1. Јеһова биздә нәјә фикир верир?

ЈЕҺОВА «халгындан зөвг алыр» (Зәб. 149:4). Бу сөзләр инсанын гәлбини охшајыр! Јеһова биздәки ҝөзәл хүсусијјәтләрә фикир верир. Јахшылыға доғру дәјишә биләҹәјимизи билир вә бизи Өзүнә ҹәлб едир. Әҝәр биз Јеһоваја садиг галсаг, О, әбәдијјән бизә јахын олаҹаг! (Јәһ. 6:44).

2. Нәјә ҝөрә бәзи мәсиһиләрә Јеһованын онлары севдијинә инанмаг чәтиндир?

² Бәзиләри белә дүшүнүр: «Билирәм, Јеһова үмумиликдә бүтүн халгыны севир, амма неҹә әмин ола биләрәм ки, шәхсән мәнә дәјәр верир?» Нәјә ҝөрә бәзиләриндә белә суал јараныр? Ушаглыгда пис рәфтара мәруз галан Оксана * адлы баҹы дејир: «Вәфтиз олунанда, өнҹүл хидмәтинә башлајанда чох хошбәхт идим. Амма үстүндән 15 ил кечәндән сонра ушаглығымла бағлы пис хатирәләр мәнә әзаб вермәјә башлады. Фикирләширдим ки, Јеһова даһа мәндән разы дејил, Онун мәһәббәтинә лајиг дејиләм». Јуа адлы өнҹүл бир баҹынын да ушаглығы јахшы кечмәјиб. О дејир: «Һәјатымы Јеһоваја һәср етдим. Чүнки Онун гәлбини шад етмәк истәјирдим. Амма инанмырдым ки, О нә вахтса мәни севәр».

3. Бу мәгаләдә һансы суалларын ҹавабыны тапаҹағыг?

³ Бу садиг мәсиһиләр кими, сиз дә Јеһованы севирсиниз, амма ола билсин, Онун сизи севдијинә шүбһә едирсиниз. Бәс нәјә ҝөрә Јеһова үчүн дәјәрли олдуғунуза әмин олмалысыныз? Бәдбин дүшүнҹәләрә гапыланда бу вәзијјәтдән чыхмаға сизә нә көмәк едә биләр? Ҝәлин бу суалларын ҹавабыны тапаг.

4. Нәјә ҝөрә Јеһованын бизи севдијинә шүбһә етмәк тәһлүкәлидир?

⁴ Мәһәббәт инсаны һәрәкәтә тәшвиг едән бөјүк гүввәдир. Әҝәр Јеһованын бизи севдијинә, бизә дајаг олдуғуна  әмин олсаг, чәтинликләрә бахмајараг, Она сидги-үрәкдән хидмәт етмәјә сөвг олунаҹағыг. Јох әҝәр шүбһә етсәк, онда ҝүҹүмүз түкәнәҹәк (Мәс. 24:10). Руһдан дүшәндә вә Аллаһын бизи севдијинә иманымызы итирәндә Шејтанын һүҹумлары гаршысында аҹиз олаҹағыг (Ефес. 6:16).

5. Аллаһын мәһәббәтинә шүбһә етмәјин нәтиҹәләри барәдә нә демәк олар?

⁵ Бәзи садиг мәсиһиләр Јеһованын онлары севдијинә шүбһә етдикләри үчүн руһани ҹәһәтдән зәифләјиб. Ҹејмс адлы ағсаггал дејир: «Бејтелдә вә башга дилдә кечирилән јығынҹагда хидмәт етмәк мәнә хош олса да, билмирдим Јеһова Онун јолунда ҝөрдүјүм ишләрдән разыдыр, ја јох. Һәтта елә олду ки, Јеһованын дуаларымы ешитдијинә дә шүбһә етмәјә башладым». Ејва адлы башга бир тамвахтлы хидмәтчи дејир: «Јеһованын мәһәббәтинә шүбһә етмәјин нә гәдәр тәһлүкәли олдуғуну баша дүшдүм, чүнки бу, инсанын Јеһованын јолунда етдији һәр бир шејә тәсир едир. Инсан руһани ишләрдән сојујур, Јеһоваја хидмәтдә севинҹини итирир». Өнҹүл вә ағсаггал кими хидмәт едән Мајкл дејир: «Аллаһ үчүн дәјәрли олдуғунуза инанмасаныз, Ондан узаглашаҹагсыныз».

6. Аллаһын мәһәббәти илә бағлы шүбһәләр баш галдыранда нә етмәлијик?

