ВАЛИДЕЈНЛӘРИМИН НҮМУНӘСИ

1957-ҹи илдә валидејнләрим Италијадан Канаданын Саскачеван әјаләтинә, Киндерслијә көчүбләр. Үстүндән чох кечмәмиш валидејнләрим һәгигәти өјрәндиләр вә һәгигәт һәјатымызда ән ваҹиб јери тутмаға башлады. Јадымдадыр, ушаг јашларымдан аилә үзвләримлә бирликдә саатларла хидмәтдә олурдум. Она ҝөрә бәзән зарафатла дејирәм: «Сәккиз јашымда көмәкчи өнҹүл олмушам».

Валидејнләрим касыб иди. Бунунла белә, онлар Јеһованын јолунда гурбанлар верирдиләр вә бу саһәдә бизә ҝөзәл нүмунә идиләр. Мисал үчүн, 1963-ҹү илдә онлар әшјаларынын чохуну сатмышдылар ки, Пасаденада (Калифорнија, АБШ) кечириләҹәк бејнәлхалг топлантыда иштирак едә билсинләр. 1972-ҹи илдә италјандилли саһәјә көмәк етмәк үчүн биздән тәхминән 1000 километр мәсафәдә јерләшән Трејлә (Британија Колумбијасы, Канада) көчдүк. Атам бир мағазада тәмизлик ишләри ҝөрүрдү. О, даһа чох пул газанмаг, даһа јахшы ишдә ишләмәк тәклифләри алса да, диггәтини руһани ишләрә ҹәмләмишди.

Валидејнләримин мәнә, гардашыма вә ики баҹыма гојдуғу нүмунәјә ҝөрә миннәтдарам. Онлар Јеһованын јолунда алдығым тәлимин тәмәлини гојдулар. Ашыладыглары бир шеј исә өмүрлүк јаддашыма һәкк олунду: Падшаһлығы биринҹи јерә гојсам, Јеһова гејдимә галаҹаг (Мәт. 6:33).

ТАМВАХТЛЫ ХИДМӘТИ ДАДМАҒА БАШЛАЈЫРАМ

Мән 1980-ҹи илдә руһани мәгсәдләри олан Деби адлы ҝөзәл бир мәсиһи илә аилә гурдум. Биз тамвахтлы хидмәтә башламаг истәјирдик. Деби тојумуздан үч ај сонра өнҹүл олду. Аилә гурандан бир ил сонра исә биз тәләбат олан кичик бир јығынҹаға кечдик вә мән дә Деби илә бирликдә өнҹүллүк етмәјә башладым.

 Бир мүддәт сонра севинҹимизи итирдик вә јығынҹағы дәјишмәк гәрарына ҝәлдик. Амма әввәлҹә бу һагда рајон нәзарәтчиси илә данышдыг. О, меһрибан, амма ачыг шәкилдә бизә деди: «Әслиндә, сиз өзүнүз вәзијјәтинизи чәтинләшдирирсиниз. Мәнфи шејләрә чох көкләнмисиниз, амма ахтарсаныз, мүсбәт чох шеј тапарсыныз». Бу, елә бизә лазым олан мәсләһәт иди (Зәб. 141:5). Дәрһал мәсләһәтә әмәл еләдик вә ҝөрдүк ки, доғрудан да, мүсбәт шејләр чох имиш. Јығынҹагда Јеһованын јолунда даһа чох иш ҝөрмәк истәјәнләр вар иди. Һәтта онлардан бәзиләри ушаглар вә әри һәгигәтдә олмајан баҹылар иди. Бу чох ваҹиб нәсиһәт иди. Биз мүсбәт шејләр ахтармағы вә чыхылмаз ҝөрүнән вәзијјәти Јеһованын өһдәсинә бурахмағы өјрәндик (Мик. 7:7). Беләҹә, јенидән севинҹ дујмаға башладыг вә һәр шеј өз јолуна дүшдү.

