1. ¿1 Tesalonicenses 5:1 textorjamajj kuna luräwinsa yanaptʼasktanjja?

 ¿TANTACHASIÑ UTA lurañatakisa jan ukajj askichtʼañatakis congregacionamankirinakajj yanaptʼapjjeriti? Ukhamächi ukhajja, uka Tantachasiñ Utan nayrïr kuti tantachtʼaskta uk amtasiskpachätawa. Jehová Diosarus taqe chuymaw yuspärarakpachayätajja. Wali kusisitätam laykojja, tantachäwi qalltan cantaskäna uka canción janiw sums cantañ puedkpachayätati. Wali suma Tantachasiñ Utanakajj Jehová Diosaruw jachʼañchi. Ukampis ukar jutapki ukanakar chʼamañchtʼtan ukhaw jukʼampejj Jehová Diosar jachʼañchtanjja. Apóstol Pablojj 1 Tesalonicenses 5:11 (liytʼäta) textonkir arunak qellqkasajj uka toqetwa lupʼiskäna. Aka yatichäwejj uka textot apstʼatawa.

2. ¿Kunanakatsa aka yatichäwin yatjjataskañäni?

² Jilat kullakanakar chʼamañchtʼañatakejja, apóstol Pablotwa yateqtʼassna. Jupajj kunjamas mayninakajj jikjjatasipjje uk wali sum amuyäna. Aka yatichäwinjja, kunjamsa apóstol Pablojj cristiano jilat kullakanakaparojj jan walinakan aguantapjjañapatakisa, mayninakamp sumankapjjañapatakisa, Jehová Diosar confiyapjjañapatakis yanaptʼäna ukwa uñjaskañäni. Kunjamsa Pablot yateqassna uk jichhajj uñjañäni (1 Cor. 11:1).

3. ¿Qollqe toqetsa Diosar serviñatsa kunjamsa apóstol Pablojj amuyäna?

³ Pablojj jilat kullakanakar wal munasïna. Niyakejjay jupajj kunayman jan walinakan uñjasiwaychïnjja, jan walinakan uñjasipkäna ukanakat khuyaptʼayasispänwa, sinttʼasirakispänwa. Mä kutejja, jan qollqen uñjasisajj trabajiñapänwa, ukhamat kunanakatï jupatakisa jupamp chik sarapkäna ukanakatakis munaskäna ukanak jikjjatañataki (Hech. 20:34). Pablojj carpanak lurasaw trabajïna, Corinto markar purisajja, Aquilampi  Priscilampiw carpanak luras trabajïna. Ukampis “sapa sábado urunwa” judionakarus griegonakarus predikirïna. Kunapachatï Silasampi Timoteompejj purinipkäna ukhajja, ‘Pablojj jan tiemponiw Diosan arunakap yatiyañar’ uchasjjäna (Hech. 18:2-5). Pablotakejj Jehová Diosar serviñaw nayrankäna, uk janipuniw armkänti. Jupajj predicañan wal trabajtʼäna, kunanakatï jakañatak wakiski ukanak jikjjatañatakis wal trabajtʼarakïna. Ukatwa jilat kullakanakar chʼamañchtʼañ puedïna. Jan walinakan uñjaskasasa, familiar mantiniñat llakiskasas janipun kunatï jukʼamp importantëki uk jaytapjjañapataki, mä arunjja Diosar adorañ jan jaytapjjañapatakiw ewjjtʼäna (Filip. 1:10).

