөнүкләрдән вә онларын сахта тәлимләриндән горумалы олурдулар (Һәв. 20:29, 30). Һәмин мәсиһиләр бүтүн бу чәтинликләрә дөздүләр (Вәһј 2:3). Буну неҹә баҹардылар? Онлар Әјјуб пејғәмбәрин вә дөзүм ҝөстәрән диҝәр мөмин инсанларын нүмунәси үзәриндә дүшүнүрдүләр (Јаг. 5:10, 11). Дуа едиб Јеһовадан ҝүҹ истәјирдиләр (Һәв. 4:29—31). Һәмчинин дөзүм ҝөстәрмәјин ҝәтирәҹәји мүкафат барәдә дүшүнүрдүләр (Һәв. 5:41).

6. Меританын нүмунәсиндән тәгибләрә дөзмәклә бағлы нә өјрәнирик?

⁶ Биз дә дөзүмлү ола биләрик. Бунун үчүн Мүгәддәс Китабдан вә нәшрләримиздән дөзүм ҝөстәрән инсанлар барәдә охумалыјыг вә онларын нүмунәси үзәриндә дүшүнмәлијик. Албанијада јашајан Мерита адлы бир баҹы мәһз бунун сајәсиндә аиләсинин вердији зүлмләрә дөзә билмишди. О дејир: «Әјјуб пејғәмбәрин нүмунәсинин мәнә бөјүк көмәји дәјди. Онун чәкмәдији әзаб галмамышды, бунунла белә, о демишди: “Мән сон нәфәсимәдәк садиг галаҹағам!” (Әјј. 27:5). Һалбуки о билмирди, бүтүн бунлары онун башына ким ҝәтирир. Бир анлыг дүшүндүм: “Әјјубун сынагларынын јанында мәним сынагларым нәдир ки! Үстәлик, ондан фәргли олараг, мән башыма ҝәлән мүсибәтләрин кимдән олдуғуну билирәм”».

7. Ҹидди проблемимиз олмаса да, индидән нә етмәји өјрәнмәлијик?

⁷ Јеһоваја тез-тез дуа едиб дәрдимизи Онунла бөлүшмәк дә дөзүмүмүзү мөһкәмләндирәҹәк (Филип. 4:6; 1 Салон. 5:17). Ола билсин, һал-һазырда ҹидди проблемләриниз јохдур. Бунунла белә, мәјус, чашгын оланда, нә едәҹәјинизи билмәјәндә көмәк үчүн Јеһоваја үз тутурсунуз? Әҝәр инди ҝүндәлик проблемләриниз заманы Јеһоваја дуа етмәји вәрдиш етсәниз, сабаһ даһа бөјүк проблемләрлә үзләшәндә ағлыныза ҝәлән илк шеј бу олаҹаг. Үрәјиниз дә архајын олаҹаг ки, Јеһова мәсләһәт билдији вахтда сизин үчүн нә лазымдырса едәҹәк (Зәб. 27:1, 3).

8. Миранын нүмунәсиндән ҝөрдүјүмүз кими индики сынаглара дөзмәк бизи ҝәләҹәјә неҹә һазырлајыр? (Јагуб 1:2—4). (Һәмчинин шәклә бахын.)

⁸ Әҝәр индики чәтинликләр заманы дөзүм ҝөстәририксә, чох јәгин ки, бөјүк мүсибәт заманы да дөзүмлү ола биләҹәјик (Ром. 5:3). Нәјә әсасән белә дејә биләрик? Чох баҹы-гардашымыз өз тәҹрүбәсиндән ҝөрүб ки, таб ҝәтирдикләри һәр иман сынағы онлара нөвбәти сынаға дөзмәјә көмәк едиб. Дөзүм онлары даһа јахшы инсан  едиб. Јеһованын онлара көмәк етмәјә һазыр олдуғуна иманларыны артырыб. Иман да өз нөвбәсиндә онлара нөвбәти сынаға дөзмәјә көмәк едиб. (Јагуб 1:2—4 ајәләрини охујун.) Албанијада өнҹүл кими хидмәт едән Мира адлы бир баҹы ҝөрүб ки, әввәлләр дөзүмлү олмағын сајәсиндә инди дә дөзүм ҝөстәрир. Бәзән онда елә фикир јараныр ки, бу гәдәр проблеми олан јеҝанә инсан одур. Амма сонра өтән 20 ил әрзиндә Јеһованын она неҹә дајаг олдуғуну хатырлајыр вә өз-өзүнә белә дејир: «Садиг гал, гојма ки, бу илләр, Јеһованын көмәји илә апардығын бүтүн мүбаризәләр бошуна ҝетсин». Сиз дә Јеһованын индијә гәдәр сизә неҹә көмәк етдији барәдә дүшүнүн. Әмин олун ки, Јеһова дөздүјүнүз һәр сынағы ҝөрүр вә О, мүтләг сизә мүкафат верәҹәк (Мәт. 5:10—12). Дөзүмлү олмағы өјрәндијиниз үчүн бөјүк мүсибәт башлајанда тәслим олмајаҹагсыныз.

