1. ¿“Diosat yatjjatañajj” kamsañsa muni, ukat kunjamsa Diosat yatjjatañajj kusisitäñatak yanaptʼistu?

 CHEQPACH kusisiñajja, janiw mä rato aleq kusistʼañakïkiti, jan ukasti wiñayatakiw kusisitäsna. Jesusajj mä Qollun Yatichkäna ukhajja, kunjamsa kusisitäsna ukwa yatichäna. Jupajj akham sänwa: “Kusisiñanïpjjew Diosat yatjjatañajj kunja wakiskirisa uk amuyasirinakajja” sasa (Mat. 5:3). Jaqenakajja jiwasar lurkistu uka Jehová Diosar wal uñtʼañ munañataki, jupar adorañatak luratätanwa, uk Jesusajj yatïnwa. “Diosat yatjjatañajj kunja wakiskirisa” sasin Bibliajj siski ukhajja, uka toqetwa parlaski. Niyakejjay Jehová Diosajj ‘kusisir Diosächejja’, jupar servipktan ukanakajj kusisitarakïsnawa (1 Tim. 1:11).

2, 3. 1) Jesusan arunakaparjamajj ¿khitinakamppachas kusisitäpjjaspa? 2) ¿Kunanakatsa aka yatichäwin yatjjataskañäni, ukat kunatsa ukanakat yatjjatañajj wakisiraki?

² ¿Jan kuna problemanïkañäni ukhakit kusisitäsna? Janiwa. Jesusajj Qollun Yatichkäna ukhajja, ‘wali llakitanakajj’ juchanakapat juchañchasipkchisa, jan walinakans uñjasipkchejja, kusisitäpjjaspawa sasaw qhanañchäna. ‘Cheqapar sarnaqapjjatap layku arknaqata uñjasirinakasa’, jan ukajj discipulöpjjatapat insultata uñjasirinakas kusisitäpjjaspawa sasaw Jesusajj sarakïna (Mat. 5:4, 10, 11). Ukampis ¿ukhamanakan uñjaskasas cheqapunit kusisitäsna?

³ Cheqpach kusisitäñatakejj janiw jakañ vidanjj taqe kunapunejj sumäñapäkiti, jan ukasti Diosat yatjjatañajj kunja wakiskirisa ukwa amuyasiñasa, Jehová Diosar jakʼachasiñasarakiwa, ukwa Jesusajj yatichäna (Sant. 4:8). ¿Kunjamsa uk lursna? Aka yatichäwinwa cheqpach kusisitäñatakejj kunanaksa lursna uk kimsa toqet yatjjataskañäni.

4. ¿Nayrïr yanaptʼarjamajj kunsa cheqpach kusisitäñatakejj lurañasa? (Salmo 1:1-3).

⁴ NAYRÏR YANAPTʼA: Cheqpach kusisitäñatakejja, Biblia liyiñasawa, yatjjatañasarakiwa. Jakaskakiñatakejja, jaqenakas uywanakas manqtʼasipjjañapawa. Ukampis jaqenakakiw Biblia liysna jan ukajj yatjjataraksna, uk lurañasajj wakisirakiwa. Ukatwa Jesusajj akham säna: “Jaqejj janiw tʼantʼa sapampikejj jakañapäkiti, jan ukasti Jehová Diosan lakapat mistki taqe uka arunakampi jakañapawa” sasa (Mat. 4:4). Ukhamajj sapüru Diosan Arup liyiñasa yatjjatañas wali wakiskiriwa. Salmo qellqerejj akham sasaw säna: ‘Kusisiñaniw Jehová Diosan leyipar wal munaski, uruy aruma Diosan leyipat liytʼi uka jaqejja’ sasa (Salmo 1:1-3 liytʼäta).

5, 6. 1) ¿Kunanaksa Bibliat yateqsna? 2) ¿Kunjamsa Biblia liyiñajj yanaptʼistu?