4. Arknaqat uñjasipkäna uka jilat kullakanakan aguantapjjañapatakejja, ¿kunjamsa Pablompi Timoteompejj yanaptʼapjjäna?

⁴ Tesalónica congregacionajj uttʼayaskäna ukat mä jukʼa tiempotjja, machaq cristianonakajj sinti jan waltʼayataw uñjasipjjäna. Tantachtʼat jan wali jaqenakajja, Pablompir Silasampir jan jikjjatasajj “mä qhawqha jilatanakaruw marka apnaqerinakan ukar qatatipjjäna”. Akham sasaw arnaqasipjjarakïna: “Aka jaqenakajj Cesaran leyinakap con[traw] saytʼasipjje” sasa (Hech. 17:6, 7). Markankirinakajj jupanak contra saytʼasipkäna ukhajja, uka machaq cristianonakajj wal sustjasipjjpachäna. Ukhaman uñjasisajj inas jupanakajj Diosar jan taqe chuyma sirvjjapjjchispänti. Ukampis Pablojj janiw uk pasañap munkänti. Jupampi Silasampejj sarjjapjjchïnsa, machaq congregacionajj suma uñjatäñapatakiw encargasipjjäna. Uka qhepatjja, Tesalónica congregacionankir jilat kullakanakarojj akham sasaw Pablojj amtayäna: ‘Timoteo jilatasarus khitanipjjaraksmawa. Jupaw Diosar confiyañan suma saytʼatäpjjañamatakisa chuymachtʼatäpjjañamatakis yanaptʼapjjätam, ukhamat uka tʼaqesiñanakan jan khitisa aynachtʼañapataki’ sasa (1 Tes. 3:2, 3). Timoteojj inas Listra markan jakkasin arknaqat uñjaschïna. Kunjamsa Pablojj uka markankir jilat kullakanakar chʼamañchtʼäna, kunjamsa Diosajj jupanakar yanaptʼäna uk jupajj uñjänwa. Ukhamajja uka machaq jilat kullakanakarojj taqe kunas walikïskaniwa sasaw chʼamañchtʼaspäna (Hech. 14:8, 19-22; Heb. 12:2).

5. ¿Kunjamsa mä anciano jilatan yanaptʼapajj Bryant sat jilatar yanaptʼäna?

⁵ ¿Jilat kullakanakar chʼamañchtʼañatakejj kunampsa Pablojj luräna? Jupampi Bernabeampejj Listra, Iconio, Antioquía markanakar kuttʼapjjäna ukhajja, “sapa congregacionanwa ancianonak uttʼayapjjäna” (Hech. 14:21-23). Uka machaq ancianonakajja, jichha tiempon serviri ancianonakjamarakiw congregacionankirinakar wal chʼamañchtʼapjjpachäna. Bryant sat mä jilatajj akham siwa: “15 maranïkayäta ukhaw papitujajj utat sarjjäna, mamitajajj congregacionat jaqsutarakïnwa. Jaytanukuta, aynachtʼata ukhamaw jikjjatasiyäta” sasa. ¿Ukhaman uñjaskäna ukhajj kunas jupar yanaptʼäna? Jilatajj saskakiwa: “Tony sat mä ancianow tantachäwinakansa yaqha horasanakans nayamp parlirïna. Jan walinakan uñjaskasas kusisitäpkäna uka jilat kullakanakan experiencianakapwa cuenttʼirïtu. Salmo 27:10 qellqatwa liytʼarapirïtu, walja kutiw Ezequiasat parlarakirïtu, tatapajj janis yateqaskay sarnaqkchïnjja, jan jitheqtasaw Diosar servïna” sasa. ¿Kunjamsa ukajj Bryant jilatar yanaptʼäna? Jupajj akham siwa: “Tony jilatan yanaptʼapampejja, mä qhawqha tiempot precursoratwa sirvjjayäta, ukajj wal kusisiyitäna” sasa. Anciano jilatanaka, Bryant jilatjam ‘mä suma arumpi’ chʼamañchtʼatäñ munapki ukanakat llakisipjjam (Prov. 12:25).

6. ¿Nayra tiempon Diosar servipkäna ukanakan sarnaqäwinakapampejj kunjamsa apóstol Pablojj mayninakar chʼamañchtʼäna?

