1, 2. ¿Jehová Diosan servirinakapajj kunsa suyasipki?

 TAQENIW jutïrin sum jakasiñ muntanjja. Sañäni, yaqhepajj chacha warmjam kusisit jakasiña, wawanakapajj jan usuntas jilsupjjaspa ukwa munapjje, wali usutäpki ukanakasti waliptjjañwa munapjjaraki. Cristianonakajj ukhamarakiw jakasiñ muntanjja. Ukampis janiw ukak suyktanti, jutïrin wiñay jakasiña, munat familiasana amigonakasan jaktaniñapwa suyaraktanjja.

² Apóstol Pablojj akham sänwa: ‘Nayajj Diosar confiyasaw suytʼasktjja, cheqapar sarnaqer jaqenakasa jan cheqapar sarnaqer jaqenakas jaktanipjjaniwa’ sasa (Hech. 24:15). Cheqas janiw Pablokejj jiwatanakan jaktanipjjañap suykänti, Job chachasa ukhamarakiw suytʼäna. Diosajj nayat amtasisin jaktayitaniwa sasaw taqe chuym suytʼarakïna (Job 14:7-10, 12-15).

3. ¿Kunjamsa 1 Corintios capítulo 15 qellqatat yatjjatañajj yanaptʼistani?

³ ‘Jiwatat jaktañ’ yatichäwejja, cristianonakajj kuna yatichäwinakarutï creyipki ukanak taypinkarakiwa (Heb. 6:1, 2). Pablojj 1 Corintios capítulo 15 ukanwa uka toqet qhanañchäna. Uka tiempon jakir cristianonakarojja, uka arunakajj wal chʼamañchtʼpachäna. Jiwasarus wal chʼamañchtʼistu, jiwatanakan jaktaniñap walja tiemposa jan ukajj jukʼa tiempokis suyaskstanjja, ukar jukʼamp confiyañatakiw chʼamañchistu.

4. ¿Kunatsa jiwatanakajj cheqapuniw jaktanipjjani sasin confiytanjja?

⁴ Jesusan jaktatapajja, munat familiasasa amigonakasas jaktanipjjaniwa sasin confiyañatakiw yanaptʼistu. Jesusan jaktatapasti, Pablojj “kuna suma yatiyäwinaktï” Corintonkirinakar yatiykäna uka taypinkarakiwa (1 Cor. 15:1, 2). Jupajj akham sänwa: “Cristotejj jan jaktayatäkchïnjja, jumanakan Diosar confiyapjjatamajj inamayakiwa” sasa (1 Cor.  15:17). Ukhamajj Jesusan jaktatapar creyiñajja, jiwatanakajj cheqapuniw jaktanipjjani sasin confiyañatakiw yanaptʼistu.

5, 6. Kuntï 1 Corintios 15:3, 4 texton siski ukajj ¿kunsa uñachtʼayistu?

⁵ Pablojj jaktañ toqet parlañ qalltkäna ukhajja, akanakwa qhanañchäna: 1) ‘Cristojj juchanakas laykuw jiwäna’. 2) “Imantatäjjarakïnwa”. 3) “Jupajj Qellqatanakarjamaw kimsïr urun jaktayatäjjäna” sasa (1 Corintios 15:3, 4 liytʼañataki).

⁶ Jesusan jiwatapasa, imantatäjjatapasa, jaktatapas ¿kunsa uñachtʼayistu? Isaías profetajja, Mesiasajj ‘aka oraqet jikʼinukutäniwa, qhoru jaqenak jakʼaruw imantapjjarakini’ sasaw säna. Ukatjja ‘walja jaqenakan juchanakapwa aparakini’ sasaw sarakïna. ¿Kunjamsa uk luräna? Jaqenak layku jiwasaw uk luräna (Is. 53:8, 9, 12; Mat. 20:28; Rom. 5:8). Jesusan jaktatapajja, juchampit jiwañampit salvatäjjañäniwa munat familiasasa amigonakasas jaktanipjjaniwa sasin confiyañatakiw yanaptʼistu.

7, 8. ¿Kunas Jesusajj cheqapuniw jaktäna sañatakejj yanaptʼistu?

⁷ Jiwatanakajj jaktanipjjaniwa sasin confiyañatakejja, nayraqatajj Jesusan jaktataparojj taqe chuymaw creyiñasa. ¿Kunatsa Jesusarojj cheqapuniw Jehová Diosajj jaktayäna sasin sissna?

