27 de junio de 2021 maranjja, Machaq Mundon Jakirinakataki Bibliaw aymar arut presentasiwayi. Uka Bibliajja ¡Diosan servirinakapatakejj wali jachʼa bendicionapuniwa!

Machaq Mundon Jakirinakataki Bibliajja cheqapar suma lurtʼatawa, Diosajj servirinakapar amuytʼaykäna uka arunakarjam lurtʼatarakiwa (2 Timoteo 3:16). Yaqha Biblianakat sipansa ¿kunatsa aka Bibliajj wali sumajja? ¿Khitinakas aka Biblia lurasiñapatakejj yanaptʼawayapjje? ¿Kunatsa Machaq Mundon Jakirinakataki Bibliajj confiykañawa sasajj sissna?

Comercio internacional toqet yatjjatat Declan Hayes sat profesorajja akham sasaw qellqäna: “Sapa marajja taqe libronakat sipansa Bibliaw jukʼamppachajj aljasi” sasa. Ukampis awispachajja jaqenakajj cheqapar lurtʼata mä Biblia apsuñat sipansa, jukʼamp walja aljasispa uka Biblia apsuñatakiw wal chʼamachasipjje. Amuytʼañataki, Biblianak luriri mä empresajja yaqhep textonakajj aburrisiñjamawa sasakiw Bibliat apsjjapjje. Yaqha Biblianjja jichha tiempo jaqenakajj aka arunak liytʼasajj colerasipjjaspawa sasakiw Biblian yaqhep arunakap cambiapjje. Sañäni, yaqhep jaqenakan chuymapar purtʼañ munasajja Diosarojj “Awki-Tayka” sasakiw sisjjapjje.

Cheqpachansa Biblia traducirinakajj kunsa Diosan Jehová sutipampejj lurawayapjje ukaw jukʼamp llakkañajja (yaqhep yatjjatat jaqenakajj Diosan sutip “Yahvé” sasaw traducipjje). Nayra qellqatanakanjja Diosan sutipajj pusi consonantenakampiw hebreo arun qellqasirïna, jichha tiempon apnaqktan uka letranakarjamajja YHWH jan ukajj JHVH sasaw qellqasispa. Hebreo Arut Qellqatanakanjja * Diosan sutipajj niya 7.000 kutiw uñsti (Éxodo 3:15; Salmo 83:18). Diosajja jupan adoririnakapajj sutip yatipjjaspa, aytapjjarakispa ukwa muni.

Ukampis nayra maranakatpachwa judionakajj creencianakapampi apayasisajj Diosan sutip jan aytjjapjjänti. Tiempompejja uka pachpa creencianakampiw cristianonakajj apayasipjjarakïna (Hechos 20:29, 30; 1 Timoteo 4:1). Jichhürunakanjja Biblia traducirinakat waljaniw Diosan sutip lantejj Tatitu sasin uchapjje. Yamas jichha tiempon traducit yaqhep Biblianakanjja Juan 17:6 textonjja suti uka arjja apsjjapjjewa. Uka textonjja Jesusajj akham siwa: “Kawkïr jaqenakarutï jumajj aka mundot churkista ukanakaruw nayajj sutim uñtʼayta” sasa. Ukampis uka textojja Qullan Arunaka Biblianjj akham sasin traducitawa: “Kawkïrinaktejj akapach taypit ajlliskta nayaru churañataki, ukanakarojj yatiytwa jumajj khitïktatejj uka” sasa.

Yatjjatat yaqhep jaqenakajja Diosan sutip Tatitu arumpiw cambiapjje, ukham lurasajj kuntï mayninakajj lurañ yatipki ukarukiw arkasipkta sasaw sapjje. Yaqhepanakasti walja Biblianak aljañatakiw ukham lurapjjta sapjjarakiwa. * Ukampis Diosar jiskʼachir costumbrenak arkañajj janiw walïkiti sasaw Jesusajj säna (Mateo 15:6). Ukhamarus mä suti lanti mä titulomp uchañajj janiw Bibliarjamajj walïkiti. Jesucristorojj aka titulonakampiw uñtʼasiraki: “Diosan Arupa”, “reyinakans Reyipa” (Apocalipsis 19:11-16). ¿Jesusan sutip lanti ukham titulonakamp cambiañajj walikïskpachati?