Илк өнҹүл мәктәбимиздәки мүәллимләр фәргли-фәргли өлкәләрдә хидмәт етмишдиләр. Онлар бизә шәкилләр ҝөстәрирдиләр, орада гаршылашдыглары чәтинликләрдән вә Јеһованын вердији немәтләрдән данышырдылар. Беләҹә, үрәјимиздә хүсуси тәјинатлы мүждәчи олмаг истәји јаранды вә бу хидмәт нөвүнү гаршымыза мәгсәд гојдуг.

Мәгсәдимизә доғру ирәлиләмәк үчүн биз 1984-ҹү илдә франсыздилли әрази олан Квебекә көчдүк. Ора Британија Колумбијасындан тәхминән 4000 километр узаглыгда јерләширди. Бу о демәк иди ки, биз јени дил өјрәнмәли вә јени мәдәнијјәтә ујғунлашмалы идик. Башга бир чәтинлијимиз дә вар иди. Адәтән пулумуз чох аз олурду. Һәтта бир ара једијимиз тәк картоф иди. Биз фермерләрдән иҹазә алыб саһәдә тәк-түк галан картофлары јығмагла доланырдыг. Деби фантазијасыны ишә салыб картофу һәр формада биширмишди. Бу чәтинликләрә севинҹлә дөзмәк үчүн әлимиздән ҝәләни едирдик. Јеһованын да гајғысыны өз үзәримиздә һисс едирдик (Зәб. 64:10).

Бир ҝүн ҝөзләнилмәз телефон зәнҝи ҝәлди. Биз Канада Бејтелиндә хидмәт етмәјә дәвәт олундуг. Артыг Ҝилад мәктәбинә әризә долдурдуғумуз үчүн бу хидмәтлә бағлы гарышыг һиссләр кечирирдик. Буна бахмајараг дәвәти гәбул еләдик. Ора чатанда филиал комитәсинин үзвү Кенет Литл гардашдан сорушдуг: «Бәс Ҝилад әризәмизин ахыры неҹә олаҹаг?» О деди ки, «чарығымызы чаја чатанда чыхарарыг».

 Бир һәфтә сонра ҝәлиб «чаја» чатдыг. Деби илә мәни Ҝилада дәвәт еләдиләр. Биз гәрар вермәли идик. Кенет гардаш бизә деди: «Һансы гәрары версәниз дә, бир ҝүн дејәҹәксиниз ки, каш о бирини сечәрдим. Демәк олмаз ки, бири о бириндән даһа јахшыдыр. Јеһова һәр ики сечиминизи аванд едә биләр». Биз Ҝилада дәвәти гәбул еләдик вә илләр әрзиндә онун сөзләринин һәгигәт олдуғуну ҝөрдүк. Бу сөзләри тәјинатлар арасында сечим етмәли олан баҹы-гардашлара да тез-тез ситат ҝәтирирдик.

ХҮСУСИ ТӘЈИНАТЛЫ МҮЖДӘЧИ ҺӘЈАТЫ

Ҝилад мәктәбинин 83-ҹү синфиндә охујан 24 шаҝирдин арасында олдуғумуза ҝөрә чох севинирдик. Мәктәб 1987-ҹи илин апрел ајында Бруклиндә (Нју-Јорк) башлады. Әсас мүәллимләримиз Улис Глас вә Ҹек Редфорд иди. Беш ај бир ҝөз гырпымында учуб ҝетди вә 1987-ҹи ил сентјабрын 6-да мәзун олдуг. Бизи Ҹон вә Мари Гудла бирликдә Һаитијә тәјин еләдиләр.

1962-ҹи илдә Һаитидәки сонунҹу хүсуси тәјинатлы мүждәчиләр депортасија олунандан бәри ора Ҝиладдан һеч кими тәјин етмирдиләр. Бурахылышымыздан үч һәфтә сонра биз Һаитидә уҹгар дағлыг әразидә хидмәт етмәјә башладыг. Јығынҹағымыз 35 тәблиғчидән ибарәт иди. Биз ҝәнҹ, тәҹрүбәсиз идик вә хүсуси тәјинатлы мүждәчиләр үчүн евдә тәк јашајырдыг. Буранын әһалиси јохсул иди, әксәријјәти охума-јазма билмирди. Һәмин дөврдә вәтәндаш иғтишашларынын, дөвләтдә чеврилиш ҹәһдләринин, јанан баррикадаларын вә сиклонларын шаһиди олдуг.

