19 YATICHÄWI
CANCIÓN 22 Diosan uttʼayatäki uka Reinojj jutpan
Jutïrin Jehová Diosajj jaqenakar juzgkani ukat ¿kunsa yattanjja?
‘Jehová Diosajj janiw khitin jiwañapsa munkiti’ (2 PED. 3:9).
¿KUNANAKATSA YATJJATASKAÑÄNI?
Jehová Diosajj cheqaparupuniw jaqenakar jutïrin juzgani, kunatsa ukar confiysna ukwa yatjjataskañäni.
1. ¿Kunatsa “wali kusiskañ tiemponwa jakasktanjja” sasin sissna?
¡WALI kusiskañ tiemponwa jakasktanjja! Sapüruw Biblian profecianakap phoqasir uñjasktanjja. Kunjamsa ‘rey del nortejj’ “rey del sur” ukampejj aka mundo apnaqañatak nuwasisipki ukwa uñjasktanjja (Dan. 11:40, nota). Ukhamarus Reinon suma yatiyäwinakapajj oraqpachanwa yatiyasiski, millón millón jaqenakaw Jehová Diosar serviñ amtasipkaraki (Is. 60:22; Mat. 24:14). Jehová Diosan yatichäwinakaps ‘tiempoparuw’ manqʼar uñtat walj katoqasktanjja (Mat. 24:45-47).
2. ¿Kuna toqetsa jan payachasiñasäki, ukat kunsa reconosiñasa?
2 Jehová Diosajja, kunanakatï akat mä jukʼarojj paskani ukanak jukʼamp sum amuyañasatakejj yanaptʼaskakistuwa (Prov. 4:18; Dan. 2:28). Jachʼa tʼaqesiñ tiempojj qalltkani ukhajja, uka wali chʼama tukuñ tiempon jupat jan jitheqtañatakisa mayachtʼatäñasatakis kunanaktï yatiñasäki ukanakwa yatiyistani, janiw ukat payachasiñasäkiti. Ukampis ak reconosiñasawa, kunanakas jutïrin pasani ukanakat janiw taqpach yatktanti. Aka yatichäwinjja, kunatsa ukanakat mä qhawqhanak cambiañajj wakisi ukwa nayraqat yatjjataskañäni, ukjjarojja kunanaksa jutïrit yattan, kunsa alajjpachankir Awkisajj lurani ukanakat mä qhawq yatjjataskarakiñäni.
¿KUNSA JAN YATKTANJJA?
3. Jachʼa tʼaqesiñ tiempojj qalltkani ukhajj ¿kunaw jaqenakar pasani sasins nayrajj amuyayätanjja, ukat kunatsa ukham amuyayätanjja?
3 Nayrajja, jachʼa tʼaqesiñ tiempojj qalltkani ukhajj janiw jaqenakarojj Jehová Diosar confiyapjjañapatakisa Armagedón jakkirpach pasapjjañapatakis oportunidadajj churaskaniti sasaw amuyayätanjja. ¿Kunatsa ukham amuyayätanjja? Kuna laykutejj taqe kunanakatï Uma Juicion paskäna ukanakajja, kunanakatï jutïrin paskani ukanak uñachtʼayañatakïnwa sasaw amuyayätanjja. Kunjamtï Jehová Diosajj Uma Juicio qalltkäna ukhajj arcan punkup llawintkänjja, ukhamarakiw jachʼa tʼaqesiñ tiempojj qalltkani ukhajj Jehová Diosajj mä punku llawintani, janirakiw khiti jaqempis salvasjjaniti sasaw amuyayätanjja (Mat. 24:37-39).
