1. 1) ¿Kuna suytʼäwsa Jehová Diosajj churistu? 2) ¿Diosar suytʼaña siski ukajj kamsañsa muni? (Amtañataki siski uka qhanañchäwi liytʼam).

 KHITINAKATÏ jupar munasktan ukanakarojja, Jehová Diosajj mä suma suytʼäwi churistu. Niyaw usuntañanaksa, llakisiñanaksa, jiwañsa chhaqtayjjani (Apoc. 21:3, 4). Jupar suytʼapki uka llampʼu chuymani jaqenakarojja, aka oraq mä paraisor tukuyapjjañapatakiw yanaptʼani (Sal. 37:9-11). Jichha tiempon sumsa Jehová Diosampejj apaskstanjja, jutïrin jukʼamp sumwa jupampejj apasjjañäni. ¡Ukajj mä suma suytʼäwiwa! Ukampis ¿kunatsa Diosan promesanakapajj phoqasipuniniwa sasin confiytanjja? Kuna laykutejj kuntï arski uk phoqapuniwa. Ukhamajj Diosar suytʼañatakejj walja razonanakaw utjistu (Sal. 27:14). b ¿Kunjamsa jupar suytʼatas uñachtʼaysna? Promesanakap phoqatpach phoqasiñapkam pacienciampi, kusisit chuymamp suytʼasaw uñachtʼaytanjja (Is. 55:10, 11).

2. ¿Kunsa Jehová Diosajj jichha tiempon lurawayi?

² Jehová Diosajj arupar phoqerïtap uñachtʼayjjewa. Ak amuytʼañäni. Apocalipsis libronjja, taqe markanakaru, tribunakaru, kunayman kasta jaqenakaru, kunayman aru parlir jaqenakar jichha tiempon tantachthapiñwa arsüna, jupanakajj mayachtʼataw adorapjjetani sasaw säna. Jupanakarojj jichha tiempon ‘walja jaqenaka’ sasaw uñtʼasi (Apoc. 7:9, 10). Uka walja jaqenak taypinjja, kunayman kasta jañchini, kunayman aru parliri, kunayman markanakata, chachanaka, warminaka, wawanakaw utji. Ukhamäkchisa, taqe jupanakajj mayachtʼataw aka oraqpachan Diosar servipjje, maynit maynikamas sumankapjjarakiwa (Sal. 133:1; Juan 10:16). Jupanakajj wali kusisitaw predicapjje. Aka oraqen suma jakasiñ utjkani uka toqet istʼañ munapki ukanakar parlañatakis jankʼakïpjjewa (Mat. 28:19, 20; Apoc. 14:6, 7; 22:17). Jumatï uka walja jaqenak taypinksta ukhajja, jutïritak mä suytʼäwejj utjki uk wali valoranitwa uñjpachätajja.

3. ¿Supayajj kuna amtanisa?

 ³ Diablojj kuntï suytʼasktan ukwa apaqañ munistu. Jehová Diosajj janiw nayat llakiskiti, janiw promesanakap phoqkaniti sasin amuyañaswa Supayajj muni, cheqas ukaw amtapajja. Jupatï uka suytʼäwis apaqestaspa ukhajja, ajjsarañampiw apayasjjsna, janirakiw Jehová Diosarojj sirvjjsnati. Diablojja Job chacharojj suytʼäwip apaqañwa munäna, ukhamat Jehová Diosar jan adorjjañapataki.

4. ¿Kunanakatsa aka yatichäwin yatjjataskañäni? (Job 1:9-12).

⁴ Job chachajj taqpach chuymapampiw Diosar servïna, uk aptʼasiñapatakejj kunanakampis Supayajj apaqañ munäna ukanakwa aka yatichäwin yatjjataskañäni (Job 1:9-12 liytʼäta). Ukatjja kunsa Job chachat yateqsna, kunatsa Diosajj munasituwa, promesanakapsa phoqaniwa sasin amtañasajj wali wakiskirejja ukanakatwa yatjjatarakiñäni.

5, 6. ¿Kunjamsa Job chachan jakäwipajj mä jukʼa tiemponak qʼal mayjtʼäna?

