1, 2. а) Чәтинликләрлә үзләшәндә тәк олмадығымыза нәјә ҝөрә әмин ола биләрик? б) Бу мәгаләдә нәдән данышаҹағыг?

 ЧӘТИНЛИКЛӘРЛӘ үзләшәндә өзүмүзү санки фыртыналы дәнизин ортасында балаҹа бир гајыгда һисс едирик. Амма бу заман унутмамалыјыг ки, биз тәк дејилик. Сәмави Атамыз нәинки бизим вәзијјәтимизи ҝөрүр, һәтта она таб ҝәтирмәјә көмәк едәҹәјинә дә сөз верир. Јеһова садиг бәндәләрини архајын етмәк үчүн белә дејир: «Сәнә көмәк едәҹәјәм» (Әшј. 41:10).

² Бу мәгаләдә Јеһованын гејдимизә галдығы дөрд үсулдан данышаҹағыг. Јеһова 1) бизә јол ҝөстәрир, 2) еһтијаҹларымызы тәмин едир, 3) бизи һифз едир, 4) бизә тәсәлли верир. О сөз верир ки, һәјатда чәтинликләрлә үзләшсәк дә, бизи һеч вахт унутмајаҹаг, һеч вахт тәрк етмәјәҹәк. Она ҝөрә дә һеч вахт тәнһа галдығымызы дүшүнмәмәлијик.

ЈЕҺОВА БИЗӘ ЈОЛ ҜӨСТӘРИР

3, 4. Јеһова бизә неҹә јол ҝөстәрир? (Зәбур 48:14).

³ Зәбур 48:14 ајәсини охујун. Јеһова билир ки, биз инсанларын Онун рәһбәрлијинә еһтијаҹы вар. О бу ҝүн садиг бәндәләринә неҹә јол ҝөстәрир? Мәсәлән, Јеһова буну Өз Кәламы васитәсилә едир (Зәб. 119:105). Бизә дүзҝүн гәрарлар вермәјә вә јахшы кејфијјәтләрә јијәләнмәјә көмәк едир. Бунун сајәсиндә бу ҝүн биз даһа хошбәхтик вә әбәди һәјат үмидинә саһибик a. Һәмчинин О бизә кин сахламамағы,  һәр ишимиздә дүрүст олмағы вә башгаларыны үрәкдән севмәји өјрәдир (Зәб. 37:8; Ибр. 13:18; 1 Бут. 1:22). Бу илаһи кејфијјәтләри тәзаһүр етдирәндә биз даһа јахшы валидејн, даһа јахшы һәјат јолдашы вә даһа јахшы дост олуруг.

⁴ Һәмчинин Мүгәддәс Китабда ҝерчәк һәјат һекајәләри јазылыб. О инсанлар да бизим кими чәтинликләрлә үзләшибләр, бизим кечирдијимиз һиссләри кечирибләр (1 Кор. 10:13; Јаг. 5:17). Бу һадисәләри охујанда вә өјрәндикләримизи һәјатымызда тәтбиг едәндә, ән азы, ики фајдасыны ҝөрүрүк. Биринҹиси, баша дүшүрүк ки, һәјатда чәтинликләрлә үзләшән јалныз биз дејилик. Башгалары да охшар чәтинликләрлә үзләшиб вә Јеһова онлара дөзмәјә көмәк едиб (1 Бут. 5:9). Икинҹиси, чәтинликләрә синә ҝәрмәји вә севинҹимизи итирмәмәји өјрәнирик (Ром. 15:4).

5. Јеһова кимләр васитәсилә бизә јол ҝөстәрир?

