1. ¿Kunsa Isaías profetajj israelitanakar yatiyäna?

 ISAÍAS profetajja, Jehová Diosajj ‘cheq parlir Diosawa’ sasaw säna. ‘Cheq parliri’ sasin hebreo arut traducitäki uka arojja, “amén” sañ muni (Is. 65:16; nota). Amén arojja, “ukhamäpan” sañ munaraki. Biblianjja, kuntï Jehová Diosas Jesusas arsupki jan ukajj lurapkaraki ukajj cheqätap qhanañchañatakiw amén arojj walja kuti apnaqasi. Ukhamajj Isaías profetajj akwa israelitanakarojj wali qhan yatiyañ munäna, kuntï Jehová Diosajj janïräkipan arski ukajj phoqasipuniwa. Jehová Diosajj taqpach promesanakap phoqasaw arsutapar phoqerïtap uñachtʼayi.

2. 1) Jehová Diosajj jutïritak arsuwayki uka promesanakaparojj ¿kunatsa confiysna? 2) ¿Kawkïr jisktʼanakarus aka yatichäwin qhanañchaskañäni?

² ¿Kuntï Jehová Diosajj jutïritak arsuwayki ukar confiyaraksnati? Isaías profetajj jakkäna ukhat mä 800 maranak qhepatjja, apóstol Pablojj kunatsa Jehová Diosan promesanakapajj phoqasipuniniwa sasin confiysna uk akham sasaw qhanañchäna: “Janirakiw Diosajj kʼariskaspati” sasa (Heb. 6:18). ¿Janejjay mä uma jalsut mojjsa umampi jayukʼar umampejj mistkaspatejja? Cheq parlir Diosampejj ukhamarakiwa, janiw kʼariskaspati. Taqe kuntï Jehová Diosajj siski ukarojj taqe chuymaw confiysna, kunanaktï jutïritak arsuwayki ukarus confiyaraksnawa. Aka yatichäwinjja, aka jisktʼanakaruw qhanañchaskañäni: ¿Kunsa Jehová Diosajj jutïritak arsuwayi? ¿Kunsa promesap phoqasiñapatakejj lurawayi?

3. 1) ¿Kawkïr promesas jiwasatakejj wali valoranejja? (Apocalipsis 21:3, 4). 2) Uka promesat liytʼaraptan ukhajj ¿kamsapjjes yaqhepanakajja?

³ Parlkañäni uka promesajja, Jehová Diosan oraqpachankir servirinakapatakejj wali valoraniwa (Apocalipsis 21:3, 4 liytʼäta). “Janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” sasaw Jehová  Diosajj arsuwayi. Uka versiculonakjja, jaqenakar chuymachtʼañatakisa Paraison jakasiñajj kunjamänisa uk qhanañchtʼañatakis walja kutiw predicacionan liytʼtanjja. Uka promesa istʼasajj ¿kamsapjjes yaqhep jaqenakajja? “Uka arunakajj wali sumäkchisa, janjamakiw cheqäkaspati” sasaw sapjje.

4. 1) Kunanaksa Jehová Diosajj yatïna uk pä toqet qhanañchtʼam. 2) ¿Jehová Diosajj mä promesa lurkäna ukhajj kunampsa lurarakïna?

⁴ Jehová Diosajj Paraisot parlki uka promesat qellqañapatak apóstol Juanar amuytʼaykäna ukhajja, uka promesat jichhürunakan predicañas yatïnwa. Walja jaqenakatakejja, ‘kunanakatï machaqäki’ ukar creyiñajj chʼamäñapänwa uk Jehová Diosajj yatirakïnwa (Is. 42:9; 60:2; 2 Cor. 4:3, 4). Ukhamajj Apocalipsis 21:3, 4 texton parlki uka bendicionanakajj phoqasipuniniwa sasin confiyapjjañapatakejj ¿kunjamsa jaqenakar yanaptʼsna? ¿Kunsa Jehová Diosarus promesanakaparus jukʼamp confiyañatak lursna? Jehová Diosajj janiw uka promesanak aleq ukhamak arsuwaykiti, jan ukasti uka promesar confiyañatakejj razonanakwa churistu. ¿Kawkïrinakas uka razonanakajja?

