Мүгәддәс Китаб һәјатлары дәјишир

НӘЈӘ ҜӨРӘ алтмыш јашларында олан гадын бүтпәрәстликдән әл чәкди? Шинто мәбәдиндә хидмәт едән кешиши мәбәддән чыхмаға вә мәсиһи олмаға нә тәшвиг етди? Ҝәлин бу суалларын ҹавабыны онларын өз дилиндән ешидәк.

«Даһа бүтләрин гулу дејиләм» ​(АБА ДАНСУ).

ДОҒУЛДУҒУ ИЛ: 1938

ӨЛКӘ: БЕНИН

КЕЧМИШДӘ: БҮТПӘРӘСТ ОЛУБ

КЕЧМИШИМ. Ушаглығым Со-Чихуве адлы бир кәнддә кечиб. Кәндимиз ҝөл јахынлығында, батаглыг бир әразидә јерләшир. Кәндимизин сакинләри балыгчылыгла мәшғул олур, мал-гара, гојун-кечи, донуз вә гуш сахлајырлар. Бизим тәрәфләрдә јоллар јохдур, ҹамаат гајыгларла лазым олан јерә ҝедиб чатыр. Евләри әксәрән ағаҹдан вә отдан тикирләр. Амма кәндимиздә кәрпиҹдән тикилмиш евләр дә вар. Кәндин ҹамааты әсас етибарилә касыбдыр. Буна бахмајараг, ҹинајәткарлыг бөјүк шәһәрләрдә олдуғу гәдәр вүсәт алмајыб.

Биз һәлә ушаг оланда атам мәнимлә баҹымы фетиш мәбәдинә јоллады. Орада бизә динимизи, адәт-әнәнәләримизи өјрәдирдиләр. Бөјүјәндә Јоруба халгынын ситајиш етдији Дудуаја (Одудува) ибадәт етмәк гәрарына ҝәлдим. Мән онун үчүн бир ев тикдим вә она гурбанлар ҝәтирмәјә башладым: јамс (тәрәвәз), палма јағы, илбиз, тојуг, ҝөјәрчин вә диҝәр һејванлары. Бу гурбанлар баһа иди, онлары алмаға чох вахт бүтүн пулуму сәрф едирдим.

МҮГӘДДӘС КИТАБ ҺӘЈАТЫМЫ ДӘЈИШДИ. Мүгәддәс Китабы өјрәнмәјә башладым. Өјрәндим ки, јеҝанә һәгиги Аллаһ Јеһовадыр вә О, бүтләрә ибадәт етмәјә пис бахыр (Чыхыш 20:4, 5; 1 Коринфлиләрә 10:14). Мән баша дүшдүм ки, һәјатымда бөјүк дәјишикликләр етмәлијәм. Ибадәт заманы истифадә етдијим бүтүн шәкилләри, әшјалары тулладым, евими онлардан тамам тәмизләдим. Фалчылара ҝедиб-ҝәлмәјин дашыны атдым, дини вә дәфн ајинләринә ҝетмәдим.

Әлбәттә, һәјатымда бу гәдәр дәјишиклик етмәк асан дејилди. Ҹаван да дејилдим, јашым артыг алтмышы өтмүшдү. Дост-таныш, гоһум-әгрәба, гонум-гоншу, адам галмырды ки, мәнә гаршы чыхмасын, мәни лаға гојмасын. Амма мән Јеһоваја дуа едирдим. Јалварырдым ки, мәнә дүзҝүн давранмаға ҝүҹ версин. Мәсәлләр 18:10 ајәсиндә јазылан сөзләр мәнә тәсәлли верирди: «Јеһованын ады мөһкәм галадыр. Салеһ ора гачыб горунар».

Јеһованын Шаһидләринин кечирдији ҝөрүшләрин дә мәнә чох көмәји дәјди. Орада мәсиһи мәһәббәтинин нә олдуғуну өз ҝөзләримлә ҝөрдүм. Мән бу адамлара һејран галмышдым. Онлар чалышырды Мүгәддәс Китабын јүксәк әхлаг дәјәрләринә ујғун јашасын. Бүтүн бунлар мәни инандырды ки, Јеһованын Шаһидләринин дини һәгиги диндир.