4. Taqe kunanakatï Noé chachan tiempopan paskäna ukanakajj jichha tiemponwa phoqasiski sasajj ¿kunatsa jan sisksna?
4 ¿Kunanakatï Uma Juicion paskäna ukanakajj kunanakatï jutïrin paskani ukanak uñachtʼayañatakïnti? a Janiwa, janiw Bibliajj uka toqet qhanañchkiti. Jesusajj kuttʼankani uka tiempot parlkäna ukhajja, ‘Noé chachan urunakapjamäniwa’ sasaw qhanañchäna. Ukampis taqe kunanakatï Uma Juicion paskäna ukanakajj janiw kunanakatï jutïrin paskani ukanak uñachtʼayañatakiwa sasajj siskänti. Janiw Jehová Diosajj kunjamtï arcan punkup jistʼantkäna ukham jutïrin mä punku jistʼantañapäkänti. Ukhamäkchisa, Uma Juiciotsa Noé chachats waljanakwa yateqsna.
5. 1) ¿Kunsa Noé chachajj janïr Uma Juicio purinkipan luräna? (Hebreos 11:7; 1 Pedro 3:20). 2) Noé chachan predicatapampi jiwasan predicatasampejj ¿kunansa igualakïpjje?
5 Noé chachajj Diosan arunakap istʼkäna ukhajja, arca lurasaw jupar confiyatap uñachtʼayäna (Hebreos 11:7; 1 Pedro 3:20 liytʼäta). Reinon suma yatiyäwinakap istʼapki ukhajja, ukhamarakiw jaqenakajj jupar confiyapjjatap luratanakapamp uñachtʼayapjjañapa (Hech. 3:17-20). Apóstol Pedrojja, Noé chacharojj “kunatï cheqapäki uk yatiyiri” sasaw säna (2 Ped. 2:5). Ukampis kunjamtï pasïr yatichäwin yatjjataniwayktanjja, Noé chachajj oraqpachan jakirinakat taqenirut Uma Juiciot yatiyäna janicha uk janiw yatktanti. Jichha tiemponjja jiwasajj taqenir yatiyañatakiw chʼamachastanjja, taqe chuymaw uk luraraktanjja. Ukampis walsa chʼamachaskchiñänejja, janïr akapach tukuskipan janiw taqe jaqenakar predicañ puedkañäniti. ¿Kunatsa ukham sistanjja?
6, 7. ¿Kunatsa janïr akapachan tukuskipan taqe jaqenakar suma yatiyäwinak jan predicañ puedkañäni?
6 Kawkjakamas predicasiñapäna uka toqet Jesusajj kamsänsa uk amuytʼañäni. Suma yatiyäwinakajj “aka oraqpachanwa yatiyasini, ukhamat taqe markanakan yatipjjañapataki” sasaw säna (Mat. 24:14). Uka arunakajj jichha tiemponwa nayrat sipans jukʼamp sum phoqasiski. Reinon suma yatiyäwinakap 1.000 jila arunakanwa yatiyasktanjja, internetan jw.org cheqan utjatapatjja, oraqenkir jilaparte jaqenakaw suma yatiyäwinak yateqapjjaspa.
7 Jesusajja, janiw ‘taqpach markanak muytapkätati’ sasaw discipulonakapar säna, mä arunjja jaqenakar juzgañatak jutkä ukhakamajj janiw taqpach jaqenakar predicañ puedipkätati sasaw säna (Mat. 10:23; 25:31-33). Jichha tiempons ukajj ukhamakïskaniwa. Kawkjanakantï predicañajj jarkʼatäki uka lugaranakanjja, millón millón jaqenakaw jakapjje. Ukhamarus sapa minutow walja wawanakajj nasipjje. Ukhamajj janïr akapachan tukuskipan “taqe markanakaru, tribunakaru, kunayman parlani jaqenakaru” suma yatiyäwinak yatiyañatak chʼamachaskchiñänisa, janiw oraqpachankir taqe jaqenakar predicañ puedkañäniti (Apoc. 14:6).
8. ¿Kamsasas jisktʼassna? (Fotonak uñjjattʼarakïta).
