1, 2. Сән Јеһова Аллаһы нәјә ҝөрә севирсән?

СӘН Аллаһы севирсән? Һәјатыны Јеһова Аллаһа һәср етмисәнсә, шүбһәсиз, бүтүн варлығынла «бәли» дејәҹәксән! Бу, белә дә олмалыдыр. Јеһованы севмәк бизим үчүн тәбии һалдыр, чүнки бу севҝи Онун бизә олан мәһәббәтиндән ирәли ҝәлир. Мүгәддәс Китабда белә дејилир: «Биз севирик, чүнки әввәлҹә Аллаһ бизи севди» (1 Јәһја 4:19).

² Инсанлара гаршы мәһәббәт ҝөстәрмәкдә биринҹи аддымы Јеһова Өзү атмышдыр. Биз Онун јаратдығы ҝөзәл Јер планетиндә јашајырыг. Аллаһ бизим физики вә мадди еһтијаҹларымызын гејдинә галыр (Мәтта 5:43—48). Һәмчинин бунлардан гат-гат үстүн олан руһани тәләбатларымызы да тәмин едир. Аллаһ бизә Өз Кәламыны, Мүгәддәс Китабы вериб. О, бизә дуа етмәјә изин вермәклә јанашы, бизи динләјиб көмәк үчүн Өз мүгәддәс руһуну верәҹәјини дә вәд едир (Зәбур 65:2; Лука 11:13). Ән ваҹиби исә одур ки, Јеһова Аллаһ бизи ҝүнаһдан вә өлүмдән гуртармаг үчүн Өз севимли Оғлуну бир Хиласкар кими јер үзүнә ҝөндәриб. Јеһованын бизә гаршы мәһәббәти неҹә дә бөјүкдүр! (Јәһја 3:16; Ромалылара 5:8 ајәләрини оху.)

3. а) Аллаһын мәһәббәтини горујуб-сахламаг үчүн биздән нә тәләб олунур? б) Һансы мүһүм суалын үзәриндә дүшүнмәлијик вә бу суалын ҹавабыны һарадан тапа биләрик?

³ Јеһова истәјир ки, Онун мәһәббәти бизә даима хејир  ҝәтирсин. Лакин Онун мәһәббәтинин бизә фајда ҝәтириб-ҝәтирмәјәҹәји өзүмүздән асылыдыр. Аллаһын Кәламы төвсијә едир ки, әбәди һәјаты ҝөзләјәркән Аллаһын мәһәббәтиндән ајрылмајаг (Јәһуда 21). «Ајрылмајын» сөзүндән ҝөрүнүр ки, Аллаһын мәһәббәтини горујуб-сахламаг үчүн бизим тәрәфимиздән һәрәкәт тәләб олунур. Биз дә Јеһованы севдијимизи конкрет әмәлләрлә ҝөстәрмәлијик. Бунун үчүн һәр биримиз чох ваҹиб бир суалын үзәриндә дүшүнмәлијик: «Аллаһы севдијими неҹә ҝөстәрә биләрәм?» Бу суалын ҹавабыны һәвари Јәһјанын сөзләриндә тапа биләрик: «Аллаһы севмәк Онун әмрләринә риајәт етмәк демәкдир. Онун әмрләри исә ағыр дејил» (1 Јәһја 5:3). Ҝәл  бу сөзләрин мәнасыны арашдыраг. Чүнки биз Аллаһа Ону нә гәдәр чох севдијимизи ҝөстәрмәк истәјирик.

4, 5. Јеһоваја гаршы мәһәббәтин үрәјиндә неҹә ҹүҹәрмәјә башладығыны тәсвир ет.

⁴ Аллаһы севән инсан илк нөвбәдә гәлбиндә Она дәрин мәһәббәт бәсләјир. Бәс сән үрәјиндә Јеһоваја гаршы мәһәббәтин ҹүҹәрмәјә башладығы вахтлары хатырлајырсан?