⁶ Бу баҹы-гардашларын сөзләри ҝөстәрир ки, бәдбин дүшүнҹәјә гапылмаг иманымыз үчүн нә гәдәр тәһлүкәлидир. Аллаһын бизи севмәдији илә бағлы шүбһәләр баш галдыранда нә етмәлијик? Бу шүбһәләри дәрһал ағлымыздан говмалыјыг! Јеһовадан көмәк истәјин ки, нараһат дүшүнҹәләринизи Аллаһын сүлһү илә — үрәјинизи вә фикирләринизи горујан сүлһлә әвәз едә биләсиниз (Зәб. 139:23; Филип. 4:6, 7). Бир шеји дә унутмајын, бу ҹүр һиссләр кечирән тәк сиз дејилсиниз. Бу ҹүр мәнфи һиссләрлә мүбаризә апаран башга садиг баҹы-гардашларымыз да вар. Һәтта Јеһованын кечмишдәки хидмәтчиләри дә бунларла мүбаризә апармалы олурду. Онлардан бири һәвари Булус иди. Ҝәлин ҝөрәк ондан нә өјрәнирик.

7. Һәвари Булусун һансы чәтинликләри олмушду?

⁷ Елә олуб ки, мәсулијјәтләриниз чох олдуғу үчүн онларын өһдәсиндән ҝәлә билмәјәҹәјинизи дүшүнәсиниз? Онда Булусу јахшы баша дүшәрсиниз. О, тәкҹә бир јығынҹағын јох, «бүтүн јығынҹагларын» фикрини чәкирди (2 Кор. 11:23—28). Бәлкә дә, сиз  хроники хәстәликдән әзијјәт чәкирсиниз вә буна ҝөрә чох вахт севинҹинизи итирирсиниз. Булуса да узун мүддәт ҹисминә батырылмыш тикан әзаб верирди. Ола билсин, бу һансыса физики гүсур иди. О, чох истәјирди бу бәладан гуртулсун (2 Кор. 12:7—10). Јахуд, ола билсин, етдијиниз сәһвләрә ҝөрә руһдан дүшүрсүнүз. Бәзән Булус да сәһвләринә ҝөрә руһдан дүшүрдү. Даима зәиф ҹәһәтләри илә мүбаризә апардығы үчүн өзүнү «јазыг адам» адландырмышды (Ром. 7:21—24).

8. Булус нәјин сајәсиндә чәтинликләрә бахмајараг, хидмәтини давам етдирирди?

⁸ Гаршылашдығы мүхтәлиф чәтинликләрә, ону руһдан салан вәзијјәтләрә бахмајараг, Булус Јеһоваја хидмәтини дајандырмырды. Бәс она ҝүҹ верән нә иди? О, јахшы билирди һансы зәиф ҹәһәтләри вар, бунунла белә, фидјәјә иманы сарсылмаз иди. О, Исанын нөвбәти вәдини унутмурду: «Она [Исаја] иман едән һәр адамын әбәди һәјаты [олаҹаг]» (Јәһ. 3:15; Ром. 6:23). Сөзсүз ки, Булус да фидјәјә иман ҝәтирәнләрдән бири иди. О әмин иди ки, һәтта ҹидди ҝүнаһ едәнләр төвбә едәрләрсә, Јеһова онлары да бағышламаға һазырдыр (Зәб. 86:5).

9. Һәвари Булусун Галатијалылара 2:20 ајәсиндәки сөзләриндән нә өјрәнирик?

⁹ Булус һәм дә Аллаһын Иса Мәсиһ васитәсилә ифадә етдији мәһәббәтинин бөјүклүјүнә дә иман едирди. (Галатијалылара 2:20 ајәсини охујун.) Бу ајәнин сонунда онун дедији сөзләрдәки әминлијә бир фикир верин, о дејир: «Мәни севән вә ҹаныны уғрумда фәда едән Аллаһын Оғлуна иманла јашајырам». Булус дүшүнмүрдү ки, Јеһованын мәһәббәтинин һәдди вар. Мәсәлән, о, белә фикирләшмирди: «Билирәм, Јеһова баҹы-гардашларымы севир, нәјә ҝөрә севдијини дә билирәм. Амма мәни инанмырам севә». О, Ромадакы мәсиһиләрә демишди: «Биз һәлә ҝүнаһлы икән Мәсиһ уғрумузда өлдү» (Ром. 5:8). Бәли, Аллаһын мәһәббәти интәһасыздыр, онун һәдди-һүдуду јохдур!

10. Ромалылара 8:38, 39 ајәләриндән нә өјрәнирик?