5. ¿Kawkïr versiculonakas Jehová Diosan promesapar confiyañatakejj razonanak churistu, ukat uka versiculonakan kamsisa?

⁵ Apocalipsis 21:5, 6 textonjja, Jehová Diosajj parlki uka promesapar confiyañatakejj yaqha razonanakaw utjaraki. Ukan akham siwa: “Tronon qontʼatäkäna uka Diosajj akham sänwa: ‘Taqe kunsa machaqatwa nayajj luraskta’ sasa. Ukatjja akham sarakïnwa: ‘Qellqantam, aka arunakajja confiykañawa, cheqarakiwa’ sasa. Ukatjja akham sarakituwa: ‘¡Phoqasjjewa! Nayätwa Alfasa Omegasa, qalltasa tukuyasa’” sasa (Apoc. 21:5, 6a).

6. Apocalipsis 21:5, 6 textonkki uka arunakajj ¿kunjamsa Jehová Diosan promesapar jukʼamp confiyañatak yanaptʼistu?

⁶ ¿Kunjamsa uka arunakajj Jehová Diosan promesapar jukʼamp confiyañatak yanaptʼistu? Apocalipsis librojj b akham sasaw uka versiculonakat qhanañchi: “Jutïrin bendicionanak churañatakejj Jehová Dios pachpas jupat jan jitheqtiri jaqenakatakejj mä garantía jan ukajj mä utan titulopsa firmkaspa ukhamawa” sasa. Apocalipsis 21:3, 4 textojj Jehová Diosan promesapatwa parli, 5 y 6 versiculonakan Jehová Diosas uka promesar firmkaspa ukhamawa, ukhamatwa phoqasipuniniwa sasin mä garantía churi. Uka garantian kuna arunaksa Jehová Diosajj ayti uk jichhajj sum yatjjatañäni.

7. ¿Khitis versículo 5 ukan parlañ qallti, ukat kunatsa ukajj wali wakiskirejja?

⁷ Diosajj churki uka garantiajj akham sasaw qallti: “Tronon qontʼatäkäna uka Diosajj akham sänwa” sasa (Apoc. 21:5a). ¿Kunatsa uka arunakajj wali wakiskirejja? Kuna laykutejj Apocalipsis libron Jehová Diosajj kimsa kutiw parli, versículo 5 ukankir arunakaw mayïrejja. Ukhamajj Jehová Dios pachpaw uka garantía churi, janiw mä chʼamani angelasa ni Jesusas uk churkiti. Niyakejjay Jehová Diosajj ‘jan kʼarisir Diosächejja’, ukjjar jutki uka arunakar jukʼamp confiyañatakiw ukajj yanaptʼistu (Tito 1:2). Ukhamajj Apocalipsis 21:5, 6 texton siski ukarojj taqe chuymaw confiyañasa.

8. Promesapajj phoqasipuniniwa sañatakejj ¿kamsis Jehová Diosajja? (Isaías 46:10).

⁸ Ukjjarusti, Diosajj akham sänwa: “Taqe kunsa machaqatwa nayajj luraskta” sasa (Apoc. 21:5). Cheqas ukham sasinjja kuna  cambionakatï jutïrin utjkani ukatwa Diosajj parlaski. Niyakejjay uka promesajj phoqasipunchinejja, niyas uka cambionak lurkaspa ukhamwa jupajj parli (Isaías 46:10 liytʼäta).

9. 1) “Taqe kunsa machaqatwa nayajj luraskta” siski uka arunakajj ¿kunanak amuytʼañatakis yanaptʼistu? 2) ¿Kunas jichhürun utjki uka ‘alajjpacharus oraqerus’ pasani?