⁵ Niyakejjay Jehová Diosajj munaschistojja, kunjamsa kusisiñ jikjjatsna ukwa Biblian yatichistu. Mä arunjja kunatsa Diosajj jakañ churistu, kunjamsa jupan amigopäsna, juchanakasat perdonatäñatakejj kunsa lursna ukanakwa yatichistu. Mä suma suytʼäwi jutïritak jiwasar churañatak Diosajj arsuwayki uksa yaticharakistuwa (Jer. 29:11). Uka cheqa yatichäwinak Bibliat yatjjatasajja, chuymasajj wali kusisitawa.

⁶ Kunjamtï yatktanjja, Bibliajj jakäwisatakejj wali suma ewjjtʼanakaniwa. Uka ewjjtʼanakarjam sarnaqktan ukhajja, kusisitätanwa. Ukhamajj problemanakatejj llakisiychistu ukhajja, Jehová Diosan Arup liytʼañataki, kuntï liyktan uka toqet lupʼiñatak jukʼamp tiempo apsusiñasawa. Jesusajj akham sänwa:  “¡Khitinakatejj Diosan arunakap istʼapki phoqapkaraki [ukanakajj] kusisipjjpan!” sasa (Luc. 11:28).

7. ¿Diosan Arupat liyktan ukhajj kunas beneficio apsuñatakejj yanaptʼistaspa?

⁷ Diosan Arupat liykasajja, kuntï liyktan ukat “disfrutañatakejj” tiempo apstʼasiñasawa. ¿Kunjamsa uk lursna? Uk amuytʼañatakejj maynis wal gustkistu uka manqʼa phaytʼarapistaspa ukham sañäni. Ukampis wali apuratätas layku jan ukajj walja problemanakanïtas laykojja, janiw sum manqtʼasjjsnati, ukhamak mallantjjaraksna. Ukat manqʼañ tukuyjjasakiw apur apur manqtʼasitas amuyasjjsna. Manqʼa disfrutañatakejj kʼachitatak manqʼasiriskayäta sasaw saraksna. Biblia liyiñampejj niya ukhamarakiw pasistaspa. Wali apuratätas laykojja, kuntï Jehová Diosajj yatichañ munkistu uk disfrutañatakejj janiw tiempo apsusjjsnati. Ukhamajj Biblia liykasajj disfrutañatak tiempo apstʼasipjjañäni, ukatakejj kunanakas pasaski ukanak amuytʼañasawa, Biblian parlki uka jaqenakan arunakap istʼksnas ukham amuytʼañasawa, kuntï liyktan uka toqetsa lupʼiñasarakiwa. Taqe ukanaktï lurañäni ukhajja, jukʼamp kusisitäñäniwa.

8. ¿Kunjamsa ‘suma phoqeri amuyasir esclavojj’ lurañanakapamp phoqaski? (Nota liytʼarakïta).

⁸ Jesusajj ‘suma phoqeri amuyasir esclavoruw’ jiwasar tiempopar manqʼa churañapatakejj encargawayi, ukhamajj Diosan arunakapamp suma chʼamañchtʼatätanwa (Mat. 24:45). b Suma phoqeri esclavojj wakichtʼki taqe uka manqʼañanakatjja, Diosan amuytʼayat Qellqatanakaw jukʼamp wakiskirejja (1 Tes. 2:13). Kunjamtï Biblian qhanañchaskejja, manqʼar uñtat uka yatichäwinakaw kunjamsa Jehová Diosajj amuyi uk uñtʼañatak yanaptʼistu. Ukatwa Yatiyañataki ukat ¡Sartapjjañäni! revistanaksa, Internetan jw.org cheqan uñstki uka yatichäwinak liytanjja. Semanana ukat seman tukuyanakajj utjki uka tantachäwinakatakis wakichtʼastanjja, arusantï utjchi ukhajja sapa phajjsejj mistki uka JW Broadcasting^® programs uñtaraktanwa. Diosajj walj churkistu uka manqʼar uñtat Biblian yatichäwinakap aprovechtʼañäni ukhajja, payïr yanaptʼarjam lurañatakiw yanaptʼistani, ukaw cheqpach kusisiña churarakistani.