8 Yatjjataniwayktan ukarjamajj inas akham sasin jisktʼassna: “Janïr jachʼa tʼaqesiñ tiempojj purinkani ukhakamajj ¿taqpach jaqenakat suma yatiyäwinak istʼapjjpachäni? ¿Kunjamsa Jehová Diosampi khitirutï juzgañatak confiyki uka Yoqapampejj uka jaqenakar juzgapjjpachäni?” sasa (Juan 5:19, 22, 27; Hech. 17:31). Aka yatichäwejj kawkïr textot apstʼatasa ukajj akwa amtayistu: ‘Jehová Diosajj janiw khitin jiwañapsa munkiti, jan ukasti taqenin arrepentisipjjañapwa muni’ (2 Ped. 3:9; 1 Tim. 2:4). Ukampis kunjamsa Jehová Diosajj uka jaqenakar juzgani uk janiw yatiykistuti. Ukhamarus janiw jupajj jiwasar yatiyañatakejj obligatäkiti.
Jachʼa tʼaqesiñajj janïr qalltkani ukhajj suma yatiyäwinak jan istʼañ puedipkani ukanakampejj ¿kunsa Jehová Diosajj lurani? (Párrafo 8). c
9. ¿Kunsa Jehová Diosajj Arupan yatiyistu?
9 Jehová Diosajj kunanaksa lurani ukanakat mä qhawqhanak Arupan yatiyistuwa. “Jan cheqapar sarnaqer” jaqenakajj janis suma yatiyäwinak istʼañatakis jan wali luräwinakap jaytañatakis oportunidadanïpkchïnjja, jaktanipjjaniwa sasaw yatiyistu (Hech. 24:15; Luc. 23:42, 43). Ukanak yatisajj inas yaqhanak jisktʼasiraksna.
10. ¿Kamsasas jisktʼasiraksna?
10 Jachʼa tʼaqesiñ tiempon jiwapkani taqe uka jaqenakajj ¿wiñayatakit tukjatäpjjpachäni, janit jaktanjjapjjpachäni? Kawkïr jaqenakatï Jehová Diosampi ejercitopamp Armagedonan tʼunjat uñjasipkani ukanakajj janiw jaktanipkaniti sasaw Bibliajj qhanañchi, jupanakajj Jehová Dios contra saytʼasipjjatapatwa tʼunjatäpjjani (2 Tes. 1:6-10). Ukampis jachʼa tʼaqesiñ tiemponjja, yaqhepajj usutäpjjatap layku jan ukajj wali jilïrëjjapjjatap laykuw jiwapjjaspa, yaqhepajj mä accidentena jan ukajj yaqhanakan jiwayataw uñjasipjjarakispa (Ecl. 9:11; Zac. 14:13). ¿Kunas jupanakampejj pasani? ¿Jupanakat yaqhepajj machaq mundon jaktanipkani uka jan cheqap sarnaqer jaqenak taypinkapjjpachäniti? Janiw uk yatktanti.
¿KUNSA YATTANJJA?
11. ¿Kunarjamas jaqenakajj Armagedonan juzgatäpjjani?
11 Kunanakas jutïrin pasani ukanakat waljanakwa yattanjja. Kunanaktï yatktan ukanakat yaqhepajj akanakawa: kunjamsa Criston jilanakapar uñjapjjäna ukarjamaw jaqenakajj Armagedonan uñjatäpjjani (Mat. 25:40). Khitinakatï ajllitanakarusa Cristorus yanaptʼapjjatap uñachtʼayapkani ukanakajj ovejanakjam uñjatäpjjaniwa. Jachʼa tʼaqesiñ tiemponjja, Criston jilanakapat yaqhepajj aka oraqenkasipkakiniwa, janïr Armagedón qalltkipanwa alajjpachar apatäjjapjjarakini. Ukhamajj ajllitanakajj aka oraqenkasipkani ukhakamajja, inas suma chuyman jaqenakajj jupanakar yanaptʼapjjchini, inas phoqasipki uka lurañanakamp yanaptʼapjjarakchini (Mat. 25:31, 32; Apoc. 12:17). ¿Kunatsa taqe ukanakajj wali importantejja?
12, 13. Jachʼa Babilonian tukjäwip uñjasajj ¿kunsa yaqhep jaqenakajj lurapjjpachäni? (Fotonak uñjjattʼarakïta).