МӘНӘ ФАЈДАСЫ. Мүгәддәс Китаб мәсләһәтләринә әмәл етмәјин мәнә чох фајдасы дәјди; өвладларымла мүнасибәтләрими јахшылашдыра билдим. Һәм дә бәзән өзүмү елә һисс едирәм ки, санки чијнимдән дағ ҝөтүрүлүб. Әввәлләр нәјим вар идисә, һамысыны мәнә һеч бир көмәји, фајдасы дәјмәјән ҹансыз бүтләрә хәрҹләјирдим. Инди исә Јеһоваја ибадәт едирәм, о Кәсә ки, бүтүн чәтинликләримизи бирдәфәлик һәлл етмәјә гадирдир (Вәһј 21:3, 4). Неҹә дә хошбәхтәм ки, даһа бүтләрин гулу дејиләм, әксинә, Јеһованын гулујам! Инди мән Онун пәнаһына сығынмышам.

«Ушаглыгдан Аллаһы ахтарырдым» ​(ШИНҸИ САТО).

ДОҒУЛДУҒУ ИЛ: 1951

ӨЛКӘ: ЈАПОНИЈА

КЕЧМИШДӘ: СИНТО МӘБӘДИНДӘ КЕШИШ

КЕЧМИШИМ. Ушаглығым Фукуока әјаләтиндә, балаҹа бир шәһәрдә кечиб. Валидејнләрим чох диндар идиләр. Көрпәликдән мәнә Синто аллаһларына еһтирам ашылајырдылар. Ушаг вахтында тез-тез хиласым һаггында дүшүнүрдүм вә дарда олан инсанлара көмәк еләмәк истәјирдим. Јадыма ҝәлир, бир дәфә һәлә ибтидаи синифдә охујурдум, мүәллим ушаглардан сорушду, бөјүјәндә нә олмаг истәјирсиниз. Синиф јолдашларымын конкрет арзулары вар иди, мәсәлән, бири алим олмаг истәјирди. Мән исә дедим ки, бөјүјәндә Аллаһа хидмәт етмәк истәјирәм. Һамы мәнә ҝүлмәјә башлады.

Мәктәби битирдикдән сонра дини тәһсил оҹағына дахил олдум. Орада бир Синто кешиши илә таныш олдум. О, бош вахтында гара үзлү китаб охујурду. Бир ҝүн о, мәндән сорушду: «Сато, һеч билирсән бу нә китабдыр?» Китабын үзүндәки јазыја әввәл дә фикир вермишдим, она ҝөрә ҹаваб вердим: «Мүгәддәс Китаб». О да деди: «Бәли, Синто кешиши олмаг истәјән һәр кәс ҝәрәк бу китабы охусун».

Мән бирбаша Мүгәддәс Китабы алмаға јолландым. Ҝәтириб ону китаб рәфимин ән јахшы јеринә гојдум. Бүтүн ҝүнү дәрс охујурдум. Мүгәддәс Китабы охумаға вахт тапмырдым. Бунунла белә, бу китаба дәрин һөрмәтлә јанашырдым. Тәһсилими битирдикдән сонра Синто мәбәдиндә кешиш олдум. Ушаглыг арзум јеринә јетди.

Тезликлә ҝөрдүм ки, мәбәддә хидмәт ҝөзләдијим кими дејил. Кешишләрин чоху башгаларына лагејд јанашырды. Бәзиләринин һеч иманы да јох иди. Бир дәфә бир бөјүк кешиш һәтта мәнә белә демишди: «Бурада јүксәк мөвге газанмаг истәјирсәнсә, анҹаг фәлсәфәдән данышмалысан. Иман сөзүнү дилинә ҝәтирмә».