⁸ Jesusajj jiwatat jaktjjäna uka qhepatjja, waljaniw jupar uñjapjjäna (1 Cor. 15:5-7). Ukanakat parlkasajja Pablojj Pedrotwa nayraqat ayti. Mä qhawqha discipulonakasa Jesusajj jaktjjasin Pedroruw uñstatayna sasaw qhanañchapjjarakïna (Luc. 24:33, 34). Ukatsti 12 apostolonakaparuw Jesusajj uñstäna. Qhepatsti, “phesqa patakatsa jukʼampi jilatanakaruw uñstäna”, inas Galilean tantachatäsipkchïna, ukajj Mateo 28:16-20 textonwa qhanañchasi. Jesusajj ‘Santiagoruw uñstarakïna’. Jupajj jilapänwa, ukhakamajja janiw Jesusan Mesiasätap creykänti (Juan 7:5). Ukampis jaktatap yatisajja, janiw pächasjjänti. Pablojj 55 mara jakʼanakan uka carta qellqkäna ukhajja, Jesusar jaktat uñjapkäna ukanakatjja waljaniw jakasipkäna. Ukhamajj maynitï Jesusan jaktatapat pächasispänjja, jupanakaruw jisktʼasispäna.

9. Hechos 9:3-5 textorjamajja, ¿kunjamsa apóstol Pablojj Jesusan jaktjjatap qhanañcharakïna?

⁹ Uka qhepatsti, Jesusajj Pabloruw uñstarakïna (1 Cor. 15:8). Pablojj (Saulojj) Damasco markaruw saraskäna, ukapachaw Jesusan arup istʼäna, ukatsti mä visionanwa Jesusarojj alajjpachankaskir uñjarakïna (Hechos 9:3-5 liytʼañataki). Kuntï Pablojj uñjkäna ukajja, Jesusajj cheqapun jaktatapwa uñachtʼayistu (Hech. 26:12-15).

10. Jesusan cheqapun jaktatap creyisajja, ¿kunsa Pablojj luräna?

¹⁰ Yaqhepajja, kuntï Pablojj Jesusan jaktatapat qhanañchkäna ukat janiw pächasipkaspänti, kunattejj Pablojja, nayrajj cristianonakaruw jan waltʼayañatak arknaqerïna. Ukampis Jesusan cheqapun jaktjjatap yatisajja, ukar creyipjjañapatakejj taqe chuymaw mayninakar yatiyäna. Jupajj Jesusan jiwatapata, jaktjjatapat kunatï cheqäki uk yatiyañ laykojj jawqʼjata, carcelan llawintata, qotans jan waltʼäwinakanwa uñjasïna (1 Cor. 15:9-11; 2 Cor. 11:23-27). Niyakejjay Pablojj Jesusan jaktatapar taqe chuyma creychïnjja, uk arjjatañ laykojj vidap aptʼasiñsa janiw ajjsarkänti. Cheqas Jesusan jaktatap qhanañchapki ukarojj taqe chuymaw creysna. Jiwatat jaktañajj cheqapuniw utjani sasajj jukʼampiw ukar creyiraksna.

11. Corinto markankir yaqhep cristianonakajja, ¿kunatsa jaktañ toqet mayj amuyapjjpachäna?

¹¹ Corinto markankir yaqhep cristianonakajja, jaktañ toqet janiw kunatï cheqäki uk amuyapkänti. Yamas yaqhepajja, “janiw jiwatat jaktañajj utjkiti” sasaw sapjjäna (1 Cor. 15:12). ¿Kunatsa ukham sapjjäna? Corinto jakʼankir Atenas markankir yaqhep filosofonakajja, Jesusajj jaktayatawa siski uka yatichäwit larusipjjänwa. Ukaw Corintonkir yaqhep cristianonakarojj amuyunakap mayjtʼaypachäna (Hech. 17:18, 31, 32). Jupanakat yaqhepajj jiwatat jaktañajj janis cheqäkaspa ukham inas amuyapjjchïna. Sañäni, juchararätap laykojj jiwatäpkaspas ukhamwa amuyapjjäna, ukampis cristianöjjapjje ukhajj juchanakapat perdonatäjjasin jiwatats jaktanjjapjjaspa ukhamwa amuyapjjarakïna. Ukham amuyasajja, Diosar confiyapjjatapajj inamayakïnwa. Diosatï Jesusar jan jaktaykchïnjja, janirakiw juchanakapat kutsuyatäpkänti ni perdonatäpkänsa. Jesusajj janiw jaktayatäkänti sapki ukanakajja, janiw jaktayatäñ suyapkaspati (1 Cor. 15:13-19; Heb. 9:12, 14).

12. 1 Pedro 3:18, 22 textorjamajj ¿kunatsa Jesusat nayra jaktirinakampi Jesusan jaktatapampejj jan igualäki?