⁵ Јеһова баҹы-гардашларымыз васитәсилә дә бизә јол ҝөстәрир b. Мәсәлән, рајон нәзарәтчиләри баҹы-гардашлары руһландырмаг үчүн мүтәмади олараг јығынҹаглары зијарәт едирләр. Онларын нитгләри бизим иманымызы мөһкәмләндирир вә арамыздакы бирлији горумаға көмәк едир (Һәв. 15:40—16:5). Јығынҹагдакы ағсаггаллар да һәр бир тәблиғчи илә ајры-ајрылыгда марагланыр вә көмәк әли узадырлар (1 Бут. 5:2, 3). Валидејнләр өвладларына Јеһованы севмәјә, мүдрик гәрарлар вермәјә, әдәб-әрканлы олмаға вә руһани вәрдишләрә јијәләнмәјә көмәк едирләр (Мәс. 22:6). Јеткин мәсиһи баҹылар да ҝәнҹ баҹылара јахшы өрнәк олурлар. Онлара практики мәсләһәтләр верирләр вә онлары руһландырырлар (Тит. 2:3—5).

6. Јеһованын ҝөстәрдији јолла ҝетмәк үчүн нә етмәлијик?

⁶ Јеһова бизә јол ҝөстәрмәк үчүн Өз тәрәфиндән нә лазымдырса, едиб. Бәс биз бунун гаршылығында Јеһоваја миннәтдар олдуғумузу неҹә ҝөстәрә биләрик? Мәсәлләр 3:5, 6 ајәсиндә белә јазылыб: «Бүтүн гәлбинлә Јеһоваја етибар ет, өз ағлына ҝүвәнмә». Бу мәсләһәтә әмәл етсәк, О, јолларымызы рәван едәҹәк. Башга сөзлә десәк, бир чох проблемләрдән јан кечмәјә вә хошбәхт өмүр сүрмәјә көмәк едәҹәк. Шүкүрләр олсун ки, Јеһова һәр биримизә вәзијјәтимизә ујғун мәсләһәтләр верир (Зәб. 32:8).

ЈЕҺОВА ЕҺТИЈАҸЛАРЫМЫЗЫ ТӘМИН ЕДИР

7. Јеһова башга һансы тәләбатларымызын гејдинә галыр? (Филиппилиләрә 4:19).

⁷ Филиппилиләрә 4:19 ајәсини охујун. Руһани ҹәһәтдән гејдимизә галмагла јанашы, Јеһова бизә физики тәләбатларымызы да өдәмәјә көмәк едир. Өзүмүзү јемәклә, ҝејимлә, евлә тәмин етмәк үчүн чәкдијимиз зәһмәтә бәрәкәт верир (Мәт. 6:33; 2 Салон. 3:12). Физики тәләбатларымыза ҝөрә нараһат олмаг тәбии һалдыр. Амма Јеһова бунлара ҝөрә чох фикир чәкмәјимизи истәмир (Мәт. 6:25). Нијә? Чүнки Јараданымыз садиг бәндәләрини дар ҝүндә тәк гојмур (Мәт. 6:8; Ибр. 13:5). Биз Онун гајғымыза галаҹағына даир вердији сөзә там етибар едә биләрик.

8. Јеһова Давуд үчүн нә етмишди?

⁸ Јеһованын Давуда көмәк етмәси барәдә дүшүнүн: Давуд гачаг һәјаты јашадығы дөврдә Јеһова она вә јолдашларына сағ галмалары үчүн лазым олан һәр шеји јетирмишди. О, чәтин дөнәмләриндә  Јеһованын гајғысыны ҝөрүб белә јазмышды: «Ҹаванлығымдан бәри, бу гоҹа јашымадәк, нә салеһ адамын атылдығыны, нә дә өвладларынын чөрәк диләндијини ҝөрмәмишәм» (Зәб. 37:25). Јәгин ки, сиз дә Давуд кими, өз һәјатынызда, баҹы-гардашларын һәјатында Јеһованын садиг бәндәләринә дајаг олдуғунун шаһиди олмусунуз.

9. Тәбии фәлакәтләр вахты Јеһова халгынын еһтијаҹларыны неҹә тәмин едир? (Һәмчинин шәкилләрә бахын.)

