1, 2. 1) ¿Kunatsa apóstol Pablojj “munasiñaw jilanki” sasin säna? 2) ¿Kuna jisktʼanakatsa yatjjataskañäni?

 APÓSTOL Pablojj Diosar confiyañata, suytʼañata, munasiñat parlkäna ukhajja, akham sasaw tukuyäna: “Uka kimsatjja munasiñaw jilanki” sasa (1 Cor. 13:13). ¿Kunatsa ukham säna? Kuna laykutejj jutïrinjja, janiw Diosajj machaq mundot arsuwayki uka promesanakapar confiyañajj wakisjjaniti, cheqas kuntï suytʼasktan ukajj phoqasjjaniwa. Ukampis Jehová Diosampir jaqenakampir munasiñajj wakisiskakiniwa. Uka munasiñajj wiñayatakiw jiltaskakini.

² Niyakejjay munasiñ uñachtʼayañajj wakisiskakchinejja, aka kimsa jisktʼanakatwa yatjjataskañäni. Maya, ¿kunatsa maynit maynikam munasiñasa? Paya, ¿kunjamanakatsa maynit maynikam munasitas uñachtʼaysna? Kimsa, ¿kunjamsa taqe chuym munasiskaksna?

3. ¿Kuna razonanakatsa maynit maynikam munasiñasa?

³ ¿Kunatsa maynit maynikam munasiñasajj wali wakiskirejja? Maynit maynikam munasisajja, cheqpach cristianötaswa uñachtʼaytanjja. Jesusajj akham sasaw apostolonakapar säna: “Jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35). Ukhamarus munasiñajj mayachtʼistuwa. Ukatwa apóstol Pablojj “munasiñajja jaqenakarojj wali sum mayachthapi” sasin säna (Col. 3:14). ¿Kuna yaqha razonatsa jiwaskam munasiñasajj wali wakiskirirakejja? Apóstol Juanajja, cristiano jilat kullakanakaparojj akham sasaw qellqäna: “Khititejj Diosar munaski ukajja, jilaparojj munasiñaparakiwa”  sasa (1 Juan 4:21). Ukhamajj jilat kullakanakasar munasisajja, Jehová Diosar munasitaswa uñachtʼayaraktanjja.

4, 5. Diosar munasiñampi jilat kullakanakasar munasiñampejj kunansa mayakïpjje uk mä uñachtʼäwimp qhanañchtʼam.

⁴ Diosar munasiñampi jilat kullakanakasar munasiñampejj ¿kunansa mayakïpjje? Uk amuytʼañatakejja, chuymasampi cuerposan mayni partenakapampejj kunansa mayakïpjje uka toqet parltʼañäni. Mä doctorajja, mä jaqen chuymapajj kunjamäskisa uk yatiñatakejj amparapan venapwa llamktʼi. ¿Kunsa ukat yateqsna?

⁵ Mä doctorajja, mä jaqen chuymapajj walikïskiti janicha uk yatiñatakejj venapajj sumti saraski janicha ukwa uñjañapa. Jiwasampejj ukhamarakiwa, Jehová Diosar munasitasajj kunjamäskisa uk yatiñatakejja, mayninakar taqe chuymat munasisktan janicha ukwa amuyañasa. Jiwasatï jilat kullakanakasar jan taqe chuyma munasitas amuyasstan ukhajja, inas Jehová Diosar jan taqe chuyma munasjjarakstanti. Ukampis jiwasatï jilat kullakanakasar sapa kuti munasiñ uñachtʼaystanjja, Jehová Diosar taqe chuyma munasitaswa ukajj uñachtʼayi.

6. ¿Kunsa jilat kullakanakasar jan taqe chuym munasitasajj uñachtʼayi? (1 Juan 4:7-9, 11).

⁶ Jilat kullakanakasar jan taqe chuym munasitasajj ¿kunsa uñachtʼayi? Jehová Diosamp wali sum apasktan ukajj jan walinkatapwa uñachtʼayi. Ukwa apóstol Juanajj akham sasin qhanañchäna: “Maynitejj jilapar uñjkasas jan munaskchi ukhajja, janirakiw jan uñjkañ Diosarojj munaskaspati” sasa (1 Juan 4:20). ¿Kunsa ukat yateqsna? Maynit maynikam munasisakiw Jehová Diosar kusisiysna (1 Juan 4:7-9, 11 liytʼäta).

