Јәгин ки, хош хәбәр алмағы хошлајырсыныз. Бизим сизә вә доғмаларыныза хош хәбәримиз вар!

Бу хош хәбәр Мүгәддәс Китабда јазылыб. Каинатын Улу Јараданы Јеһова Аллаһ бу китабы әсрләр өнҹә јаздырыб. Әлиниздәки нәшрдә әсасән Мүгәддәс Китабын дөрд бөлмәсинә диггәт јетирилир. Бу бөлмәләрдә һәр биримиз үчүн хош хәбәр вар. Аллаһ бу бөлмәләри јазмағы мөмин бәндәләр олан Мәтта, Марк, Лука вә Јәһјаја бујурмушду. Бөлмәләр елә онларын адыны дашыјыр.

Чохлары бу дөрд бөлмәни дөрд Инҹил, јахуд Мүждә адландырыр. Чүнки онларын дөрдүндә дә Иса пејғәмбәр һагда мүждә вә ја хош хәбәр вар. Бу хош хәбәр Аллаһын онун васитәсилә бәшәријјәти хилас етмәси вә Аллаһын сәмави Падшаһлығынын Падшаһы кими Иса Мәсиһин она иман едәнләрин һамысына әбәди немәтләр верәҹәји барәдәдир (Марк 10:17, 30; 13:13).

Јәгин ки, сизә мараглы ҝәлир, нәјә ҝөрә Иса Мәсиһин һәјаты вә тәлимләри барәдә јазмаг үчүн Аллаһ дөрд нәфәри илһамландырыб?

Иса Мәсиһин сөзләри вә әмәлләри барәдә дөрд мүждәнин олмасы чох бөјүк үстүнлүкдүр. Бунун доғрулуғуну бир нүмунә әсасында ҝөрмәк олар. Тәсәввүр едәк ки, дөрд нәфәр бир мәшһур мүәллимин јанында дуруб. Мүәллимин гаршысында дуран адамын верҝи идарәси вар. Сағында һәким, солунда исә балыгчы олан ән јахын досту дуруб. Архада дуран исә һамыдан ҹавандыр, о, мүшаһидәчидир. Онларын дөрдү дә дүрүст инсанлардыр, һәр биринин фәргли-фәргли бахышлары вә мәгсәдләри вар. Әҝәр һәр бири мүәллиминин данышдығы вә етдији ишләр һагда јазса, чох јәгин ки, һәрәси мүхтәлиф тәфсилатлары вә һадисәләри вурғулајаҹаг. Онларын бахышларынын вә мәгсәдләринин фәргли олдуғуну јадда сахлајараг, дөрдүнүн дә јаздығы мәлуматы охумагла мүәллимин дедији вә етдији шејләр барәдә там тәсәввүрүмүз олаҹаг. Бу нүмунә ҝөстәрир ки, Бөјүк Мүәллим Иса Мәсиһин һәјаты барәдә дөрд Мүждәнин олмасынын бизә бөјүк фајдасы вар.

Ҝәлин нүмунәни давам етдирәк. Верҝи идарәси олан адам јәһуди мәншәли инсанларын үрәјинә јол тапмаг истәдији үчүн онлара мараглы ҝәлән тәлимләри вә һадисәләри јазыб. Һәким хәстәләрин вә ја әлилләрин шәфа тапмасыны  вурғулајыр, буна ҝөрә дә верҝијығанын јаздығы һиссәләри бурахыб вә ја онлары башга ардыҹыллыгла гәләмә алыб. Мүәллимин јахын досту онун һиссләрини вә хүсусијјәтләрини тәсвир едиб. Ҹаван оғлан исә мүәллими һагда гыса вә јығҹам мәлумат јазыб. Бунунла белә, јазарларын дөрдүнүн дә гәләмә алдығы мәлуматлар там дәгигдир. Ејнилә, Иса пејғәмбәрин һәјаты һагда дөрд Мүждәнин олмасы сајәсиндә биз онун фәалијјәти, тәлимләри вә шәхсијјәти барәдә һәр тәрәфли өјрәнә биләрик.

Бәзән инсанлар «Мәттанын Инҹили» вә ја «Јәһјанын Инҹили» дејирләр. Белә демәк сәһв дејил, чүнки һәр бириндә Иса Мәсиһ һагда мүждә вар (Марк 1:1). Амма ҝениш мәнада, Иса Мәсиһ һагда әслиндә бир хош хәбәр вар вә бу һагда дөрд мүждәнин дөрдүндә дә охумаг олар.