¹⁰ Ромалылара 8:38, 39 ајәләрини охујун. Булус Аллаһын мәһәббәтинин ҝүҹлү олдуғуна зәррә гәдәр дә шүбһә етмирди. О јазмышды ки, һеч нә бизи «Аллаһын мәһәббәтиндән ајыра билмәз». Булус Јеһованын Исраил халгы илә неҹә сәбирлә даврандығыны билирди. Ону да билирди ки, Јеһова она бөјүк мәрһәмәт ҝөстәриб. Булус, бир нөв, белә дејирди: «Әҝәр Јеһова Оғлуну мәним уғрумда өлмәк үчүн ҝөндәрибсә, Онун мәни севдијинә нијә шүбһә етмәлијәм ки?!» (Ром. 8:32).

11. Һәвари Булус 1 Тимутијә 1:12—15 ајәләриндә јазылан ҝүнаһлары ишләсә дә, нәјә ҝөрә Јеһованын ону севдијинә әмин иди?

 ¹¹ 1 Тимутијә 1:12—15 ајәләрини охујун. Јәгин Булус кечмиши хатырлајанда чох пис олурду. О өзүнү «ән бетәр» ҝүнаһкар адландырмышды вә ајдындыр нәјә ҝөрә. Һәгигәти дәрк етмәздән өнҹә Булус шәһәрбәшәһәр ҝәзәрәк мәсиһиләри амансызҹасына тәгиб едирди, онлары зиндана салырды вә онларын едамыны дәстәкләјирди (Һәв. 26:10, 11). Тәсәввүр един, вахтилә Булус бир ҝәнҹ мәсиһинин валидејнләринин едам олунмасыны дәстәкләјиб. Инди һәмин адамла үз-үзә ҝәлир. Һәмин ан һансы һиссләри кечирәрди? О, кечмишдәки сәһвләринә ҝөрә чох пешман иди, амма билирди ки, кечмиши дәјишә билмәз. Булус әмин иди ки, Мәсиһ ондан өтрү өлүб, она ҝөрә дә белә сөзләр демишди: «Инди бу мөвгеји Аллаһын лүтфү сајәсиндә тутурам» (1 Кор. 15:3, 10). Булусдан нә өјрәнирик? Шүбһә етмәјин ки, Мәсиһ сиздән өтрү өлүб вә сизин Јеһова илә сых достлуг мүнасибәти гурмағыныз үчүн јол ачыб (Һәв. 3:19). Јеһова диггәтини кечмишдә Онун хидмәтчиси олмаздан габаг вә ја оландан сонра етдијимиз сәһвләрә ҹәмләмир. Онун үчүн өнәмли олан буҝүнкү вә ҝәләҹәкдәки һәрәкәтләримиздир (Әшј. 1:18).

12. Һеч кимин бизә дәјәр вермәдијини, севмәдијини дүшүнәндә 1 Јәһја 3:19, 20 ајәләри бизә неҹә көмәк едә биләр?

¹² Ола билсин, Иса Мәсиһин бизим ҝүнаһларымыздан өтрү өлдүјү һагда дүшүнәндә белә гәнаәтә ҝәлмисиниз: «Мән бу дәјәрли әнама лајиг дејиләм». Бу ҹүр дүшүнмәјинизә нә сәбәб ола биләр? Ҝүнаһлы үрәјимизә алданараг дүшүнә биләрик ки, һеч ким бизи севмир, дәјәр вермир. (1 Јәһја 3:19, 20 ајәләрини охујун.) Белә мәгамларда унутмамалыјыг ки, «Аллаһ үрәјимиздән  бөјүкдүр». Сәмави Атамызын мәһәббәти вә әфви хәлвәтҹә үрәјимиздә баш галдыран истәнилән мәнфи һиссдән гат-гат ҝүҹлүдүр. Биз өзүмүзү Јеһованын мәһәббәтинә инандырмалыјыг. Бунун үчүн Онун Кәламыны һәмишә мүталиә етмәли, тез-тез дуа етмәли вә садиг хидмәтчиләри илә мүнтәзәм үнсијјәт етмәлијик. Нәјә ҝөрә бунлары етмәк олдугҹа ваҹибдир?

13. Аллаһын Кәламынын мүталиәси бизә неҹә көмәк едә биләр? (« Аллаһын Кәламы онлара неҹә көмәк едир?» адлы чәрчивәјә бахын.)

¹³ Аллаһын Кәламыны һәр ҝүн мүталиә един. Онда Јеһованын нә гәдәр меһрибан Аллаһ олдуғуну даһа ајдын баша дүшәҹәксиниз. Онун сизи нә гәдәр чох севдијини анлајаҹагсыныз. Һәр ҝүн Аллаһын Кәламындан охудугларынызын дәринлијинә варсаныз, даһа ајдын дүшүнәҹәксиниз. Чүнки орада јазыланлар јанлыш фикирләринизи вә һиссләринизи ислаһ едәҹәк (2 Тим. 3:16). Өзүнү дәјәрсиз һисс едән Кевин адлы бир ағсаггал дејир: «103-ҹү мәзмуру охујуб дәриндән дүшүнәндә өзүмә ҝәлдим. Јеһованын мәним һагда әслиндә һансы фикирдә олдуғуну анладым». Бајаг сөзләри ҝәтирилән Ејва дејир: «Һәр ҝүнүн сонунда вахт ајырыб Јеһова һагда, Онун үчүн нәјин өнәмли олдуғу барәдә дүшүнүрәм. Беләҹә, гәлбимә раһатлыг чөкүр, иманым мөһкәмләнир».