7, 8. ¿Kunjamanakatsa mayninakar munasitas uñachtʼaysna?

⁷ “Maynit maynikam munasipjjam” siski uka mandatojj walja kutiw Biblian uñsti (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Ukampis munasiñajj chuyma manqhanwa jilti, janiw khitis uk uñjkaspati. Ukhamajj ¿kunanaksa mayninakar munasitas uñachtʼayañatakejj lursna? Arunakasampi luratanakasampiw uk uñachtʼaysna.

⁸ Walja toqenakatwa jilat kullakanakasar munasitas uñachtʼaysna. Bibliajj uka toqet mä qhawqhanak aka textonakampiw qhanañchistu: “Maynit maynikamajj cheq parlapjjañama” (Zac. 8:16). “Maynit maynikamas sumankapjjarakim” (Mar. 9:50). “Maynit maynikam respetasiñansa nayrankapjjam” (Rom. 12:10). “Maynit maynikam katoqtʼasipjjam” (Rom. 15:7). “Perdonasisipkakim” (Col. 3:13). “Jan waltʼäwinakanjja maynit maynikam yanaptʼasisipkakim” (Gál. 6:2). “Maynit maynikam chuymachtʼasisipkakim” (1 Tes. 4:18). “Maynit maynikamas yanaptʼasisipkakim” (1 Tes. 5:11). “Maynit maynikam oración lurapjjarakim” (Sant. 5:16).

9. Mayninakar chuymachtʼasin munasiñ uñachtʼayañajj wali wakiskiriwa, ¿kunatsa ukham sistanjja? (Fotonak uñjjattʼarakïta).

⁹ Párrafo 8 ukan parlaniwayktan uka munasiñ kunjamanakatsa uñachtʼaysna uk jukʼamp sum yatjjataskakiñäni. Apóstol Pablojj akham sänwa: “Maynit maynikam chuymachtʼasisipkakim” sasa. ¿Kunatsa mayninakar chuymachtʼasaw munasiñ uñachtʼaytanjja sasin sistanjja? Apóstol Pablojj griego arut “chuymachaña” siskäna ukajja, “maynejj  jan waltʼäwinakan uñjaski ukhajj jupar chuymachtʼañatak ladopan saytʼatäña sañ muni” sasaw Bibliat parlir mä qellqatajj qhanañchi. Ukhamajj tʼaqesiskir mä jilatar chuymachtʼtan ukhajja, wiñay jakañar apki uka thakinjam saraskakiñapatakiw yanaptʼtanjja. Sapa kuti jilat kullakanakasar chuymachtʼtan ukhajja, jupanakar munasitaswa uñachtʼaytanjja (2 Cor. 7:6, 7, 13).

10. ¿Kunatsa sinttʼasiñampi chuymachtʼañampejj mayakïpjje?

¹⁰ Maynit sinttʼasiñampi chuymachtʼañampejj mayakïpjjewa. ¿Kunatsa ukham sistanjja? Maynejj tʼaqesiskir mä jaqet sinttʼaski ukhajja, chuymachtʼañwa muni, jupar yanaptʼañatakis mä kuns lurarakiwa. Nayraqatjja, maynit sinttʼastanwa, ukatsti ukaw chuymachtʼañatakejj yanaptʼistu. Jehová Diosampejj ukhamarakiwa. Jehová Diosajj jaqenakat sinttʼasisaw jupanakar chuymachtʼi sasaw apóstol Pablojj qhanañchäna. Jehová Diosaw “wali munasiñampi khuyaptʼayasiri Awkejja, taqe kunan chuymachtʼasiri Diosarakiwa” sasaw sarakïna (2 Cor. 1:3). Apóstol Pablojj “wali munasiñampi khuyaptʼayasiri” sasinjja, sinttʼasiñatwa parlaskäna. Ukatsti Jehová Diosarojj ‘wali munasiñampi khuyaptʼayasiri Awki’ sasaw sarakïna, kuna laykutejj Jehová Diosatwa sinttʼasiñajj juti. Uka sinttʼasiñapatwa “kunayman llakinakan” uñjastan ukhajj jiwasar chuymachtʼistu (2 Cor. 1:4). Kunjamtï jaqenakajj uma jalsut umtʼasajj jan umat pharjatäjjapkejja, ukhamarakiw Jehová Diosajj tʼaqesirinakan chuymap chuymachtʼi, sumak jikjjatasipjjañapatakis yanaptʼi. ¿Kunas Jehová Diosjam mayninakat sinttʼasiñatakis chuymachtʼañatakis yanaptʼistani? Mayninakar chuymachtʼir chuymanïñatakiw chʼamachasiñasa. Uka toqet mä qhawqhanak uñjañäni.