¹² Pablojj jupa pachpaw ‘Cristojj jiwatanak taypit jaktayatäjjatap’ uñjäna. Jesusan jaktatapajja, jupat nayra jaktayatäpkäna ukanakampejj janiw igualäkänti, jupanakajja wasitampiw qhepat jiwjjapjjäna. Pablojja, “khitinakatï jiwañan iktʼjjapjje ukanakat [Jesusajj] nayrïr achuwa” sasaw säna. ¿Kunjamatsa Jesusajj nayrïr achünjja? Jupaw espíritu cuerponi nayraqat jaktayatäna, alajjpacharus nayraqat sararakïna (1 Cor. 15:20; Hech. 26:23; 1 Pedro 3:18, 22 liytʼañataki).

13. ¿Apóstol Pablojj Adán chachampita Jesusampit kamsänsa?

¹³ ¿Kunjamsa mä sapa jaqen jiwatapajj walja millón jaqenakar jakañ vida churaspa? Pablow uk sum qhanañchäna. Adán chachajj kuntï lurkäna ukajj kunjamansa jaqenakar uñjasiyi, Jesusan jiwatapajj kunsa jikjjatawayaraki ukwa qhanañchäna. Adanatjja akham sänwa: ‘Jiwañajj mä jaqe taypiw utjawayi’ sasa. Adanajj juchachasisaw jiwañar purtʼasiwayi, wawanakaparus jiwañar aptʼawayaraki. Ukatwa kunayman jan walinakan tʼaqestanjja. Ukampis Jehová Diosajj Jesusaru jiwatat jaktayatap laykojja, jutïrin suma bendicionanakwa katoqañäni. Pablojj akham sänwa: “Jiwatat jaktañajj mä jaqe taypirakiw utji [mä arunjja Jesús taypikiw utji]. Kunjamtï taqenis Adán kawsajj jiwarasipkejja, ukhamarakiw taqenis Cristo taypi jaktayatäpjjani” sasa (1 Cor. 15:21, 22).

14. ¿Adán chachajj janiw jiwatat jaktayatäkaniti sasajj kunatsa sissna?

¹⁴ ‘Taqenis Adán kawsaw jiwarasipki’ sasajja, ¿kamsañsa Pablojj munäna? Taqe jaqenakatwa parlaskäna, cheqas Adanan juchachasitap kawsaw taqenis juchanïtanjja jiwaraktansa (Rom. 5:12). Adanajj janiw ‘jaktayatäpkani’ ukanak taypinkkiti. Cristojj janiw jupa layku jiwawaykiti, Adanajj perfectönwa, yatkasinwa Diosar jan istʼkänti. Ukhamajja, “Jaqen Yoqapajj” juzgañatak jutkani ukhajj khitinakarutï ‘cabranakarjam’ uñjkani, mä arunjja Adanajj ‘wiñayatak jiwayata uñjasipkani’ ukanak taypinkarakiniwa (Mat. 25:31-33, 46; Heb. 5:9).

15. ¿Kamsis 1 Corintios 15:22 textojj jiwatat jaktañ toqetjja?

¹⁵ ‘Taqeniw Cristo taypi jaktayatäpjjaniʼ sasaw Pablojj sarakïna (1 Cor. 15:22). Pablon cartapajja, Corinto markankir ajllita  cristianonakatakïnwa, jupanakajj alajjpachar sarañataki jaktayatäpjjañapänwa. Jupanakarojja, ‘Cristo Jesusamp mayakïpjjatap laykuw Diosajj santor tukuyäna’. Ukatsti ‘Criston discipulonakapjam jiwañan iktʼjjapjje ukanakäpjjewa’ sasaw Pablojj ajllitanakat sarakïna (1 Cor. 1:2; 15:18; 2 Cor. 5:17). Yaqha cartapansti, Pablojj akham sarakïnwa: “Kunjamtï [Jesusajj] jiwkäna ukham jiwktan ukhajja, jupampejj mayakïtanwa. Ukhamatarakwa kunjamtï jupajj jaktankäna ukham jaktankañäni ukhajja, jupamp mayakëjjañäni” sasa (Rom. 6:3-5). Jesusajj espíritu cuerponi jaktayatänwa, alajjpacharuw sarjjarakïna. Ukhamajja, ‘Cristomp mayakïpki’ mä arunjja, espíritu santompi ajllitäpki uka cristianonakarojj uka pachpaw pasarakini.

16. Jesusajj “nayrïr achuwa” sasinjja, ¿kamsañsa apóstol Pablojj munäna?

¹⁶ Cristojj “jiwañan iktʼjjapjje ukanakat nayrïr achuwa” sasaw Pablojj säna. Cheqas aka oraqenjja, mä qhawqhanejj jupat nayra jaktayatäpjjänwa, ukanakat maynejj Lázaro chachänwa, ukampis Jesús sapakiw espíritu cuerponi nayraqat jaktayatäna, wiñay jakañsa katoqarakïna. Jesusajja, israelitanakajj nayrïr achunak Jehová Diosarojj churapjjerïkäna ukamp sasïnwa. Ukampis Jesusajj “nayrïr achuwa” sasinjja, ¿kamsañsa Pablojj munäna? Yaqhanakajj alajjpachar sarapjjañapatak jaktayatäpjjarakiniwa sañwa munäna. Sañäni, apostolonakasa, ‘Cristomp mayakïpki’ uka ajllit cristianonakasa, Jesusjamarakiw alajjpachan jakañatak jaktayatäpjjani.