⁵ Job chachajj wali sum jakasïna: Jehová Diosan amigopänwa, wali jachʼa ukat mayachtʼat familianïnwa, wali qamirirakïnwa (Job 1:1-5). Ukampis mä urunakwa niya taqe ukanak aptʼasïna. Jan utjiriniw quedasïna (Job 1:13-17). Wali munat taqpach wawanakapaw jiwarjjarakïna. ¿Kunjamakis jikjjataspachäna uk amuyasmati? Mä wawajj jiwi ukhajja, awk taykajj wali llakitaw jikjjatasipjje. Ukhamajj tunka wawanakapan jiwarapjjatap yatisajj Job chachas esposapas janiw kamachtʼasiñsa puedipkpachänti, chuymas kawkstʼata, wali llakita ukhamaw jikjjatasipjjpachäna. Ukatwa Job chachajj wali llakitätap uñachtʼayañatakejj isip chʼiyanoqasïna, oraqer puriñkamas altʼasirakïna (Job 1:18-20).

⁶ Ukjjarusti Supayajj Job chacharuw usuntayäna, wali respetomp uñjatäkäna uksa takichasirakïnwa (Job 2:6-8; 7:5). Job chacharojj jaqenakajj wal respetapjjäna, ewjjtʼayasiñatakis juparuw thaqapjjerïna (Job 31:18). Ukampis jichhajj janiw jupar jakʼachasjjapjjänti, yaqhachapjjänwa. Jilanakapasa, wali munat amigonakapasa, servirinakapasa jaytanukjjapjjänwa (Job 19:13, 14, 16).

7. 1) ¿Kuna razonatsa tʼaqespachäta sasas Job chachajj amuyäna, ukat kunsa jan lurkäna? 2) ¿Job chachajj uñjaskäna niya ukham jan walinakan mä cristianojj uñjasirakispati? (Párrafo 7 ukatak utjki uka dibujo uñjjattʼam).

⁷ Jehová Diosajj janiw sum uñj-jjetuti, ukatwa tʼaqesiskta sasin Job chachajj amuyaspa ukwa Supayajj munäna. Uka amtampiw kawkïr utantï tunka wawanakapajj manqʼasipkäna, vino umasipkäna uk mä jachʼa thayamp allthapïna (Job 1:18, 19). Ukatjja alajjpachat nina saraqayanisaw Job chachan ovejanakap jiwarayäna, janiw ukakïkänti, ovej awatirinakaparus jiwarayarakïnwa (Job 1:16). Niyakejjay thayajj alajjpachat thaytʼanchïnjja, ninas alajjpachat saraqanirakchïnjja, Diosas jupar ukanakamp jan waltʼayawaykaspa ukhamwa Job chachajj amuyäna. Diosan chuymap ustʼayañatakejj kuna jan walsa lurkaspa ukhamwa amuyjjarakïna. Ukhampachas janiw alajjpachankir Awkiparojj maldiskänti. Kunatï walïki ukanak walja maranakaw Diosat katoqäna, ukanak taqe chuymaw katoqtʼasïna, ukhamajj ‘¿janit kunanakatï jan walïki ukanak katoqaskarakiristjja?’ sasaw amuyäna. Ukatwa jupajj akham säna: “Jehová Diosan sutipajj jachʼañchatakïskpan” sasa (Job 1:20, 21; 2:10). Job chachajja, qollqe toqet aynachtʼatäkasasa, wali llakitäkasasa, usuntatäkasas janipuniw Jehová Diosat jitheqtkänti. Ukampis Supayajj janiw qarjtkänti.

8. ¿Kuna yaqha toqetsa Supayajj Job chachar yantʼäna?

⁸ Supayajj yaqha toqetwa Job chachar yantʼarakïna. Diosat jan jitheqtir Job chacharojja,  kimsa falso amigonak toqew Supayajj janis kunatakis sirvkaspa ukham amuyayäna. Sinti jan walinaksa lurawaykaspa, ukatsa tʼaqeskaspa ukhamwa jupanakajj Job chachar amuyayapjjäna (Job 22:5-9). Janis jan walinak lurkchismänjja, janipuniw Jehová Diosar kusisiykasmänti sasaw jupar creyiyañ munapjjarakïna (Job 4:18; 22:2, 3; 25:4). Mä arunjja, Diosajj janis jupar munaskaspa, janis cuidkaspa, jupar serviñajj inamayakïkaspasa ukham payachasiñapwa munapjjäna. Uka arunakajj kuna jan walinakantï uñjaskäna ukanakajj janis askichañjamäjjaspa ukham inas Job chachar amuyaychïna.

