Фелиса: Бизим аиләмиз чох диндар аилә иди. Гоһумларымызын ичиндә 13 нәфәрдән кимиси кешиш, кимиси Католик орденинин үзвү иди. Анамын халасы оғлу католик мәктәбиндә дәрс дејән кешиш иди. Һәтта Папа II Иоһан Павел ону «мүгәддәс» елан етмәји төвсијә етмишди. Бизим аиләмиз исә садә аилә иди. Атам мисҝәр иди, анам тарлада ишләјирди. Аиләдә 8 ушағын ичиндә ән бөјүјү мән идим.

12 јашым оланда Испанија Вәтәндаш мүһарибәси башлады. Мүһарибәдән сонра атам һәбс олунду. Онун либерал фикирләри диктатор һөкумәтинә хош ҝәлмирди. Анам аиләни доландырмаг үчүн дишијлә-дырнағыјла чөрәк газанырды. Буна ҝөрә дә рәфигәси мәсләһәт ҝөрдү ки, мәндән кичик үч баҹымы — Араселини, Лаурини вә Рамонини Испанијанын Билбао шәһәриндәки гадын монастырына ҝөндәрсин. Орада онлар һеч олмаса аҹындан өлмәјәҹәкдиләр.

Арасели: Һәмин вахт мәним 14, Лауринин 12, Рамонинин исә 10 јашы вар иди. Евдән ајрылмаг чох чәтин иди. Биз Билбаода тәмизлик ишләри ҝөрүрдүк. Ики ил сонра раһибәләр бизи Зарагозада гоҹалара гуллуг едилән бөјүк монастыра көчүртдүләр. Бизим ишимиз мәтбәхи тәмизләмәк иди. Бу иш јенијетмә үчүн чох ағыр иш иди.

Фелиса: Баҹыларым Зарагозаја ҝедәндә анам вә јашадығымыз јердә кешиш кими хидмәт едән дајым гәрара ҝәлди ки, мән дә ҝедиб һәмин монастырда ишләјим. Онлар фикирләширдиләр ки, ора ҝетсәм, мәндән хошу ҝәлән оғландан узаг оларам. Мән чох диндар гыз идим. Буна ҝөрә дә мүвәггәти олараг  монастырда галмаг фикри хошума ҝәлди. Мән һәр ҝүн мессада иштирак едирдим вә һәтта Африкада раһиб кими хидмәт едән халам оғлу кими миссионер олмағы фикирләширдим.

Раһибәләр мәним башга өлкәләрдә Аллаһа хидмәт етмәк истәјимә биҝанә јанашырдылар. Монастыр мәнә һәбсхана кими ҝәлирди. Буна ҝөрә дә бир илдән сонра мән евә гајыдыб кешиш олан дајыма бахмаг гәрарына ҝәлдим. Мән евин ишини ҝөрүрдүм, һәр ахшам дајымла бирҝә тәсбеһ чевирә-чевирә дуа охујурдум. Бакирә Мәрјәмин вә диҝәр «мүгәддәс»ләрин сурәтләрини сәлигәјә салыб бәзәмәји хошлајырдым.

Арасели: Монастырда бизим һәјатымыз дәјишди. Биринҹи дәфә анд ичәндән сонра раһибәләр бизи бир-биримиздән ајырдылар. Рамони Зарагозада галды, Лаурини Валенсијаја, мәни исә Мадридә ҝөндәрдиләр. Орада икинҹи дәфә анд ичдим. Мадрид монастырында тәләбәләр, гоҹалар галырды вә чохлу гонаглар ҝеҹәләјирди. Буна ҝөрә дә иш башымыздан ашырды. Мән монастырын хәстәханасында ишләјирдим.

Сөзүн ачығы һәмишә фикирләширдим ки, раһибә һәјаты мараглы олаҹаг. Дүшүнүрдүм ки, Мүгәддәс Китабы охујуб баша дүшәҹәјәм. Амма һеч ким нә Аллаһын, нә дә Исанын адыны дилинә ҝәтирмирди. Биз Мүгәддәс Китабын үзүнү дә ачмырдыг. Мәнә бир аз латын дилини кечдиләр. Сонра исә «мүгәддәс»ләрин һәјатыны өјрәнирдим, Мәрјәмә ибадәт едирдим. Галан вахтларда тәр төкә-төкә ишләјирдик.

Мән артыг нараһат олмаға башламышдым. Буна ҝөрә дә баш раһибә илә сөһбәт етдим. Она дедим ки, бурада галмағымда бир мәна ҝөрмүрәм. Мән бурада ҹаным чыха-чыха ишләјирәм, кимләрсә ҹибини долдурур, һалбуки аиләм орада мәним көмәјимә мөһтаҹдыр. О, мәни һүҹрәјә салыб гапыны гыфыллады. Үмид едирди ки, фикрими дәјишиб монастырда галарам.