Һаитидәки дөзүмлү, севинҹ долу баҹы-гардашлардан өјрәниләси чох шеј вар иди. Әксәријјәтинин һәјаты ағыр олса да, Јеһованы вә хидмәти чох севирдиләр. Јығынҹағымыздакы јашлы  бир баҹы охумағы баҹармаса да, 150-јә јахын ајәни әзбәр билирди. Әразидәки вәзијјәти ҝөрдүкҹә бир даһа әмин олурдуг ки, инсанлара мүждә чатдырмалыјыг, Аллаһын Падшаһлығынын бәшәријјәтин проблемләринин јеҝанә һәлл јолу олдуғуну демәлијик. Мүгәддәс Китаб дәрси кечдијимиз инсанлардан бәзиләринин сонралар өнҹүл, хүсуси өнҹүл, ағсаггал олдуғуну ҝөрәндә үрәјимиз фәрәһлә долурду.

Һаитидә оланда Тревор адлы ҝәнҹ бир мормон миссионери илә таныш олмушдум. Онунла бир нечә дәфә Мүгәддәс Китаб һагда сөһбәт етмәк имканымыз олмушду. Илләр сонра ондан ҝөзләмәдијим бир мәктуб алдым. О јазмышды: «Мән нөвбәти топлантыда вәфтиз олунмаға һазырлашырам. Истәјирәм, Һаитидә мормон миссионери кими хидмәт еләдијим әразијә хүсуси өнҹүл кими гајыдым». О белә дә етди. Узун илләр јолдашы илә бирликдә һәмин әразидә хидмәт етди.

АВРОПА, СОНРА ИСӘ АФРИКА

Биз Авропанын бир әразисинә тәјин олундуг. Бурада тәблиғ ишинә гојулмуш гадағалар арадан галдырылырды. 1992-ҹи илдә биз Лүблјанаја (Словенија) ҝәлиб чатдыг. Бура валидејнләримин Италијаја көчмәздән әввәл јашадыглары әразијә јахын иди. Кечмиш Југославија әразиләриндә һәлә дә мүһарибә ҝедирди. Вјанадакы филиал (Австрија), һәмчинин Загреб (Хорватија) вә Белграддакы (Сербија) офисләр һәмин бөлҝәдәки тәблиғ ишинә нәзарәт едирди. Артыг һәр мүстәгил өлкәнин өз Бејтел бинасы олаҹагды.

Бу исә о демәк иди ки, биз јени дилә вә јени мәдәнијјәтә өјрәшмәли идик. Буранын сакинләри адәтән белә дејирди: «Jezik je težek» (језик је тезик), јәни «дилимиз чәтин дилдир». Доғрудан да, белә иди! Биз тәшкилатдакы дәјишикликләри ҹанла-башла гәбул едән баҹы-гардашларын сәдагәтинә һејран идик. Јеһованын онлара неҹә дәстәк олдуғуну ҝөрүрдүк. Бир даһа шаһиди олдуг ки, Јеһова һәр шеји мәһәббәтлә јолуна гојур вә буну вахтында едир. Словенијада хидмәт еләдијимиз илләр әрзиндә өзүмүз үчүн чох шеј өјрәндик. Һәмчинин бундан әввәл өјрәндијимиз дәрсләр сајәсиндә бурадакы чәтинликләрә таб ҝәтирә билдик.

 Тәјинатымыздакы дәјишикликләр бунунла битмәди. 2000-ҹи илдә биз гәрби Африкаја, Кот-д’Ивуара тәјин олундуг. Сонра 2002-ҹи илин нојабрында вәтәндаш мүһарибәсинә ҝөрә Сјерра-Леонејә тәхлијә едилдик. Орада 11 ил давам едән вәтәндаш мүһарибәси јениҹә битмишди. Кот-д’Ивуары белә гәфил тәрк етмәк чох чәтин иди. Амма әввәл өјрәндијимиз дәрсләр сајәсиндә севинҹимизи горуја билдик.