⁶ ‘Jachʼa qenayar uñtat walja testigonakajj’ kunjamsa jan walinakan uñjaskasas Diosan  chʼamapampejj aguantapjjäna ukwa Pablojj jilat kullakanakar amtayäna (Heb. 12:1). Nayra tiempon Diosat jan jitheqtas servipkäna ukanakan sarnaqäwinakapajja, jan ajjsarapjjañapataki, ‘jakkir Diosan markapat’ lupʼipjjañapatakiw jilat kullakanakar yanaptʼaspäna (Heb. 12:22). Ukhamarakiw jiwasarojj yanaptʼistaspa. Kunjamsa Jehová Diosajj Gedeón, Barac, David, Samuel ukat yaqha servirinakapar yanaptʼäna uk liytʼasajj wali chʼamañchtʼataw jikjjatastanjja (Heb. 11:32-35). Jichha tiempon Jehová Diosar confiyiri jilat kullakanakasan experiencianakap liytʼasajj ukhamarakiw jikjjatastanjja. Central mundialanjja, jilat kullakanakan walja cartanakapaw katoqasi. Ukanakanjja, Diosat jan jitheqtir jilat kullakanakan sarnaqäwinakap liytʼasajj wali chʼamañchtʼataw jikjjatasipjjta sasaw jilat kullakanakajj sapjje.

7. ¿Kuntï apóstol Pablojj Romanos 14:19-21 texton ewjjtʼkäna ukajj kunsa yatichistu?

⁷ Congregacionan sumankañ utjañapatak yanaptʼasaw jilat kullakanakar chʼamañchtʼaraktanjja. Janis taqenis mä pachpa amuykstanjja, janiw congregacionan tʼaqa tʼaq sarnaqañasäkiti. Biblian mä wiñay yatichäwipatï jan pʼakintaskchejja, janiw munañasarjampun kun lurasiñaps munañasäkiti. Kunas Roma markankir congregacionan pasäna uk uñjañäni. Uka congregacionanjja, judío cristianonakampi yaqha markanakat jutir cristianonakampiw utjäna. Niyakejjay Moisesan Leyipajj chhaqtayatäjjchïnjja, yaqhep manqʼañanak manqʼañajj janiw jarkʼatäjjänti (Mar. 7:19). Yaqhep judío cristianonakajj taqe kasta manqʼañanakwa manqʼasipkäna. Ukampis yaqhep judío cristianonakatakejj janiw ukajj walïkänti, ukaw congregacionarojj tʼaqjtayäna. Apóstol Pablojja sumankañajj kunja wakiskirisa uk qhanstayañatakejj akham sänwa: “Jukʼamp walïspaw aycha jan manqʼañajja, ni vino umañasa jan ukajj yaqhanak lurañasa, jilamatejj ukanak luratamat lanktʼaschi ukhajja” sasa (Romanos 14:19-21 liytʼäta). Uka arunakampejja, kunjamsa manqʼañ toqet chʼajjwañanakajj jupanakarusa, congregacionarus jan waltʼayaspäna uk amuyasipjjañapatakiw jilat kullakanakar yanaptʼäna, mayninakar jan lanktʼasiyañatakejja, jupa pachpas cambiañatakejj dispuestokïnwa (1 Cor. 9:19-22). Kuntï jiwasajj munktan, kuntï mayninakajj munapkaraki uka toqet jan chʼajjwkañäni ukhajja, Pabljamarakiw mayninakar chʼamañchtʼañäni, sumankañ utjañapatakis yanaptʼarakiñäni.

8. ¿Kunatï congregacionan sumankañap jan waltʼaykäna uk askichañatakejj kunsa apóstol Pablojj luräna?