⁹ Јеһова тәбии фәлакәтләр вахты да халгына дајаг олур. Мәсәлән, биринҹи әсрдә Јерусәлимдә аҹлыг баш галдыранда мүхтәлиф өлкәләрдә јашајан мәсиһиләр орадакы диндашларына јардым ҝөндәрмишдиләр (Һәв. 11:27—30; Ром. 15:25, 26). Аллаһын халгы бу ҝүн дә ејни әһвали-руһијјәдәдир. Тәбии фәлакәт баш верәндә Јеһова халгыны тәшвиг едир ки, һәмин әразидәки диндашларынын јемәк, су, палтар, дәрман кими еһтијаҹларыны өдәсин. Тикинти бригадалары зәрәр дәјмиш евләри вә ибадәт евләрини тәмир едир. Һәмчинин ев-ешикләрини, јахуд әзизләрини итирмиш баҹы-гардашларымыза тез бир заманда руһани вә емосионал ҹәһәтдән көмәк ҝөстәрилир c.

10, 11. Борисин һадисәси бизә нә дејир?

¹⁰ Јеһова Она ибадәт етмәјән кәсләрә дә сәхавәт ҝөстәрир. Ондан өрнәк ҝөтүрән бизләр дә иманымыза шәрик олмајан инсанлара хејирхаһлыг ҝөстәририк (Гал. 6:10). Бунун сајәсиндә ҝөзәл шаһидлик вермиш олуруг. Ҝәлин Украјнада јашајан Борис мүәллимин һадисәсинә бахаг. О, мәктәб директору иди вә Јеһованын  Шаһиди олан шаҝирдләрлә һәмишә меһрибан давранырды вә онларын әгидәләринә һөрмәтлә јанашырды. Борисин јашадығы әразидә мүһарибә ҝетдији үчүн о, өлкәнин даһа тәһлүкәсиз әразисинә гачмаг гәрарына ҝәлир. Һәмин вахт гардашлар она чох көмәк едир. Сонрадан Борис Иса Мәсиһин өлүмүнү анма мәрасиминдә иштирак едир. Гардашларын она ҝөстәрдикләри көмәклә бағлы о дејир: «Јеһованын Шаһидләри мәнә гаршы чох меһрибан, чох диггәтҹил идиләр. Онлар мәнә гајғы ҝөстәрдиләр. Онлара чох миннәтдарам».

¹¹ Биз дә мәрһәмәтли Атамыз Јеһовадан өрнәк ҝөтүрүб мәсиһи олуб-олмамасындан асылы олмајараг, еһтијаҹ ичиндә олан инсанлара мәһәббәт ҝөстәрә биләрик (Лука 6:31, 36). Үмид едирик ки, инсанлара ҝөстәрдијимиз мәһәббәт бәһрәсиз галмајаҹаг (1 Бут. 2:12). Бир ҝүн онлар да Мәсиһин шаҝирдләри олаҹаглар. Нәтиҹә һәр неҹә олса да, биз истәнилән һалда, вермәјин ҝәтирдији бөјүк хошбәхтлији дадаҹағыг (Һәв. 20:35).

ЈЕҺОВА БИЗИ ҺИФЗ ЕДИР

12. Јеһова Өз халгыны бир груп һалында неҹә горујаҹаг? (Зәбур 91:1, 2, 14).

¹² Зәбур 91:1, 2, 14 ајәләрини охујун. Бу ҝүн Јеһова бизә сөз верир ки, бизи руһани зәрәрләрдән горујаҹаг. О, һеч вахт јол вермәјәҹәк ки, Шејтан пак ибадәти ләкәләсин (Јәһ. 17:15). «Бөјүк мүсибәт» башлајанда там әмин ола биләрик ки, Јеһова сөз вердији кими, Өз халгына һәм руһани, һәм дә физики ҹәһәтдән сипәр олаҹаг (Вәһј 7:9, 14).

13. Јеһова бизи фәрди шәкилдә неҹә горујур?

¹³ Јеһова бизи фәрди шәкилдә неҹә горујур? Өз Кәламы васитәсилә Јеһова бизә дүзү сәһвдән ајырмаға көмәк едир (Ибр. 5:14). Аллаһын Кәламындакы принсипләрә ујғун јашајанда өзүмүзү һәм руһани, һәм дә физики зәрәрләрдән горумуш олуруг (Зәб. 91:4). Һәмчинин Јеһова бизи јығынҹаг васитәсилә дә горујур (Әшј. 32:1, 2). Јеһованы севән вә Онун принсипләринә ујғун јашајан инсанларла әһатә олунанда биз руһланырыг вә пис тәсирләрә дүшмәмәк үчүн өзүмүздә ҝүҹ тапырыг (Мәс. 13:20).