Бурада һәгигәтә мараг ҝөстәрән инсанларын сајы чох иди. Фикримизи буна вә илләрлә мүһарибә шәраитиндә јашамыш баҹы-гардашларымызын ҝөстәрдији мәһәббәтә вә имана ҹәмләдик. Онлар нә гәдәр касыб олсалар да, бир о гәдәр әлиачыг идиләр. Бир баҹы Дебијә палтар вермәк истәјирди. Әввәл-әввәл Деби ҝөтүрмәк истәмәди. Амма баҹы тәкид едиб деди: «Мүһарибә вахты башга өлкәдәки баҹы-гардашлар бизә әл тутурдулар. Инди исә бизим нөвбәмиздир». Онлардан нүмунә ҝөтүрмәји гаршымыза мәгсәд гојдуг.

Бир мүддәт сонра Кот-д’Ивуара ҝери гајытдыг. Амма өлкәдәки сијаси ҝәрҝинлик јенидән чахнашмалара сәбәб олду. Буна ҝөрә дә 2004-ҹү илин нојабрында һеликоптерлә өлкәдән тәхлијә едилдик. Һәрәмиз өзүмүзлә ҹәми 10 килолуг чанта ҝөтүрә билдик. Ҝеҹәни франсыз һәрби базасынын дөшәмәсиндә јатдыг. Сәһәриси ҝүн исә бизи Исвечрәјә ҝөндәрдиләр. Филиала ҝеҹәјарысы чатдыг. Филиал комитәси вә Хидмәти Тәкмилләшдирмә Мәктәбинин мүәллимләри јолдашлары илә бирҝә бизи чох меһрибан гаршыладылар, гуҹагладылар, исти јемәк ҝәтирдиләр вә чохлу Исвечрә шоколады вердиләр. Бу ҹүр мәһәббәти ҝөрмәк чох хош олду.

Биз мүвәггәти олараг Ганаја тәјин олундуг. Даһа сонра вәтәндаш иғтишашлары сәнҝијәндә Кот-д’Ивуара ҝери гајытдыг. Тәшвишлә тәхлијә олундуғумуз вахтларда вә мүвәггәти тәјинатларымыз боју баҹы-гардашларын хејирхаһлығыны чох ҝөрдүк. Бу ҹүр гардашлыг мәһәббәти Јеһованын тәшкилатына хас олса да, Деби илә данышдыг ки, буна һеч вахт ади бир шеј кими јанашмајаг. Инди баша дүшүрүк ки, әслиндә һәјатымызын ән кешмәкешли дөнәмләриндә олдугҹа ваҹиб дәрсләр өјрәнмишик.

ЈАХЫН ШӘРГӘ ҜЕДИРИК

2006-ҹы илдә Баш идарәдән алдығымыз мәктубда дејилирди ки, биз Јахын Шәргә тәјин олунуруг. Бу о демәк иди ки, бизи јени маҹәралар, чәтинликләр, мүхтәлиф дилләр вә мәдәнијјәтләр ҝөзләјирди. Бура сијаси вә дини ҹәһәтдән чохлу проблемләрин олдуғу әрази иди. Амма јенә дә өјрәндијимиз чох шеј олду. Јығынҹагларда баҹы-гардашлар фәргли-фәргли дилләрдә данышсалар да, теократик ҝөстәришләрә әмәл етмәјин сајәсиндә араларында бирлик вар иди. Буну ҝөрмәк чох хош иди. Биз баҹы-гардашларла фәхр едирдик, чүнки онлар аилә үзвләринин, синиф јолдашларынын, иш јолдашларынын вә гоншуларынын тәгибләринә ҹәсарәтлә синә ҝәрирдиләр.

Биз 2012-ҹи илдә Тәл-Әвивдә (Исраил) кечирилән хүсуси топлантыда иштирак етдик. Ерамызын 33-ҹү илинин Әллинҹи ҝүн бајрамындан бәри илк дәфә иди ки, Јеһованын халгындан олан бу гәдәр сајда инсан бу әразидә бир јерә топлашмышды. Бу, һәгигәтән дә унудулмаз һадисә иди!