Бу кими сөзләрә ҝөрә синтоизм дини мәни ҝет-ҝедә мәјус едирди. Мәбәддә ишләјә-ишләјә башга динләрлә марагланмаға башладым. Амма бахдым ки, онлар да синтоизмдән ҝеридә галмыр. Бу динләри арашдырдыгҹа, мәјуслуғум даһа да артырды. Мәнә елә ҝәлирди ки һеч бир диндә һәгигәт јохдур.

МҮГӘДДӘС КИТАБ ҺӘЈАТЫМЫ ДӘЈИШДИ. 1988-ҹи илдә бир буддистлә таныш олдум. О, мәндә Мүгәддәс Китабы охумаға һәвәс ојатды. Јадыма дүшдү ки, илләр өнҹә Синто кешиши дә мәни буна һәвәсләндирирди. Онларын мәсләһәтинә әмәл етмәк гәрарына ҝәлдим. Мүгәддәс Китабы әлимә аландан сонра артыг јерә гоја билмәдим. Бәзән ҝеҹә узуну охујурдум, сәһәрин неҹә ачылдығындан хәбәрим олмурду.

Охудугҹа дахилимдә Мүгәддәс Китабдакы Аллаһа дуа етмәк истәји јаранырды. Мәтта 6:9—13 ајәләриндә јазылмыш дуадан башладым. Һәр ики саатдан бир ону тәкрар едирдим, бахмајараг ки, һәлә дә Синто мәбәдиндә хидмәт едирдим.

Әлбәттә, охудугларым мәндә суал да доғурурду. Һәмин вахт евләнмишдим. Билирдим ки, Јеһованын Шаһидләри инсанлара Мүгәддәс Китабы өјрәдир, чүнки әввәлләр јолдашыма да баш чәкмишдиләр. Бир Шаһид гадын тапдым вә ону суал атәшинә тутдум. Гадын һәр суалыма Мүгәддәс Китабдан ҹаваб верирди. Бу, мәни һејрәтә ҝәтирди. Мәнә Мүгәддәс Китаб дәрси кечмәјә башладылар.

Гыса вахтдан сонра Јеһованын Шаһидләринин ҝөрүшләринә ҝетмәјә башладым. Һәмин вахт һәлә билмәсәм дә, о јығынҹаға ҝәлән Шаһидләрин арасында еләләри вар иди ки, онларла вахтилә чох нәзакәтсиз давранмышам. Буна бахмајараг, онлар мәни сәмими гаршыладылар вә мән јығынҹагда өзүмү гонаг кими һисс етмәдим.

О ҝөрүшләрдә өјрәндим ки, Аллаһ кишидән аилә үзвләринә севҝи вә һөрмәт ҝөстәрмәји ҝөзләјир. О вахта кими, бүтүн фикрим-зикрим өз ишимә ҹәмләнмишди, буна ҝөрә дә арвадыма вә ики өвладыма диггәт ајырмырдым. Һәмин ан мәнә чатды: мәбәдә ҝәлән инсанлар үрәкләрини бошалдырдылар, мән дә онлары диггәтлә динләјирдим, амма бир дәфә дә олсун, һәјат јолдашымы динләмәмишәм.

Јеһова һагда чох шеј өјрәндикҹә, Она даһа да јахын олмаг истәјирдим. Ајәләр вар иди ки, мәнә хүсусилә ҝүҹлү тәсир бағышлајырды. Мәсәлән, Ромалылара 10:13 ајәсиндә дејилир: «Јеһованын адыны чағыран һәр кәс гуртулаҹаг». Ушаглыгдан Аллаһы ахтарырдым вә будур, нәһајәт Ону тапдым!

Мәбәддә өзүмә јер тапа билмирдим. Әввәл-әввәл башгаларынын нә дејәҹәји мәни чох нараһат едирди. Диҝәр тәрәфдән, өзүмә сөз вермишдим ки, Аллаһы башга јердә тапсам, Синто дининдән чыхаҹағам. Беләҹә 1989-ҹу илин јазында виҹданымын сәсинә гулаг асмаг гәрарына ҝәлдим. Мәбәддән чыхдым. Өзүмү тамамилә Јеһованын әлләринә вердим.