Үч дәфә раһибәләр мәни һүҹрәдән бурахдылар. Онлар билмәк истәјирдиләр ки, мән һәлә дә ҝетмәк истәјирәм, ја јох. Фикримдән дөнмәдијими ҝөрәндә дедиләр ки, јазылы шәкилдә белә бир бәјанат верим: «Мән Аллаһа јох, Шејтана хидмәт етмәк истәдијим үчүн монастырдан ҝедирәм». Буну ешидәндә сарсылдым. Монастырдан чыхыб ҝетмәји чох арзуласам да, һеч вахт бу сөзләри јаза билмәздим. Ахырда хаһиш етдим ки, бир кешиш ҝәлсин. Баш верәнләри она данышдым. О, јепископун табелијиндә олан әјаләтин кешишләри илә мәним мәсәләми мүзакирә етди вә мәни Зарагозаја әввәлки монастыра ҝөндәрдиләр. Бир нечә ајдан сонра мәнә чыхыб ҝетмәјә иҹазә вердиләр. Тезликлә Лаури вә Рамони дә монастыры тәрк етдиләр.

Фелиса: Сонралар мән аилә гуруб Кантабријаја көчдүм. Мән јенә дә һәр һәфтә мессаја ҝедирдим. Бир базар ҝүнү кешиш күрсүдән гәрибә бир елан етди. О, «Әбәди һәјата апаран һәгигәт» китабыны ҝөстәрәрәк гәзәблә гышгырды: «Бу китабы ҝөрүрсүнүз? Әҝәр кимсә сизә бу китабдан верибсә, ону ја мәнә верин, ја да атын».

Мәндә о китабдан јох иди. Амма кешишин сөзләриндән сонра о китабы охумаг истәдим. Иш елә ҝәтирди ки, бир нечә ҝүндән сонра ики Шаһид гапыны дөјүб мәнә һәмин «гадаған олунмуш» китабы тәклиф етди. Бир ҝеҹәјә китабы охујуб гуртардым. Гадынлар нөвбәти дәфә ҝәләндә онларла Мүгәддәс Китабы өјрәнмәјә разылашдым.

Һәгигәт тезликлә үрәјимә тәсир етди. Әввәлки диндарлығын јерини Јеһоваја мәһәббәт вә хидмәтә һәвәс тутду. 1973-ҹү илдә вәфтиз олундум. Һәгигәти аиләмә данышмаға елә дә чох имканым олмаса да, әлимдән ҝәлдији гәдәр онлара һәгигәт барәдә данышырдым. Әввәлдә дедијим кими, онлар, хүсусилә дә, баҹым Арасели гәти шәкилдә јени етигадыма гаршы чыхырдылар.

Арасели: Монастырда јашадығым аҹы һәјат мәни сәртләшдирмишди. Буна бахмајараг, һәр базар мессаја ҝедирдим, һәр ҝүн тәсбеһ чевирә-чевирә дуа охујурдум. Һәлә дә Мүгәддәс Китабы баша дүшмәк арзусунда идим. Аллаһа дуа едирдим ки, мәнә көмәк етсин. Баҹым Фелиса јени етигадларындан елә шөвглә данышырды ки, мәнә фанатик кими ҝөрүнүрдү. Онун дедикләрини һеч ҹүр гәбул едә билмирдим.

Бир нечә илдән сонра ишлә әлагәдар Мадридә гајытдым. Орада аилә гурдум. Амма вахт кечдикҹә һеч нәјә инамым галмады. Ҝөрүрдүм ки, мүнтәзәм олараг мессаја ҝәләнләр Инҹилдә јазыланлара әмәл етмирләр. Буна ҝөрә дә даһа килсәјә ҝетмәдим. Артыг нә «мүгәддәс»ләрә, нә төвбәјә, нә дә ҹәһәннәмә инанмырдым. Бүтүн сурәтләри евдән чыхармышдым. Билмирдим дүз һәрәкәт едирәм, ја јох. Бүсбүтүн мәјус олмушдум. Елә һеј Аллаһа дуа едирдим: «Сәни танымаг истәјирәм. Өзүнү мәнә таныт». Јадымдадыр ки, Јеһованын Шаһидләри бир нечә дәфә бизим гапыны дөјмүшдүләр, анҹаг мән гапыны ачмырдым. Һеч бир динә етибар етмирдим.

 1980-ҹи илләрин әввәлләриндә Франсада јашајан Лаури вә Испанијада јашајан Рамони Јеһованын Шаһидләри илә Мүгәддәс Китабы өјрәнмәјә башладылар. Мән фикирләширдим ки, онлар да Фелиса кими алданыблар. Сонралар гоншулуғумузда јашајан Ангелинес адлы гадынла таныш олуб достлашдыг. О да Јеһованын Шаһиди иди. Вахташыры Ангелинеслә әри мәнә Мүгәддәс Китабы өјрәнмәји тәклиф едирди. Онлар баша дүшүрдүләр ки, мән һеч бир динә етибар етмәсәм дә, әслиндә үрәјимин дәринлијиндә Мүгәддәс Китабы дәрк етмәјин һәсрәтиндәјәм. Ахырда онлара дедим: «Јахшы, мән сизинлә өјрәнәрәм. Анҹаг бир шәртлә: мән өз Мүгәддәс Китабымы охујаҹағам». Өз китабым дејәндә Мүгәддәс Китабын Накар-Колунга тәрҹүмәсини нәзәрдә тутурдум.