⁸ ¿Kunanakatï wali importantëki ukanakat jan mä pachpa amuykstan ukhajj kunsa lursna? Sumankañ utjaskakiñapatakejj Pablotwa yateqassna. Nayrïr patak maranakan utjkäna uka congregacionanjja, jan judiöpki uka chachanakajj circuncidasipjjañapawa sasaw yaqhepajj sapjjäna. Inas yaqhanakamp jan parlayasiñatak ukham sapjjchïna (Gál. 6:12). Pablojj janiw jupanakjam amuykänti, ukampis janiw munañaparjamak lurasiñap munkänti. Ukatwa Jerusalenankir apostolonakampiru ancianonakampir uka toqet humilde chuymampi yatiyäna (Hech. 15:1, 2). Ukham lurasajj congregacionan sumankaña, kusisiña utjaskakiñapatakiw yanaptʼäna (Hech. 15:30, 31).

9. ¿Kunsa apóstol Pablot yateqasiñatakejj lursna?

⁹ Maynimp jan waltʼayasiñäni ukhajja, congregacionar cuidañatak Diosajj uttʼayki uka jilatanakan yanaptʼapwa thaqañasa, ukhamat sumankañajj utjaskakiñapataki. Qellqatanakasa, Diosan markapajj churkistu uka instruccionanakas Bibliarjamawa, ukaw jakäwisan yanaptʼistu. Jiwasatï munañasarjam lurañat sipans uka instruccionanakarjam lurañäni ukhajja, congregacionan sumankañaw utjani.

10. ¿Kunjamsa apóstol Pablojj congregacionan sumankañ utjañapatakejj yanaptʼarakïna?

 ¹⁰ Jilat kullakanakan pantjasitanakap uñchʼukiñat sipansa, kunjam suma chuymanïpjjesa uk uñjañatakiw Pablojj chʼamachasïna, ukhamatwa sumankañ utjañapatak chʼamañchtʼäna. Romanonakar apaykäna uka carta janïr tukuykasajja, walja jilat kullakanakaruw sutinakapat aytäna. Jupanakat wali sum parläna, jan ukajj suma luratanakapatwa qellqarakïna. Pablot yateqasisajj ukhamarakiw jiwasajj jilat kullakanakajj kunjam suma chuymanïpjjesa uk qhan sañasa. Ukhamatwa jupanakkam jukʼamp munasipjjañapatakisa, suma amigöpjjañapatakis yanaptʼañäni.

11. ¿Jan waltʼayasiñanakajj utjani ukhajj kunjamsa sumankañ utjañapatakejj yanaptʼsna?

¹¹ Awisajja wali experiencian cristianonakas jan waltʼayasipjjarakispawa, jan ukajj yaqhanakampis toqesipjjarakispawa. Ukaw Pablompiru Bernabé amigopampirojj pasäna. Misionerot wasitat viajiñatakejj Marcosarojj irpañäniti janicha sasaw toqesipjjäna. Ukat ¿kunas pasäna? ‘Wal colertʼasisajj toqentasipjjänwa’, ukat tʼaqjtapjjarakïnwa (Hech. 15:37-39). Ukampis Pablompi Bernabeampi Marcosampejj uka jan waltʼäwip askichjjapjjänwa. Ukhamatwa congregacionan sumankañas mayachtʼatäñas kunja wakiskirisa uk uñachtʼayapjjäna. Mä qhawqha tiempotjja, Pablojj wali sumwa Bernabeatsa Marcosatsa parläna (1 Cor. 9:6; Col. 4:10). Congregacionan yaqhanakamp jan waltʼayasisajj ukhamarakiw ukanak askichañasa. Jilat kullakanakasajj kunja suma chuymanïpjjesa uk uñjañatakiw chʼamachasiñasaraki. Ukhamatwa congregacionan sumankañ utjañapatakisa mayachtʼatäñapatakis yanaptʼañäni (Efes. 4:3).

12. ¿Kunjamanakansa jilat kullakanakajj uñjasipjje?