⁵ Јеһова Аллаһ вә Онун нијјәтләри һаггында һәгигәти тәзә-тәзә өјрәндијин вә инанмаға башладығын вахтлары бир анлыға ҝөзүнүн өнүнә ҝәтир. О заман сән ҝүнаһы мирас алдығыны вә доғуландан бәри Аллаһы танымадығыны дәрк етмәјә башладын. Һәмчинин баша дүшдүн ки, Јеһова Мәсиһин васитәсилә сәнин үчүн Адәмин итирдији камиллији гајтармаг вә әбәди јашамаг имканы јаратмышдыр (Мәтта 20:28; Ромалылара 5:12, 18). Јеһованын сәнин уғрунда әзиз Оғлуну гурбан вердијини өјрәндин вә бу гурбанын нә гәдәр бөјүк әһәмијјәт дашыдығыны анламаға башладын. Бүтүн бунлар үрәјини риггәтә ҝәтирди вә гәлбиндә сәни бу гәдәр севән Аллаһа гаршы мәһәббәт ојанмаға башлады. (1 Јәһја 4:9, 10 ајәләрини оху.)

6. Әсил мәһәббәт неҹә ифадә олунур вә Аллаһа гаршы мәһәббәт сәни нәјә тәшвиг едиб?

⁶ Гејд етмәк лазымдыр ки, о һиссләр Јеһоваја олан әсил мәһәббәтин башланғыҹыдыр. Мәһәббәт јалныз һиссләрдән ибарәт дејил. Јахуд да «мән Јеһованы севирәм» демәк һәлә Аллаһы сөзүн әсил мәнасында севдијимизи ҝөстәрмир. Әсил мәһәббәт дә иман кими, әмәлләрдән бәлли олур (Јагуб 2:26). Мәсәлән, севдијимиз адама мәһәббәтимизи онун хошладығы ишләрлә ҝөстәририк. Буна ҝөрә дә Јеһоваја гаршы мәһәббәт үрәјиндә көк салдыгҹа, сәндә сәмави Атаны севиндирмәк үчүн дүзҝүн јашамаг арзусу  јаранды. Сән Јеһованын Шаһиди кими вәфтиз олунмусан? Әҝәр беләдирсә, демәли, һәјатда бу ән ваҹиб аддымы атмаға сәни Јеһоваја олан дәрин мәһәббәт вә сәдагәт тәшвиг едиб. Сән Јеһованын ирадәсини јеринә јетирмәк үчүн Она һәср олунмусан вә буну суда вәфтиз олунмагла символизә етмисән. (Ромалылара 14:7, 8 ајәләрини оху.) Јеһоваја вердијин вәди јеринә јетирмәк үчүн һәвари Јәһјанын нөвбәти сөзләринә диггәт јетирәк.

7. Аллаһын әмрләриндән бәзиләри һансылардыр вә онлара риајәт етдијимизи неҹә ҝөстәрә биләрик?

⁷ Һәвари Јәһја ҝөстәрир ки, «Аллаһы севмәк Онун әмрләринә риајәт етмәк демәкдир». Бурада сөһбәт һансы әмрләрдән ҝедир? Јеһова Өз Кәламында бизә бир сыра әмрләр верир. Мисал үчүн, О, сәрхошлуғу, әхлагсызлығы, бүтпәрәстлији, оғурлуғу вә јалан данышмағы гадаған едир (1 Коринфлиләрә 5:11; 6:18; 10:14; Ефеслиләрә 4:28; Колослулара 3:9). Аллаһын әмрләринә риајәт етмәк Мүгәддәс Китабда ајдын јазылмыш әхлаг нормаларына ујғун јашамаг демәкдир.

8, 9. Үзләшдијимиз вәзијјәтә аид Мүгәддәс Китабда конкрет ганун олмаса да, биз Јеһованын үрәјини неҹә шадландыра биләрик? Нүмунә чәк.