11. Colosenses 3:12 ukat 1 Pedro 3:8 textorjamajj ¿kunanakas mayninakar munasiñatakis chuymachtʼañatakis yanaptʼistani?

¹¹ ¿Kunanakas sapa kuti munasiñatakis chuymachtʼañatakis yanaptʼistani? Sinttʼasirïña, jilapurjam munasiña, suma chuymanïñaw yanaptʼistani (Colosenses 3:12; 1 Pedro 3:8 liytʼäta). Sinttʼasiri jan ukajj yaqha ukham suma chuymanïñajja, jan walinakan uñjasipki ukanakar chuymachtʼañatakiw yanaptʼistu. Jesusajj akham sasaw qhanañchäna: “Mä jaqejj kunatï chuymapan phoqantatäki ukanak parlaraki. Suma jaqejja, kunatï sumäki ukwa chuymapat apsuni” sasa (Mat. 12:34, 35). Ukhamajj jilat kullakanakasar chuymachtʼtan ukhajja, jupanakar munasitaswa uñachtʼaytanjja.

12. 1) ¿Kunatsa wal amuyasiñasa? 2) ¿Kuna jisktʼarus qhanañchaskañäni?

¹² “Maynit maynikam munasisipkakiñäni” siski uka mandatorojj taqeniw istʼañasa (1 Juan 4:7). Ukampis janiw kuntï Jesusajj siskäna uk armasiñasäkiti, jupajj akham sänwa: “Niya taqe jaqenakan munasiñapaw thayarani” sasa (Mat. 24:12). Uka arunakampejj discipulonakapat waljanejj janis munasjjapjjaspa ukham janiw Jesusajj sañ munkänti. Ukhamäkchisa, akapachan jan munasiñajj utjki ukamp jan apayasiñatakejj amuyasiñasawa. Uk yatisajja, aka jisktʼar qhanañchañäni: ¿Jilat kullakanakasar taqe chuymat munasisktan janicha uk kunjamatsa yatsna?

13. ¿Kunapachas taqe chuymat mayninakar munastan janicha ukajj yantʼat uñjasispa?

¹³ Jakäwisan mä kunas pasi ukhajj kunjamsa ukar saykattan ukhaw jilat kullakanakasar taqe chuymat munasisktan janicha uk yatsna (2 Cor. 8:8). Ukanakat mayjja, apóstol Pedrow akham sasin qhanañchi: “Taqe kunat  sipansa, maynit maynikam wal munasipjjam, khititejj munasirïki ukajja walja juchanakwa perdoni” sasa (1 Ped. 4:8). Ukhamajj jilat kullakanakasajj pantjasipjje jan ukajj jan wal lurapkistu ukhaw munasiñasajj yantʼat uñjasi.

14. 1 Pedro 4:8 textorjamajj ¿kunjam munasiñsa uñachtʼayañasa? Mä uñachtʼäwimp uk qhanañchtʼam.

¹⁴ Pedron arunakapat jukʼamp sum yatjjatañäni. Versículo 8 ukan nayrïr partepanjja, “wal munasipjjam” sasaw sistu. Pedrojj “wal” siskäna ukajja, griego arun “janatataña” sañ muni. Uka versiculon payïr partepajja, jilat kullakanakasan pantjasitanakap wali munasiñat perdonañatwa parli. Munasiñajj kunjamtï mä telajj imjjatki ukhamawa, ukampis janiw mä juchaksa ni pä juchaksa imjjatkiti, jan ukasti “walja juchanakwa” imjjati. Griego arun “imjjataña” sasinjja “perdonañatwa” parli. Kunjamtï mä jiskʼa telajj mä manchar imjjatkejja, ukhamarakiw munasiñajj mayninakan pantjasitanakapsa jan wali luratanakaps imjjataspa jan ukajj perdonaspa.