⁹ Jichhajj kuntï Apocalipsis 21:5 texton siski uk amuytʼarakiñäni, ukan akham siwa: “Taqe kunsa machaqatwa nayajj luraskta” sasa. Uka capitulonkir arunakajja, kunanaksa Jehová Diosajj yaqhamp cambiani, kunanaksa machaqar tukuyani uka toqet amuytʼañatakiw yanaptʼistu. Nayraqatjja, kunanaksa yaqhamp cambiani uka toqet parltʼañäni. Apocalipsis 21:1 textojj akham siwa: “Nayra alajjpachas nayra oraqes chhaqtjjänwa” sasa. ‘Nayra alajjpachajja’ Supayampi demonionakampi apnaqatäki uka gobernantenakamp sasiwa (Mat. 4:8, 9; 1 Juan 5:19). Biblianjja, oraqe arojj taqe jaqenakat parlañatakiw awisajj apnaqasi (Gén. 11:1; Sal. 96:1). Ukhamajj ‘nayra oraqe’ sasinjja, jichhürun jakapki uka jan wali jaqenakatwa parlaraki. Uka arunakarjamajja, Jehová Diosajj janiw mä jukʼak ‘alajjpacharus oraqerus’ cambionak lurkaniti. Jan ukasti qʼal tukjani, uka lantejj “mä machaq alajjpachampi mä machaq oraqempwa” lurani, mä arunjja mä machaq gobiernompi machaq jaqenakampiw utj-jjani.

10. Jehová Diosajj “taqe kunsa machaqatwa nayajj luraskta” siwa, ¿ukajj kamsañs muni?

¹⁰ Apocalipsis 21:5 textonjja, Jehová Diosajj “taqe kunsa machaqatwa nayajj luraskta” siwa, ¿ukajj kamsañs muni? Jehová Diosajj aka oraq sum askichani, jaqenakarojj perfectöpjjañapatakiw yanaptʼarakini. Isaiasan profeciaparjamajja, oraqpachaw mä suma Paraisöjjani. Edén jardinar uñtasit wali sumäjjaniwa. Jiwasasti sapa maynejj machaqaruw tukuñäni. Jehová Diosajj cojonakarusa, juykhunakarusa, oqaranakarus qollaniwa, jiwatäjjapjje ukanakarus jaktayarakiniwa (Is. 25:8; 35:1-7).

11. ¿Kun lurañapsa Jehová Diosajj Juanar mayïna, ukat kunatsa?

¹¹ ¿Jehová Diosan yaqha garantiapajj kawkïrirakisa? Jehová Diosajj apóstol Juanar akham sänwa: “Qellqantam, aka arunakajja confiykañawa, cheqarakiwa” sasa (Apoc. 21:5). Jehová Diosajj janiw qellqantam sasakejj siskänti, jan ukasti kunatsa qellqantañapa ukwa sarakïna. Diosajj akham sänwa: “Aka arunakajja confiykañawa, cheqarakiwa” sasa. ¡Apóstol Juanan Diosar istʼatapatsa qellqatapatsa walpun yuspärtanjja! Ukhamïpanwa Diosajj mä Paraíso utjañapat mä promesa arski uk liytʼtanjja, kuna suma bendicionanakas jutïrin utjani uka toqets lupʼiraktanjja.

12. ¿Kunatsa Jehová Diosajj “¡Phoqasjjewa!” säna?

¹² Ukjjarojj ¿Jehová Diosajj kamsisa? Akham siwa: “¡Phoqasjjewa!” sasa (Apoc. 21:6). Jehová Diosajj taqe kunanaktï Paraisot arski ukjja, niyas phoqasjjaspa ukhamwa parli. Ukajj cheqäskapuniwa, kuntï Diosajj amtki uk phoqasiñapatakejj janiw kunas jarkʼkaspati. Ukjjarusti, promesapajj phoqasipuniniwa sañatakejj mä qhawqhanakampwa Jehová Diosajj arsuwayäna.

13. ¿Kunatsa Jehová Diosajj “Nayätwa Alfasa Omegasa” säna?

¹³ Kunjamtï sisktanjja, Juanajj visionanak uñjkäna ukan Jehová Diosajj kimsa kutiw parli (Apoc. 1:8; 21:5, 6; 22:13). Taqe ukanakan Jehová Diosajj akham sänwa: “Nayätwa Alfasa Omegasa” sasa. Alfa arojja griego alfabeton qallta letrapawa, omega arusti tukuya letraparakiwa. “Nayätwa Alfasa Omegasa”  sasinjja, kuntï qalltkta ukjja tukuytwa sañwa Jehová Diosajj munaskäna.