9. ¿Payïr yanaptʼarjamajj kunsa cheqpach kusisitäñatakejj lurañasa?

⁹ PAYÏR YANAPTʼA: Cheqpach kusisitäñatakejja, Jehová Diosajj churkistu uka leyinakar istʼañasawa. Mä salmo qellqeri chachajj akham sänwa: “Taqe khitinakatï Jehová Diosar ajjsarapki ukanakajj kusisitäpjjewa, taqe khitinakatï jupan thakinakapan sarnaqapki ukanakajj kusisitäpjjewa” sasa (Sal. 128:1). Jehová Diosar ajjsarañajj jupar wali respetomp uñjaña sañ muni. Ukham respetatasatjja, kunatï jupar jan gustki ukanak janiw lurktanti (Prov. 16:6). Ukatwa kunatï walïki jan walïkaraki uka toqet parlir leyinakaparjama, Bibliankki uka leyinakaparjam sarnaqañatak chʼamachasiskaktanjja (2 Cor. 7:1). Kunarutï Jehová Diosajj munaski uk lurañäni, ukat kuntï jupajj uñiski uk jan lurkarakiñäni ukhajja, jukʼamp kusisitäñäniwa (Sal. 37:27; 97:10; Rom. 12:9).

10. Kuntï Diosajj munki uk yatkstansa, ¿kunampsa lurañasa? (Romanos 12:2).

¹⁰ (Romanos 12:2 liytʼäta). Inas maynejj kunatï walïki jan walïkaraki uk sañatakejj Jehová Diosan autoridadanïtap yatchi, ukampis Jehová Diosan leyinakapar istʼañaparakiwa. Uk amuytʼañatakejj akham sañäni. Mä gobiernojja, qhawqsa choferonakajj automp tʼijupjjañapa  uka leyinak uskuñatakejj derechoniwa. Uk maynejj yatiskaspawa, ukampis uka leyinakar janiw istʼañ munkaspati. Ukatwa qhawqtï tʼijuñapäki ukat sipans jukʼamp tʼij-jjaspa. Jiwasampejj ukhamarakiwa, Jehová Diosan leyinakapar respetañajj qhawqha wakiskirisa uk cheqpachapun creyitasajj luratanakasanwa qhan uñjasini (Prov. 12:28). Davidajj ukhamwa amuyäna, ukatwa Jehová Diosarojj akham säna: “Jumaw jakañ thakjja uñtʼayistajja. Juma nayraqatanjja wali kusisiñaw utji, kupëjjamankañajj wiñayatak kusiskañawa” sasa (Sal. 16:11).

11, 12. 1) ¿Llakitäktan jan ukajj desanimatäktan ukhajj kuna toqetsa amuyasiñasa? 2) ¿Kunjamsa Filipenses 4:8 textojj kusistʼañanak ajlliñatak yanaptʼistu?

¹¹ Llakitäktan jan ukajj desanimatäktan ukhajja, problemanakasat armasiñatakejj inas yaqhep kusistʼañanak thaqsna, ukajj walikïskiwa. Ukampis wal amuyasiñasawa, janiw kuntï Jehová Diosajj uñiski uk lurañasäkiti (Efes. 5:10-12, 15-17).

