1, 2. ¿Kunatsa Jehová Diosajj janis oracionanakasar jayskistaspa ukham amuyassna?

 “JEHOVÁ DIOSAR serviñanjja wal kusisim, jupasti kunanaktï chuymamajj munki ukanakwa churätam” (Sal. 37:4). ¡Uka promesajj wali sumawa! Ukampis ¿uka arunakajj taqe kuntï mayktan uk jankʼakiw churistani sañti munpacha? Ukham jisktʼasiñasajj wali wakiskiriwa. Amuytʼañatakejj aka jilat kullakanakat parltʼañäni. Mä soltera kullakajja, Escuela para Evangelizadores del Reino ukar sarañ munatapwa Jehová Diosar yatiyi, ukampis walja maranakas pasjjchejja, janiw invitapkiti. Mä wayna jilatajj wali usutawa, jupasti congregacionan jukʼampinak lurañatakejj qolltʼita sasaw Jehová Diosar mayisi, ukampis janiw waliptkiti. Mä awk taykajj wawapan Jehová Diosar jan jaytañapatakiw orasipjje, ukampis wawapajj Jehová Diosar jaytjjewa.

² Inas Jehová Diosar mä kun mayisajj jan katoqkstati. Ukhamätapatjja, inas akham amuysta: “Jehová Diosajj mayninakan oracionanakap jaysiwa, ukampis oracionaj janiw jayskituti jan ukajj mä kun jan wal luratajatwa mayiskta uk jan churkituti” sasa. Juana b sat mä kullakajj ukhamaw jikjjatasïna. Jupas esposopas Jehová Diosarojj Betelar sarañatakiw mayisipjjäna. Juana kullakajj akham siwa: “Betelarojj jankʼakiw invitapjjetani sasaw amuyayäta” sasa. Ukampis walja phajjsinakampi maranakampi pasatatjja, janiw kuna invitacions katoqapkänti. Kullakajj akham sarakiwa: “Wali llakitäyätwa, janiw kamachañs  puedkayätti. ‘¿Jehová Diosatakejj kuna jan wals lurpachätjja?’ sasaw jisktʼasiyäta. Kunsa munayäta uk qhan mayisiyäta, ukampis kunatsa Diosajj jan jayskitäna uk janiw amuykayätti” sasa.

3. ¿Kuna toqenakatsa aka yatichäwin yatjjataskañäni?

³ Inas awisajj “¿Jehová Diosajj oracionanakaj istʼpachati?” sasin jisktʼasirïstan. Diosat jan jitheqtir nayra servirinakapat yaqhepajj ukhamwa jisktʼasipjjarakïna (Job 30:20; Sal. 22:2; Hab. 1:2). ¿Kunas Jehová Diosajj oracionanakas istʼiwa sasin confiyañatakejj yanaptʼistaspa? (Sal. 65:2). Uka jisktʼar qhanañchañatakejj aka toqenakat nayraqat amuytʼañäni: 1) ¿kunsa Jehová Diosajj lurani?, 2) ¿kun lurañassa Jehová Diosajj muni?, 3) ¿kunatsa yaqhep oracionanakas cambiañajj wakisi?

4. Jeremías 29:12 textorjamajj ¿kunsa Jehová Diosajj arsuwayi?

⁴ Jehová Diosajj oracionanakamar istʼañwa arsuwayi (Jeremías 29:12 liytʼäta). Diosajj servirinakapar munasiwa, oracionanakaps istʼapuniwa (Sal. 10:17; 37:28). Ukampis ukajja, janiw taqe kuntï maykañäni uk churapunistaniwa sañ munkiti. Kunanaktï mayisktan ukanakat yaqhepjja, inas Jehová Diosajj machaq oraqenak churchistani.

5. ¿Kunarjamas Jehová Diosajj oracionanakas jaysistu?

⁵ Jehová Diosajj amtaparjamaw oracionanakas jaysistu (Is. 55:8, 9). Uka amtapat mä partejja, Diosamp apnaqatäñ munapki, kusisita mayachtʼat servipki uka chachanakamp warminakamp aka oraqe phoqantañawa. Ukampis Supayajja, jaqenakajj jupanak pachpa apnaqasisajj sumaw jakasipjjaspa sasaw säna (Gén. 3:1-5). Kuntï Supayajj siskäna ukan kʼarïtap uñachtʼayañatakejja, Jehová Diosajj jupanak pachpa apnaqasipjjañapatakiw jaqenakar jaytäna, ukatwa jichhürunakan uñjktan uka jan walinakajj utji (Ecl. 8:9). Cheqas Jehová Diosajj janiw jichhajj taqe uka jan walinak askichkaniti. Ukhamtï luraspa ukhajja, “jaqenakajj sumaw apnaqasipjjaspa, aka mundon utjki uka jan walinaks askichapjjaspawa” sasaw yaqhepanakajj amuyapjjaspa.