9. ¿Kunas Job chacharojj chʼamanïskakiñatakisa jan ajjsarañatakis yanaptʼpachäna?

⁹ Ak amuytʼapjjañäni. Job chachajj qhella patjjan qontʼatäskiwa, uruy arumaw llaganakajj jupar tʼaqesiyaraki (Job 2:8). Amigonakapas janiw suma jaqëktati, kuntï lurawaykta ukajj janiw kuna valoranïkisa sasaw sapjjaraki. Taqe ukanakajj walpun Job chachar aynachtʼayi. Wawanakapan jiwatapats wali llakitapuniw jikjjatasiraki. Qalltan janiw kamskisa (Job 2:13-3:1). Ukham jan kun kamsatapat inas amigonakapajj Jehová Diosarojj apanukjjaniwa sasin amuyapjjchi, ukampis janiw ukhamäkiti. Ukat inas amigonakapar uñkatasajj aka arunak sischïna: “¡Jiwañajkamajj janipuniw Diosar taqpach chuymamp serviñ apanukkäti!” sasa (Job 27:5). Ukham jan walinakan uñjasisajj ¿kunas Job chacharojj chʼamanïskakiñatakisa jan ajjsarañatakis yanaptʼpachäna? Sinti jan walin uñjasisas munasiri Diosajajj yanaptʼitaniwa sasaw suytʼaskakïna. Jiwjjä ukhas Jehová Diosaw jaktayitani sasaw confiyäna (Job 14:13-15).

10. ¿Job chachan sarnaqäwipat kunsa yateqsna?

¹⁰ Supayajj Jehová Diosar apanukuñasatakejj janiw obligkistaspati, Diosajj taqe kunanakatï  paskistu ukanak sum uñjaski, ukwa Job chachan sarnaqäwipat yateqsna. Job chachan jakäwipat wali wakiskir yatichäwinakwa yateqaraksna, uk jichhajj mä qhawqhanak uñjañäni.

11. ¿Taqe horasan Diosar confiyañajj kunatakis yanaptʼistani? (Santiago 4:7).

¹¹ Jiwasatï taqe horasan Jehová Diosar confiyañäni ukhajja, kuna yantʼansay uñjaskchiñänejja, aguantañäniwa, Supay contraw saytʼasirakiñäni, ukwa Job chachajj uñachtʼayäna. Ukhamtï lurañänejja, Diablojj jiwasanakat jaltjjaniwa sasaw Bibliajj qhanañchi (Santiago 4:7 liytʼäta).

12. ¿Jiwatat jaktaña utjatap suytʼañajj kunjamsa Job chachar chʼamañchtʼäna?

¹² Jehová Diosajj jutïrin jaktayistaniwa sasaw taqe chuyma confiyañasa. Kunjamtï pasïr yatichäwin yatjjataniwayktanjja, Supayajj jiwañar ajjsarañaswa muni, ukhamat Jehová Diosar phoqat chuymamp servitas apanukuñasataki. Job chachat amuytʼaskakiñäni. Job chachajj jakañ vidap salvasiñatakejj kuns lurakispawa, Diosar serviñs apanukuspawa sasaw Supayajj säna. ¡Ukham amuyasajj pantjasïnwa! Sinti jan walinakan uñjaskasasa, jiwjjäwa sasin amuykäna ukhasa, janipuniw Diosar apanukkänti. ¿Kunjamsa uka jan walinak aguantäna? Jehová Diosajj suma Diosawa sasaw confiyäna, Diosajj taqe kunwa jutïrin askichjjani sasaw taqe chuyma suytʼarakïna. Janis jichha tiempon Diosajj yanaptʼkchitanejja, jutïrinwa yanaptʼitani sasaw Job chachajj confiyäna. Jiwatat jaktañajj utjapuniniwa sasaw suytʼarakïna. Jiwasatï jiwatat jaktaniñajj utjapuniniwa sasin taqe chuyma confiyarakstanjja, jiwayämaw satpachas phoqat chuymampiw Diosar serviskakiñäni.