Diosan sutipajj Bibliar uchañäspati janicha ukajj janiw amuyusarjamakejj amtañasäkiti. Diosan sutip Bibliat apsuñ toqetjja, Biblia traduciñat yatjjatat India markankir mä jaqejj akham sänwa: “India markankir jaqenakajja, janiw Diosan titulopak yatiñ munapkiti. Jupanakajj Diosan Sutipwa yatiñ munapjje, janitï Diosan sutip yatipkaspajja janiw jupampejj amigöpkaspati” sasa. Cheqas Diosar thaqerinakajj ukhamarakiw Diosan sutip yatiñ munapjje. Diosar uñtʼañatakisa, aleq chʼamakïkaspas ukham jan uñjañatakisa, cheqapun utjaskatap yatiñatakisa, sutip yatiñajj wali importantewa (Éxodo 34:6, 7). Bibliajj akham siwa: “Taqe khititï Jehová Diosan sutip artʼaski ukajj salvatäniwa” sasa (Romanos 10:13). Diosar adoririnakajj Diosan sutip aytapjjapuniñapawa.

Kunapachatï Machaq Mundon Jakirinakataki Griego Arut Qellqatanakajj 1950 maran inglés arut mistkäna ukhajja, taqenitakis mä suma bendicionapunïnwa. Hebreo Arut Qellqatanakajja part partew tunka maranakan apsusïna. 1961 maransti phoqatpachaw Bibliajj inglés arut presentasïna. Machaq Mundon Jakirinakataki Biblianjja Diosan Jehová sutipajj niya 7.000 kutiw Antiguo Testamenton uñsti. Griego Arut Qellqatanakanjja * 237 kutiw Diosan Jehová sutipajj kawkjanakantï uñstañapäkäna uka lugaranakar uchasiwayjje.

Kawkjanakantï Jehová sutejj uñstañapäkäna uka lugaranakar mayamp uchasitapajja Jehová Diosaruw jachʼañchi, jupar uñtʼañatakis yanaptʼarakistuwa. Amuytʼañataki, walja Biblianakanjja Mateo 22:44 textojj akham traducitawa: “Tatitojj Tatitojarojj siwa” sasa. Ukampis ukham traducitajj janiw khitis khitir parlaski uk amuyaskiti. Machaq Mundon Jakirinakataki Biblianjja Salmo 110:1 qellqatat aytasajj akham sasaw Mateo 22:44 textojj cheqapar traducisiwayi: “Jehová Diosajj akham sasaw Tatitujar säna”. Ukham traducitätapatjja Biblia liytʼirinakajj Jehová Diosajj Jesús Yoqapar parlaskatap qhan amuyapjjaspa.

Machaq Mundon Jakirinakataki Bibliajja Watch Tower Bible and Tract Society ukanakan luratawa, markan leyinakarjamajja jupanakaw Jehová Diosan Testigonakapar representapjje. Jehová Diosan Testigonakapajj 100 maranak jilaw oraqpachan Biblianak imprimiwayapjje lakirawayapjjaraki. Machaq Mundon Jakirinakataki Biblia Traducirinakajja, Jehová Diosan Testigonakapäpjjewa, jupanakaw aka Biblia wakichawayapjje. Jupanakajja janiw wali uñtʼatäñ thaqapkiti, ukatwa sutinakap jan yatisiñap munapkiti, jiwjjapjjani uka qhepatsa janiw sutinakap yatisiñap munapkiti (1 Corintios 10:31).

¿Kunatsa aka Bibliajj Machaq Mundon Jakirinakataki satajja? Kunjamtï 2 Pedro 3:13 texton siskejja jaqenakajj machaq mundor niyaw mantjjañäni sasaw taqe chuyma creyipjje, ukatwa aka Bibliajj Machaq Mundon Jakirinakataki satajja sasaw 1950 maran inglés arut mistkäna uka Biblian Qallta Arunakapan qhanañchäsïna. Uka Biblia traducirinakajj akham sasaw qellqapjjäna: ‘Tukusiskir mundot taqe kunas cheqapäjjani uka machaq mundor mantañkamajja, traduciski uka Biblianakajj Diosan Arupankir cheqapa ukhamarak qʼoma arunak kʼajtayapjjañapajj wali importantewa’ sasa.

Bibliajj cheqaparjam traducitäñapajj wali importantewa. Inglés aruru Biblia traducirinakajja, hebreo, arameo, griego uka arunakatwa traducipjjäna. Ukatakejja, uka tiempon jukʼamp suma qellqatanakajj utjkäna ukanakampiw yanaptʼayasipjjäna. Original qellqatanakarjam arut aru traduciñatakiw wal chʼamachasipjjäna, ukampis jichha tiempo liytʼirinakatak fácil amuykañwa lurapjjarakïna.

Machaq Mundon Jakirinakataki Bibliajj inglés arun confiykaña cheqaparu suma traducitätapatjja, yaqhep yatjjattʼat jaqenakajj wali sum parlapjjäna. 1989 maranjja, Israel markankiri hebreo arut yatjjattʼata Benjamin Kedar-Kopfstein sat mä profesorajj akham sänwa: “Hebreo arut Bibliajj kunjam luratasa, uka arut traducit Biblianakas kunjamarakisa uka toqet yatjjatkasajja, inglés arut Machaq Mundon Jakirinakataki sat Bibliatwa jilapartejj parlañ yatta. Sapa kuti ukham lurkta ukhajja, uka Biblia cheqaparu sum traduciñatakejj qhawqsa hebreo aru sum entiendiñatakejj chʼamachasiwayapjje ukwa amuyta” sasa.