9. Сурија Антакјасындакы мәсиһиләрин шәфгәтли олдуғу нәдән ҝөрүнүр?

⁹ Ҝәлин ҝөрәк Јәһудијјәдәки мәсиһиләр аҹлыгдан әзијјәт чәкәндә һансы көмәји алмышдылар. Сурија Антакјасындакы јығынҹаг аҹлыг барәдә ешидәндә, сөз јох ки, орадакы баҹы-гардашлара үрәкләри ағрыды. Бу да онлары һәмин баҹы-гардашлар үчүн нәсә етмәјә тәшвиг етди. Онлар «гәрарлашдырдылар ки, һәр кәс Јәһудијјәдә јашајан гардашлара ҝүҹү чатан гәдәр јардым ҝөстәрсин» (Һәв. 11:27—30). Аҹлыгдан әзијјәт чәкән баҹы-гардашлар узагда јашасалар да, Антакјадакы мәсиһиләр онлары көмәксиз гојмадылар (1 Јәһ. 3:17, 18).

10. Фәлакәтдән зәрәр чәкән диндашларымыза һансы јолларла шәфгәт ҝөстәрә биләрик? (Һәмчинин шәклә бахын.)

¹⁰ Биз дә диндашларымызын фәлакәтлә үзләшдијини ешидәндә шәфгәт ҝөстәририк, дәрһал онларын дадына чатмаға чалышырыг. Мәсәлән, ағсаггаллара јардым ишиндә иштирак етмәк истәдијимизи билдиририк, үмумдүнја ишинә ианә едирик вә ја фәлакәтдән зәрәрчәкәнләр үчүн дуа едирик b (Мәс. 17:17). 2020-ҹи илдә COVID-19 пандемијасындан зәрәр чәкәнләрә јардым етмәк үчүн 950-дән чох Зәрәрчәкәнләрә јардым комитәси тәјин олунмушду. Јардым комитәләриндә хидмәт едәнләр ән ҝөзәл тәрифләрә лајигдирләр. Онлар диндашларынын һалына јандыглары үчүн мадди јардым чатдырыблар, руһани ҹәһәтдән онларын гејдинә галыблар, бәзи һалларда исә евләри, ибадәт үчүн јерләри тәмир-бәрпа едибләр. (2 Коринфлиләрә 8:1—4 ајәләри илә әлагәләндирин.)

11. Шәфгәт ҝөстәрмәјимиз сәмави Атамызын адыны неҹә уҹалдыр?

¹¹ Фәлакәтдән зәрәр чәкәнләр үчүн вердијимиз гурбанлар башгаларынын ҝөзүндән јајынмыр. Мәсәлән, 2019-ҹу илдә «Дориан» гасырғасы Баһама Адаларында бир ибадәт евини дағытмышды. Гардашлар ону бәрпа едәркән Јеһованын Шаһиди олмајан бир подратчыдан мүәјјән ишләри ҝөрмәк үчүн нә гәдәр зәһмәт һаггы алаҹағыны сорушдулар. Подратчы онлара белә ҹаваб вермишди: «Аваданлыға, чәкдијим зәһмәтә вә материаллара ҝөрә сиздән бир гәпик дә пул ҝөтүрмәјәҹәјәм… Сизин тәшкилатыныз үчүн һәр шеји һавајы едәҹәјәм, чүнки достларыныза неҹә ҹан јандырмағыныз мәни валеһ едир». Дүнјада чох адам Јеһованы танымыр, амма онлар Јеһованын Шаһидләрини мүшаһидә едирләр. Бизим әмәлдә шәфгәт ҝөстәрмәјимиз инсанлары «мәрһәмәти бол олан» Аллаһа јахынлашдыра биләр (Ефес. 2:4). Бу, чох бөјүк шәрәфдир!