13. ¿Kunanakampitï Supayajj Job chachar yantʼkäna ukanakat kunatsa amuyasiñasa?

¹³ Supayajj kunanakampis Job chachar yantʼäna uk sum amuyañasawa, kuna laykutejj niya ukhamanakampiw jichhürunakan yantʼistaspa. Supayajj janiw Job chacha contrakejj parlkänti jan ukasti taqe jaqenak contraw parläna. Jupajj akham sänwa: ‘Jaqejj vidap salvasiñatakejj kunanakatï jupan utjki taqe ukanakwa churaspa’ sasa (Job 2:4, 5). Uka arunakampejja, janis Jehová Diosar cheqpachapun munasksna, jakäwisan jan walin uñjasisajj Jehová Diosar apanukjjaksnasa, Diosajj janis munaskistaspa, kunanaktï jupar kusisiyañatakejj lurktan ukanak janis valoranit uñjkaspa ukhamwa Supayajj sañ munaskäna. Jehová Diosar suytʼasktan ukanakarojja, janiw Supayajj engañjkistaspati, kuna laykutejj kunanakampis yantʼistu uk yatjjtanwa.

14. ¿Yantʼanakan uñjasiñajj kun amuyasiñatakis yanaptʼistaspa? Uk mä uñachtʼäwimp qhanañchtʼam.

¹⁴ Yantʼanakan uñjasisajja, ukanakajj jiwas pachpar sum uñtʼasiñatakïkaspas ukhamwa uñjañasa. Jan waltʼäwinakan uñjasiñajja, kuna cambionaksa jakäwipan lurañapäna uk amuyasiñatakiw Job chachar yanaptʼäna. Sañäni, jukʼamp humilde chuymanïñatak chʼamachasiñap wakisitapwa amuyasïna (Job 42:3). Yantʼanakan uñjasiñäni ukhajja, kunjam jaqëtansa uk sum amuyasiñatakiw yanaptʼistaspa. Nikolái c jilatarojj ukaw pasäna, wali usutäkchïnsa carcelaruw llawintapjjäna. Jupajj akham siwa: “Carcelankañajja, radiografía apsuyasiñamp sasiwa: mä cristianorojj kunjam chuymanisa uk amuyasiñatakiw yanaptʼi” sasa. Kunans jakäwisan mejorañasa uk amuyasisajja, ratukiw ukarjam lurañatak chʼamachasiñasa.

15. ¿Khitirus istʼañasa, ukat kunatsa?

¹⁵ Enemigonakasar istʼañat sipansa, Jehová Diosaruw jiwasajj istʼañasa. Job chachajja, Diosajj jupar parlkäna ukhajj wali amuyumpiw istʼäna. Niya akham arunakampiw Diosajj jupar  amuytʼayäna: “¿Kunanaktï nayajj lurawaykta ukanak uñjtati? Taqe kunanakatï jumar pasawayktam uk nayajj uñjtwa. ¿Janit nayajj jumar cuidkirisma?” sasa. Kunanaktï Diosajj jupa layku lurkäna ukjja, humilde chuymampi ukat yuspärasaw Job chachajj akham säna: “Jiñchunakajajj jumat parlir istʼapjjänwa, ukampis jichhajj pachpa nayranakajampiw jumar uñjsmajja” sasa (Job 42:5). Uka arunak arskäna ukhajj inas Job chachajj qhella patjjan qontʼatakïskchïna, cuerpopajj qʼala llagakamakïnwa, wawanakapan jiwatapatsa wal jachaskarakïna. Ukhaman uñjaskäna ukhajja, Jehová Diosajj jupar munasitapa valoranit uñjatapwa uñachtʼayäna (Job 42:7, 8).