14. Дуа бизә нәдә көмәк едә биләр?

¹⁴ Тез-тез дуа един (1 Салон. 5:17). Киминләсә мөһкәм дост олмаг үчүн онунла тез-тез вә сәмими үнсијјәт етмәк ҝәрәкдир. Ејни шеји Јеһова илә достлуғумуза да аид етмәк олар. Биз дуада Она һиссләримизи, фикирләримизи, нараһатлығымызы билдирәндә ҝөстәририк ки, Она ҝүвәнирик вә Онун бизи севдијинә әминик (Зәб. 94:17—19; 1 Јәһ. 5:14, 15). Әввәлдә сөзләри ҝәтирилән Јуа дејир: «Мән дуа едәндә анҹаг ҝүн әрзиндә баш верәнләр һаггында данышмырам. Јеһоваја үрәјими ачыб, әслиндә нә һисс етдијими Она дејирәм. Вахт кечдикҹә Јеһова мәним үчүн ширкәт мүдири кими јох, өвладларыны севән Ата кими олур». (« Буну охумусунуз?» адлы чәрчивәјә бахын.)

15. Јеһова шәхсән һәр биримизә неҹә гајғы ҝөстәрир?

¹⁵ Садиг достларла үнсијјәтдә олун. Онлар Јеһовадан бир пајдыр (Јаг. 1:17). Јеһова бизә бизи «һәр заман» севән баҹы-гардашлардан ибарәт руһани аилә бәхш едиб (Мәс. 17:17). Бу, сәмави Атамыз Јеһованын шәхсән һәр биримизә ҝөстәрдији гајғыдыр. Булус Колослулара јаздығы мәктубда бәзи мәсиһиләрин адларыны чәкәрәк она дајаг олдугларыны демишди (Кол. 4:10, 11). Һәтта Иса Мәсиһин дә достларынын көмәјинә еһтијаҹы олурду вә о, бу көмәји чох гијмәтләндирирди.  Она дајаг оланлар арасында һәм мәләкләр вар иди, һәм дә инсанлар (Лука 22:28, 43).

16. Садиг достлар Јеһоваја даһа да јахынлашмағымыза неҹә көмәк едә биләр?

¹⁶ Јеһованын бәхш етдији садиг достлардан көмәк истәјирсиниз? Јахуд да онларын көмәјини гәбул едирсиниз? Дәрдимизи јеткин мәсиһи илә бөлүшмәк о демәк дејил ки, биз зәифик, әксинә, бу бизи чох шејдән горуја биләр. Мәгаләдә ады чәкилән Ҹејмс дејир: «Јеткин мәсиһиләрлә сых достлуғун һәјатымда әвәзсиз јери вар. Мәнфи фикирләрә гапыланда бу дәјәрли достлар мәнә сәбирлә гулаг асыр, мәни чох истәдикләрини дејирләр. Онларын симасында Јеһованын мәнә севҝисини вә гајғысыны ҝөрүрәм». Доғрудан да, иман баҹы-гардашларымызла мөһкәм достлуға саһиб олмаг олдугҹа ваҹибдир!

17, 18. Кимә гулаг асмалыјыг вә нәјә ҝөрә?

¹⁷ Шејтан истәјир ки, Јеһованы разы салмаг үчүн апардығымыз мүбаризәни дајандыраг. О бизи инандырмаға чалышыр ки, Јеһова бизи севмир, биз хиласа лајиг дејилик. Амма мәгаләдән ҝөрдүк ки, бу, гәтијјән белә дејил.

¹⁸ Јеһова сизи севир. Сиз Онун ҝөзүндә ләл-ҹәваһиратсыныз. Она табе олсаныз, онда Иса Мәсиһ кими, сиз дә Онун мәһәббәтини горујуб-сахлајаҹагсыныз (Јәһ. 15:10). Одур ки, Шејтана вә даима сизи гынајан үрәјинизин сәсинә гулаг асмајын. Һәр биримиздәки ҝөзәл хүсусијјәтләри ҝөрән Јеһова Аллаһымыза гулаг асын. Әмин олун ки, «Јеһова халгындан зөвг алыр», о халгдан ки, сиз дә онун ичиндәсиниз!