¹² Jehová Diosar jukʼamp confiyapjjañapatak yanaptʼasaw jilat kullakanakar chʼamañchtʼaraktanjja. Yaqhepanakajja jan Testigöpki uka familiaranakapana, trabaj compañeronakapana, jan ukajj escuel masinakapan jiskʼachataw uñjasipjje, ukwa jupanakajj aguantapjjañapa. Yaqhepajj wali usutäpjjewa, yaqhepasti chuyma pʼakintat uñjasisajj ukar saykatañatakiw chʼamachasisipkaraki. Yaqhepanakajj walja maranakaw bautisatäjjapjje, akapachan tukusiñapsa suyasipkakiwa. Taqe ukhamanakan uñjasisajja, mä cristianon Diosar confiyatapajj yantʼataw uñjasispa. Nayrïr cristianonakajj niya ukhamanakanwa uñjasipjjarakïna. ¿Kunsa apóstol Pablojj jupanakar chʼamañchtʼañatakejj luräna?

13. ¿Cristianöpjjatap layku jiskʼachat uñjasipkäna ukanakarojj kunjamsa apóstol Pablojj yanaptʼäna?

¹³ Pablojj Qellqatanakampiw Diosar jukʼamp confiyapjjañapatak jilat kullakanakar yanaptʼäna. Cristianonakat sipans judionakan religionapaw nayranki sasin familiaranakapajj judío cristianonakar sapkäna ukhajja, jupanakajj janiw kamsañs puedipkpachänti. Pablojj hebreo cristianonakar carta qellqkäna ukajj walpun jupanakar chʼamañchtʼpachäna (Heb. 1:5, 6; 2:2, 3; 9:24, 25). Uka cristianonakarojja, kuntï Pablojj amuytʼaykäna ukaw jan cristianöpkäna uka familiaranakapar kun sañatakis yanaptʼaspäna. ¿Mayninakamp jiskʼachat uñjasipki uka jilat kullakanakar kunjamsa yanaptʼsna? Kunanakarutï creyipki ukar arjjatapjjañapatakejj Bibliat apstʼat qellqatanakamp sum qhanañchtʼapjjañapatakiw yatichsna. ¿Es la vida obra de un Creador? ukat El origen de la vida. Cinco cuestiones dignas de análisis sat folletonakampiw cristiano wayn tawaqonakar yanaptʼsna, ukhamat kunatsa Diosaw taqe kunsa luri sasin creyipjje uk sum qhanañchtʼapjjañapataki.

14. Predicasasa yatichasas wali ocupatäkchïnsa, ¿kunsa apóstol Pablojj luräna?

¹⁴ Pablojj ‘suma luräwinak’ lurasa munasiñ  uñachtʼayapjjañapatakiw jilat kullakanakar chʼamañchtʼäna (Heb. 10:24). Jupajj janiw arunakampik cristianonakar yanaptʼkänti, jan ukasti luratanakapampiw yanaptʼarakïna. Judea markankir cristianonakajj jan manqʼañanakani uñjasipjjäna ukhajja, apóstol Pablow yanaptʼanak apäna (Hech. 11:27-30). Jupajj predicasasa yatichasas wali ocupatäkchïnsa, pisin jakasir cristianonakarojj kunjamats yanaptʼapunirïnwa (Gál. 2:10). Ukham luratapajja, Diosaw cuidaskistani sasin jukʼamp confiyapjjañapatakiw jilat kullakanakar yanaptʼäna. Jichha tiemponjja, labores de socorro ukan yanaptʼañatakejj tiempwa apstʼastanjja, chʼamasampisa, kunanaktï lurañ yatktan ukampis ukan yanaptʼaraktanwa. Obra mundial ukar donacionanak churasas yanaptʼaraktanwa. Ukhamanak lurasaw jilat kullakanakarojj Diosar jukʼamp confiyapjjañapatak yanaptʼtanjja. Ukanak lurasa ukat yaqha ukhamanak lurasaw “Jehová Diosajj janipuniw apanukkistaniti” sasin confiyapjjañapatak yanaptʼtanjja.

15, 16. ¿Diosar serviñan aynachtʼatäpki uka jilat kullakanakar kunjamsa yanaptʼsna?