Jehová Diosan Testigonakapajja, Machaq Mundon Jakirinakataki Biblia janiw inglés arutak apsupkiti, jan ukasti yaqha aru parliri jaqenakatakis lurapjjarakiwa. Aka Bibliajj phoqatpachasa jan ukajj mä partekisa 205 arunakanwa lurasi. Fácil traduciñatakejja, computadoran mä programaw lurasiwayi, ukhamat Biblian uñstki uka arunak sum yatjjatasin uka programar uchañataki. Traductoranakar yanaptʼañatakejja, Servicios de Traducción sat mä departamentow uttʼayasiwayi. Jehová Diosan Testigonakapan Cuerpo Gobernantepajja, Comité de Redacción toqew kunjamsa Bibliajj traducisiski uk uñji. Ukampis ¿kunjamsa Biblia traducipjje?

Nayraqatajja, bautisata mä qhawqha cristianonakaruw Biblia traducipjjañapatakejj ajllisi. Traductoranakajj sapak trabajiñat sipansa mä gruponwa trabajipjje, ukhamatwa traducit Bibliajj jukʼamp sumajj mistu, taqenin entiendkayarakiwa (Proverbios 11:14). Biblia traducirinakajj taqeniw nayraqatajj Jehová Diosan Testigonakapan qellqatanakap traducipjjäna, ukhamatwa jupanakajj traduciñatak experiencianëjjapjjäna. Ukatjja, Biblia traduciñatakejj kunanaksa amuytʼapjjañapa, Biblia traduciñatak utjki uka programanaksa kunjamsa apnaqapjjañapa uka toqetwa traductoranakajj capacitación katoqapjje.

Biblia cheqapar traducipjjañapatakisa taqenitak fácil amuykañ lurapjjañapatakisa, traductoranakarojj wali sumwa wakichtʼasiwayi. Puedischi ukhajj arut arwa Biblia traducipjjañapa, kuntï original qellqatan siski ukas janiw mayjtʼayasiñapäkiti. ¿Kunas ukham traducipjjañapatakejj yanaptʼi? Aka Bibliajj kunjam luratasa uk uñjapjjañäni. Machaq Mundon Jakirinakataki inglés arut Biblian uñstki uka importante arunakajj kunjamsa aymar arun apnaqasini ukwa traductoranakajj nayraqat amtapjjäna. Watchtower Translation System sat programanjja, Biblian apnaqaski uka arunakajj kuna yaqha arumpis traducisispa, kunjamsa sasirakispa ukaw utji. Ukatjja, inglés arun qellqatäki uka arunakajj kawkïr griego ukhamarak hebreo arunakatsa juti ukaw uñsti, ukhamat traductoranakajj griego ukat hebreo arunakajj kunjamsa yaqha textonakan inglés arur traducisiwayi uk uñjjatapjjañapataki. Kawkir arunakampis aymaran traducisini uk ajllisajja, traductoranakajj Biblia traduciñwa qalltapjjäna. Versiculonak tradusjjapjjäna ukhajja, ajllisiwaykäna uka arunakwa programajj uñstayäna.

Ukampis Biblia traduciñajja janiw original arunakan uñstki uka arunak yaqha arunakamp cambiasin traduciñakïkiti. Traductoranakajj wali amuyumpiw aymara arut ajllipkäna uka arunak uñakipapjjäna, ukhamat kuntï original qellqatajj sañ munki uka pachpa amuyasiñapataki. Kunjamtï arunakajj ordentʼaski ukajj fácil liytʼañaskiti, kunjamtï jaqenakajj parlapki ukham qellqatäskiti ukanakas sum amuytʼasïna. Qhawqsa aka Biblia traduciñatakejj chʼamachasiwayapjje ukajj Biblia pachpanwa amuyasi. Machaq Mundon Jakirinakataki aymara arut Biblianjja, Diosan Arupajj wali qhanawa, fácil liytʼkaña, fácil amuytʼkaña, original qellqatanakarjam traducitarakiwa. *

Machaq Mundon Jakirinakataki Bibliat yatjjattʼañamatakiw chʼamañchtʼapjjsma. Internetana jan ukajj JW Library aplicacionanwa liytʼasma. Jan ukasti Jehová Diosan Testigonakapan congregacionapanwa mä Biblia katoqaraskisma. Aymara arut aka Bibliajj cheqaparjam traducitawa, ukhamasti taqe confianzampiw Diosan arunakap liytʼasma. Liytʼkäta ukhajja, aka Bibliajj Diosan wali suma bendicionapätapwa amuyäta.