Мән Јени Ҹәнуби Уелсин кичик гәсәбәси Вориалда бөјүмүшәм. Бурада сакинләр малдарлыгла мәшғул олур, еләҹә дә тахыл вә тәрәвәз әкиб-беҹәрирләр. Гәсәбәмиз тәмиздир вә чох надир һалларда бурада ҹинајәт төрәдилир.

Аиләмиздәки он ушагдан ән бөјүјү мән идим, аиләнин доланышығына көмәк етмәк үчүн 13 јашымдан ишләмәјә башладым. Савадым аз олдуғу үчүн фермаларда ишләјирдим. 15 јашымда артыг вәһши атлары әһлиләшдирән тәлиматчы идим.

Фермада ишләмәјин мүсбәт вә мәнфи тәрәфләри варды. Бир тәрәфдән ҝөрдүјүм иши вә тәбиәти севирдим. Ҝеҹәләр оҹаг галајыб кәнарында әјләшир, ҝөјдәки ајы, улдузлары сејр едирдим. Ахшамын меһи тарланын хош әтрини әтрафа јајырды. Јадымдадыр, дүшүнүрдүм ки, јәгин бүтүн бу ҝөзәлликләри Кимсә јарадыб. Диҝәр тәрәфдән фермада бәзи мәнфи тәсирләрә дә мәруз галырдым. Инсанлар тез-тез сөјүш сөјүр, сигарет чәкирдиләр. Буна ҝөрә дә тезликлә мән дә сигарет чәкмәјә вә сөјүш сөјмәјә башладым.

18 јашым оланда Сиднејә көчдүм. Әсҝәрлијә ҝетмәк истәјирдим, амма орта тәһсил алмамышдым дејә мәни ҝөтүрмәдиләр. Онда иш тапдым вә бир ил Сиднејдә галдым. Һәмин вахт илк дәфә Јеһованын Шаһидләри илә растлашдым. Ибадәт ҝөрүшүнә дәвәти гәбул едиб ҝетдим. Онларын тәлимләрини ешидәр-ешитмәз анладым ки, бу, һәгигәтдир.

Лакин чох кечмәмиш, әввәлки ишимә гајытмаг гәрарына ҝәлдим. Квинсленд штатынын Гундивинди гәсәбәсинә көчдүм. Бурада иш тапдым, аилә гурдум вә тәәссүфләр олсун ки, ичкијә гуршандым.

Бизим ики оғлумуз олду. Онлар доғуландан сонра агибәтим барәдә ҹидди дүшүнмәјә башладым. Сиднејдә Јеһованын Шаһидләринин ибадәт ҝөрүшүндә дејиләнләр јадыма дүшдү вә һәрәкәтә кечмәк гәрарына ҝәлдим.

«Ҝөзәтчи гүлләси»нин көһнә сајыны тапдым. Үзәриндә Јеһованын Шаһидләринин Австралијадакы филиалынын үнваны јазылмышды. Һәмин үнвана мәктуб јазыб көмәк истәдим. Мәктуба ҹаваб олараг меһрибан вә нәзакәтли бир Шаһид мәни зијарәт етди. Чох кечмәмиш, о мәнимлә Мүгәддәс Китаб дәрсинә башлады.

Мүгәддәс Китабы өјрәнәндә баша дүшдүм ки, һәјатымда бөјүк дәјишикликләр етмәлијәм. 2 Коринфлиләрә 7:1 ајәси мәнә хүсусилә тәсир етди. Бу ајә мәни тәшвиг етди ки, ҹисми мурдарлајан һәр шејдән өзүмү тәмизләјим.

Гәрара ҝәлдим ки, сигарети атым вә әјјашлыг етмәјим. Амма бу дәјишикликләри етмәк һеч дә асан дејилди, чүнки узун илләрдир белә јашајырдым. Бунунла белә, Аллаһы разы салан һәјат јашамаға гәти гәрарлы идим. Мәнә ән чох көмәк едән Ромалылара 12:2 ајәсиндәки бу принсип олду: «Бундан сонра бу зәманәјә ујғунлашмајын. Әксинә, дүшүнҹәнизи јениләшдирәрәк бүсбүтүн дәјишин». Баша дүшдүм ки, вәрдишләримдән јаха гуртармаг үчүн дүшүнҹә тәрзими дәјишмәлијәм, вәрдишләримә Аллаһын ҝөзү илә, јәни зәрәрли бир шеј кими бахмалыјам. Онун көмәји илә сигарети тәрҝитдим, әјјашлыгдан әл чәкдим.

Мәним үчүн ән чәтини сөјүш сөјмәји тәрҝитмәк иди. Ефеслиләрә 4:29 ајәсиндәки мәсләһәти билирдим: «Гој дилиниздән һеч бир пис сөз чыхмасын». Бунунла белә, данышыг тәрзими дүзәлтмәк һеч дә асан олмады. Әшија 40:26 ајәсиндәки сөзләрин үзәриндә дүшүнмәјин мәнә хејри дәјди. Улдузлу сәмадан данышан бу ајәдә јазылыб: «Башынызы галдырыб ҝөјләрә бахын, бүтүн бунлары ким јарадыб? Ҝөјләрин ордусуну сајы илә Чыхаран! О, онларын һәр бирини ады илә чағырыр. Онун һәдсиз гүввәси, мөһтәшәм ҝүҹү сајәсиндә бирҹәҹији дә әскилмир». Дүшүнүрдүм ки, әҝәр Аллаһ зөвг ала-ала сејр етдијим Каинаты јаратмаг гүдрәтинә маликдирсә, онда мәнә дәјишмәјә дә ҝүҹ верә биләр. Чохлу дуа етмәклә вә чалышмагла нәһајәт дилими јүјәнләмәји баҹардым.

Ат тәлиматчысы ишләдијим мүддәтдә демәк олар ки, инсанларла данышмаг имканым олмурду, чүнки әтрафда аз адам вар иди. Амма Јеһованын Шаһидләринин ибадәт ҝөрүшләриндә алдығым тәлимләр сајәсиндә фикрими ифадә етмәји өјрәндим. Үстәлик, бу тәлимләр мәнә Аллаһын Падшаһлығы һаггында хош хәбәри инсанларла бөлүшмәк имканы верди (Мәтта 6:9, 10; 24:14).

Артыг бир нечә илдир ки, ағсаггал кими хидмәт едирәм. Диндашларыма көмәк етмәк имканы мәним үчүн шәрәфдир. Ән бөјүк немәт исә әзиз һәјат јолдашым вә ҝөзәл өвладларымла бирҝә Јеһоваја хидмәт етмәкдир.

Јеһоваја миннәтдарам ки, мәним кими савадсыз адама билик верди (Әшија 54:13). Мәсәлләр 10:22 ајәсиндәки сөзләрлә тамамилә разыјам. Орада дејилир: «Јеһованын вердији бәрәкәтдир инсана сәрвәт ҝәтирән». Аиләликҹә ән бөјүк арзумуз Јеһова Аллаһы даһа јахындан танымаг вә Она әбәдијјән хидмәт етмәкдир.