6. ¿Kunatsa Jehová Diosajj munasiñampi kunatï cheqapäki ukarjamaw kuns luri sasin taqe chuym confiyañasa?

⁶ Oracionanakajj niya igualäpkchisa janiw Diosajj mä kikpak jayskiti. Ezequías reyejj wal usuntäna ukhajj Jehová Diosaruw qolltʼañapatak ruwtʼasïna, Jehová Diosasti qollänwa (2 Rey. 20:1-6). Ukampis apóstol Pablojj ‘mä chʼapi jañchipat’ apaqañapatak maykäna ukhajj janiw Jehová Diosajj uk lurkänti, inas Pablojj mä kunat usutächïna, ukajj mä chʼapimp sasispänwa (2 Cor. 12:7-9). Kunas apóstol Santiagompi Pedrompirojj pasäna uk amtañäni. Herodes reyejj panpachaniruw jiwayañ munäna. Jilat kullakanakajj Pedrotak orarapipjjänwa, inas Santiagotak orapjjarakchïna, ukampis Santiagor jiwayapjjänwa, Pedrosti Diosan mä milagrop toqew salvasïna (Hech. 12:1-11). Inas akham sasin jisktʼassna: “¿Kunatsa Jehová Diosajj maynir salväna, maynirojj jan salvkarakïna?” sasa. Bibliajj janis uk qhanañchkchejja, aka toqet janiw payachasktanti, Jehová Diosajj “janipuniw kunatï jan cheqapäki uk lurkaspati”, kunjamtï Pedror munaskänjja, ukhamarak Santiagorojj munasïna (Deut. 32:4; Apoc. 21:14). c Awisajj janiw Diosajj oracionanakasarojj kunjamtï munktan ukham jayskaspati. Ukampis Jehová Diosajj kunjamsa oracionanakasar jaysistu ukat janiw quejasktanti, jupajj munasiñampi kunatï cheqapäki ukarjamaw kuns luri, janiw ukat payachasktanti (Job 33:13).

7. ¿Kunsa jan lurañasäki, ukat kunatsa?

 ⁷ Sapa mayniw kunaymanin uñjastanjja, ukatwa mayninakamp jan igualayasiñasäkiti. Inas mä kuns Jehová Diosar qhan maystan, ukampis jupajj jan uk churkchistuti. Qhepatjja jiwasajj mayisktan niya uka kikpa yaqhan mayisitapwa yatsna, Jehová Diosajj mayisitaparjam churatapwa yatiraksna. Ukaw Anna kullakarojj pasäna. Matthew sat esposopajj canceramp usuntatänwa, esposopan waliptañapatakiw kullakajj orasïna. Uka tiemponjja, pä jilïr kullakanakajj canceranïpjjarakïnwa. Anna kullakajj kimsanpachatakiw wal orasïna. Ukampis uka pä jilïr kullakanakajj waliptapjjänwa, Matthew esposopajj jiwjjänwa. Qalltanjja, “¿Jehová Diosat uka kullakanakan waliptapjjañapatakejj yanaptʼpachäna?” sasaw jisktʼasïna, “ukhamächi ukhajj ¿kunatsa esposojarojj jan yanaptʼkpachäna?” sasaw jisktʼasirakïna. Kunatsa kullakanakajj waliptapjjäna uk janiw sum yatktanti, ukampis akwa yattanjja: Jehová Diosajj kunanakatï tʼaqesiykistu ukanak wiñayatakiw chhaqtayani, jiwapki uka munat servirinakaparus jaktayañwa munaraki (Job 14:15).

8. 1) Isaías 43:2 textorjamajj ¿kunsa Jehová Diosajj jiwasar yanaptʼañatak luri? 2) ¿Kunjamsa oracionajj jan walinakan uñjastan ukhajj yanaptʼistu? (Oracionajj jan aynachtʼañatakiw yanaptʼistu sat video uñtäta).

⁸ Jehová Diosajj yanaptʼapunistaniwa. Jehová Dios Awkisajj munasistuwa, janiw tʼaqesiñas munkiti (Is. 63:9). Ukampis janiw taqe jan walinakat salvkistuti, Bibliarjamajj uka jan walinakajj jawiraru ninar uñtasitawa (Isaías 43:2 liytʼäta). Diosan arsutaparjamajj mä jan waltʼäwir atipjañatakejj jupaw yanaptʼistani, janirakiw wiñayatak jan walin uñjasiñas permitkaniti. Ukhamarus jan walinakan aguantañatakejj wali chʼamani espíritu santopwa Diosajj churistu (Luc. 11:13; Filip. 4:13). Ukhamajj aguantañatakis Diosat jan jitheqtañatakis kunanakatï wakiski ukanakajj utjapunistaniwa, janiw ukat payachasiñasäkiti. d

9. ¿Kunjamsa Santiago 1:6, 7 textojj Jehová Diosajj yanaptʼitaniwa sasin confiyañatak yanaptʼistu?