⁸ Лакин Јеһованын үрәјини севиндирмәк үчүн онун әмрләринә риајәт етмәк һәлә ишин јарысыдыр. Јеһова бизим һәр аддымымызы ганунларла мәһдудлашдырмыр. Ҝүн әрзиндә мүхтәлиф вәзијјәтләрлә үзләшә биләрик, лакин Мүгәддәс Китабда онларын һамысына аид конкрет ҝөстәришләр верилмир. Бәс онда һансы һәрәкәтимизин Јеһованын үрәјинҹә олаҹағыны неҹә биләк? Мүгәддәс Китабда Јеһованын дүшүнҹә тәрзи ачыг-ајдын тәсвир едилир. Аллаһын Кәламыны өјрәндикҹә биз Јеһованын нәји севиб, нәјә нифрәт  етдијини анлајырыг (Зәбур 97:10 ајәсини оху; Мәсәлләр 6:16—19). Биз Онун һансы әһвал-руһијјәни вә давраныш тәрзини бәјәндијини ајдын дәрк едирик. Јеһованын кејфијјәтләри вә әмәлләри барәдә даһа чох өјрәндикҹә, Онун бахышлары гәрарларымыза вә һәрәкәтләримизә бир о гәдәр тәсир ҝөстәрәҹәк. Беләликлә, үзләшдијимиз вәзијјәтләрә аид Мүгәддәс Китабда конкрет ганун олмајанда белә, әксәр һалларда Јеһованын ирадәсини мүәјјән едә биләҹәјик (Ефеслиләрә 5:17).

⁹ Мәсәлән, Мүгәддәс Китабда зоракылыг вә ҹинси әхлагсызлыг нүмајиш етдирилән телевизија верилишләринә вә ја филмләрә бахмамаг барәсиндә конкрет әмр јохдур. Мәҝәр конкрет ганун олмадығындан биз отуруб онлара бахаҹағыг? Биз Јеһованын белә шејләрә мүнасибәтини јахшы билирик. Онун Кәламында ајдын шәкилдә дејилир: «[Јеһова] зоракылығы севәнләрә нифрәт едир» (Зәбур 11:5). Орада һәмчинин дејилир: «Аллаһ әхлагсызлары вә зинакарлары мүһакимә едәҹәк» (Ибраниләрә 13:4). Бу сөзләрин үзәриндә дүшүнсәк, Јеһованын ирадәсини ајдын гавраја биләҹәјик. Она ҝөрә дә биз Аллаһымызын нифрәт етдији шејләрә бахыб әјләнмирик. Бу дүнја ијрәнҹ әхлагсызлығы зәрәрсиз әјләнҹә кими гәләмә верир, лакин биз билирик ки, белә «әјләнҹәдән» узаг ҝәзәндә Јеһованы севиндиририк *.

10, 11. Нәјә ҝөрә биз Јеһоваја итаәт едирик вә бу итаәткарлығымыз неҹә олмалыдыр?

¹⁰ Аллаһын әмрләринә илк нөвбәдә нәјә ҝөрә риајәт едирик? Нә үчүн һәр ҝүнүмүзү Аллаһын дүшүнҹә тәрзинә ујғун јашамаг истәјирик? Биз белә һәјат тәрзини ҹәзаланмамаг вә ја Аллаһын ганунларыны позанларын агибәтинә шәрик олмамаг мәгсәдилә сечмәмишик (Галатијалылара 6:7).  Бизим үчүн Јеһоваја итаәткар олмаг Ону севдијимизи нүмајиш етдирмәк үчүн ән ҝөзәл имкандыр. Ушаг атасыны мәмнун етмәјә чалышдығы кими, биз дә Јеһованы разы салмаг истәјирик (Зәбур 5:12). Јеһова Атамыздыр, биз Ону севирик. Јеһованын бизим һәјатымыздан разы галдығыны билмәк бизә мисилсиз мәмнунлуг вә һәдсиз севинҹ бәхш едир (Мәсәлләр 12:2).