Фелиса: Мән 1973-ҹү илдә вәфтиз олунанда Испанијанын Кантабрија әјаләтинин мәркәзи олан Сантандер шәһәриндә тәхминән 70 Шаһид вар иди. Тәблиғ саһәмиз чох ҝениш иди. Биз бүтүн әјаләтдә тәблиғ етмәк үчүн әввәлҹә автобусла, сонра исә машынла јол ҝедирдик. Кәндбәкәнд ҝәзиб һәмин бөлҝәнин јүзләрлә кәндини долашмышдыг.

Илләр әрзиндә чох адама Мүгәддәс Китабы өјрәтмишәм. Онлардан он бири вәфтиз олунуб. Онларын әксәријјәти католик иди. Мән өзүм әввәлләр гаты диндар олдуғум үчүн билирдим ки, сәбирли олмалыјам, онлары баша дүшмәлијәм. Билирдим ки, көк салмыш етигадлардан әл чәкмәк үчүн онлара вахт лазымдыр, һәгигәти дәрк етмәләри үчүн ҝәрәк Мүгәддәс Китаб вә Јеһованын руһу онларын үрәјинә тәсир етсин (Ибр. 4:12). Әввәлләр полис ишчиси олан һәјат јолдашым Биенвенидо 1979-ҹу илдә вәфтиз олунду. Анам да өлүмүндән бир гәдәр әввәл Мүгәддәс Китабы өјрәнмәјә башламышды.

Арасели: Мән Јеһованын Шаһидләри илә Мүгәддәс Китабы өјрәнмәјә башлајанда чох еһтијат едирдим. Амма һәфтәләр кечдикҹә фикир верирдим ки, илләрлә үрәјимдә јығылыб галан һиддәт јаваш-јаваш кечиб ҝедир. Шаһидләрдә ән чох хошума ҝәлән о иди ки, онлар тәблиғ етдикләри шејләрә өзләри дә әмәл едирдиләр. Ҝетдикҹә шүбһәләрин јерини иман долдурмаға башлады. Артыг өзүмү хошбәхт һисс едирдим. Һәтта гоншулар да дејирдиләр ки, «Арасели, елә тутдуғун јолла да ҝет».

Јадыма ҝәлир Јеһоваја дуа едирдим: «Јеһова, шүкүр Сәнә ки, мәндән әлини үзмәдин. Мәним үчүн бу гәдәр имкан јаратдын ки, ахтардығымы тапым. Нәһајәт ки, мән инди Мүгәддәс Китабы баша дүшүрәм». Баҹым Фелисадан дедијим аҹы сөзләрә ҝөрә үзр истәдим. Артыг онунла мүбаһисә јох, Мүгәддәс Китаб барәдә мараглы сөһбәтләр едирдик. Нәһајәт, 1989-ҹу илдә 61 јашымда вәфтиз олундум.

Фелиса: Инди мәним 91 јашым вар. Дулам. Даһа әввәлки гәдәр ҝүҹүм-тагәтим галмајыб. Анҹаг Мүгәддәс Китабы һәр ҝүн охујурам. Сәһһәтим јол верәндә јығынҹаға ҝедирәм. Ҝүҹүм чатан гәдәр хидмәт едирәм.

Арасели: Бәлкә дә өзүм әввәлләр раһибә олдуғум үчүн хидмәтдә кешишләрә вә раһибәләрә шаһидлик етмәк чох хошума ҝәлир. Мән онлара нәшрләримиздән чох вермишәм. Бәзән онларла мараглы сөһбәт дә алыныб. Јадымдадыр, бир кешишә бир нечә дәфә баш чәкәндән сонра о демишди: «Арасели, мән сәнинлә үрәкдән разыјам. Амма бу јашымда һара ҝедим? Ҹамаат, аиләм нә дејәр?» Онда мән она дедим: «Бәс Аллаһ нә дејәр?» О, кәдәрлә башыны тәрпәтди. Анҹаг һәмин вахт һәгигәтә ҝәлмәк үчүн онун ҹәсарәти јох иди.

Һәјатымын бир ҝүнүнү хош дујғуларла хатырлајырам. Бу, о ҝүн иди ки, јолдашым илк дәфә мәнимлә бирҝә јығынҹаға ҝетмәк истәдијини демишди. Һәмин вахт онун јашы 80-и өтмүшдү. Амма о, бундан сонра бир дәфә дә олсун јығынҹагдан галмады. О, Мүгәддәс Китабы өјрәнди вә тәблиғчи олду. Онунла бирҝә тәблиғә ҝетмәјимизи севә-севә хатырлајырам. Вәфтиз олунаҹағы ҝүнә ики ај галмыш о вәфат етди.

Фелиса: Мән чох хошбәхтәм ки, бир вахтлар мәнә гаршы чыхан үч баҹым мәним руһани баҹыларым олдулар. Биз бир јерә јығышыб меһрибан Аллаһымыз Јеһова, Онун Кәламы барәдә данышмағы чох хошлајырыг. Ахыр ки, биз баҹылар бирләшиб ејни Аллаһа ибадәт етдик *.