Мәбәди тәрк етмәк асан дејилди. Бөјүк кешишләр мәни данлајыб, тәзјиг ҝөстәрирдиләр ки, галым. Амма ән чәтини валидејнләримә бу тәзә хәбәри чатдырмаг иди. Онлара ҝедиб һәр шеји ачыб данышмалы идим. Јолда һәјәҹандан үрәјим сыхылды, ајагларым ҝетмирди! Ҹәсарәт топламаг үчүн бир нечә дәфә дајаныб Јеһоваја дуа етдим.

Валидејнләримин евинә ҝәлдим. Амма горху мәни о гәдәр бүрүмүшдү ки, һеч ҹүр мәтләбә кечә билмирдим. Саатлар кечди. Нәһајәт, чохлу дуа едәндән сонра һәр шеји атама данышдым. Дедим ки, һәгиги Аллаһы тапмышам, Синто дининдән ҝедирәм, артыг анҹаг һәгиги Аллаһа хидмәт едәҹәјәм. Атам шока дүшдү, ганы гаралды. Гоһумлар евә ҝәлиб мәни фикримдән дашындырмаға чалышдылар. Әлбәттә, һеч кимин хәтринә дәјмәк истәмирдим, диҝәр тәрәфдән баша дүшүрдүм ки, Јеһоваја хидмәт етмәк ән дүзҝүн вә ағыллы ишдир. Вахт кечди, сонрадан аиләм гәрарымла барышды.

Мәбәди тәрк етмәк ишин јарысы иди, дүшүнҹәми дәјишмәк исә ән чәтини иди. Кешишлик илијимәдәк ишләмишди. Вар ҝүҹүмлә чалышырдым ки, кечмиш һәјатымы унудум, амма һара бахырдым һәр јер мәнә кечмишими хатырладырды.

Мәнә ики шеј көмәк етди: биринҹиси, евими башдан ајаға кими әләк-вәләк еләдим, көһнә динимә аид нә вар идисә, китаблар, шәкилләр, һәтта јадиҝар кими сахладығым чох баһалы әшјалары белә, бир јерә јығыб јандырдым. Икинҹиси, чалышырдым әлимдән ҝәләни едим ки, Јеһованын Шаһидләри илә даһа чох вахт кечирим. Онларын достјана мүнасибәти, дәстәји мәнә чох көмәк етди. Јаваш-јаваш кечмиш һәјатым унудулмаға башлады.

МӘНӘ ФАЈДАСЫ. Әввәлләр арвадыма вә өвладларыма вахт ајырмырдым. Буна ҝөрә дә онлар өзләрини чох тәнһа һисс едирдиләр. Анҹаг Мүгәддәс Китаб мәсләһәтинә ујғун олараг, аиләмлә вахт кечирмәјә башлајандан сонра мүнасибәтләримиз дүзәлмәјә башлады. Бир гәдәр вахтдан сонра һәјат јолдашым да Јеһоваја хидмәт етмәјә башлады. Инди бүтүн аиләмиз, оғлум, гызым вә күрәкәнимлә бир јердә һәгиги Аллаһ Јеһоваја ибадәт едирик.

Ушаг вахтларымдан үрәјимдә бир арзу варды: Аллаһын хидмәтчиси олмаг вә инсанлара көмәк етмәк. Бу һагда дүшүнәндә анлајырам ки, арзум тамамилә вә артыгламасы илә јеринә јетиб, ахтардығым һәр шеји тапмышам. Јеһоваја миннәтдарлығымы ифадә етмәјә сөз тапмырам.

[Шәкил]

Јеһованын Шаһидләринин арасында оланда мәсиһи мәһәббәтинин нә олдуғуну өз ҝөзләримлә ҝөрдүм

[Шәкил]

Бир заманлар ибадәт етдијим синто мәбәди