14. а) Јеһова нәјә ҝөрә бәзән чәтинликләрлә үзләшмәјимизә изин верир? б) Зәбур 9:10 ајәси бизи нәјә әмин едир? (Һәмчинин һашијәјә бахын.)

¹⁴ Кечмишдә Јеһованын Өз халгыны физики зәрәрләрдән горудуғу вахтлар олуб. Амма О, һәмишә белә етмәјиб. Бәзән биз вахт вә тәсадүфүн гурбаны олуруг (Ваиз 9:11). Шејтанын јаланчы олдуғуну сүбут етмәк үчүн Јеһова тарих бојунҹа бәзи хидмәтчиләринин тәгиб олунмасына вә һәтта өлмәсинә изин вериб (Әјј. 2:4—6; Мәт. 24:9). Кечмишдә олдуғу кими, бу ҝүн дә белә шејләр баш верә биләр. Јеһова чәтинликләримизи арадан галдырмаса да, бир шејә әмин ола биләрик ки, Ону севәнләри һеч вахт тәк гојмајаҹаг d (Зәб. 9:10).

ЈЕҺОВА БИЗӘ ТӘСӘЛЛИ ВЕРИР

15. Дуа, Аллаһын Кәламы вә диндашларымыз васитәсилә неҹә тәсәлли алырыг? (2 Коринфлиләрә 1:3, 4).

¹⁵ 2 Коринфлиләрә 1:3, 4 ајәләрини охујун. Бәзән кәдәрли анларымыз, нараһатлыг, стрес кечирдијимиз ҝүнләр олур. Бәлкә дә, һал-һазырда елә бир чәтин дөврдән кечирсиниз ки, өзүнүзү тәнһа һисс едирсиниз. Ҝөрәсән, сизи баша дүшән вар? Бәли, вар, Јеһова. О нәинки сизин ағрынызы дујур, һәтта һәр дәрдиниздә сизә «тәсәлли верир».  Биз дуа едиб Јеһоваја јалваранда О бизә «һәр бир ағылдан үстүн олан сүлһү» верир (Филип. 4:6, 7). Һәмчинин Мүгәддәс Китабы охујанда да тәсәлли тапырыг. Бу китаб васитәсилә Јеһова бизимлә данышыр, мәһәббәтини әјан едир, һикмәтли олмағы өјрәдир, үмид верир. Бунун сајәсиндә руһумуз дирчәлир, еләҹә дә, ибадәт ҝөрүшләриндә тәсәлли тапырыг. Орада Мүгәддәс Китабдан өјрәндијимиз биликләр бизи руһландырыр, диндашларымызын мәһәббәтини дујуруг.

16. Нејтанла Присиланын һадисәсиндән нә өјрәнирсиниз?

¹⁶ Бирләшмиш Штатларда јашајан Нејтан вә Присиланын һадисәси Јеһованын Кәламы васитәсилә бизә тәсәлли вә ҹәсарәт вермәсинә даир бир нүмунәдир. Бир нечә ил бундан әввәл онлар гәрар вердиләр ки, тәблиғчиләрә тәләбат олан әразијә көчсүнләр. Нејтан дејир: «Биз әмин идик ки, Јеһова гәрарымыза хејир-бәрәкәт верәҹәк». Амма онлар јени әразијә көчән кими мадди чәтинликләрлә үзләширләр. Үстәлик, сәһһәтләриндә дә проблемләр јараныр. Онлар мәҹбур галыб ҝери гајытсалар да, мадди ҹәһәтдән һәлә дә корлуг чәкирдиләр. Нејтан дејир: «Дүшүнүрдүм ки, ҝөрәсән, нијә Јеһова ҝөзләдијимиз көмәји етмәди. Һәтта мәнә елә ҝәлирди ки, нәјисә сәһв етмишәм». Амма заманла Нејтанла Присила баша дүшдүләр ки, дар ҝүнләриндә Јеһова онлары тәрк етмәмишди. Нејтан гејд едир: «Һәмин чәтин дөнәмләрдә Мүгәддәс Китаб бизи руһландыран, бизә јол ҝөстәрән мүдрик бир дост олду. Диггәтимизи үзләшдијимиз чәтинликләрә јох, онлара дөзмәк үчүн Јеһованын бизә неҹә көмәк етдијинә ҹәмләмәк бизи ҝәләҹәкдә үзләшәҹәјимиз чәтинликләрә һазырлады».

