Ола билсин, нә вахтса доғма адамыныз вәфат едиб. Јәгин белә кәдәрли вахтда сизи нөвбәти суаллар дүшүндүрүб: «Ҝөрәсән, инсан өләндә һара ҝедир? Вәфат етмиш доғмаларымызы даһа һеч вахт ҝөрмәјәҹәјик?» Бу вә нөвбәти дәрсдә Мүгәддәс Китабын бу суаллара вердији ҹавабдан тәсәлли тапаҹағыг.

1. Мүгәддәс Китабда өлүмлә бағлы нә дејилир?

Иса Мәсиһ өлүмү дәрин јухуја бәнзәтмишди. Бәс өлүм һансы мәнада јухуја бәнзәјир? Дәрин јухуја ҝетмиш инсанын әтрафда баш верәнләрдән хәбәри олмур. Ејнилә, өләндән сонра инсан һеч бир ағры һисс етмир, әзаб чәкмир. Мүгәддәс Китабда дејилир: «Өлүләр һеч нә билмир». (Ваиз 9:5 ајәсини охујун.)

2. Өлүм һагда һәгигәти билмәк инсана неҹә көмәк едир?

Инсанларын чоху өлүмдән вә өлүләрдән горхур. Амма Мүгәддәс Китабдан өлүм һагда һәгигәти өјрәнмәк сизә тәсәлли верә биләр. Иса Мәсиһ демишди: «Һәгигәт сизи азад едәҹәк» (Јәһја 8:32). Бәзи динләр өјрәдир ки, инсан өләндән сонра руһу јашајыр. Амма бу тәлим Мүгәддәс Китаба әсасланмыр. Инсан өләндән сонра әзаб чәкмир. Өлүнүн һеч нәдән хәбәри олмадығына ҝөрә бизә зәрәр дә јетирә билмәз. Буна ҝөрә дә өлүләрин руһуну шад етмәјә чалышмаг, онлара ибадәт етмәк, јахуд дуа охумаг әбәсдир.

Бәзи инсанлар дејир ки, өлүләрлә даныша билир. Амма бу, мүмкүн дејил. Өјрәндијимиз кими, «өлүләр һеч нә билмир». Вәфат етмиш доғмалары илә данышдығыны дүшүнән инсанлар, әслиндә, ҹинләрлә данышырлар. Ҹинләр өзләрини һәмин өлүләрин руһу кими гәләмә верир. Јеһова хәбәрдарлыг едир ки, өлүләрлә данышмаға чалышмаг чох тәһлүкәлидир. Чүнки ҹинләрлә тәмасда олмағын инсана зәрәр јетирдијини билир. Демәли, өлүм һагда һәгигәти билмәк бизи ҹинләрдән горујур. (Ганунун тәкрары 18:10—12 ајәләрини охујун.)

3. Өлүләрин вәзијјәти илә бағлы һәгигәти өјрәнин

Дүнјада өлүмлә бағлы фәргли-фәргли инанҹлар мөвҹуддур. Сөзсүз ки, бу инанҹларын һамысы һәгигәт ола билмәз.

• Сизин әразиниздә өлүләрлә бағлы нәјә инанырлар?

 4. Өлүм һагда һәгигәти билмәјин фајдасы

Өлүм һагда һәгигәти биләндә артыг өлүләрдән горхмуруг. Ваиз 9:10 ајәсини охујун вә нөвбәти суалы мүзакирә един:

• Өлүләр бизә хәтәр јетирә биләр?

Мүгәддәс Китабдакы һәгигәти биләндә артыг өлүләрин руһуну шад етмәјә чалышмајаҹағыг, јахуд онлара ибадәт етмәјәҹәјик. Әшија 8:19 вә Вәһј 4:11 ајәләрини охујун. Сонра нөвбәти суалы мүзакирә един:

• Сизҹә, Јеһова өлүләрә ситајиш едән, онлардан көмәк истәјән адам барәдә нә дүшүнүр?

5. Өлүм һагда һәгигәти билмәк тәсәлли верир

Чохлары дүшүнүр ки, инсан өләндән сонра әмәлләринин ҹәзасыны чәкир. Амма Аллаһ һеч кәси, һәтта ән пис әмәл саһибини белә өләндән сонра ҹәзаландырмыр. Буну билмәк, инсана тәсәлли верир. Ромалылара 6:7 ајәсини охујун вә нөвбәти суалы мүзакирә един:

• Өлүм инсаны ҝүнаһдан азад едир. Неҹә дүшүнүрсүнүз, өләндән сонра инсан кечмиш ҝүнаһларына ҝөрә ҹәза чәкир?

Јеһованы јахындан таныдыгҹа әмин олуруг ки, О, һеч вахт инсана өләндән сонра ишҝәнҹә вермәз. Ганунун тәкрары 32:4 вә 1 Јәһја 4:8 ајәләрини охујун. Сонра нөвбәти суаллары мүзакирә един:

• Неҹә дүшүнүрсүнүз, бу ҹүр ҝөзәл Аллаһ өлән адама ишҝәнҹә верәр?

• Өлүм һагда һәгигәт сизә тәсәлли верир? Нәјә ҝөрә?

 ИҸМАЛ

Инсан өләндә һәјаты сона чатыр. Өлүләр нә әзаб чәкир, нә дә дириләрә хәтәр јетирир.

Тәкрар

• Мүгәддәс Китабда өлүмлә бағлы нә дејилир?

• Өлүм һагда һәгигәти билмәјин инсана һансы фајдасы вар?

• Өлүм һагда һәгигәти билмәк инсана неҹә тәсәлли верир?