Аллаһын Кәламыны тәдгиг едән бир чох инсан Мәтта, Марк, Лука вә Јәһјанын Мүждәләриндәки һадисәләри вә мәлуматлары мүгајисә едиб тутушдуруб. Мәсәлән, ерамызын тәхминән 170-ҹи илиндә Татјан адлы суријалы бир јазычы белә бир шеј етмәјә чалышмышды. О, Иса Мәсиһ һагда јазылан дөрд Мүждәнин Аллаһдан илһам алдығыны вә дәгиг олдуғуну гәбул едирди. О Мүждәләрин дөрдүнү һәмаһәнҝ шәкилдә бирләшдирәрәк «Диатессарон» адланан әсәр мејдана ҝәтирмишди.

Әлиниздә тутдуғунуз бу китаб Татјанын јаздығы китаба бәнзәјир, амма даһа дәгигдир вә баша чатдырылыб. Бу, Иса Мәсиһлә бағлы бир чох пејғәмбәрликләрин ҝерчәкләшмәсинин вә дедији мәсәлләрин ачыгланмасынын даһа јахшы баша дүшмәјимизин сајәсиндәдир. Бунун сајәсиндә онун дедији сөзләр вә етдији ишләр, һабелә һадисәләрин һансы ардыҹыллыгла ҹәрәјан етдији даһа ајдын олур. Археоложи тапынтылар да бәзи тәфсилатлара вә јазарларын бахышларына ајдынлыг ҝәтирир. Әлбәттә ки, һәр бир һадисәнин һансы ардыҹыллыгла ҹәрәјан етдијини һеч ким гәтијјәтлә дејә билмәз. Анҹаг «Иса пејғәмбәр. Јол, һәгигәт, һәјат» китабында һадисәләрин ардыҹыллығы ағлабатан вә мәнтигли шәкилдә тәгдим олунуб.

Бу китабы охујаркән онун сизә вә доғмаларыныза чатдырмаг истәдији әсас фикри нәзәриниздә сахлајын. Иса Мәсиһин һәвари Томаса дедији сөзләри јадыныза салын: «Јол, һәгигәт вә һәјат мәнәм. Мәним васитәчилијим олмадан һеч кәс Атанын јанына ҝәлә билмәз» (Јәһја 14:6).

Бу китаб сизә Иса пејғәмбәрин һансы мәнада «јол» олдуғуну баша дүшмәјә көмәк едәҹәк. Јалныз онун васитәсилә биз Јеһова Аллаһа дуада јахынлаша биләрик. Бундан әлавә, Иса Мәсиһ бизи Аллаһла барышыға апаран јолдур (Јәһја 16:23; Ромалылара 5:8). Үстәлик, биз јалныз онун васитәсилә Аллаһын рәғбәтини газана биләрик.

Иса пејғәмбәр «һәгигәтдир». О, сөзләри вә әмәлләрилә Аллаһ һагда һәгигәти мүкәммәл шәкилдә тәзаһүр етдирирди. О, чохлу пејғәмбәрликләри јеринә јетирди вә онлар онун васитәсилә «бәли» олду (2 Коринфлиләрә 1:20; Јәһја 1:14). Бу пејғәмбәрликләр Иса Мәсиһин Аллаһын нијјәтинин ҝерчәкләшмәсиндә әсас јер тутдуғуну баша дүшмәјә көмәк едир (Вәһј 19:10).

Иса пејғәмбәр «һәјатдыр». Мәсиһин өз камил бәдәнини вә ганыны бизим уғрумузда гурбан вермәси сајәсиндә бизим әсил һәјата, јәни әбәди һәјата говушмаг имканымыз вар (1 Тимутијә 6:12, 19; Ефеслиләрә 1:7; 1 Јәһја 1:7). О һәмчинин Ҹәннәтдә әбәдијјән јашамаг үмидилә дирилән инсанлар үчүн дә һәјат олаҹаг (Јәһја 5:28, 29).

Аллаһын нијјәтиндә Иса пејғәмбәрин ојнадығы ролу һәр биримиз дәрк етмәлијик. Арзумуз будур ки, јол, һәгигәт вә һәјат олан Иса пејғәмбәр барәдә севә-севә өјрәнәсиниз!