1, 2. Isaías 65:16, 17 textojj ¿kunjamsa aguantaskakiñatak yanaptʼistu?

JEHOVÁ DIOSAN Testigonakapan kimsa uru jachʼa tantachäwipajj 2017 maran apaskäna ukan pʼeqeñchäwipajj “Janipun qarjtamti” satänwa. Kunjamsa jan waltʼäwinakan uñjaskasas aguantsna ukwa uka jachʼa tantachäwejj yatichawayistu. Ukhat jichhakamajj pusi maras pasawayjjchejja, aka jan wali pachan aguantaskaktanwa.

² ¿Kuna jan walinakansa uñjasiwaytan? Inas mä familiarasa, jan ukajj mä amigosa jiwawaychi, inas wali usuntatästan, edadanëjjstan jan ukajj oraqen jan waltʼäwinakajj utjawaychi, inas arknaqata, jan waltʼayata, jan ukajj COVID-19 usumpi jan waltʼayat uñjasstan. Taqe uka jan walinak jankʼak tukusiñapwa muntanjja. Cheqas taqe ukanakajj tukusjjaniwa, janiw mayampsa amtjjañäniti (Isaías 65:16, 17 liytʼañataki).

3. ¿Kunsa luraskakiñasa, ukat kunatsa?

³ Akapachan jakañajj chʼamakiwa, inas jutïrin jukʼamp jan walinakan uñjaschiñäni (Mat. 24:21). Ukhamajj aguantañ yateqaskakiñasawa. ¿Kunatsa? Jesusajj uka toqet akham sänwa: “Aguantapjjatam laykojj jakañanakamsa salvasipjjätawa” sasa (Luc. 21:19). ¿Kunas ukatakejj yanaptʼistaspa? Jiwasjam jan walinakan uñjasipki ukanakajj kunjamsa aguantapjje ukanakatwa lupʼiñasa.

4. ¿Kunatsa aguantañ toqet Jehová Diosaw wali yateqaskayajja sasin sissna?

⁴ ¿Aguantañ toqet khitis suma yateqaskayajja? Jehová Diosawa. Inas Jehová Diosat jan lupʼkchiyätanti, ukampis ak amuytʼañäni. Aka pachjja, Supayaw apnaqaski ukatwa kunayman jan walinakajj utji. Jehová Diosajj taqe uka jan walinakjja, jichhpachaw tukjaspa, ukampis kuna urutï tukjañ amtki uka uru puriniñap pacienciampiw suytʼaski (Rom. 9:22). Ukañkamasti, aguantaskakiwa, kunanaksa aguantaski ukanakat llätunka uñjañäni.

5. ¿Kunjamsa Diosan sutipajj qʼañuchasiwayi, ukat uk yatisajj kunjamakis jikjjatasta?

⁵ Sutip qʼañuchapki ukwa aguantaski. Jehová Diosajj sutipar munasiwa, taqenin respetapjjañapwa munaraki (Is. 42:8, TNM). Ukampis mä 6.000 maranakaw Diosan sutipajj qʼañuchata uñjasiski (Sal. 74:10, 18, 23). ¿Kunjamsa ukajj qalltawayi? Diosajj Adanampir Evampirojj kusisit jakasiñatsa jarkʼkaspa ukhamwa Diablojj (ukajj “kʼarintiri” sañwa muni) Edén jardinan Diosar kʼarintäna, ukhamatwa ukajj qalltawayi (Gén. 3:1-5). Ukhat aksaruw Diablojj Jehová Diosar kʼarintaski, jaqenakajj kunanaktï cheqpachapun munapki ukanakatsa Diosajj jarkʼkaspa ukhamwa kʼarintaski. Kunjamsa Awkipan sutipajj sapürutjam qʼañuchat uñjasïna uk uñjasajja, Jesusajj wal llakisïna, ukatwa discipulonakaparojj akham mayisiñ yatichäna: “Alajjpachankir nanakan Awkija, sutimajj jachʼañchatäpan” sasa (Mat. 6:9).

6. Jupaki alajjpachansa aka oraqensa apnaqañatak derechonïtap uñachtʼayañatakejj ¿kunatsa Jehová Diosajj walja tiempo suyaskaki?