17. ‘Cristomp mayakïpki’ uka ajllitanakajj ¿kunapachas alajjpachar sarañatak jaktayatäpjjañapäna?

¹⁷ Pablojj Corintonkirinakar carta qellqkäna ukhajja, ‘Cristomp mayakïpki’ uka ajllit cristianonakar alajjpachar sarapjjañapatak jaktayañajj janïraw qalltkänti. Pablon arunakaparjamajja, jutïrinwa ukajj phoqasiñapäna. Jupajj akham sänwa: “Sapa mayniw horasapar jaktani: Cristow nayrïr achojja, ukjjarusti khitinakatï Cristonkapki ukanakaw jaktanipjjani, jupajj kuttʼankani uka tiempona” sasa (1 Cor. 15:23; 1 Tes. 4:15, 16). Ukhamajja, apostolonakasa, ajllit yaqha cristianonakasa Jesusajj kuttʼankani uka tiemponwa alajjpachan jakañataki jaktayatäpjjañapäna. Jichhaw uka tiempon jakasktanjja.

18. 1) Ajllitanakajj jaktapkani uka qhepatjja, ¿yaqhanakaw jaktanipjjarakini sasajj kunatsa sissna? 2) Kunjamtï 1 Corintios 15:24-26 texton siskejja ¿alajjpachan kunanakas pasani?

¹⁸ Bibliajja, Pablosa alajjpachar sarañatak  mayni ajllit cristianonakasa ‘jiwatanak taypit nayraqatwa jaktapjjaniʼ siwa (Filip. 3:11). ¿Ukajj kunsa amuyayistu? Qhepat yaqhanakarakiw jiwatat jaktanipjjani ukwa amuyayistu. Job chachajj ukham jaktayatäñwa suytʼarakïna (Job 14:15). Ukhamajj “khitinakatï Cristonkapki” ukanakajja, Jesusajj taqe gobiernonakaru, taqe munañaninakaru tukjkani ukhajj taqpachaniw Jesusamp chika alajjpachankjjapjjani. “Jiwañasa, mä arunjja qhepïri enemigosa” janiw utj-jjaniti. Ajllitanakajj janiw mayampsa jiwjjapjjaniti. Alajjpachar jan sarapkani uka cristianonakampejj ¿kunas pasarakini? (1 Corintios 15:24-26 liytʼañataki).

19. Khitinakatï aka oraqen jakapkani ukanakajj ¿kunsa suytʼasipki?

¹⁹ Aka oraqen jakapkani ukanakajja, ¿kunsa suytʼasipki? Kuntï Pablojj siskäna ukwa suytʼasipki, jupajj akham sänwa: ‘Nayajj Diosar confiyasaw suytʼasktjja, cheqapar sarnaqer jaqenakasa jan cheqapar sarnaqer jaqenakas jaktanipjjaniwa’ sasa (Hech. 24:15). Jan cheqapar sarnaqer jaqenakajj janiw alajjpachar sarapkaspati ukajj qhanawa. Ukhamajja, uka arunakajj jutïrin aka oraqen jakañatak jaktanipkani ukanakatwa parlaski.

20. ¿Kuntï aka yatichäwin yatjjatawayktan ukajj kunjamsa chʼamañchtʼtamjja?

²⁰ Jiwatanakajj “jaktanipjjaniwa” ukat janiw pächasktanti. Aka oraqen jakañataki jaktanirinakajj wiñayatakiw jakapjjani. Ukarojj taqe chuymaw confiysna. Cristompi ajllitanakampejj ‘waranqa maranaka’ reyinakjam apnaqapkani ukhaw munat familiasasa amigonakasas jaktanipjjarakini, ukajj wal chuymachtʼistu (Apoc. 20:6). Jiwasatï jiwañänejja, uka tiemponwa jaktayatarakïñäni, uk ‘suytʼasasti janirakiw chuyma pʼakintat uñjaskañäniti’ (Rom. 5:5). Cheqas ukham suytʼañaw jichha tiempon jan aynachtʼañatak yanaptʼistu, Jehová Diosar jukʼamp kusisita serviñatakis yanaptʼarakistuwa. Akjjar jutki uka yatichäwinjja, 1 Corintios capítulo 15 textot kunanakampsa yateqsna ukwa uñjaskañäni.