14. 1) ¿Kunapachas Jehová Diosajj “Alfa” sasin säna, kunapachas “Omega” sarakini? 2) ¿Jehová Diosan kuna garantiapas Génesis 2:1-3 textonki?

¹⁴ Jehová Diosajj Adanampir Evampir lurkäna uka qhepatjja, kunsa jaqenakatakisa aka oraqetakis amtäna ukwa jupanakar säna. Bibliajj akham siwa: “Diosajj akham sasaw jupanakar bendisïna: ‘Walja wawanakanïpjjam, waljaptapjjam, oraqpach phoqantapjjam, apnaqapjjarakim’” sasa (Gén. 1:28). Jehová Diosajj amtap qhanañchkäna ukhajja, “Alfa” siskaspas ukhamänwa. Mä urojj Adanampin Evampin istʼasiri ukat perfecto wawanakapaw oraqpach phoqantapjjañapäna, mä paraisoruw tukuyapjjañaparakïna. Uka uruw Jehová Diosajj “Omega” siskaspas ukhamäni. Kunapachatï ‘alajjpachsa oraqsa, taqe kunanakatï alajjpachansa oraqensa utjki’ ukanak lurañ tukuyjjäna ukhajja, Jehová Diosajj amtap phoqapuniniwa sañatakejj mä garantía churäna. ¿Kunjamsa uk luräna? Paqallqöri ururojj sagradoruw tukuyäna (Génesis 2:1-3 liytʼäta). ¿Ukajj kamsañs muni? Jehová Diosajj kuntï jaqenakatakis oraqetakis amtki ukjja, paqallqöri urun phoqañwa amtäna. Uka amtapajj paqallqöri uru tukuyaruw phoqatpach phoqasini.

15. ¿Kunatsa Jehová Diosajj janis amtap phoqerjamäjjaspa ukham amuyañjamäna?

¹⁵ Adanampi Evampejj Dios contra saytʼasipkäna uka qhepat juchanëjjapjjänwa, jupanakat jutir wawanakaparus juchampir jiwañampiruw katuyapjjarakïna (Rom. 5:12). Diosajj istʼasiri ukat perfecto jaqenakamp aka oraqe phoqantañ amtkäna ukajj ¿janit phoqasjjaspäna? ¿Janipunit Supay kawsajj Jehová Diosajj “Omega” sasin sisjjaspäna? Inas ukham amuyaschispäna. Jehová Diosajj  janis kuns lurirjamäjjaspa ukham inas Supayajj amuychïna. Cheqas Jehová Diosajj Adanampir Evampir tukjasajj jaqenakatak amtkäna uk phoqañatakejj yaqha perfecto chacha warmi luraspäna. Ukampis uk luraspäna ukhajja, kʼarïkaspas ukhamwa Supayajj Diosat parlaspäna. ¿Kunatsa? Génesis 1:28 textorjamajja, Adanampi Evampirojj jumanakat jutir wawanakaw oraq phoqantapjjani sasaw Jehová Diosajj säna.

16. ¿Kunatsa Jehová Diosan amtapajj ina chʼusarukis tukuskaspa ukham Supayajj amuyaspäna?

¹⁶ ¿Kunsa Supayajj amuyarakpachäna? Jehová Diosajj Adanampir Evampirojj wawanakanïpjjañap permitkchïnsa, janipuniw wawanakapajj perfectöpkaniti sasin inas Supayajj amuychïna (Ecl. 7:20; Rom. 3:23). Ukatï pasaspäna ukhajja, Jehová Diosajj amtki ukajj ina chʼusarus tukuskaspa ukhamwa Supayajj parlaspäna. Kuna laykutejj Diosan amtapajj janiw phoqaskaspänti, mä arunjja aka oraqejj janiw perfecto jaqenakamp phoqantatäkaspänti.

17. Supayampi, Adanampi, Evampi Dios contra saytʼapkäna uk askichañatakejj ¿kunsa Jehová Diosajj luräna, ukat kunjamsa ukajj tukuyani? (Dibujonak uñjjattʼarakïta).