⁶ Waljanejj Jupa contra, gobiernop contra saytʼapki ukwa aguantaski. Jehová Dios sapakiw alajjpachansa aka oraqensa apnaqañatakejj derechoni, Jupjam suma apnaqerejj janiw utjkiti (Apoc. 4:11). Ukampis Diablojja, Diosajj janis apnaqañatak derechonïkaspa ukham amuyapjjañapatakiw angelanakarusa jaqenakarus engañjañ munäna. Jehová Dios sapaki apnaqañatak derechonïtap uñachtʼayañatakejja, walja tiempow munasi. Ukatwa taqe kun Lurir Diosajj wali yatiñanïtap laykojj jaqenakan walja tiempo jupanak pachpa apnaqasipjjañapatak jaytawayi, ukhamat Diosar jan istʼasa jupanak pachpa apnaqasipjjatapajj jan walïtap amuyasipjjañapataki (Jer. 10:23). Diosan paciencianïtap laykuw Jupaki taqe kunjjar apnaqañatak derechonïtapat jan khitis pächaskaniti. Taqeniw Jehová Dios sapaki sum apnaqerïtap yatipjjani, Reinop toqekiw sumankañasa, suma jakasiñas aka oraqen utjani uksa yatipjjarakini.

7. ¿Khitinakas Dios contra saytʼawayapjje, ukat kunsa jupanakar Jehová Diosajj lurani?

⁷ Yaqhep wawanakapajj Jupa contra saytʼawayapki ukwa aguantaski. Jehová Diosajj angelanakarusa jaqenakarus perfectwa lurawayi. Ukampis Dios contra saytʼiri angelajja, mä arunjja Supayajja (ukajj “kutkatasiri” sañwa muni) perfectöpkäna uka Adanampiru Evampiruw Jehová Dios contra saytʼapjjañapatak amtayäna. Ukatsti, yaqha angelanakasa, yaqha jaqenakas ukhamarakiw Dios contra saytʼapjjäna (Jud. 6). Tiempompejja, Diosan ajllita Israel markankirinakat yaqhepasa, Dios contraw saytʼjjapjjäna, yaqha diosanakar serviñwa qalltjjapjjarakïna (Is. 63:8, 10). Razonaniw Jehová Diosajj chuyma ustʼata jikjjatasïna. Ukampis aguantaskakiwa, Jupa contra saytʼirinakaru tukjañ uru puriniñkamajj aguantaskakiniwa. Diosar jan jitheqtas servirinakajj Jupamp chika akapachan jan walinak aguantasipki ukanakajj wal kusisipjjani.

8, 9. ¿Kuna kʼarinaksa Jehová Diosat parlapjje, ukat kunjamsa ukajj jan cheqätap uñachtʼaysna?

⁸ Diablojj sapa kuti kʼariski ukwa aguantaski. Supayajja, Diosar jan jitheqtas serviri Job chachar kʼarintkäna ukhajja, Diosar jan jitheqtas servirinakajj interés laykukis servipkaspa ukhamwa amuyayäna (Job 1:8-11; 2:3-5). Diablojj jichhürunakkamaw jaqenakar ukham kʼarintaskaki (Apoc. 12:10). Supayan kʼarïtapjja, jan walinak aguantasa, Jehová Diosar munasiñat jan jitheqtas servisaw uñachtʼaysna. Kunjamtï Job chachar bendiskänjja, ukhamarakiw aguantatasat bendisistani (Sant. 5:11).

⁹ Supayajj kʼari religionanakan pʼeqtʼirinakap  toqew Jehová Diosajj janis munasirïkaspa, Jupas taqe tʼaqesiñanakat juchanïkaspa ukham amuyayi. Mä wawajj jiwi ukhajja, ‘Diosajj mä angelito alajjpachan munäna, ukatwa apasjje’ sasaw yaqhepajj sapjje. Ukajj Diosar jan respetatapwa uñachtʼayi. Ukampis munasiri Diosätap jiwasajj yattanwa. Ukatwa wal usuntktan jan ukajj mä familiasajj jiwjje ukhajj Diosar jan juchañchktanti. Antisas ‘Jupaw jutïrin uka tʼaqesiñanak askichani’ sasaw confiytanjja. Khitinakatï istʼapkistani ukanakarojja, ‘Jehová Diosajj munasiriwa’ sasaw yatiysna. Ukhamatwa Jupat jan wal parlirirojj jan cheq parlatap Diosajj uñachtʼayani (Prov. 27:11).

10. Salmo 22:23, 24 qellqatajj ¿kunsa Jehová Diosat yatichistu?

¹⁰ Munat servirinakapajj tʼaqesipki ukwa aguantaski. Jehová Diosajj wali khuyaptʼayasiri Diosawa. Ukatwa jan waltʼayañatak arknaqasin tʼaqesiyapkistu, jan ukajj usuntat tʼaqesktan, juchanakas kawsa tʼaqesktan ukanak uñjasajj tʼaqesiraki (Salmo 22:23, 24 liytʼañataki). Kunjamsa tʼaqestan uk amuyiwa, ukatwa jankʼak uk tukjañ muni, tukjarakiniwa (Éxodo 3:7, 8; Isaías 63:9, TNM uñjjattʼarakïta). Ukatjja, “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” (Apoc. 21:4).