⁹ Jehová Diosajj jupar confiyañaswa muni (Heb. 11:6). Awisajja, sinti jan walinakansa uñjasksna ukhamwa amuysna, Jehová Diosan yanaptʼapats payachasjjaraksnawa. Ukampis Bibliarjamajja, Diosan chʼamapampejj ‘mä muralls thoqokipsnawa’ (Sal. 18:29). Ukhamajj payachasiñanakampejj jan apayasiñäniti. Jan ukasti Jehová Diosajj oracionanakasar jaysaniwa sasin taqe chuym confiyas orasipjjañäni (Santiago 1:6, 7 liytʼäta).

10. Orasitasarjam chʼamachasiñasatakejj kunanaksa lursna uk mä uñachtʼäwimp qhanañchtʼam.

¹⁰ Jehová Diosajj orasitasarjam chʼamachasiñaswa muni. Asamblea regionalar sarañ munir mä jilatat amuytʼañäni, jupajj Jehová Diosaruw jefepan permiso churañapatak yanaptʼa mayisi. ¿Kunjamsa Jehová Diosajj uka oracionapar jaysani? Jefepamp jan ajjsartʼas parlañatakiw yanaptʼaspa. Ukampis jefepamp parlañatakejj jilataw chʼamachasiñapa, inas walja kuti uk lurañapajj wakischini. Inas mä compañeropamp turnot cambiasiñatak jefepar sischispa, wakischini ukhajj jan trabajkä uka urunakat janiw pagkitätati sasaw sarakispa.

11. ¿Kunatsa kutin kutin orasiñasa?

¹¹ Kunatï llakisiykistu uka toqet walja kuti orasiñaswa Jehová Diosajj muni (1 Tes. 5:17). Jesusan arunakaparjamajja, yaqhep mayisitanakasarojj janiw Diosajj jankʼak jayskaspati (Luc. 11:9). ¡Ukhamajj janiw qarjtañasäkiti! Taqe chuyma kutin kutin orasiskakiñasawa  (Luc. 18:1-7). Kuntï munktan uk kutin kutin orastan ukhajja, mayisktan ukajj jiwasatak wali wakiskirïtapwa Jehová Diosar uñachtʼaytanjja. Jupajj yanaptʼitaniwa sasin confiyataswa uñachtʼayaraktanjja.

12. 1) ¿Kunsa jisktʼasiñasa, ukat kunatsa? 2) Oracionanakasajj Diosar respetatas uñachtʼayañapatakejj ¿kunsa lurañasa? (“ ¿Mayisitanakajajj Jehová Diosar respetatajti uñachtʼayi?” sat recuadro liytʼäta).

¹² Jehová Diosar mayisktan uk jan katoqkañäni ukhajja, aka kimsa jisktʼanakwa jisktʼasiñasa. Nayrïr jisktʼa: “Kuntï maykta ukajj ¿walikïskiti?”. Niya jilapartejja, kunatï jiwasatak walïki ukarjamaw mayistanjja. Ukampis kuntï mayktan ukajj janiw jutïrin yanaptʼjjestaspati. Kunjamsa mä jan walin askichasiñap muntan uka toqet inas Jehová Diosar mayisiskstan, ukampis inas uka jan walejj pienskayätan ukat sipans jukʼamp sum askichaschispa. Yaqhep mayisitanakasajj janiw Jehová Diosan munañaparjamäkaspati (1 Juan 5:14). Párrafo 1 ukan parlaniwayktan uka awk taykat amuytʼañäni. Jupanakajj wawapan Diosar jan jaytañapatakiw orasipjjäna. Ukham mayisipjjatapajj walikjamäkchisa, Jehová Diosajj jupar servipjjañapatakejj janiw khitirus obligkiti. Taqenis amtasat adorsna ukwa Diosajj muni, wawanakasan uk lurapjjañapwa munaraki (Deut. 10:12, 13; 30:19, 20). Ukhamajj ¿kunsa awk taykanakajj Diosar mayisipjjaspa? Wawapan chuymapar purtʼañatakiw yanaptʼa mayisipjjaspa, ukhamat wawapajj Jehová Diosar munasiñapataki, amigopäñ munañapataki (Prov. 22:6; Efes. 6:4).