12. Бу ҝүн шәфгәтли олмағы өјрәнмәк бизи бөјүк мүсибәтә неҹә һазырлајыр? (Вәһј 13:16, 17).

 ¹² Бөјүк мүсибәт заманы бизә шәфгәтли олмаг лазым ҝәләҹәк. Нәјә ҝөрә? Мүгәддәс Китабда ҝөстәрилир ки, сијаси системи дәстәкләмәјәнләр һәм инди, һәм дә бөјүк мүсибәт заманы чәтинликләрлә үзләшәҹәкләр. (Вәһј 13:16, 17 ајәләрини охујун.) Ола билсин, баҹы-гардашларымыз зәрури тәләбатларыны өдәмәк үчүн көмәјә еһтијаҹ дујаҹаглар. Арзу едирик ки, Падшаһымыз Иса Мәсиһ һөкмүнү иҹра етмәјә ҝәләндә шәфгәт ҝөстәрдијимизи ҝөрсүн вә бизи Падшаһлығы мирас алмаға дәвәт етсин (Мәт. 25:34—40).

13. Ромалылара 15:7 ајәсиндә гејд олундуғу кими мәсиһиләр араларындакы мәһәббәти неҹә мөһкәмләндирирдиләр?

¹³ Биринҹи әсрдә мәсиһиләр араларындакы мәһәббәтлә танынырдылар. Бәс онлара мәһәббәт ҝөстәрмәк асан иди? Рома јығынҹағындакы вәзијјәт барәдә дүшүнәк. Орада бир-бириндән фәргли баҹы-гардашлар вар иди. Онлардан бәзиләри јәһуди иди вә ушаглыгдан Мусанын ганунуна әмәл едирдиләр. Бәзиләри исә башга милләтдән иди вә тамам башга адәтләрлә бөјүмүшдүләр. Чох јәгин ки, јығынҹагда һәм гуллар вар иди, һәм дә азад инсанлар, һәтта бәлкә дә бәзиләринин өз гулу вар иди. Араларындакы фәргә бахмајараг, онлар нәјин сајәсиндә бир-бириләринә мәһәббәт ҝөстәрирдиләр? Һәвари Булус онлары бир-бирини гәбул етмәјә тәшвиг етмишди. (Ромалылара 15:7 ајәсини охујун.) О нәји нәзәрдә тутурду? «Гәбул етмәк» кими тәрҹүмә олунан јунан ифадәси гонагпәрвәрлик, хош үз ҝөстәрмәк демәкдир. Адәтән бу ҹүр мүнасибәти кимисә евимизә вә ја достларымызын арасына дахил едәндә ҝөстәририк. Мәсәлән, Булус Филимона јазмышды ки, гачаг гул олан Онисими бу ҹүр гәбул етсин: «Ону меһрибанлыгла гаршыла» (Флм. 17). Һәмчинин Аквилас вә Прискилла Аполлосу гәбул етдиләр. Неҹә? Аполлосун мәсиһилик һагда билији онларынкындан хејли аз олса да, ону «јанларына алдылар» (Һәв. 18:26). Мәсиһиләр чалышырдылар ки, араларындакы мүхтәлифлик нифаг јаратмасын, онлар бир-бириләрини гәбул едирдиләр.   

14. Анна илә һәјат јолдашы мәһәббәтләрини неҹә ҝөстәрирдиләр?

¹⁴ Ејнилә биз дә баҹы-гардашлара севҝимизи онлары достларымызын сырасына гәбул етмәклә ҝөстәрә биләрик. Онлар да севҝимизә севҝи илә гаршылыг верәҹәкләр (2 Кор. 6:11—13). Ҝәлин Анна баҹы илә һәјат јолдашынын нүмунәсинә бахаг. Онлар хүсуси тәјинатлы мүждәчи кими Африканын гәрбинә тәјин олунанда COVID-19 пандемијасы башлады. Буна ҝөрә дә јени јығынҹагларындакы баҹы-гардашларла ҹанлы ҝөрүшә билмирдиләр. Бәс онлар мәһәббәтләрини неҹә ҝөстәрдиләр? Онлар видеоконфранс васитәсилә јығынҹагларындакы баҹы-гардашларла әлагә јарадырдылар вә онларла јахындан таныш олмаг истәдикләрини билдирирдиләр. Бу һәмин аиләләрә чох ҝөзәл тәсир бағышлады. Онлар да тез-тез Аннаҝилә зәнҝ едирдиләр, ја да месаж јазырдылар. Нәјә ҝөрә бу әр-арвад баҹы-гардашларла таныш олмаға белә ҹан атырды? Анна дејир: «Диндашларымын мәнә вә аиләмә һәм јахшы, һәм дә пис ҝүнүмүздә ҝөстәрдији мәһәббәти һеч вахт унутмарам. Онларын нүмунәси мәни дә башгаларына мәһәббәт ҝөстәрмәјә тәшвиг едир».