Һәмин илләр әрзиндә биз тәблиғ ишимизин гадаған олундуғу өлкәләрә ҝедирдик. Ора бәзи нәшрләр апарырдыг, саһә хидмәтинә чыхырдыг вә кичик мигјасда кечирилән рајон топлантыларында  иштирак едирдик. Һәр тәрәфдә силаһлы әсҝәрләр вә јохланыш мәнтәгәләри вар иди. Амма биз еһтијатлы шәкилдә бир нечә тәблиғчи илә ҝетдијимиз үчүн өзүмүзү тәһлүкәсизликдә һисс едирдик.

АФРИКАЈА ГАЈЫДЫРЫГ

2013-ҹү илдә биз фәргли тәјинат алдыг — Киншасадакы (Конго) филиала тәјин олундуг. Бу өлкә ҝөзәл тәбиәти илә зәнҝин олса да, бурада кәскин јохсуллуг вар иди вә тез-тез силаһлы мүнагишәләр баш галдырырды. Ора тәјинат аланда белә дүшүндүк: «Биз Африканы јахшы таныјырыг, бизә чәтин олмајаҹаг». Сән демә, һәлә өјрәнмәли олдуғумуз чох шеј вар имиш. Мәсәлән, бу өлкәдә инфраструктур чох зәиф олдуғу үчүн сәјаһәт етмәк чәтин иди. Амма фикримизи ҹәмләјә биләҹәк мүсбәт шејләр дә тапдыг. Баҹы-гардашлар игтисади чәтинликләрә бахмајараг, севинҹләрини горујурдулар, дөзүм ҝөстәрирдиләр. Онлар хидмәти чох севирдиләр, јығынҹагларда, топлантыларда иштирак етмәк үчүн сәј ҝөстәрирдиләр. Падшаһлыг ишинин ирәли ҝетдији ҝөз габағында иди. Бу исә јалныз Јеһованын көмәји сајәсиндә мүмкүн олду. Конгода тамвахтлы хидмәтдә кечән илләр бизә чох шеј өјрәтди вә јени достлар газандырды.

2017-ҹи илин сонларында биз јени бир тәјинат алдыг. Бу дәфә Ҹәнуби Африкаја тәјин олундуг. Бу, хидмәт етдијимиз ән бөјүк филиалдыр. Бејтелдә ҝөрдүјүмүз иш дә бизим үчүн јени иди. Һәмишә олдуғу кими өјрәниләси чох шеј вар иди. Амма әввәл өјрәндијимиз дәрсләрин бизә бөјүк көмәји дәјди. Бурада онилликләр әрзиндә дөзүм ҝөстәрән чохлу баҹы-гардашымыз хидмәт едир, онлары үрәкдән севирик. Бејтелдә ирги вә милли мүхтәлифлијә бахмајараг, бирлик һөкм сүрүр. Буну ҝөрмәк мөһтәшәм һиссдир. Јеһованын халгы јени шәхсијјәтә бүрүндүјү вә Мүгәддәс Китаб принсипләринә әмәл етдији үчүн онлара сүлһ бәхш етдији ҝөз габағындадыр.

Илләр әрзиндә Деби илә мән бир-бириндән мараглы тәјинатлар алмышыг, фәргли мәдәнијјәтләрә ујғунлашмышыг вә јени дилләр өјрәнмишик. Бу, һәмишә асан олмајыб, амма Јеһованын бизә Өз тәшкилаты вә баҹы-гардашлар васитәсилә мәһәббәт ҝөстәрдијини даима һисс етмишик (Зәб. 144:2). Тамвахтлы хидмәт боју өјрәндикләримиз бизә Јеһованын даһа јахшы хидмәтчиләри олмаға көмәк едиб.

Валидејнләримин вердији тәрбијәни, әзиз һәјат јолдашым Дебинин дәстәјини вә бүтүн дүнјадакы баҹы-гардашларын гојдуғу ҝөзәл нүмунәни чох гијмәтләндирирәм. Биз өмрүмүзүн галаныны да Бөјүк Нәсиһәтчимиз Јеһованын өјүдләри илә кечирмәк нијјәтиндәјик.