12 Jachʼa tʼaqesiñ tiempojj qalltkani ukhajja, inas yaqhepanakajj ‘Jachʼa Babilonian’ tukjäwip uñjasajj kunjamsa Jehová Diosan Testigonakapajj ukan pasañap walja maranak predicapjjäna uk amtapjjchini. ¿Jupanakat yaqhepajj Jehová Dios toqet saytʼasipjjpachäniti? (Apoc. 17:5; Ezeq. 33:33).
13 Kunas Moisesan tiempopan pasäna uk amuytʼañäni. Israelitanakajj Egiptot mistunipkäna ukhajja, jupanakamp chikajj “yaqha markat jutir jaqenakaw” mistunipjjarakïna (Éx. 12:38). Moisesajj yatiykäna uka tunka plaganakajj kunjamsa phoqasïna uk uñjasajja, inas jupanakat yaqhepajj Jehová Diosar confiyapjjchïna. Jachʼa Babiloniajj tukjatäkani ukhatï ukham pasaspa ukhajja, ¿janïr akapachan tukuskipan jaqenakan jiwasamp mayachasjjapjjatapajj janis walïkaspa ukhamti amuyañäni? ¡Janiw ukham amuyañasäkiti! Alajjpachankir Awkisatwa yateqasiñasa, jupajj “khuyaptʼayasiri, sinttʼasiri, pacienciani, wali munasiñat jan jaytjasiri, arupar phoqeri ukhamawa” (Éx. 34:6). b
Yaqhepanakajja, ‘Jachʼa Babilonian’ tukjäwip uñjasajj kunjamsa Jehová Diosan Testigonakapajj walja maranak ukan pasañap predicapjjäna ukwa amtapjjani. (Párrafos 12 y 13). d
14, 15. Mä jaqejj wiñayatakit jakani janicha ukajja, janiw kunapachas jiwi kawkjansa jakasi ukarjamäkaniti, ¿kunjamatsa uk yattanjja? (Salmo 33:4, 5).
14 Inas maynir Jehová Diosar jan servir familiapat akham parlir istʼsta: “Mä familiarajatï jachʼa tʼaqesiñ tiempo janïr purinkipan jiwaspa ukhajj jukʼamp walïspawa, jupajj jaktasinkaniwa” sasa. Cheqas janiw jan wali amtampejj uk siskpachati. Maynejj wiñayatakit jakani janicha ukajja, janiw kunapachas jiwi ukarjamäkaniti. Jehová Diosajj perfecto Juezawa, kunanaktï amtki ukanakajj cheqapapuniwa (Salmo 33:4, 5 liytʼäta). “Oraqpachan Juezapajj” kunatï cheqapäki ukpunwa lurani, janiw ukat payachasktanti (Gén. 18:25).
15 Maynejj wiñayatakit jakani janicha ukajja, janiw kawkjansa jaki ukarjamäkarakiniti. Reinon suma yatiyäwinakapajj jan yatiyaski uka lugaranakanjja, millón millón jaqenakaw jakapjje, Jehová Diosajj janipuniw jupanakarojj uka lugaranakan jakapjjatap laykukejj ‘cabranakarjam’ uñjkaspati (Mat. 25:46). Jiwasatï uka jaqenakat llakisstanjja, oraqpachan Juezapajj jukʼampiw jupanakat llakispacha. Kunjamsa Jehová Diosajj jachʼa tʼaqesiñ tiempon uñjani uk janiw yatktanti. Kunapachatï Jehová Diosajj taqe markanak nayraqatan sutip jachʼañchkani ukhajja, inas yaqhep jaqenakajj jupar uñtʼapjjchini, jupar confiyapjjarakchini (Ezeq. 38:16).
Jachʼa tʼaqesiñajj qalltkani ukhajj kunatï paskani uk uñjasajj ¿yaqhepajj Jehová Dios toqet saytʼasiñ amtapjjpachäniti?