¹⁵ Diosar serviñan aynachtʼatäpkäna ukanakar Pablojj yanaptʼaskakïnwa. Apóstol Pablojj jupanakat sinttʼasïnwa, chʼamañchtʼkir arunakampi munasiñampiw parlarakïna (Heb. 6:9; 10:39). Hebreonakar qellqkäna uka cartapanjja, “jupanaka” sañat sipans “jiwasanaka” sasaw walja kuti säna, ukhamatwa jupa pachpas ewjjtʼanakaparjam lurañapätap uñachtʼayäna (Heb. 2:1, 3). Apóstol Pabljamarakiw Diosar serviñan aynachtʼatäpki ukanakar jiwasajj yanaptʼtanjja, jupanakat llakisisaw chʼamañchtʼtanjja, ukhamatwa jupanakar munasitas uñachtʼaytanjja. Uka jilat kullakanakar kamsañänisa ukajj wali wakiskiriwa, ukampis munasiñampi parltʼañajj wali wakiskirirakiwa.

¹⁶ Apóstol Pablojja, Jehová Diosajj janiw suma luratanakamat armaskiti sasaw jilat kullakanakar  säna (Heb. 10:32-34). Diosar serviñan aynachtʼatäki uka jilataru jan ukajj uka kullakar yanaptʼañatakejja, apóstol Pabljamarakiw lursna. ¿Kunjamsa Jehová Diosar uñtʼawayta, kunjamsa Jehová Diosajj yanaptʼawaytam? sasaw jisktʼsna. Jupamp parlkañäni ukhajja, kunanaktï Diosar munasitamat lurawaykta ukanak janiw jupajj armaskiti, jutïrins janiw apanukkätamti sasaw chʼamañchtʼsna (Heb. 6:10; 13:5, 6). Ukham parltʼañaw Jehová Diosar serviñ munasipkakiñapatak jilat kullakanakasar yanaptʼaspa.

17. ¿Kunjamsa mayninakar jukʼamp sum chʼamañchtʼsna?

¹⁷ Utanak lurir mä jaqejja, tiempompejj jukʼamp sum lurañwa yatjje. Jiwasajj ukhamarakiw mayninakar jukʼamp sum chʼamañchtʼañ yateqsna. Jan walinakan uñjasipki uka jilat kullakanakar chʼamañchtʼañatakejja, kunjamsa Diosan servirinakapajj jan walinakan uñjasisajj aguantawayapjje ukwa jupanakar parltʼsna. Sumankañ utjañapatakejja, mayninakan suma luratanakapat parlapjjañäni. Sumankañ jan aptʼasipjjañäniti, mayninakamp jan waltʼayasiñäni ukhas jankʼak askichapjjañäni. Biblian cheqa yatichäwinakapat jilat kullakanakar parlaskakiñäni, yanaptʼa munapkani ukhas yanaptʼaskakiñäni. Diosar serviñan aynachtʼatanakarus yanaptʼaskakiñäni, ukhamatwa Diosar jukʼamp confiyapjjañapatak yanaptʼaskakiñäni.

18. ¿Kun lurañatakis chʼamachasïta?

¹⁸ Jehová Diosar adorañatak utanak lurañan yanaptʼirinakajja, chuymas chuyma ukat kusisitaw jikjjatasipjje. Diosar jukʼamp confiyapjjañapatak jilat kullakanakasar yanaptʼtan ukhajja, jiwasajj ukhamarakiw jikjjatassna. Utanakajj tiempompejj tukusjjakiwa, ukampis mayninakar chʼamañchtʼktan ukajj wiñayatakïspawa. Ukhamasti kuntï 1 Tesalonicenses 5:11 texton siski ukarjam lurañatak chʼamachasiskakiñäni, ukan akham siwa: “Jumanakajj maynit maynikam chʼamañchtʼasisipkakim, maynit maynikamas yanaptʼasisipkakim” sasa.