¹² Apóstol Pablojj Filipos markankir cristianonakar qellqkäna uka cartapanjja, taqe kunatejj cheqäki, taqe kunatejj qʼomäki, taqe kunatejj munkañäki, taqe kunatejj sumäki ukanakat amuytʼasipkakim sasaw säna (Filipenses 4:8 liytʼäta). Apóstol Pablojj janis kusistʼañanakatpun parlkchïnjja, uka arunakaparjamaw kusistʼañanak ajlliñasa. ¿Janit akanak lurañ amtksna? Uka versiculon “ukanakat” siski uka aru lantejja, “cancionanakat”, “peliculanakat”, “libronakat”, “videojuegonakat” arunakamp cambiapjjañäni. Ukaw kawkïrinakas Jehová Diosatakejj wali jan walïkaraki uk amuytʼasiñatak yanaptʼistani. Jehová Diosan leyinakaparjam jakañwa muntanjja (Sal. 119:1-3). Ukhamtï lurañänejja, qʼoma concienciampiw kimsïr yanaptʼarjam lurañäni, ukaw cheqpach kusisiñ churarakistani (Hech. 23:1).

13. ¿Kimsïr yanaptʼarjamajj kunsa cheqpach kusisitäñatakejj lurañasa? (Juan 4:23, 24).

¹³ KIMSÏR YANAPTʼA: Jakäwisanjja Jehová Diosar adorañaw nayrankañapa. Niyakejjay Jehová Diosajj jiwasan Luririsächejja, adoratäñatakejj derechoniwa (Apoc. 4:11; 14:6, 7). Ukhamajj kunjamtï jupajj munki ukhamwa “espiritumpi cheqampi” adorañasa, ukaw jakäwisan jukʼamp importanteñapa (Juan 4:23, 24 liytʼäta). Biblian cheqa yatichäwinakaparjam Diosar adorañatakejja, espíritu santopampiw irpayasiñasa. Jakasktan uka cheqantï predicacionajj jarkʼatächejja, jiwasatakejj Diosar serviñaw jukʼamp importanteñapa. Jichhürunakanjja, Jehová Diosan Testigopätap laykojj 100 jilaw jilat kullakanakasajj carcelan llawintatäpjje. c Ukhaman uñjaskasinsa, jupanakajj kusisitäsipkakiwa, Diosar orasiñatakisa, Bibliat yatjjatañatakisa, Diosampit Reinopampit yaqhanakar parlañatakisa wal chʼamachasipjjaraki. Insultatpachasa arknaqatpachasa, jiwasajj kusisitakïsktanwa, kuna laykutejj Jehová Diosaw jiwasampïski, juparakiw ukanakat bendisiskistani (Sant. 1:12; 1 Ped. 4:14).

14. ¿Kunas Tayikistán markankir mä wayna jilatarojj pasäna, ukat kunatsa ukhaman uñjasïna?

¹⁴ Yaqhep jilat kullakanakasajj kunayman jan walinakan uñjasipjje, ukham jan walinakan uñjaskasasa yatjjataniwayktan uka kimsa yanaptʼanakarjam sarnaqasajj wali kusisitäpjjewa. Yovidón Boboyónov jilatat amuytʼañäni, jupajj 19 maranakaniwa, Tayikistán markatawa. 4 de octubre de 2019 maranjja, juparojj cuartelar jan sarañ munatapat munkir jan munkirwa utapat apapjjäna. Walja phajjsinak  carcelar llawintasajja, mä jan wali jaqerjamaw uñjapjjäna. Jupar ukham jan wal lurapjjatapjja, walja markanakanwa noticieronakan yatiyasirakïna. Mä juramento militar lurañapatakisa mä uniforme militar uchasiñapatakisa, juparojj nuwjapjjänwa sasaw yatiyasïna. Ukatjja tribunalajj juchaniw sasaw uka jilatat säna, chʼama tukuñ trabajonakajj luraski ukaruw apayapjjarakïna. Qhepatsti presidentejj jan juchanitwa jupar uñj-jjäna, carcelat apsupjjañapatakiw ordenjjarakïna. Ukham yantʼan uñjasisajja, Yovidón jilatajj janiw Diosat jitheqtkänti, kusisitakïskarakïnwa. ¿Kunjamsa uk luräna? Jehová Diosat yatjjatañajj kunja wakiskirisa uk jupajj amtapunirïnwa.

15. ¿Kunjamsa Yovidón jilatajj carcelankkasajj Diosat yatjjataskakïna?