16. ¿Kunanaksa Jehová Diosat yattanjja? (Dibujo uñjjattʼarakïta).
16 Bibliat yatjjatasajja, Jehová Diosajj jaqen jakäwip wali valoranit uñjatapwa yateqawaytanjja. Wiñay jakañasatakejj Yoqaparuw jiwasanak layku churawayi (Juan 3:16). Kunjamsa Jehová Diosajj munasiñampi sinttʼasiñamp uñjistu ukjja, taqeniw jakäwisan uñjawaytanjja (Is. 49:15). Sapa mayniruw sutitkam uñtʼarakistu. Janiw ukakïkiti, niyakejjay jupajj wali sum uñtʼchistojja, jiwjjañäni ukhas kunjamäkayätantï uka pachpwa jaktayistani, kunjam amuyunïyätansa uka pachpa amuyun jaktayarakistani (Mat. 10:29-31). Niyakejjay alajjpachankir Awkisajj wali yatiñani, cheqapar uñjiri, munasir Diosächejja, jaqenakarojj cheqaparjamaw juzgani, janiw ukat payachasktanti (Sant. 2:13).
Niyakejjay Jehová Diosajj yatiñani, cheqapar uñjiri, khuyaptʼayasir Diosächejja, cheqaparuw jaqenakar juzgani, janiw ukat payachasktanti. (Párrafo 16).
17. ¿Kunsa jutïr yatichäwin yatjjataskañäni?
17 Niyakejjay jichhajj taqe ukanakat jukʼamp sum amuyjjstanjja, kunatsa jaqenakar jankʼak predicañasa ukwa amuyaraktanjja. ¿Kunatsa ukham sistanjja? Suma yatiyäwinak jan qarjtas predicaskakiñatakejj ¿kunas yanaptʼistani? Jutïr yatichäwinwa uka jisktʼanakar qhanañchaskañäni.
CANCIÓN 76 ¿Chuymaman kunjamakis jikjjatasta?
a “Jehová Diosajj amuyañwa yatichi” sat yatichäwi liytʼäta, ukajj Yatiyañataki 15 de marzo de 2015, páginas 7 al 11 revistankiwa. Kunatsa Biblian parlki uka yaqhep sarnaqäwinakajj janiw kunanakatï jutïrin paskani ukanak uñachtʼayañatakïkiti sasin sistan ukaw ukan qhanañchasi.
b Jachʼa Babiloniajj tukjatäkani uka qhepatjja, Magog oraqenkir Gog satäki ukaw Diosan taqe servirinakapar yantʼani. Jachʼa Babiloniajj tukjatäkani uka qhepat khitinakatï Jehová Dios toqet saytʼasiñ amtapkani ukanakajj yantʼatäpjjarakiniwa.
c FOTONAKAT JUKʼAMP QHANAÑCHTʼAÑATAKI.: Kunatsa taqpach jaqenakar jan predicañ puedkañäni ukaw uka kimsa fotonakan uñachtʼayasi: 1) mä warmejja, kawkjantï jilaparte jaqenakajj jan cristianöpki uka cheqanwa jakasi, predicañas ajjsarayasiñjamarakiwa; 2) mä chacha warmejja, kawkjantï política toqet jan walinak utjatapat predicañajj jarkʼatäki, ajjsarañjamäkaraki uka cheqanwa jakasipjje; 3) mä chachajja, kawkjarutï jan puriñjamäki uka lugaranwa jakasi.
d FOTONAKAT JUKʼAMP QHANAÑCHTʼAÑATAKI: Jehová Diosat jitheqtat mä tawaq warmejja, kuntï “Jachʼa Babilonian” tukjasitapat yateqkäna ukwa amtaski, Jehová Dios toqet saytʼasiñwa amtaraki. Testigöpki uka tatap mamapan ukaruw kuttʼaraki. Maynitï ukham kuttʼanini ukhajja, alajjpachankir Awkisjamaw khuyaptʼayasiñasa, sinttʼasiñasa, juchararan kuttʼanitapat kusisiñasaraki.