15. Ванесанын нүмунәсиндән бүтүн баҹы-гардашларымызы севмәклә бағлы нә өјрәнирик? (Һәмчинин шәклә бахын.)

¹⁵ Чохумузун ҝетдији јығынҹагларда баҹы-гардашларын хасијјәти, миллијјәти вә мәдәнијјәти бир-бириндән фәргләнир. Фикримизи  онларын мүсбәт ҹәһәтләринә ҹәмләсәк, онлара севҝимизи артыра биләҹәјик. Јени Зеландијада хидмәт едән Ванеса адлы бир баҹыја јығынҹагда бәзиләри илә јола ҝетмәк чәтин иди. Амма сонра о, гәрара ҝәлди ки, ону гыҹыгландыран кәсләрдән ҝен ҝәзмәсин, әксинә, онларла даһа чох вахт кечирсин. Бунун сајәсиндә о, Јеһованын һәмин инсанларда һансы хүсусијјәти севдијини ҝөрә билди. О дејир: «Јолдашым рајон нәзарәтчиси тәјин олундуғу үчүн инди мүхтәлиф хасијјәтли баҹы-гардашларын арасында даһа чох олуруг вә онларла дил тапмаг мәнә даһа асандыр. Артыг мән мүхтәлифлији севирәм. Ајдындыр ки, Јеһова да севир, чүнки О бир-бириндән фәргли инсанларын Она ибадәт етмәсинә иҹазә вериб». Биз инсанлара Јеһова кими јанашанда онлары севдијимизи сүбут едирик (2 Кор. 8:24).

16. Нәјә ҝөрә бөјүк мүсибәт заманы мәһәббәтимизин олмасы ваҹиб рол ојнајаҹаг? (Һәмчинин шәклә бахын.)

¹⁶ Бөјүк мүсибәт заманы мәһәббәт ваҹиб рол ојнајаҹаг. Һәмин вахт Јеһова бизи неҹә горујаҹаг? Гәдим Бабил һүҹума мәруз галан заман Јеһова Өз халгына белә бир ҝөстәриш вермишди: «Еј халгым, ичәри отагларыныза ҝирин, арханызҹа гапылары бағлајын. Гәзәб кечәнәҹән, гыса мүддәтә ҝизләнин» (Әшј. 26:20). Јәгин, биз дә бөјүк мүсибәт заманы бу ҝөстәришә әмәл етмәли олаҹағыг. Ола билсин, «ичәри отаглар» дејиләндә јығынҹагларымыз нәзәрдә тутулур. Јеһова сөз верир ки, бөјүк мүсибәт заманы диндашларымызын арасында олуб ибадәтимизи давам етдирсәк, О бизи горујаҹаг. Буна ҝөрә дә биз индидән вар ҝүҹүмүзлә чалышмалыјыг ки, баҹы-гардашлара садәҹә дөзмәјәк, онлары севәк. Хиласымыз бундан асылы ола биләр!

17. Әҝәр индидән һазыр олсаг, бөјүк мүсибәт заманы неҹә давранаҹағыг?

¹⁷ «Јеһованын мөһтәшәм ҝүнү» бүтүн бәшәријјәт үчүн ағыр дөвр олаҹаг (Сәф. 1:14, 15). Аллаһын халгынын да һәмин вахт чәтинликләри олаҹаг. Амма биз индидән һазырлашсаг, сакитлијимизи горујаҹағыг вә башгаларына көмәк едә биләҹәјик. Биз һәр бир чәтинлик гаршысында дөзүм ҝөстәрәҹәјик. Диндашларымыз әзијјәт чәкәндә әлимиздән ҝәләни едәҹәјик ки, шәфгәт ҝөстәрәрәк вә әл тутараг онларын дәрдини јүнҝүлләшдирәк. Индидән баҹы-гардашлара мәһәббәт јетишдирдијимиз үчүн ҝәләҹәкдә дә онлара јахын олаҹағыг. Онда Јеһова да бизә әбәди һәјат мүкафаты верәҹәк. О заман бүтүн бәлалар вә әзаблар унудулаҹаг (Әшј. 65:17).