11. Jupar jan jitheqtasa servirinakapan jiwatapatjja, ¿kunjamas Jehová Diosajj jikjjatasi?

¹¹ Munat amigonakapan jiwatapwa aguantaski. Walja chachanaka, warminakaw Diosar jan jitheqtas servisa jiwapjje, ¿uka servirinakapan jiwatapat kunjamas Jehová Diosajj jikjjatasi? Jupanakar wasitamp uñjañ wal muni (Job 14:15). Abrahán amigoparus wal uñjañ munaraki (Sant. 2:23). Moisesampejj ‘ajanut ajanuw’ parlirïna, juparus ukhamarakiw wal uñjañ munpacha (Éx. 33:11). Davidarusa, mayni salmonak qellqerinakarus  cantatanakap wasitampi istʼañ wal munpacha (Sal. 104:33). Uka amigonakapajj jiwañansa iktʼjjapjjchejja, janiw jupanakat armaskiti (Is. 49:15). Uka servirinakapajj kunjamäpjjänsa ukjja, Jehová Diosajj taqwa amtaski, “Jupatakejj taqe uka jaqenakajj jakasipkiwa” (Luc. 20:38). Mä uruw jupanakar jaktayjjani, ukat wasitampiw oracionanakapsa istʼjjani, Jupar servipjjatapatsa kusisirakiniwa. ¿Munat familiarapajj jiwjje ukanakatakejj uk yatiñajj wali chuymachtʼkirejjaya?

12. ¿Aka qhepa urunakan kunas Jehová Diosar jukʼamp llakisiyi?

¹² Jan wali jaqenakajj mayninakar jan waltʼayasipki ukwa aguantaski. Edén jardinan Dios contra saytʼapkäna ukhajja, uka jan walinak janïr askichaskipan jukʼamp jan walinak utjañap Jehová Diosajj yatïnwa. Jichha tiempon ina chʼusat tʼaqesiñanaka ukat yaqha ukham jan walinak uñjktan ukanak Jehová Diosajj uñisiwa. Jan arjjatirinïpki ukanakat jukʼampiw llakisi. Sañäni, aynachtʼatäpki, jan jarkʼaqasiñ puedipki, wajchäpki, viudäpki ukanakatjja, llakisipuniwa (Zac. 7:9, 10). Jupar jan jitheqtas servipki ukanakarojj kunjamsa tʼaqesiyapjje, carcelarus jistʼantapjje uk uñjasajj jukʼampiw llakisi. Jupamp chika aguantasipki ukanakarojj Jehová Diosajj wal munasi, jupanakajj janiw ukat pächasipjjañapäkiti.

13. ¿Jaqenakan kuna jan wal luratapsa Jehová Diosajj uñji, ukat kunsa lurani?

¹³ Jaqenakajj jukʼamp qʼañu juchanak lurapki ukwa aguantaski. Jaqenakajj Diosat yateqasiñataki luratätanwa, ukampis Supayajj qʼañu juchanak lurayañwa munistu. Noé chachajj jakkäna uka tiemponjja, Jehová Diosajj ‘jaqenakan jan wali luratanakapajj waljapunïtapwa uñjäna’, ukatsti ‘jaqenakar oraqen luratapatjja wal amtasïna, chuymsa wal usuyasirakïna’ (Gén. 6:5, 6, 11). ¿Ukhat aksarojj sumti jaqenakajj sarnaqjjapjje? Janiwa. Jichha tiemponjja, jaqenakajj kunayman jan wali qʼañu juchanakwa lurapjje, chacha pura, jan ukajj warmi puraw qʼañu juchanak lurapjje, ukanak uñjañajj Diablor wal gusti (Efes. 4:18, 19). Yamas Diosan mä serviripajj juchar purtʼasi ukhajja, walpun kusisi. Ukampis Jehová Diosan pacienciapajj tukusjjani ukhajja, qhawqsa uka jan wali qʼañu jucha lurañanakar uñisi ukwa Diosajj uñachtʼayani.

14. ¿Kunsa jaqenakajj aka oraqerusa animalanakarus lurasipki?

¹⁴ Jaqenakajj aka oraqer jan waltʼayasipki ukwa aguantaski. ‘Jaqejja pachpa jan waltʼäwipatakiw jaqerojj apnaqe’, Diosajj kunjamtï aka oraqerusa animalanakarus cuidapjjañap munkäna, ukham janiw cuidapkiti (Ecl. 8:9; Gén. 1:28). Jutïr maranakanjja, mä millón kunayman kasta animalanaka, plantanakaw aka oraqet chhaqtjjani sasaw cientificonakajj sapjje. Razonaniw ukanakat wal llakisipjje. Jehová Diosajj ‘aka oraqe tukjasipki ukanakarojj tʼunjaniwa’, ukatsti aka oraq mä Paraisoruw tukuyarakini, Jupaw uk arsuwayi, uk yatisajj walpun yuspärtanjja (Apoc. 11:18; Is. 35:1).