¹¹ Биз Аллаһа көнүлсүз јох, үрәкдән, гејд-шәртсиз итаәт едирик *. Хошумуза ҝәлмәјән әмрләрә риајәт етмәкдән бојун гачырмыр вә ја тәкҹә раһат вә асан ганунлара әмәл етмәклә кифајәтләнмирик. Хејр, биз үрәкдән итаәт едирик (Ромалылара 6:17). «Әмрләрин мәнә әзиздир, онлары севирәм» дејән мәзмурчунун сөзләринә гошулуруг (Зәбур 119:47). Бәли, биз Јеһоваја үрәкдән итаәт едирик. Биз баша дүшүрүк ки, Аллаһ гејд-шәртсиз итаәтә лајигдир вә биздән мәһз буну ҝөзләјир (Ганунун тәкрары 12:32). Һәзрәти Нуһ Аллаһы севдијини онилликләр әрзиндә итаәткарлығы илә сүбут етмишди. Аллаһын Кәламында дејилир: «Нуһ Аллаһын бүтүн тапшырыгларыны јеринә јетирди. Она неҹә дејилмишдисә, елә дә етди» (Јарадылыш 6:22). Биз дә арзу едирик ки, Јеһованын ҝөзүндә Нуһ кими олаг.

12. Бизим итаәткарлығымыз Јеһованы нә вахт севиндирир?

¹² Јеһова бизим көнүллү итаәткарлығымыза неҹә мүнасибәт ҝөстәрир? Онун Кәламында дејилир ки, бунунла биз Онун гәлбини севиндиририк (Мәсәлләр 27:11). Доғруданмы бизим итаәткарлығымыз Каинатын Һөкмдарынын үрәјини севиндирир? Бәли, бу беләдир. Јеһованын севинмәсинә тутарлы сәбәбләр вар! Јеһова инсаны азад ирадә илә јарадыб. Јәни биз сечим етмәкдә сәрбәстик, биз Аллаһа итаәт едә  вә ја етмәјә биләрик (Ганунун тәкрары 30:15, 16, 19, 20). Јеһоваја үрәкдән итаәт едириксә вә бизи буна Аллаһа гаршы һәдсиз мәһәббәт тәшвиг едирсә, онда ҝөјдәки Атамызы чох-чох севиндирир, үрәјини шадландырырыг (Мәсәлләр 11:20). Бунунла биз һәмчинин ән доғру һәјат јолуну сечирик.

13, 14. Нәјә ҝөрә демәк олар ки, Аллаһын әмрләри ағыр дејил вә һансы нүмунә буну јахшы ҝөстәрир?

¹³ Һәвари Јәһја Јеһованын тәләбләри барәсиндә чох үрәкачан бир фикир сөјләјир: «Онун әмрләри... ағыр дејил» *. Доғрудан да, Јеһова биздән ағласығмаз, чәтин бир шеј тәләб етмир. Гејри-камиллијимизә бахмајараг, Аллаһын ганунларына итаәт етмәк мүмкүндүр.

¹⁴ Буну баша дүшмәк үчүн бир нүмунәни нәзәрдән кечирәк. Тәсәввүр ет ки, бир достун башга евә көчүр вә сәндән она көмәк етмәјини хаһиш едир. Чохлу гуту, бағлама дашымаг лазымдыр. Бу гуту вә бағламалардан бәзиләри чох јүнҝүлдүр вә онлары бир адам да дашыја биләр, диҝәрләрини исә јердән галдырмаға ики адамын ҝүҹү анҹаг чатыр. Достун бир нечә гуту ајырыб сәнә верир. Сәнҹә, о, ҝүҹүн чатмајан гутулары сәнин үчүн ајырарды? Әлбәттә ки, јох. О истәмәзди ки, сән онлары тәкбашына дашыјыб зәдәләнәсән. Ејнилә, бизим меһрибан вә гајғыкеш Аллаһымыз да биздән ҝүҹүмүз чатмајан әмрләрә риајәт етмәји тәләб етмир (Ганунун тәкрары 30:11—14). О, һеч  вахт истәмәз ки, биз ағыр јүкүн алтында әзиләк. Јеһова ҝүҹүмүзүн мәһдудлуғуну баша дүшүр, «чүнки неҹә јарандығымызы јахшы билир, торпаг олдуғумузу унутмур» (Зәбур 103:14).

15. Јеһованын әмрләринин бизим хејримизә олдуғуна нәјә ҝөрә әмин ола биләрик?