13. Hebreos 4:16 textorjamajj ¿kunapachas Jehová Diosajj yanaptʼistu?

¹³ Payïr jisktʼa: “¿Jehová Diosajj jichpachat kuntï maykta uk churitani?”. Inas amuyusarjamajj oracionanakasar jankʼak jaysañap  munchiñäni. Ukampis Jehová Diosajj kuna horasas yanaptʼistani uk yatiwa (Hebreos 4:16 liytʼäta). Kuntï Jehová Diosar mayktan uk jan jankʼak katoqasajja, “Janiwa” siskistaspas ukhamwa amuysna. Ukampis jan jankʼak churasajja, inas “Mä jukʼamp suytʼam” sañ munaskchi. Jan usutäjjañatak Diosar oraskäna uka wayna jilatat parltʼaskakiñäni. Jehová Diosatï mä milagro toqe qollaspäna ukhajja, qollatäjjatap laykukis Jehová Diosar sirvkaspa ukhamwa Supayajj parlaspäna (Job 1:9-11; 2:4). Jehová Diosajj kunapachas taqe usunak chhaqtayani uk amtjjewa (Is. 33:24; Apoc. 21:3, 4). Janiw jichhajj Jehová Diosan mä milagro toqe qollañap suyktanti. Ukhamajj ¿kunsa uka wayna jilatajj mayisispa? Chʼam churañapataki chuymapan sumak jikjjatasiñapatakiw mayisispa, ukhamat usutäkasas Diosat jan jitheqtas serviskakiñataki (Sal. 29:11).

14. ¿Kunsa Juana kullakat yateqassna?

¹⁴ ¿Betelar sarañatak oraskäna uka Juana kullakat amtastati? Kunjamsa Jehová Diosajj oracionapar jaysäna uk phesqa mara pasatatwa amuyäna. Kullakajj akham siwa: “Uka tiempon Jehová Diosaw yatichitäna, jukʼamp suma chuymanïñatakiw yanaptʼarakitäna. Diosar jukʼamp confiyañajänwa, Bibliat jukʼamp sum yatjjatañ yateqañajänwa, kawkjankkasas Jehová Diosar kusisit serviñ yateqañajarakïnwa” sasa. Qhepatjja, Juana kullakampiru esposopampirojj circuitot serviñatakiw invitapjjäna. Kullakajj akham sarakiwa: “Jehová Diosajj oracionanakajar jaysitänwa, ukampis janiw kunjamtï munkayäta ukarjamäkänti. Oracionanakajar wali sum jaysatap walja tiempotwa amuyasiyäta. Diosajj kunja munasirisa khuyapayasirisa uk uñjañajatak mä oportunidad churatapat walpun yuspärta” sasa.

15. ¿Kunatsa awisanakajj sinti qhana arunakamp mayisiñajj jan wakiski? (Fotonak uñjjattʼarakïta).

 ¹⁵ Kimsïr jisktʼa: “¿Sinti qhana arunakampit Diosar mayistjja?”. Qhana arunakamp mayisiñajj walikïskchisa, awisanakajj kunsa Jehová Diosajj jiwasatak muni uk amuyañatakejj janiw uk lurañajj wakiskapuniti. Escuela para Evangelizadores del Reino ukar sarañatak orasiri soltera kullakat amuytʼaskakiñäni. Kawkjantï jukʼamp yanapajj munaski ukan serviñatakiw jupajj uka escuelar sarañ munäna. Uka toqet orasiskakchisa, ¿kunampsa Jehová Diosar mayisispa? Kunjamanakatsa Jehová Diosar jukʼamp servispa uk amuyañatakiw orasispa (Hech. 16:9, 10). Uka toqet orasisajja, jakaski uka lugaran kawknïr congregacionans jukʼamp precursoranakajj munasi ukwa circuito jilatar jisktʼaspa. Kawkinsa jukʼamp predikirinakajj munasi uk yatiñatakejj sucursalaruw qellqtʼarakispa. e

16. ¿Kuna toqetsa jan payachasiñasäki?

¹⁶ Kunjamtï yatjjataniwayktanjja, Jehová Diosajj munasiñampi, kunatï cheqapäki ukarjamaw oracionanakasar jaysistu, janiw ukat payachasiñasäkiti (Sal. 4:3; Is. 30:18). Awisajj janiw kunjamtï munktan ukhampun oracionanakasar jayskistaspati, ukampis kunjamats jaysapunistaniwa. Diosajj wal munasistu, janipuniw jaytanukkistaniti (Sal. 9:10). Ukhamajj “taqe tiemponsa” Jehová Diosar confiyaskakiñäni, oracionan chuymas jistʼaraskakiñäni (Sal. 62:8).