15. ¿Mayninakar taqe chuym munastan ukhajj kunsa jikjjattanjja? (Colosenses 3:13).

¹⁵ Jilat kullakanakasarojj taqe chuymaw munasiñasa, ukhamatwa pantjasitanakap  perdonañajj chʼamäkani ukhas perdonañäni (Colosenses 3:13 liytʼäta). Mayninakar perdonktan ukhajja, taqe chuyma munasirïtaswa uñachtʼaytanjja, Jehová Diosarus kusisiyaraktanwa. Mayninakan pantjasitanakap perdonañatakisa, mayninakan luratanakapamp jan chuym ustʼayasiñatakis ¿kunas yanaptʼarakistaspa?

16, 17. ¿Mayninakan jiskʼa pantjasitanakap perdonañatakejj kunas yanaptʼarakistaspa? Mä uñachtʼäwimp uk qhanañchtʼam. (Fotonak uñjjattʼarakïta).

¹⁶ Mayninakan jan wali luratanakap uñjañat sipansa, suma luratanakap uñjañatak chʼamachasim. Mä qhawqha jilatanakampis jumajj kusistʼkasma ukham amuytʼañäni, tukuyarojj taqeniw mä foto apsusiñ amtapjjtajja. Mä suma fotonïñatakejj paya jan ukajj kimsa fotonakwa apstajja. Ukampis mä fotonjja, mä jilatan jan sum mistutapwa uñjtajja. ¿Kunsa uka fotompejj luräta? Uka foto borrsusajj suma fotonakapwa imasjjäta, kuna laykutejj uka pä fotonakanjja, taqeniw wali sum lartʼasisipki.

¹⁷ Kunanaktï amtktan ukanakajj imasktan uka fotonakamp sasiwa. Jilapartejja, kunjamsa jilat kullakanakasampejj kusistʼayätan ukwa amtastanjja. Ukampis jilat kullakanakamp kusistʼkasajj mä jilatan jan wal parlatapsa jan ukajj jan wal lurataps uñjsna ukham amuytʼañäni. ¿Uka jilatan parlataps lurataps wiñayatakit amtañäni? ¿Janit mä fotorjam borrsuñajj wakiskaspa? (Prov.  19:11; Efes. 4:32). Niyakejjay uka jilatamp wali sum kusistʼatas amtstanjja, jiskʼa pantjasitanakap mä fotorjamaw borrsuñasa. Antisas “suma fotonakwa” wali munat imasiñasa.   

18. ¿Kunsa aka yatichäwin yatjjatawaytanjja?

¹⁸ ¿Kunatsa taqe chuyma munasiskakiñasa? Kunjamtï yatjjatawayktanjja, jilat kullakanakasar munasisajj Jehová Diosar munasitaswa uñachtʼaytanjja. ¿Kunjamsa jilat kullakanakasar munasitas uñachtʼaysna? Mä toqetjja, jilat kullakanakasar chuymachtʼasaw uñachtʼaysna. Ukham luraskakiñatakejj sinttʼasirïñaw wakisi. ¿Kunjamsa taqe chuyma munasiskaksna? Mayninakan pantjasitanakap perdonañatak chʼamachasisaw uk lursna.   

19. ¿Kunatsa jichhürunakan munasiñasajj wali wakiskirejja?

¹⁹ ¿Kunatsa jichhürunakan maynit maynikam munasiñajj wali wakiskirejja? Kuntï Pedrojj siskäna uk amuytʼañäni, jupajj akham sänwa: “Taqe kunan tukusïwipaw jakʼachasinjje. Ukhamajj […] maynit maynikam wal munasipjjam” sasa (1 Ped. 4:7, 8). Akapachan tukusiñap jakʼachasisinkipan ¿kun pasañapsa suytanjja? Discipulonakapat parlkasinjja, Jesusajj akham sänwa: “Sutij laykusti taqe markankir jaqenakaw uñisipjjarakïtam” sasa (Mat. 24:9). Jaqenakan uñisitpachas Jehová Diosar serviskakiñatakejja, mayachtʼatäñasawa. Supayajj tʼaqjtayañwa munistu, ukampis jiwasatï maynit maynikam munasiñäni ukhajja, janiw Supayan amtap phoqasiykañäniti, kuna laykutejj “munasiñajja jaqenakarojj wali sum mayachthapi” (Col. 3:14; Filip. 2:1, 2).