¹⁵ Бәли, Јеһованын әмрләри һеч дә ағыр дејил, әксинә онлар бизим хејримизәдир. (Әшија 48:17 ајәсини оху.) Буна ҝөрә дә Муса гәдим Исраил халгына демишди: «Јеһова бүтүн бу ганунлара риајәт етмәји, Аллаһымыз Јеһовадан горхмағы әмр етди ки, һәмишә хејир тапаг вә буҝүнкү кими, сағ-саламат олаг» (Ганунун тәкрары 6:24). Биз әмин ола биләрик ки, Јеһова ганун верәндә илк нөвбәдә бизим хејримизи, әбәди рифаһымызы дүшүнүр. Башга ҹүр ола да билмәз! Јеһова Аллаһын һикмәти һәдсиздир (Ромалылара 11:33). Демәли, О, нәләрин бизә фајда ҝәтирәҹәјини јахшы билир. Јеһова һәм дә мәһәббәтин тәҹәссүмүдүр (1 Јәһја 4:8). Мәһәббәт Онун варлығынын маһијјәтидир; сөјләдији һәр бир кәлмәнин вә ҝөрдүјү һәр бир ишин архасында мәһз мәһәббәт дурур. Хидмәтчиләринә бујурдуғу бүтүн әмрләринин әсасыны да мәһәббәт тәшкил едир.

16. Јашадығымыз позғун дүнјанын тәсиринә вә гејри-камил ҹисмимизин тәһрикинә бахмајараг, биз нәјин сајәсиндә итаәткар ола биләрик?

¹⁶ Бу, о демәк дејил ки, Аллаһа итаәт етмәк асандыр. Биз Шәририн әлиндә олан позғун дүнјанын тәсиринә мүгавимәт ҝөстәрмәлијик (1 Јәһја 5:19). Аллаһын ганунларыны позмаға тәһрик едән гејри-камил ҹисмимизлә мүбаризә апармалыјыг (Ромалылара 7:21—25). Анҹаг Аллаһы севириксә, зәфәр чала биләрик. Итаәткар олмагла өз мәһәббәтини сүбут етмәјә чалышанлара Јеһова көмәк олур. Аллаһ мүгәддәс руһуну јалныз «Она һөкмдар кими итаәт едәнләрә» верир (Һәвариләрин ишләри 5:32). Мүгәддәс руһ биздә  ҝөзәл бәһрә — итаәткар олмаға көмәк едән ҝөзәл кејфијјәтләр јетишдирир (Галатијалылара 5:22, 23).

17, 18. а) Бу китабда нәләри арашдыраҹағыг вә бу заман нәји јадда сахламалыјыг? б) Нөвбәти фәсилдә сөһбәт нәдән ҝедәҹәк?

¹⁷ Јеһова Өз ирадәсинин нәдән ибарәт олдуғуну вердији әхлаг нормалары вә принсипләр, һәмчинин башга үсулларла ҝөстәрир. Бу китабда биз мәһз бу барәдә өјрәнәҹәјик. Анҹаг бу заман бир сыра ваҹиб шејләри јадда сахламалыјыг. Унутмајаг ки, Јеһова бизи Онун ганунларына вә принсипләринә итаәт етмәјә мәҹбур етмир; О истәјир ки, биз үрәкдән итаәт едәк. Јеһованын арзусу одур ки, биз дүзҝүн һәјат сүрүб артыг индидән бунун хејрини ҝөрәк, ҝәләҹәкдә исә әбәди һәјата говушаг. Бәли, ҝәл Јеһоваја сидги-үрәкдән итаәт едәк вә бунунла да Она олан мәһәббәтимизи сүбут едәк.

¹⁸ Јеһова јахшыны писдән ајырмағымыз үчүн мәһәббәтлә бизә виҹдан әнамыны бәхш едиб. Лакин виҹданын етибарлы бәләдчи олмасы үчүн ону тәрбијә етмәк лазымдыр. Нөвбәти фәсилдә исә сөһбәт мәһз бу мөвзу барәдә олаҹаг.