15, 16. ¿Kunas Jehová Diosamp chika aguantañatak jiwasar yanaptʼañapa? Uk mä uñachtʼäwimp qhanañchtʼam.

¹⁵ Alajjpachankir Awkisajj walja waranqa maranakaw kunayman jan walinak aguantaski (“ ¿Kunanaksa Jehová Diosajj aguantaski?” sat recuadro uñjjattʼäta). Jehová Diosajj aka jan wali pacharojj niyaw tukjaspäna. Ukampis pacienciampi suytʼatapajj wal yanaptʼawayistu. Uka toqet akham amuytʼañäni. Mä chacha warmirojja, ‘wawamajj usutaw nasini, ukatsti janiw jaya tiempo jakkaniti, walirak tʼaqesini’ sasaw yatiyapjje. Uka awk taykajj wawapar cuidañajj wali chʼamäñap yatipkchisa, wawap nasipan wal kusisipjje. Kuna jan walisay utjaskpan,  wawapar munasipjjatap laykojj sum jakasiñapatakejj taqe ukanakwa aguantapjje.

¹⁶ Niya ukar uñtasitarakiw Adanampin Evampin taqe wawanakapajj jucharara nasiwaytanjja. Ukhamäkchisa, Jehová Diosajj wal munasistu, cuidarakistuwa (1 Juan 4:19). Ukampis parlaniwayktan uka awk taykat sipans Jehová Diosajj kunanakatï wawanakapar tʼaqesiyki ukanak chhaqtayaspawa. Kunapachas uka tʼaqesiñanak chhaqtayani uk amtjjewa (Mat. 24:36). Ukhamajja, Diosan jiwasar munasitap laykojj qhawqha tiempoy aguantañajj wakischini uk Jupamp chikaw aguantañasa.

17. Hebreos 12:2, 3 textojj kuntï Jesusat siski ukajj ¿kunatsa aguantañatak yanaptʼistu?

¹⁷ Aguantañ toqetjja, Jehová Diosaw wali yateqaskayajja. Jesusajj awkipat yateqasisaw aguantarakïna. Aka oraqenkkäna ukhajja, jiwasanak laykuw jupa contra jan walinak parlatasa, phenqʼachatasa, tʼaqesiñ lawan jiwayatas aguantäna (Hebreos 12:2, 3 liytʼañataki). Awkipan aguantatapaw juparojj aguantañatak yanaptʼäna. Jiwasarus ukaw aguantañatakejj yanaptʼarakistaspa.

18. ¿Jehová Diosan pacienciampi aguantatapat kunanakas jikjjatasiski uk amuyañatakejj kunjamsa 2 Pedro 3:9 textojj yanaptʼistu?

¹⁸ (2 Pedro 3:9 liytʼañataki). Kunapachas aka jan wali pacharojj tukjañajj wakisi uk Jehová Diosaw yati. Diosan paciencianïtap laykuw walja millón jaqenakajj Jupar servisipki, jachʼañchasipkaraki. Jehová Diosatï jan aguantkaspänjja, janiw jupanakajj utjapkaspänti, Diosarus janiw munasiñ yateqapkaspänti, ni jakäwipsa katuyasipkaspänti, ukatwa Jehová Diosar aguantatapat yuspärapjje. Jiwasanakat walja millonanakajj tukuykama aguantatasat premio katoqkañäni ukhajja, Diosan pacienciampi aguantañ amtatapajj wali wakiskirïtapwa amuyañäni.

19. ¿Kun lurañsa amtañasa, ukat kunsa katoqañäni?

¹⁹ Supayajj kunayman tʼaqesiñanaka jan walinaksa utjaykchejja, Jehová Diosajj kusisitaw aguantaskaki, Jupatwa kusisit aguantañ yateqtanjja (1 Tim. 1:11). Jehová Diosajj sutip qʼomachañapkama, Jupaki taqe kun apnaqañatak derechonïtap uñachtʼayañapkama, taqe jan walinak tukjañapkama, kunanakatï tʼaqesiykistu ukanak chhaqtayañapkam pacienciampi suykasajja, ukhamarakiw kusisit aguantaskaksna. Alajjpachankir awkisajj aguantaskakiwa, ukhamajja jiwasajj aguantaskakiñäni, chuymachtʼasisipkakiñäni. Ukhamtï lurañänejja, aka arunakaw jiwasanakamp phoqasini: “Jan waltʼäwinak aguantir jaqejj kusispan. Jupajj suma jaqet uñjatäni ukhajja, jakañ corona katoqani. Jehová Diosajj khitinakatï jupar munasisipkaki ukanakar uk churañatakiw promesa luräna” sasa (Sant. 1:12).