16. Isaías 49:15, 16 textorjamajja, ¿yantʼanakan uñjaskasajj kunsa amtañasa?

¹⁶ Jichhürunakanjja inas jaqenakajj insultchistani, jan ukajj janis kunäksna ukham uñjapjjchistani. Inas jaqenakajj jiwasarusa Diosan markaparus jan walit uñjayañ munapjjchini, ‘inas kunayman arunakampi kʼarinak’ jiwasanakjjat parlapjjarakchini (Mat. 5:11). Yantʼanakan uñjaskasajj servirinakajajj janiw nayat jitheqtapkaniti sasaw Jehová Diosajj confiyi, ukwa Job chachan sarnaqäwipajj yatichistu. Jehová Diosajja, jupar suytʼasktan ukanakarojj munasistuwa, janipuniw armaskistaniti (Isaías 49:15, 16 liytʼäta). Diosan enemigonakapajj kʼarintapkchistusa, janiw yäqañasäkiti. Turquía markankir James jilatat parltʼañäni, jupasa familiapasa, sinti jan walinakanwa uñjasiwayapjje. Jupajj akham siwa: “Nanakatï Diosan markapjjat kʼarinak parlapkäna ukar istʼapjjeriskayäta ukhajja, desanimasipjjeriskayätwa, ukwa amuyasipjjta. Ukatwa Diosan  Reinop taqe chuyma suyapjjayäta. Diosar serviñansa wali ocupatäpjjarakiyätwa, ukhamatwa kusisitakïsipkayäta” sasa. Ukhamajj Job chachat yateqasis Jehová Diosar istʼapjjañäni. Enemigonakasajj kʼarinaksa parlapkchinejja, ¡jiwasajj Jehová Diosar suytʼaskakiñasawa!

17. Hebreos 11 capitulon Diosat jan jitheqtir chachanakata warminakatwa parli, ¿kunsa jupanakat yateqsna?

¹⁷ Job chachajj jan waltʼäwinakan uñjaskasajj jan ajjsartʼirïnwa, chʼamaniw saytʼasirakïna. Ukampis janiw jupakejj ukhamäkänti, Diosan servirinakapat waljaniw ukhamäpjjarakïna. Hebreo cristianonakar qellqkäna uka cartanjja, apóstol Pablojj Diosan walja servirinakapatwa parläna, jupanakajj “jachʼa qenayar uñtat walja testigona[käpjjewa]” sasaw säna (Heb. 12:1). Jupanakajj sinti jan walinsa uñjasipkchïnjja, janiw Jehová Diosat jitheqtapkänti (Heb. 11:36-40). Ukham chʼamachasipjjatapasa, aguantapjjatapas janiw inamayäkänti. Cheqas Diosan taqe promesanakap phoqasir janis uñjawayapkchïnjja, jupar suytʼasipkakïnwa. Jehová Diosan suma uñjatäpjjatap jupanakajj yatipjjänwa, ukatwa Diosan uka promesanakap phoqasir uñjañäniwa sasin confiyapjjäna (Heb. 11:4, 5). Jupanakat yateqasiñajja, Jehová Diosar suytʼaskakiñatakiw yanaptʼistu.

18. Jan walinakansa uñjaskchiñänejja, ¿kun lurañsa amtañasa? (Hebreos 11:6).

¹⁸ Aka jan wali pachajj jan walit jukʼamp jan waliruw saraski (2 Tim. 3:13). Supayajj Diosan servirinakaparojj yantʼaskakiwa. Jutïrin kunjamanakansay uñjaskchiñänejja, taqe almamp Diosar servisipkakiñäni. Jiwasajj “jakkiri Diosaruw suytʼasktanjja”, janiw ukat payachasktanti (1 Tim. 4:10). Ak amtapjjapuniñäni: qhepatjja ‘wali munasir chuymanïtapa, wali khuyapayasirïtapwa’ Diosajj Job chachar uñachtʼayäna (Sant. 5:11). Job chachat yateqasisajj janipun Jehová Diosat jitheqtapjjañäniti, ‘jupar taqe chuyma thaqerinakarojj’ jupajj bendisipuniniwa, janipun ukat payachasipjjañäniti (Hebreos 11:6 liytʼäta).