¹⁵ Yovidón jilatajja, carcelan janiw Biblianïkänti, ni Bibliat apstʼat mä qellqatanïkänsa, ukhampachas jupajj Diosat yatjjataskakïnwa. ¿Kunjamsa uk luräna? Jilat kullakanakajj jupatak manqʼañanak aparapipjjäna ukhajja, pachpa bolsanakaruw ukürutak apstʼat texto qellqtʼarapipjjerïna. Ukhamatwa Yovidón jilatajj sapürus Bibliat liytʼaspäna, ukat amuytʼarakispäna. Carcelat mistjjäna ukhajja, sinti jan walinakan janïr uñjasipki ukanakarojj akham sasaw ewjjtʼäna: “Jehová Diosar jakʼachasiñatakejj jichhatpachwa librëkasin jukʼamp aprovechtʼapjjañama. Ukatakejja, Bibliat  liytʼañampi, Bibliat apstʼat qellqatanakasat liytʼañampiw wali importantejja” sasa.

16. ¿Kunas Yovidón jilatatakejj nayrankäna?

¹⁶ Yovidón jilatasajja, Jehová Diosan leyinakaparuw istʼäna. Jan wali amuyunakamp apayasiñat sipansa, jan walinak lurañat sipansa, jupatakejj Jehová Diosaw nayrankäna, kunatï Diosatakejj importantëki ukaw nayrankarakïna. Jehová Diosan wali suma luratanakapat amuytʼapunirïnwa. Sapa alwaw jamachʼinakar cantir istʼasajj sartirïna. Arumanakasti phajjsimpi warawaranakampwa uñchʼukirïna. Jilatajj akham sänwa: “Jehová Diosan taqe uka regalonakapajj wal kusisiyitäna, chʼamañchtʼarakitänwa” sasa. Jehová Diosaw Biblian yatichäwinakapsa kunanakatï jakañatak wakiski ukanaks churistu. Ukanak wali valoranit uñjktan ukhajja, kusisitätanwa, uka kusisiñaw aguantañatakejj chʼam churistu.

17. Maynitï Yovidón jilatjam uñjaschejja, ¿kunjamsa 1 Pedro 1:6, 7 textojj yanaptʼaspa?

¹⁷ Yovidón jilatatakejja, Jehová Diosar adorañaw nayrankarakïna. Jupatakejj Diosar taqpach chuymamp serviñajj wali importantënwa. Jesusajj akham sänwa: “Jehová Diosamaruw adorañama, jupa saparukiw serviñama” sasa (Luc. 4:8). Comandantenakasa soldadonakasa, Yovidón jilatajj Jehová Diosar jan confiyjjaspa ukwa munapjjäna, ukampis jupajj uruy arumaw Jehová Diosar wal orasïna. Jupajj aguantaskakiñataki, Diosat jan jitheqtañatakiw oracionan wal ruwtʼasïna. Yovidón jilatajj kunayman jan walinaksa aguantañapäkchïnjja, janiw Diosat jitheqtkänti. Ukanak pasatatjja, kunatï jupan jan utjkäna uk jikjjatasajj wal kusisïna, kuna laykutejj utat apapkäna, nuwjapkäna, carcelar llawintapkäna uka qhepatjja, jupajj jukʼampiw Diosar confiyjjäna, Diosar confiyatapas yantʼataw uñjasirakïna (1 Pedro 1:6, 7 liytʼäta).

18. ¿Kunjamatsa kusisitakïsksna?

¹⁸ Jehová Diosajja, kunsa jaqenakajj cheqpach kusisitäñatakejj necesitapjje uk yatiwa. Aka yatichäwin yatjjataniwayktan uka kimsa yanaptʼanakarjam lurañäni ukhajja, jan walinakan uñjaskasas kusisitakïskañäniwa. Ukatsti akhamwa sarakiñäni: “¡Kawkïr markatejj Jehová Diosat Diosanïki uka markajj kusisitawa!” sasa (Sal. 144:15).