17. Һелга неҹә тәсәлли тапды? (Һәмчинин шәклә бахын.)

¹⁷ Баҹы-гардашларымыз да бизә тәсәлли верә биләр. Неҹә? Ҝәлин Маҹарыстанда јашајан Һелганын һадисәсинә бахаг. О, узун илләр чохлу чәтинликләрлә үзләшиб.  Чәкдији әзаб-әзијјәтләрә ҝөрә өзүнү дәјәрсиз, начар һисс едирди. Амма кечмишә баханда о баша дүшүр ки, Јеһова она јығынҹаг васитәсилә тәсәлли вериб. Һелга дејир: «Ишләмәк, хәстә балама бахмаг вә диҝәр чәтинликләр бәзән мәни әлдән салырды. Белә анларда Јеһова һәмишә мәнә дајаг олуб. Бу отуз ил әрзиндә елә бир ҝүн олмајыб ки, Јеһова сөзүнүн үстүндә дурмасын, мәнә тәсәлли вермәсин. О мәни баҹы-гардашларын хош, севҝи вә гајғы долу сөзләри илә мөһкәмләндирир. Ән чох еһтијаҹ дујдуғум анда онлар мәнә месаж, ачыгҹа јазырлар, мәни тәрифләјирләр».

18. Башгаларына неҹә тәсәлли верә биләрик?

¹⁸ Бизим Јеһовадан өрнәк ҝөтүрүб башгаларына тәсәлли вермәк имканымыз вар. Буну неҹә едә биләрик? Биз онлары сәбирлә динләјә, тәскинлик верән сөзләр дејә вә әмәли көмәк ҝөстәрә биләрик (Мәс. 3:27). Әзаб-әзијјәт чәкән һәр кәсә, һәтта Јеһоваја ибадәт етмәјән инсанлара да тәсәлли вермәјә ҹан атмалыјыг. Јахынларымыз кәдәр ичиндә оланда, хәстәләнәндә вә ја нараһатлыг кечирәндә биз онларын јанына ҝедирик, онлары сәбирлә динләјирик вә Мүгәддәс Китабдан руһландырыҹы ајәләр бөлүшүрүк. «Һәр ҹүр тәсәлли Аллаһы» олан Јеһовадан өрнәк ҝөтүрмәклә биз нәинки диндашларымыза чәтинликләрә дөзмәјә көмәк едәҹәјик, һәмчинин, ола билсин, Аллаһа ибадәт етмәјән инсанларда Ону танымаг истәји ојадаҹағыг (Мәт. 5:16).

ЈЕҺОВАНЫН ӘЛИ ҺӘМИШӘ ҮСТҮМҮЗДӘ ОЛАҸАГ

19. Јеһова бизим үчүн нәләр едир вә биз Ондан неҹә өрнәк ҝөтүрә биләрик?

¹⁹ Јеһова Ону севән бүтүн инсанларын гајғысына галыр. Дар ҝүнүмүздә О бизи тәрк етмир. Өвладынын гајғысына галан валидејн кими садиг хидмәтчиләринин гајғысына галыр. О бизә јол ҝөстәрир, еһтијаҹларымызы тәмин едир, бизи һифз едир вә бизә тәсәлли верир. Инсанлара чәтин вахтларында тәсәлли вериб руһландырмагла сәмави Атамыздан өрнәк ҝөтүрүрүк. Чәтинликләр, дәрд-бәлалар јолумуза чыха биләр. Амма әмин ола биләрик ки, Јеһова һәмишә бизимләдир. О бизә белә бир вәд вериб: «Горхма, Мән сәнинләјәм» (Әшј. 41:10). Биз там әмин ола биләрик ки, һеч вахт тәк дејилик.