¹⁷ Supayampi, Adanampi, Evampi Dios contra saytʼasipkäna uk kunjamsa Jehová Diosajj askichäna ukajja, Supayarojj jan arun jaytpachäna (Sal. 92:5). Adanampir Evampir wawanakanïpjjañap permitisajja, Jehová Diosajj jan kʼarisirïtapa, arupajj phoqasipunirïtapwa uñachtʼayäna. Ukatsti amtapajj jan ina chʼusar phoqasirïtapwa uñachtʼayarakïna. ¿Kunjamsa uk uñachtʼayäna? Diosajj mä ‘wawa’ utjañapatakiw arsüna, uka ‘wawaw’ Adanampit Evampit jutiri ukat istʼasiri wawanakaparojj salvañapäna, ukhamatwa Diosan amtapajj phoqasiskakispäna (Gén. 3:15; 22:18). Jehová Diosajj jaqenakar juchampit jiwañampit kutsuyañapätap janipuniw Supayajj amuykpachänti. Juchampit jiwañampit kutsuyatäñajj munasiñatwa utji (Mat. 20:28; Juan 3:16). Niyakejjay Supayajj jupatakik llakisirïchejja, janipuniw uka kasta munasiñajj jupan utjkaspati. Ukhamajj ¿juchampit jiwañampit kutsuyatäñ utjatapat kunas jikjjatasini? Waranqa Maranak tukuyatarojja, Adanampit Evampit jutiri ukat istʼasiri perfecto wawanakapajj aka oraqen mä Paraisonwa jakapjjani, kunjamtï Jehová Diosajj qalltatpach amtkänjja ukhamäniwa. Uka tiemponjja, Jehová Diosajj “Omega” sasaw sani.

18. ¿Kuna kimsa razonanaksa Jehová Diosajj promesapar confiyañasatakejj churistu? (“ Jehová Diosan promesapar confiyañatak kimsa razonanaka” siski uka recuadro liytʼarakïta).

¹⁸ Aka oraqejj mä Paraisöniwa sañatakejj mä qhawqha razonanakwa aka yatichäwin yatjjatawaytanjja. ¿Diosajj promesap phoqapuniniwa sañatakejj kunsa mayninakar sissna? Maya, Jehová Dios pachpaw uka promes luri. Apocalipsis librojj akham siwa: “Tronon qontʼatäkäna uka Diosajj akham sänwa: ‘Taqe kunsa machaqatwa nayajj luraskta’ sasa”. Diosajj promesap phoqañ muniwa, phoqañatakis yatiñaniwa, chʼamanirakiwa. Paya, Jehová Diosajj promesap phoqapuniniwa, ukatwa uka promesapajj niyas phoqasjjaspa ukham parli. Arunakapat jupajj akham siwa: “Confiykañawa, cheqarakiwa” sasa. Ukatsti akham sarakiwa: “¡Phoqasjjewa!” sasa. Kimsa, Jehová Diosajj kun qalltasas tukuyapuniwa. Ukan cheqätapjja, “Nayätwa Alfasa Omegasa” siski uka arunakaw qhanañchi. Supayajj kʼarïtapa taqe kunan aynachtʼirïtapwa Jehová Diosajj uñachtʼayani.

19. Oraqen mä Paraisojj utjkani ukat maynejj payachaschi ukhajj ¿kunsa lurasma?

¹⁹ Diosajj mä garantía churawayki ukjjat maynimp parläta ukhajja, Jehová Diosan promesanakapar jukʼamp confiyañatakiw ukajj yanaptʼätam, janipun uk armamti. Ukhamajj Apocalipsis 21:4 textonkki uka chʼamañchtʼir promesa maynitak liytʼarapïta ukat jupajj “uka arunakajj sumjamäkchisa, janjamakiw cheqäkiti” sätam ukhajj ¿kamsasmasa? Apocalipsis 21:5, 6 texto liytʼasaw qhanañchtʼasma. Promesap phoqañatakejj Jehová Dios pachpaw mä garantía churi sasaw sarakisma. Ukajj Jehová Dios pachpas mä firma uchkaspa ukhamawa (Is. 65:16).